١١٨
١ غَارْ بدُّو ...
قَاذَامْ سِيذِي،
مَاغَارْ نتَّا ذ أَصبْحَانْ،
مَاغَارْ ثَامخْسِيوْثْ نّسْ إِشوَّارنْ
ثتّْغِيمَا إِ ڒبْذَا.
٢ أجّْ إِسْرَائِيل أَذْ يِينِي:
”ثَامخْسِيوْثْ نّسْ إِشوَّارنْ
ثتّْغِيمَا إِ ڒبْذَا.“
٣ أجّْ ثَادَّارْثْ ن هَارُونْ أَذْ ثِينِي
”ثَامخْسِيوْثْ نّسْ إِشوَّارنْ
ثتّْغِيمَا إِ ڒبْذَا.“
٤ أجّْ إِنِّي إِتّڭّْوذنْ سِيذِي أَذْ إِنِينْ:
”ثَامخْسِيوْثْ نّسْ إِشوَّارنْ
ثتّْغِيمَا إِ ڒبْذَا.“
٥ ذڭْ وبْرِيذْ ...
ذِي ڒحْصَارثْ ڒَْاغِيغْ غَارْ سِيذِي.
سِيذِي يَارَّا-د خَافِي، إِوْشَا أَيِي تَّاسِيعْ.
٦ سِيذِي أَقَا-ث أَكِيذِي، وَارْ تّڭّْوذغْ شَا،
مَاغَارْ مِينْ إِزمَّارْ بْنَاذمْ
أَذْ أَيِي إِڭّْ؟ ◘118:6 رُوم. 8:31؛ عبر. 13:6
٧ سِيذِي أَقَا-ث أَكِيذِي
جَارْ يِينِّي ذ أَيِي إِوْشِينْ أَفُوسْ.
نشّْ أَذْ خزَّارغْ غَارْ سْوَادَّايْ
خْ يِينِّي ذ أَيِي إِشَارّْهنْ.
٨ إِحْڒَا أَذْ أَروْڒغْ غَارْ سِيذِي
خْ ؤُثشْڒِي خْ بْنَاذمْ. ◘118:8 إِزهد. 62:9، 10؛ 146:3؛ إِرْم. 17:5، 7
٩ إِحْڒَا أَذْ أَروْڒغْ غَارْ سِيذِي
خْ ؤُثشْڒِي خْ ثَارْوَا ن ثَاصِيڒثْ.
١٠ مَارَّا ڒڭْنُوسْ نّْضنْ أَيِي-د،
نشّْغضْڒغْ ثنْ س يِيسمْ ن سِيذِي.
١١ نّْضنْ أَيِي-د، وَاهْ، قُووَّارنْ أَيِي.
نشّْغضْڒغْ ثنْ س يِيسمْ ن سِيذِي.
١٢ نِيثْنِي نّْضنْ أَيِي أَمْ ثْزِيزْوَا،
أَقَا أَمْ ثْمسِّي ن إِسنَّاننْ خسْينْ.
نشّْغضْڒغْ ثنْ س يِيسمْ ن سِيذِي.
١٣ شكْ ثْعَارْنذْ أَيِي س ڒقْسَاحثْ
أَڒَامِي عْڒَاحَاڒْ وْضِيغْ،
مَاشَا سِيذِي إِوْشَا أَيِي أَفُوسْ.
١٤ سِيذِي ذ جّهْذْ إِنُو ذ أَزهّذْ إِنُو،
نتَّا إِذْوڒْ أَيِي ذ أَسنْجمْ.
١٥ ذڭْ إِقِيضَانْ ن إِمْسڭَّاذنْ إِتّْوَاسڒْ
ڒْْحسّْ ن ؤُسْڒِيوْڒوْ ذ ؤُسنْجمْ.
أَفُوسْ أَفُوسِي ن سِيذِي إِڭَّا س جّهْذْ.
١٦ أَفُوسْ أَفُوسِي ن سِيذِي إِتّْوَاسّْڭعّذْ،
أَفُوسْ أَفُوسِي ن سِيذِي إِڭَّا س ومْحَاضْ. ◘118:16 لك. 1:51
١٧ نشّْ وَارْ تّْمتِّيغْ شَا، أَذْ دَّارغْ،
أَذْ بَارّْحغْ ثِيمڭَّا ن سِيذِي.
