١ أَوَارْنِي مَانْ أَيَا ژْرِيغْ أَربْعَا ن لْمَالَاكَاثْ بدّنْثْ غَارْ أَربْعَا ن ثْغمُّورَا ن ثمُّورْثْ، طّْفنْثْ أَربْعَا ن إِسمِّيضنْ ن ثمُّورْثْ، حِيمَا وَارْ إِتّْسُوضِي ؤُسمِّيضْ ڒَْا خْ ڒْْبَارّْ ڒَْا خْ وَامَانْ ؤُڒَا خْ شَا ن ثْشجَّارْثْ. ◼7:‏1 ’ثَاشجَّارْثْ‘ - نِيغْ ’أَدَّاڭْ‘ (’إِدَّاڭنْ‘). ٢ ؤُشَا ژْرِيغْ إِجّْ ن لْمَالَاكْ نّغْنِي يُوڒِي-د مَانِيسْ ذ ثْنقَّارْ ثْفُوشْثْ، أَقَا غَارسْ أَشمِّيعْ ن أَربِّي إِدَّارنْ ؤُشَا إِڒَاغَا س جّهْذْ إِ أَربْعَا ن لْمَالَاكَاثْ نِّي ؤُمِي ثمّوْشْ ثْزمَّارْ حِيمَا أَذْ سّخْسَارنْثْ ثَامُّورْثْ ذ ڒبْحَارْ، ◘7:‏2 يُوح. 6‏:‏26؛ أَسَا. 9‏:‏4. ٣ إِقَّارْ: ”وَارْ تّْسخْسَارمْ ثَامُّورْثْ ؤُڒَا ذ ڒبْحَارْ ؤُڒَا ذ ثِيشجِّيرَا أَڒْ غَا نڭّْ أَشمِّيعْ خْ ثنْيَارِينْ ن إِمْسخَّارنْ ن أَربِّي نّغْ.“

٤ ؤُشَا سْڒِيغْ ڒْْقدّْ ن يِينِّي إِتّْوَاشمّْعنْ، مْيَا ؤُ-أَربْعَا ؤُ-ربْعِينْ-أَڒفْ أَقَا تّْوَاشمّْعنْ زِي مَارَّا ثِيقبَّاڒْ ن إِسْرَائِيل: ◘7:‏4 أَسَا. 14‏:‏1.

٥ ثنْعَاشْ-أَڒفْ زِي ثقْبِيتْشْ ن يَاهُوذَا،

ثنْعَاشْ-أَڒفْ زِي ثقْبِيتْشْ ن رُوبِينْ،

ثنْعَاشْ-أَڒفْ زِي ثقْبِيتْشْ ن جَاذْ،

٦ ثنْعَاشْ-أَڒفْ زِي ثقْبِيتْشْ ن أَشِيرْ،

ثنْعَاشْ-أَڒفْ زِي ثقْبِيتْشْ ن نَافْثَالِي،

ثنْعَاشْ-أَڒفْ زِي ثقْبِيتْشْ ن مَانَاسَّا،

٧ ثنْعَاشْ-أَڒفْ زِي ثقْبِيتْشْ ن شِيمْعُونْ،

ثنْعَاشْ-أَڒفْ زِي ثقْبِيتْشْ ن إِسَّاكَارْ،

ثنْعَاشْ-أَڒفْ زِي ثقْبِيتْشْ ن لَاوِي،

٨ ثنْعَاشْ-أَڒفْ زِي ثقْبِيتْشْ ن زِيبُولُونْ،

ثنْعَاشْ-أَڒفْ زِي ثقْبِيتْشْ ن يُوسُوفْ،

ثنْعَاشْ-أَڒفْ زِي ثقْبِيتْشْ ن بِينْيَامِينْ.

