١ وِي إِضعْفنْ ذِي لْ-إِيمَانْ، وْشمْ أَسْ أَفُوسْ، وَارْ تّمْسبْضَامْ ذڭْ إِخَارِّيصنْ نْومْ جَارْ أَومْ. ٢ أَقَا ذِينْ حذْ يُومنْ إِزمَّارْ أَذْ إِشّْ كُوڒْشِي، مَاشَا ونِّي إِضعْفنْ أَذْ إِشّْ ثِيبِّي وَاهَا. ◘14:‏2 أَوڒن. 15‏:‏7 ٣ ونِّي إِتّتّنْ، وَارْ إِسّحْقَارِي ونِّي وَارْ إِتّتّنْ، ذ ونِّي وَارْ إِتّتّنْ، وَارْ إِحكّمْ خْ ونِّي إِتّتّنْ، مِينْزِي أَربِّي إِقْبڒْ إِ-ث. ٤ مِينْ ثعْنِيذْ شكْ ونِّي إِحكّْمنْ خْ ؤُمْسخَّارْ ن ونّغْنِي؟ مِينْزِي مَاڒَا إِبدّْ، ذ مَانْ أَيَا إِ بَابْ نّسْ، ؤُ مَاڒَا إِوْضَا، ذ مَانْ أَيَا إِ بَابْ نّسْ. سِيذسْ إِزمَّارْ أَذْ ث إِسّْبدّْ ذ أَبذِّي. ◘14:‏4 يَاع. 4‏:‏12.

٥ أَقَا ذِينْ حذْ إِتّْغِيڒْ أَسْ أَقَا ذِينْ أَسّْ سنّجْ إِ وَاسّْ نّغْنِي، ؤُ ونّغْنِي إِتّْغِيڒْ أَسْ أَقَا كُوڒْ أَسّْ كِيفْكِيفْ. أجّْ كُوڒْ إِجّنْ أَذْ إِقْنعْ ذِي ڒْْبَاڒْ نّسْ نِيشَانْ. ◘14:‏5 ڭال. 4‏:‏10؛ كُول. 2‏:‏16. ٦ ونِّي إِوقَّارنْ إِجّْ ن وَاسّْ، إِ سِيذسْ إِ ث غَا إِوقَّارْ. ونِّي وَارْ إِوقَّارنْ أَسّْ، إِ سِيذسْ إِ وَارْ ث إِوقَّارْ. ونِّي إِتّتّنْ، إِتّتّْ إِ سِيذسْ، مِينْزِي أَذْ إِشكَّارْ أَربِّي. ونِّي وَارْ إِتّتّنْ شَا، إِ سِيذسْ وَارْ إِتّتّْ شَا ؤُشَا نتَّا أَذْ إِشكَّارْ أَربِّي عَاوذْ. ◘14:‏6 1 كُور. 10‏:‏31؛ 1 تِيم. 4‏:‏3. ٧ مِينْزِي ؤُڒَا ذ إِجّْ زَّايْنغْ أَقَا إِدَّارْ إِ يِيخفْ نّسْ، ؤُشَا ؤُڒَا ذ إِجّنْ إِمُّوثْ إِ يِيخفْ نّسْ. ◘14:‏7 2 كُور. 5‏:‏15؛ ڭال. 2‏:‏20؛ 1 تس. 5‏:‏10؛ 1 بُط. 4‏:‏2. ٨ مِينْزِي مَاڒَا ندَّارْ، أَذْ ندَّارْ إِ سِيذِيثْنغْ، نِيغْ مَاڒَا نمُّوثْ أَذْ نمّثْ إِ سِيذِيثْنغْ. س ؤُيَا، مَا ندَّارْ نِيغْ نمُّوثْ، أَقَا نشِّينْ إِ سِيذِيثْنغْ. ٩ مِينْزِي إِ ؤُيَا إِ إِمُّوثْ لْمَاسِيحْ، ؤُشَا إِذْوڒْ إِدَّارْ عَاوذْ ؤُشَا إِكَّارْ-د، حِيمَا أَذْ يِيڒِي ذ سِيذِي إِ يِينِّي إِمُّوثنْ ؤُڒَا إِ يِينِّي إِدَّارنْ. ١٠ مَاشَا شكْ، مَايمِّي غَا ثْحكْمذْ خْ ؤُمَاشْ؟ نِيغْ مَايمِّي عَاوذْ شكْ ثسّحْقَارَاذْ ؤُمَاشْ؟ مِينْزِي نشِّينْ مَارَّا أَذْ نْبدّْ قِيبَاتْشْ إِ ڒْْكُورْسِي ن شّْرعْ ن لْمَاسِيحْ. ◘14:‏10 مت. 25‏:‏31؛ 2 كُور. 5‏:‏10.

١١ أَمْ مَامّشْ ثُورَا:

”س ثِيذتّْ، أَمْ دَّارغْ نشّْ، إِقَّارْ سِيذِي،

أَذْ أَيِي أَضَارنْ مَارَّا إِفَادّنْ

ؤُ كُوڒْ إِڒسْ أَذْ خَافِي إِشْهذْ.“ ◘14:‏11 إِشا. 45‏:‏23؛ 49‏:‏18 فِيل. 2‏:‏10.