١٨ سِيذِي إِوبّخْ أَيِي أَطَّاسْ،
مَاشَا وَارْ ذ أَيِي إِوْشِي إِ ڒْْموْثْ.
١٩ غَارْ وَاذَافْ ...
أَرْزْممْ أَيِي ثِيوُّورَا ن ثْسڭْذَا،
أَذْ زَّايْسنْثْ أَذْفغْ، أَذْ قَاذِيغْ سِيذِي. ◘118:19 إِشا. 26:2
٢٠ إِنِّي يَارحّْبنْ زڭْ يِينِّي إِتَّاذْفنْ قَّارنْ ...
ثَا ذ ثَاوَّارْثْ ن سِيذِي،
إِمْسڭَّاذنْ أَذْ زَّايسْ أَذْفنْ.
٢١ نشّْ أَذْ أَشْ قَاذِيغْ ؤُمِي ذ أَيِي ثسْڒِيذْ،
ثْذوْڒذْ أَيِي ذ أَسنْجمْ.
٢٢ أَژْرُو إِ وَارْ خْسنْ إِبنَّاينْ،
إِذْوڒْ ذ إِخفْ ن ثغْمَارْثْ. ◘118:22 إِشا. 8:14؛ 28:16؛ مت. 21:42؛ مك. 12:10؛ لك. 20:17؛ ڒخ. 4:11؛ رُوم. 9:33؛ أَفا. 2:20؛ 1 بُط. 2:4، 7
٢٣ وَا يُوسَا-د زِي سِيذِي
ؤُ مَانْ أَيَا ذ ڒعْجبْ ذِي ثِيطَّاوِينْ نّغْ.
٢٤ وَا ذ أَسّْ إِ إِڭَّا سِيذِي،
أجّْ أَنغْ أَذْ نَارْشقْ ؤُ أَذْ ذَايسْ نْفَارْحْ.
٢٥ أَ سِيذِي، أَوِي-د أَسنْجمْ،
أَ سِيذِي، أَوِي-د أَفْڒَاحْ.
٢٦ لْبَارَاكَا إِ ونِّي د غَا يَاسنْ
س يِيسمْ ن سِيذِي!
نشِّينْ أَذْ كنِّيوْ نْبَاركْ
زِي ثَادَّارْثْ ن سِيذِي. ◘118:26 مت. 21:9؛ مت. 23:39؛ مك. 11:9، 10؛ لك. 19:38؛ يُوح. 12:13
٢٧ أَربِّي ذ سِيذِي نِّي ذ أَنغْ إِڭِّينْ ثَافَاوْثْ.
قْنمْ ثَاغَارْصْثْ ن ڒْْعِيذْ س إِسغْوَانْ
غَارْ وَاشَّاونْ ن ؤُعَالْطَارْ،
ڒْْمذْبحْ ن وشْمَاضْ.
٢٨ إِنِّي إِتَّاذْفنْ قَّارنْ ...
شكْ ذ أَربِّي إِنُو، س ؤُيَا أَذْ شكْ قَاذِيغْ،
أَ أَربِّي إِنُو، أَذْ شكْ سّْعُودْجغْ.
٢٩ مَارَّا جْمِيعْ ...
قَاذَامْ سِيذِي، مَاغَارْ نتَّا إِصْبحْ،
مَاغَارْ ثَامخْسِيوْثْ نّسْ إِشوَّارنْ
ثتّْغِيمَا إِ ڒبْذَا.
◘١١٨:٦ 118:6 رُوم. 8:31؛ عبر. 13:6
◘١١٨:٨ 118:8 إِزهد. 62:9، 10؛ 146:3؛ إِرْم. 17:5، 7
◘١١٨:١٦ 118:16 لك. 1:51
◘١١٨:١٩ 118:19 إِشا. 26:2
◘١١٨:٢٢ 118:22 إِشا. 8:14؛ 28:16؛ مت. 21:42؛ مك. 12:10؛ لك. 20:17؛ ڒخ. 4:11؛ رُوم. 9:33؛ أَفا. 2:20؛ 1 بُط. 2:4، 7
◘١١٨:٢٦ 118:26 مت. 21:9؛ مت. 23:39؛ مك. 11:9، 10؛ لك. 19:38؛ يُوح. 12:13