٩ أَوَارْنِي مَانْ أَيَا أَقَا ژْرِيغْ إِجّْ ن ؤُبَارُّو ن ڒْْغَاشِي أَمقّْرَانْ إِ وَارْ إِزمَّارْ ؤُڒَا ذ إِجّْ أَذْ ث إِحْسبْ، زِي كُوڒْ ڒْْڭنْسْ ذ ثقْبِيتْشْ ؤُ زِي مَارَّا شُّوعُوبْ ذ إِڒْسَاونْ. نِيثْنِي بدّنْ زَّاثْ إِ ڒْْعَارْشْ ذ يزْمَارْ، أَرْضنْ ڒعْبَايَاثْ ثِيزِيرَارِينْ ذ ثِيشمْڒَاڒِينْ، ؤُشَا غَارْسنْ ثِيسضْوِينْ ن ثِينِي ذڭْ إِفَاسّنْ نْسنْ، ١٠ تّْڒَاغَانْ س جّهْذْ:

”أَسنْجمْ أَقَا س أَربِّي نّغْ،

ونِّي إِقِّيمنْ خْ ڒْْعَارْشْ

ؤُ س يزْمَارْ.“

١١ ؤُشَا مَارَّا لْمَالَاكَاثْ ثُوغَا بدّنْثْ نّْضنْثْ إِ ڒْْعَارْشْ أَكْ-ذ إِمْغَارنْ ذ أَربْعَا ن إِمُودَّارنْ، وْضَانْ غَارْ ثمُّورْثْ س وُوذْمَاونْ نْسنْ قِيبَاتْشْ إِ ڒْْعَارْشْ، ١٢ قَّارنْ

”أَمِينْ!

أَعُودْجِي ذ لْبَارَاكَا

ذ ثِيغِيثْ ذ ؤُقَاذِي

ذ شَّانْ ذ صُّولْطَا ذ جّهْذْ

أَقَا-ثنْ إِ أَربِّي نّغْ

إِ ڒبْذَا قَاعْ.

أَمِينْ!“

١٣ إِطّفْ إِجّنْ زڭْ إِمْغَارنْ نِّي ذڭْ وَاوَاڒْ، إِنَّا أَيِي: ”مِينْ عْنَانْ إِنَا، إِنِّي يَارْضنْ ڒعْبَايَاثْ ثِيشمْڒَاڒِينْ، مِينْ عْنَانْ ؤُ مَانِيسْ د-ؤُسِينْ؟“ ١٤ نشّْ نِّيغْ أَسْ: ”أَ سِيذِي، شكْ إِ إِسّْننْ.“ إِنَّا أَيِي: ”إِنَا أَقَا ؤُسِينْ-د زِي ڒْْمحْنثْ ثَامقّْرَانْثْ. أَقَا نِيثْنِي سِيزْذِيڭنْ ڒعْبَايَاثْ نْسنْ ؤُشَا أَرِّينْ ثنْثْ ذ ثِيشمْڒَاڒِينْ ذڭْ إِذَامّنْ ن إِزْمَارْ. ١٥ س ؤُينِّي بدّنْ نِيثْنِي زَّاثْ إِ ڒْْعَارْشْ ن أَربِّي ؤُشَا سخَّارنْ أَسْ أَسّْ ذ دْجِيڒثْ ذِي زَّاوشْثْ ثَامقّْرَانْثْ، ؤُشَا ونِّي إِقِّيمنْ خْ ڒْْعَارْشْ أَذْ خَاسنْ إِوّثْ أَقِيضُونْ نّسْ. ١٦ وَارْ إِقِّيمْ عَاذْ أَذْ دْجَاژنْ نِيغْ أَذْ فَّاذنْ، وَارْ ثنْ ثتّْقذِّي ؤُڒَا ذ ثَافُوشْثْ ؤُڒَا ذ إِشْثْ ن جُّورّثْ ن ڒحْمُو، ◘7:‏16 إِشا. 49‏:‏10. ١٧ مِينْزِي إِزْمَارْ نِّي إِدْجَانْ ذِي ڒْْوسْطْ ن ڒْْعَارْشْ أَذْ ثنْ يَارْوسْ، أَذْ ثنْ إِنْذهْ غَارْ ثُوذَارْثْ ؤُ غَارْ ثَاڒَاوِينْ ن وَامَانْ، ؤُشَا نتَّا أَذْ أَسنْ إِمْسحْ كُوڒْ أَمطَّا زِي ثِيطَّاوِينْ نْسنْ.“ ◘7:‏17 إِشا. 25‏:‏8؛ إِزهد. 23‏:‏1؛ أَسَا. 21‏:‏4.