١٢ خنِّي أجّْ كُوڒْ إِجّنْ زَّايْنغْ أَذْ إِڭّْ ڒحْسَابْ خْ يِيخفْ نّسْ قِيبَاتْشْ إِ أَربِّي. ◘14:‏12 إِزهد. 62‏:‏13؛ إِرْم. 17‏:‏10؛ 32‏:‏19؛ مت. 16‏:‏27؛ رُوم. 2‏:‏6؛ 1 كُور. 3‏:‏8؛ 2 كُور. 5‏:‏10؛ ڭال. 6‏:‏5؛ أَسَا. 2‏:‏23؛ 22‏:‏12. ١٣ زِي ڒخُّو ذ ثْسَاونْثْ وَارْ حكّْممْ إِجّنْ خْ ونّغْنِي، مَاشَا حْسنْ أَذْ ثكْسذْ أَوَاڒْ مَاحنْذْ وَارْ ثسَّارْسذْ شَا إِجّْ ن وژْرُو مَاحنْذْ أَذْ ذَايسْ إِنْقَارْضْ ؤُمَاشْ. ◘14:‏13 1 كُور. 10‏:‏32؛ 2 كُور. 6‏:‏3. ١٤ مِينْزِي نشّْ سّْنغْ، أَقَا تّْوَاسّْقنْعغْ ذِي سِيذِي يَاسُوع، بلِّي ؤُڒَا ذ إِشْثْ ن ڒْْحَاجّثْ ثخْمجْ إِ نتَّا، مْغِيرْ إِ ونِّي ت إِحسْبنْ ذ ڒخْمجْ، أَقَا إِ نتَّا وَاهَا ؤُمِي ثخْمجْ. ◘14:‏14 مت. 15‏:‏11؛ مك. 17‏:‏17‏-‏23؛ ڒخ. 10‏:‏15؛ 1 كُور. 8‏:‏4؛ 1 تِيم. 4‏:‏4. ١٥ مَاڒَا إِخيّقْ ؤُمَاشْ خْ سِّيبّثْ ن مَاشَّا إِ ثشِّيذْ، أَقَا شكْ وَارْ ثُويُورذْ ذِي ثَايْرِي. وَارْ تّحِّي شَا س مَاشَّا نّشْ ونِّي إِ خفْ إِمُّوثْ لْمَاسِيحْ. ◘14:‏15 1 كُور. 8‏:‏11. ١٦ مِينْ نْحسّبْ ذ ڒْْخَارْ إِ نشِّينْ، وَارْ تّجِّي حذْ أَذْ خَاسْ إِسِّيوڒْ س ڒْْغَارْ. ١٧ مِينْزِي ثَاڭلْذِيثْ ن أَربِّي وَارْ ثدْجِي ذِي مَاشَّا ذ ثِيسِّيثْ، مَاشَا ذِي ثْسڭْذَا ذ ڒهْنَا ذ ڒفْرَاحثْ س أَرُّوحْ إِقدّْسنْ. ◘14:‏17 1 كُور. 8‏:‏8. ١٨ مِينْزِي ونِّي إِسخَّارنْ إِ لْمَاسِيحْ ذِي مَانْ أَيَا، أَقَا يَارْضَا أَربِّي ؤُشَا نتَّا ذ أَمقْبُوڒْ غَارْ إِوْذَانْ.

١٩ أَذْ نضْفَارْ خنِّي مِينْ إِدْجَانْ إِ ڒهْنَا ذ ڒبْنِي ن إِجّنْ إِ ونّغْنِي. ٢٠ وَارْ تَّاردّدْجْ شَا ڒْْخذْمثْ ن أَربِّي خْ سِّيبّثْ ن مَاشَّا. مَارَّا ثِيمسْڒَايِينْ أَقَا أَثنْثْ ذ ثِيمزْذَاڭْ، مَاشَا ؤُشْثْ خْ بْنَاذمْ ونِّي إِ غَا إِڭّْ أَژْرُو إِ ؤُنذْرفْ س مَاشَّا نّسْ. ◘14:‏20 ثِيث. 1‏:‏15. ٢١ مْلِيحْ ؤُمِي وَارْ نتّتّْ شَا أَيْسُومْ ؤُ وَارْ نْسسّْ شَا بِينُو نِيغْ وَارْ نتّڭّْ ؤُڒَا ذ إِشْثْ ن ڒْْحَاجّثْ إِ ذِي إِ غَا إِنْذرْفْ ؤُمَاشْ. ◘14:‏21 1 كُور. 8‏:‏13. ٢٢ مَا ثتّْوَاسّْقنْعذْ إِ يِيخفْ نّشْ؟ أَذْ أَشْ يِيڒِي مَانْ أَيَا إِ يِيخفْ نّشْ زَّاثْ إِ أَربِّي. سّعْذْ ن ونِّي وَارْ إِتِّيكّْوِيضْ شّْرعْ خْ يِيخفْ نّسْ ذِي مِينْ ذ أَسْ إِتّْغِيڒْ مْلِيحْ. ٢٣ مَاشَا ونِّي إِتّْشكَّانْ خْمِي إِتّتّْ، إِتّْوَاحَاسبْ، مِينْزِي مَانْ أَيَا وَارْ إِدْجِي زِي لْ-إِيمَانْ. قَاعْ مِينْ وَارْ إِدْجِينْ زِي لْ-إِيمَانْ، أَقَا-ث ذ دّنْبْ. ◘14:‏23 ثِيث. 1‏:‏15.