١ ؤُشَا ژْرِيغْ غَارْ ؤُفُوسْ أَفُوسِي ن ونِّي إِقِّيمنْ خْ ڒْْعَارْشْ إِجّْ ن وذْلِيسْ إِتّْوَانْضنْ، ثُوغَا خَاسْ ثِيرَا غَارْ ذَاخڒْ ذ بَارَّا، ؤُشَا أَذْلِيسْ ثُوغَا إِتّْوَاشمّعْ س سبْعَا ن إِشمِّيعنْ. ◘5:‏1 حِز. 2‏:‏10. ٢ ؤُشَا ژْرِيغْ إِجّْ ن لْمَالَاكْ إِجْهذْ نّغْنِي، إِتّْڒَاغَا س جّهْذْ:

”مَانْ ونْ إِسْذَاهدْجنْ أَذْ يَارْزمْ

أَذْلِيسْ-أَ إِتّْوَانّْضنْ،

ؤُشَا أَذْ إِكّسْ إِشمِّيعنْ نّسْ؟“

٣ ؤُشَا ؤُڒَا ذ إِجّْ ذڭْ ؤُجنَّا نِيغْ ذِي ثمُّورْثْ نِيغْ سَاذُو ثمُّورْثْ إِزمَّارْ أَذْ يَارْزمْ أَذْلِيسْ-أَ إِتّْوَانّْضنْ ؤُ أَذْ إِكّسْ إِشمِّيعنْ نّسْ، أَذْ ذَايسْ إِخْزَارْ. ◘5:‏3 فِيل. 2‏:‏10؛ أَسَا. 5‏:‏13. ٤ نشّْ رُوغْ أَطَّاسْ ؤُمِي وَارْ ؤُفِينْ وِي إِسْذَاهدْجنْ أَذْ يَارْزمْ أَذْلِيسْ-أَ إِتّْوَانّْضنْ ؤُ أَذْ يَارْزمْ إِشمِّيعنْ نّسْ. ٥ إِجّنْ زڭْ إِمْغَارنْ إِنَّا أَيِي: ”وَارْ تّْرُو شَا! خْزَارْ، أَيْرَاذْ زِي ثقْبِيتْشْ ن يَاهُوذَا، أَژْوَارْ ن ذَاوُوذْ، أَقَا إِغلّبْ، حِيمَا أَذْ يَارْزمْ أَذْلِيسْ-أَ إِتّْوَانّْضنْ ذ إِشمِّيعنْ نّسْ.“ ◘5:‏5 أَمز. 49‏:‏9، 10؛ إِشا. 11‏:‏10؛ رُوم. 15‏:‏12؛ أَسَا. 22‏:‏16.

٦ ؤُشَا ژْرِيغْ ذِي ڒْْوسْطْ ن ڒْْعَارْشْ ذ أَربْعَا ن إِمُودَّارنْ ؤُشَا ذِي ڒْْوسْطْ ن إِمْغَارنْ، إِجّْ ن إِزْمَارْ إِبدّْ، إِڭَّا أَخْمِي ذ ثَاغَارْصْثْ. نتَّا غَارسْ سبْعَا ن وَاشَّاونْ ذ سبْعَا ن ثِيطَّاوِينْ، نِيثْنِي ذ سبْعَا ن أَرُّوحَاثْ ن أَربِّي إِنِّي د-إِتّْوَاسّكّنْ غَارْ دُّونشْثْ ثْمُونْ. ◼5:‏6 ’دُّونشْثْ‘ - س ثْعِيبْرَانِيثْ ’ثمُّورْثْ‘.  ◘5:‏6 زَاك. 3‏:‏9؛ 4‏:‏10؛ أَسَا. 4‏:‏5. ٧ أَقَا نتَّا يُوسَا-د ؤُشَا إِكْسِي أَذْلِيسْ إِتّْوَانّْضنْ زڭْ ؤُفُوسْ ن ونِّي إِقِّيمنْ خْ ڒْْعَارْشْ.

