١ إِ خنِّي، مَانْ ڒفْضڒْ غَارْ وُوذَاينْ، نِيغْ مَانْ ثِيزِي ن وخْثَانْ؟ ٢ أَطَّاسْ خْ كُوڒْ إِغزْذِيسنْ! خنِّي غَارْ ؤُمزْوَارْ مّوْشنْ أَسنْ ‬وَاوَاڒنْ نْ‮ ‬أَربِّي. ◘3:‏2 إِزهد. 147‏:‏19؛ رُوم. 9‏:‏4. ٣ مَاغَارْ مَاڒَا ثُوغَا شَا زَّايْسنْ وَارْ ؤُمِيننْ شَا، مَا خنِّي بضْڒنْ نِيثْنِي ڒَْامَانْ ن أَربِّي زِي سِّيبّثْ ن بْڒَا لْ-إِيمَانْ نْسنْ؟ ◘3:‏3 ڒخْڒ. 23‏:‏19؛ رُوم. 9‏:‏6؛ 2 تِيم. 2‏:‏13. ٤ عمَّارْصْ! مَاغَارْ أَربِّي ذ ثِيذتّْ ؤُشَا كُوڒْ بْنَاذمْ ذ بُو-إِخَارِّيقنْ، أَمْ مَامّشْ ثُورَا:

”شكْ أَذْ ثْبَانذْ ذ أَمْسڭّذْ س وَاوَاڒنْ نّشْ،

أَذْ ثِيڒِيذْ ثْكمّْڒذْ ذِي ڒصْفَايثْ

خْمِي شكْ إِ غَا حَاسْبنْ.“ ◘3:‏4 إِزهد. 51‏:‏6؛ 116‏:‏11؛ يُوح. 3‏:‏33.

٥ مَاشَا مَاڒَا مِينْ وَارْ إِسّڭّْذنْ ذَايْنغْ أَقَا إِسّْبيّنْ ثَاسڭْذَا ن أَربِّي، مِينْ غَا نِينِي عَاذْ خنِّي؟ مَا أَربِّي وَارْ غَارسْ بُو ڒْْحقّْ ؤُمِي خَانغْ إِڭَّا أَغْضَابْ نّسْ؟ نشّْ سَّاوَاڒغْ أَمْ يِيجّْ ن بْنَاذمْ ذ أَمذْنُوبْ. ٦ وَارْ خَاسْ نسِّيوِيڒْ! مَامّشْ إِ غَا إِحَاسبْ أَربِّي دُّونشْثْ ڒخْذنِّي؟ ٧ مَامّشْ مَاڒَا ثْفيّضْ ثِيذتّْ ن أَربِّي غَارْ ؤُعُودْجِي نّسْ س ؤُخَارِّيقْ إِنُو، مَايمِّي عَاذْ إِ غَا تّْوَاحَاسْبغْ أَمْ ؤُمذْنُوبْ؟ ٨ وَارْ إِعدّڒْ أَقَا ثَامسْڒَاشْثْ ثدْجَا أَمْ مَامّشْ قَّارنْ إِنِّي ذَايْنغْ إِشقّْفنْ بلِّي نشِّينْ نقَّارْ: ”أجّْ أَنغْ أَذْ نڭّْ ثُوعفّْنَا، حِيمَا أَذْ زَّايسْ د-يكّْ مِينْ إِشْنَانْ!“؟، إِنِّي أَقَا ڒْْحُوكْمْ خَاسنْ أَذْ إِتّْوَاخمّڒْ أَڒْ شّْرعْ إِسڭّْذنْ.

٩ إِ خنِّي مَامّشْ؟ مَا نشِّينْ حْسنْ؟ قْبڒْ أَقَا نُوفَا أَقَا ؤُذَاينْ ذ إِرَامِييّنْ مَارَّا سَاذُو دّنْبْ، ◘3:‏9 ڭال. 3‏:‏22. ١٠ أَمْ مَامّشْ ثُورَا:

”ؤُڒَا ذ إِجّْ وَارْ إِدْجِي ذ أَمْسڭّذْ، ◘3:‏10 إِزهد. 14‏:‏3؛ 53‏:‏4.

١١ ؤُڒَا ذ إِجّْ وَارْ إِفهّمْ،

ؤُڒَا ذ إِجّْ وَارْ يَارزُّو خْ أَربِّي.

١٢ مَارَّا فّْغنْ زڭْ وبْرِيذْ، مّنْضَارنْ،

ؤُڒَا ذ إِجّْ وَارْ إِتّڭّْ ثْشُونِي، ؤُڒَا ذ إِجّْ. ◘3:‏12 إِزهد. 14‏:‏1‏-‏3؛ 53‏:‏2‏-‏4؛ أَمب. 7‏:‏20

١٣ ثْمِيجَّاوِينْ نْسنْ ذ إِمضْڒَانْ يَارزْمنْ،

س إِڒْسَاونْ نْسنْ شمّْثنْ،

سّمْ ن إِفِيغْرَانْ سَاذُو إِينْشِيشنْ نْسنْ، ◘3:‏13 إِزهد. 5‏:‏10؛ 140‏:‏4.

١٤ أَقمُّومْ نْسنْ إِشُّورْ س نّعْڒثْ ذ ثَارْزُوڭِي، ◘3:‏14 إِزهد. 10‏:‏7.

١٥ س إِضَارنْ نْسنْ تّْقدْجِيقنْ

غَارْ ؤُسِيزّڒْ ن إِذَامّنْ، ◘3:‏15 أَوڒن. 1‏:‏16؛ إِشا. 59‏:‏7.

