٩٨
١ أَزهِّيذْ.
غنّْجمْ إِ سِيذِي إِجّْ ن يزْڒِي ن جْذِيذْ،
مَاغَارْ نتَّا إِڭَّا لْمُوعْجِيزَاثْ.
أَفُوسْ نّسْ أَفُوسِي ذ ؤُغِيڒْ نّسْ إِقدّْسنْ
سّْنجْمنْ ث.
٢ سِيذِي إِسّْشنْ أَسنْجمْ نّسْ،
إِسَّارْڭبْ ثَاسڭْذَا نّسْ
زَّاثْ إِ ثِيطَّاوِينْ ن ڒڭْنُوسْ.
٣ نتَّا إِعْقڒْ خْ ثْمخْسِيوْثْ نّسْ إِشوَّارنْ،
خْ ڒَْامَانْ نّسْ إِ ثَادَّارْثْ ن إِسْرَائِيل.
مَارَّا ثِينڭُّورَا ن ثمُّورْثْ ژْرِينْثْ أَسنْجمْ
س ؤُفُوسْ ن ن أَربِّي نّغْ.
٤ ذُوقّْزمْ س ؤُسْڒِيوْڒوْ إِ سِيذِي،
مَارَّا ثَامُّورْثْ،
سْغُويّمْ، سْڒِيوڒْومْ، زهّْذمْ.
٥ زهّْذمْ إِ سِيذِي س ڒْْڭَامْبْرِي،
س ڒْْڭَامْبْرِي ؤُ س ثْمِيجَّا ن يزْڒِي،
٦ س ڒبْوَاقْ ذ ڒْْحسّْ ن ؤُسُوضِي
ذڭْ ؤُيِيشّْ ن إِشَارِّي.
ذُوقّْزمْ س ؤُسْڒِيوْڒوْ
زَّاثْ إِ وُوذمْ ن ؤُجدْجِيذْ، سِيذِي.
٧ أجّْ أَذْ إِزْهَارْ ڒبْحَارْ
ذ مَارَّا أَعمَّارْ نّسْ،
دُّونشْثْ ذ يِينِّي ذَايسْ إِزدّْغنْ.
٨ أجّْ إِغزْرَانْ أَذْ وْثنْ شَامْخَا س إِفَاسّنْ،
إِذُورَارْ أَذْ سّْڒِيوْڒونْ جْمِيعْ
٩ زَّاثْ إِ وُوذمْ ن سِيذِي،
مَاغَارْ نتَّا أَذْ د-يَاسْ
حِيمَا أَذْ إِحْكمْ ثَامُّورْثْ.
نتَّا أَذْ إِحْكمْ ثَامُّورْثْ س ثْسڭْذَا،
ڒڭْنُوسْ س ڒْْحقّْ.