٨ أَڒَامِي إِطّفْ أَذْلِيسْ إِتّْوَانّْضنْ، وْضَانْ-د أَربْعَا ن إِمُودَّارنْ ذ أَربْعَا ؤُ-عِيشْرِينْ ن إِمْغَارنْ غَارْ ثمُّورْثْ زَّاثْ إِ يزْمَارْ. نِيثْنِي مَارَّا إِذْسنْ غَارْسنْ إِشْثْ ن لهَارْپَا ذ إِجّْ ن طّبْصِي ن وُورغْ إِشُّورْ س ڒبْخُورْ: مَانْ أَيَا ذ ثِيژَادْجِيثِينْ ن إِمْقدَّاسنْ. ◘5:‏8 إِزهد. 141‏:‏2؛ أَسَا. 14‏:‏2. ٩ ؤُشَا تّْغنَّاجنْ إِجّْ ن إِزْڒِي ن جْذِيذْ، قَّارنْ:

”شكْ ثسْذَاهدْجذْ

أَذْ ثكْسِيذْ أَذْلِيسْ إِتّْوَانّْضنْ،

أَذْ ثكّْسذْ إِشمِّيعنْ نّسْ،

مِينْزِي شكْ ثتّْوَاغَارْصذْ

ؤُشَا س إِذَامّنْ نّشْ

ثسْغِيذْ أَنغْ إِ أَربِّي،

زِي كُوڒْ ثَاقْبِيتْشْ ذ ڒْْڭنْسْ ذ شّعْبْ.“ ◘5:‏9 ڒخ. 20‏:‏28؛ أَفا. 1‏:‏7؛ كُول. 1‏:‏14؛ عبر. 9‏:‏12؛ 10‏:‏10؛ 1 بُط. 1‏:‏19؛ 1 يُوح. 1‏:‏7؛ أَسَا. 4‏:‏11.

١٠ “شكْ ثَارِّيذْ ثنْ ذ إِشْثْ ن ثْڭلْذَا

ن إِكهَّاننْ ذ إِجدْجِيذنْ

إِ أَربِّي نّغْ،

ؤُ نِيثْنِي أَذْ حكْمنْ

أَمْ إِجدْجِيذنْ خْ ثمُّورْثْ.“ ◘5:‏10 ؤُف. 19‏:‏6؛ 1 بُط. 2‏:‏5، 9؛ أَسَا. 1‏:‏6.

١١ خنِّي ژْرِيغْ، ؤُشَا سْڒِيغْ ثْمِيجَّا ن وَاطَّاسْ ن لْمَالَاكَاثْ نّْضنْثْ إِ ڒْْعَارْشْ ؤُڒَا ن إِمُودَّارنْ ذ إِمْغَارنْ، ؤُشَا ثُوغَا أَثنْثْعشْرَا-أَڒَافْ ذِيعشْرَا ن ڒُْوڒُوفْ ؤُ أَڒَافْ ذِي ڒُْوڒُوفْ، ◘5:‏11 دَان. 7‏:‏10؛ عبر. 12‏:‏22. ١٢ قَّارنْ س ثْمِيجَّا إِجهْذنْ:

”إِزْمَارْ نِّي إِتّْوَاغَارْصنْ

إِسْذَاهدْجْ أَذْ إِطّفْ

صُّولْطَا ذ وَاڭْڒَا ذ ثِيغِيثْ،

ذ جّهْذْ ذ شَّانْ ذ ؤُعُودْجِي،

ذ لْبَارَاكَا!“ ◘5:‏12 أَسَا. 4‏:‏11.

١٣ ؤُشَا كُوڒْ إِجّْ إِ د-إِخڒْقنْ ذڭْ ؤُجنَّا ؤُ خْ ثمُّورْثْ ذ سَاذُو ثمُّورْثْ ؤُ خْ ڒبْحَارْ، وَاهْ، قَاعْ مِينْ إِدْجَانْ ذَايْسنْ، سْڒِيغْ أَسنْ، قَّارنْ:

”لْبَارَاكَا ذ شَّانْ ذ ؤُعُودْجِي ذ صُّولْطَا

أَذْ إِڒِينْ إِ ونِّي إِقِّيمنْ خْ ڒْْعَارْشْ

ؤُ إِ يزْمَارْ إِ ڒبْذَا قَاعْ!“

١٤ ؤُشَا ؤُمِي أَربْعَا ن إِمُودَّارنْ نَّانْ: ”أَمِينْ!“، وْضَانْ إِمْغَارنْ غَارْ ثمُّورْثْ، سجْذنْ.