١٦ أَريّبْ ذ ثَامَارَا ذڭْ إِبْرِيذنْ نْسنْ،

١٧ أَبْرِيذْ ن ڒهْنَا وَارْ ث سِّيننْ شَا، ◘3:‏17 إِشا. 59‏:‏7، 8

١٨ ثِيڭّْوُوذِي ن أَربِّي

وَارْ ثدْجِي قِيبَاتْشْ إِ ثِيطَّاوِينْ نْسنْ.“◘3:‏18 إِزهد. 36‏:‏2.

١٩ نشِّينْ نسّنْ بلِّي مَارَّا مِينْ ثقَّارْ شَّارِيعَا، أَقَا ثقَّارْ إِ-ث إِ يِينِّي إِدْجَانْ سَاذُو شَّارِيعَا، حِيمَا أَذْ إِتّْوَاقّنْ كُوڒْ أَقمُّومْ ؤُشَا أَذْ ثذْوڒْ مَارَّا دُّونشْثْ ذَايسْ ڒْْعِيبْ زَّاثْ إِ أَربِّي، ٢٠ مَاغَارْ زِي ڒخْذَايمْ ن شَّارِيعَا وَارْ إِتّْوَاسڭّذْ ؤُڒَا ذ إِجّْ ن بْنَاذمْ قِيبَاتْشْ نّسْ، مِينْزِي س شَّارِيعَا أَقَا تّْوَاسّْننْ دّْنُوبْ. ◘3:‏20 رُوم. 7‏:‏7؛ ڭال. 2‏:‏16؛ عبر. 7‏:‏18.

٢١ مَاشَا ڒخُّو أَقَا ثضْهَارْ-د ثْسڭْذَا ن أَربِّي بْڒَا شَّارِيعَا، ثْشهّذْ خَاسْ شَّارِيعَا ذ إِنَابِييّنْ، ◘3:‏21 رُوم. 1‏:‏17؛ فِيل. 3‏:‏9. ٢٢ أَقَا ثَاسڭْذَا ن أَربِّي زِي لْ-إِيمَانْ ن يَاسُوع لْمَاسِيحْ غَارْ مَارَّا ؤُ خْ مَارَّا إِنِّي زَّايسْ يُومْننْ، مِينْزِي وَارْ ذِينْ بُو ڒْْفَارْزْ. ٢٣ مِينْزِي مَارَّا خْضَانْ ؤُشَا إِنقْصْ إِ-ثنْ ؤُعُودْجِي ن أَربِّي، ٢٤ ؤُشَا تّْوَاسڭّْذنْ بَاطڒْ س أَرْضَا نّسْ س ؤُفكِّي إِ إِدْجَانْ ذِي يَاسُوع لْمَاسِيحْ. ◘3:‏24 إِشا. 53‏:‏5. ٢٥ أَربِّي إِڭَّا إِ-ث ذ أَصْڒَاحْ قْبڒْ سْ لْ-إِيمَانْ ذڭْ إِذَامّنْ نّسْ، ذِي سِّيبّثْ ن دّْنُوبْ نّغْ نِّي ثُوغَا نڭَّا زِيشْ ذِي ڒْْمِيجَاڒْ ن ڒْْوقْثْ إِ ذ أَنغْ إِوْشَا أَربِّي س تَّاسِيعْ ن ڒْْخَاضَارْ نّسْ، حِيمَا أَذْ إِسّْشنْ ثَاسڭْذَا نّسْ ذِي ڒْْوقْثْ-أَ، ◘3:‏25 ؤُف. 25‏:‏17؛ 2 كُور. 5‏:‏19؛ كُول. 1‏:‏20؛ عبر. 4‏:‏16؛ 1 يُوح. 4‏:‏10. ٢٦ مَاحنْذْ ذِي ثْسڭْذَا أَذْ يَارّْ ذ أَمْسڭَّاذْ وِي إِدْجَانْ ذِي لْ-إِيمَانْ ن سِيذِيثْنغْ يَاسُوع لْمَاسِيحْ.

٢٧ مَانِي إِدْجَا خنِّي ؤُسمْغَارْ؟ وَارْ خَاسْ نسِّيوِيڒْ. س مَانْ شَّارِيعَا؟ س مَانْ ڒخْذَايمْ؟عمَّارْصْ، مَاشَا س شَّارِيعَا ن لْ-إِيمَانْ. ٢٨ س ؤُيَا نحْسبْ بلِّي بْنَاذمْ أَذْ إِتّْوَاسڭّذْ س لْ-إِيمَانْ، وَارْ إِدْجِي س ڒخْذَايمْ ن شَّارِيعَا. ◘3:‏28 ڒخ. 13‏:‏38؛ رُوم. 8‏:‏3؛ ڭال. 2‏:‏16؛ عبر. 7‏:‏25. ٢٩ نِيغْ أَربِّي ن وُوذَاينْ وَاهَا، وَارْ إِدْجِي ن ڒڭْنُوسْ عَاوذْ؟ وَاهْ، ؤُڒَا ن ڒڭْنُوسْ! ٣٠ مِينْزِي أَربِّي ذ إِجّنْ ونِّي إِ غَا إِسڭّْذنْ إِنِّي إِتّْوَاخثْننْ س لْ-إِيمَانْ، ؤُ عَاوذْ إِنِّي وَارْ إِتّْوَاخْثِيننْ س لْ-إِيمَانْ. ٣١ مَا نْبطّڒْ شَّارِيعَا س لْ-إِيمَانْ؟ وَايَّاوْ، س ڒمْقْڒُوبْ، نشِّينْ أَذْ نضْمنْ شَّارِيعَا.