135
1 هَالِّيلُو-يَاهْ!
صبّْحمْ إِسمْ ن سِيذِي،
صبّْحمْ خَاسْ، أَ إِمْسخَّارنْ ن سِيذِي،
2 كنِّيوْ إِنِّي إِبدّنْ ذِي ثَادَّارْثْ ن سِيذِي،
ذِي ڒمْرَاحَاثْ ن ثَادَّارْثْ ن أَربِّي نّغْ.
3 هَالِّيلُو-يَاهْ، مَاغَارْ سِيذِي إِصْبحْ،
زهّْذمْ إِ يِيسمْ نّسْ،
مَاغَارْ نتَّا ذ ڒضْرَافثْ.
4 مَاغَارْ سِيذِي إِفَارْزْ يَاعْقُوبْ إِ يِيخفْ نّسْ،
إِسْرَائِيل ذ أَڭْڒَا نّسْ. ◘135:4 ؤُف. 19:5؛ أَعَوذ. 7:6؛ ثِيث. 2:14؛ 1 بُط. 2:9
5 مَاغَارْ نشّْ سّْنغْ أَقَا سِيذِي ذ أَمقّْرَانْ،
سِيذِيثْنغْ ذ أَمقّْرَانْ خْ مَارَّا إِربِّيثنْ.
6 مَارَّا مِينْ ذ أَسْ إِتّعْجِيبنْ إِ سِيذِي، إِڭَّا إِ-ث،
ذڭْ إِجنْوَانْ ؤُ خْ ثمُّورْثْ،
ذِي ڒبْحُورْ ؤُ ذڭْ وَامَانْ إِهوْڒنْ مَارَّا.
7 نتَّا إِسّْڭعّذْ إِسيْنُوثنْ
زِي طّْرُوفَا ن ثمُّورْثْ،
نتَّا إِتّڭّْ أَسَّامنْ أَكْ-ذ ونْژَارْ،
إِتّْڭوَّاذْ أَسمِّيضْ
زِي ڒهْرِيثْ نّسْ غَارْ بَارَّا. ◘135:7 إِرْم. 10:13؛ 51:16
8 نتَّا إِوْثَا إِمنْزَا ن مِيصْرَا،
زڭْ إِوْذَانْ أَڒْ ڒْمَارْ. ◘135:8 ؤُف. 12:12، 29؛ إِزهد. 78:51
9 نتَّا إِسّكّْ ڒعْڒَامَاثْ ذ لْمُوعْجِيزَاثْ
ذِي ڒْوسْطْ نّشْ، أَ مِيصْرَا،
غَارْ فِيرْعُونْ
ؤُ غَارْ مَارَّا إِمْسخَّارنْ نّسْ. ◘135:9 ؤُف. 7، 8، 9، 10، 14
10 نتَّا إِوْثَا أَطَّاسْ ن ڒڭْنُوسْ
ؤُ إِنْغَا إِجدْجِيذنْ إِجهْذنْ. ◘135:10 ياش. 12
11 سِيحُونْ، أَجدْجِيذْ ن إِمُورِييّنْ،
ؤُ عُوجْ، أَجدْجِيذْ ن بَاشَانْ،
ؤُ مَارَّا ثِيڭلْذِيوِينْ ن كنْعَانْ.
12 إِوْشَا أَسنْ ثَامُّورْثْ ذ ثَاسْغَارْثْ،
ذ ثَاسْغَارْثْ إِ إِسْرَائِيل، ڒْڭنْسْ نّسْ. ◘135:12 إِزهد. 78:55
13 أَ سِيذِي، إِسمْ نّشْ إِتّْغِيمَا إِ ڒبْذَا،
أَخَارّصْ ذَايكْ أَذْ يِيڒِي زِي جِّيڒْ أَڒْ جِّيڒْ. ◘135:13 ؤُف. 3:15، إِزهد. 102:13
14 مَاغَارْ سِيذِي أَذْ يَارّْ ثَاسْغَارْثْ
غَارْ ڒْڭنْسْ نّسْ،
نتَّا أَذْ إِحِينّْ خْ إِمْسخَّارنْ نّسْ. ◘135:14 أَعَوذ. 32:36، إِزهد. 90:13
15 ڒخْيَاڒَاثْ نْ لْ-أَصْنَامْ ن ڒڭْنُوسْ
أَقَا أَثنْثْ س نُّوقَارْثْ ذ وُورغْ،
تّْوَاڭّنْثْ س إِفَاسّنْ ن إِوْذَانْ.◘135:15 إِزهد. 115:4
16 نِيثنْثِي غَارْسنْثْ إِجّْ ن ؤُقمُّومْ،
مَاشَا وَارْ سِّيوِيڒنْثْ،
غَارْسنْ ثِيطَّاوِينْ،
مَاشَا وَارْ تّْوِيڒِينْثْ،
17 نِيثنْثِي غَارْسنْ ثِيمزُّوغنْ،
مَاشَا وَارْ تّسْڒِينْثْ،
وَالُو أَسُوضِي ن نّفْسْ
ذڭْ ؤُقمُّونْ نْسنْ.
18 أَذْ ذوْڒنْ إِنِّي ثنْثْ إِڭِّينْ
أَمْ نِيثنْثِي،
مَارَّا وِي خَاسنْثْ إِتّْشَاڒْ.
19 أَ ثَادَّارْثْ ن إِسْرَائِيل، بَارْكمْ سِيذِي،
أَ ثَادَّارْثْ ن هَارُونْ، بَارْكمْ سِيذِي.
20 أَ ثَادَّارْثْ ن لَاوِي، بَارْكمْ سِيذِي!
أجّْ مَارَّا إِنِّي إِتّڭّْوذنْ سِيذِي،
أَذْ بَارْكنْ سِيذِي.
21 أَذْ إِتّْوَابَاركْ سِيذِي زِي صِيهْيُونْ،
نتَّا ذ ونِّي إِزدّْغنْ ذِي ؤُرْشَالِيمْ.
هَالِّيلُو-يَاهْ!
◘135:4 135:4 ؤُف. 19:5؛ أَعَوذ. 7:6؛ ثِيث. 2:14؛ 1 بُط. 2:9
◘135:7 135:7 إِرْم. 10:13؛ 51:16
◘135:8 135:8 ؤُف. 12:12، 29؛ إِزهد. 78:51
◘135:9 135:9 ؤُف. 7، 8، 9، 10، 14
◘135:10 135:10 ياش. 12
◘135:12 135:12 إِزهد. 78:55
◘135:13 135:13 ؤُف. 3:15، إِزهد. 102:13
◘135:14 135:14 أَعَوذ. 32:36، إِزهد. 90:13
◘135:15 135:15 إِزهد. 115:4