110
1 أَزهّذْ ن ذَاوُوذْ.
سِيذِي إِسَّاوَاڒْ أَكْ-ذ سِيذِي إِنُو:
قِيمْ غَارْ ؤُفُوسْ أَفُوسِي إِنُو،
أَڒْ د-سَّارْسغْ ڒْعذْيَانْ نّشْ
ذ ثَانبْذَاثْ سَاذُو إِضَارنْ نّشْ. ◘110:1 مت. 22:42-45؛ مك. 12:36؛ لك. 20:41-44؛ ڒخ. 2:34-36؛ عبر. 1:13، 6:20؛ 10:13؛ 1 كُور. 15:25-28؛ أَفا. 1:22
2 سِيذِي أَذْ إِسّكّْ أَزدْجَاضْ ن صُّولْطَا نّشْ
زِي صِيهْيُونْ،
شكْ أَذْ ثْصلّْطذْ ذِي ڒْوسْطْ ن ڒْعذْيَانْ نّشْ.
3 ڒْڭنْسْ نّشْ أَذْ يِيڒِي ذ أَمْسعَّافْ
ذڭْ وَاسّْ ن صُّولْطَا نّشْ،
أَذْ د-يَاسْ ذِي ثِيسِّيقْثْ إِقدّْسنْ
زِي ڒمْڒَاوْڒثْ ن ثُوفُّوثْ،
أَمُّو إِ غَا يِيڒِي إِ شكْ نّْذَا
ن يِينِّي عَاذْ مَامّشْ
ذ أَشْ د-إِتّْوَاخڒْقنْ.
4 سِيذِي إِجِّيدْجْ،عمَّارْصْ أَذْ خَاسْ إِنْذمْ:
”شكْ ذ أَكهَّانْ إِ ڒبْذَا،
عْلَاحْسَابْ صِّيفثْ ن مَالْكِيصَاذِيقْ!“،
إِخْسْ أَذْ يِينِي ’أَجدْجِيذْ ذ أَمْسڭّذْ‘. ◘110:4 عبر. 4:14-15؛ 5:6، 9-10؛ 6:20؛ 7:15-26؛ 8:1؛ 10:21
5 سِيذِي أَقَا-ث غَارْ ؤُفُوسْ أَفُوسِي نّشْ.
نتَّا أَذْ إِڒْبزْ إِجدْجِيذنْ
ذڭْ وَاسّْ ن وغْضَابْ نّسْ.
6 نتَّا أَذْ إِحَاكمْ خْ ڒڭْنُوسْ،
أَقَا ذَا ثَامُّورْثْ ثشُّورْ س ڒْخشْبَاثْ،
أَذْ إِڒْبزْ أَزدْجِيفْ
خْ إِشْثْ ن ثمُّورْثْ ثَامقّْرَانْثْ. ◘110:6 أَسَا. 14:14-20؛ 16:14-16؛ 20:8-10
7 أَكْ-ذ وبْرِيذْ أَذْ إِسُو زِي ثغْزَارْثْ،
خْ ؤُيَا أَذْ إِسّْڭعّذْ أَزدْجِيفْ نّسْ.