8
ثَاسْڒِيثْ ثْكمّڒْ أَوَاڒْ نّسْ
1 ”أَخْ، معْلِيكْ قَاعْ شكْ ذ ؤُمَا،
ثطّضذْ ذِي ثْبِيبِّيشِينْ ن يمَّا.
مَاڒَا ؤُفِيغْ شكْ ذِي بَارَّا، أَذْ شكْ سُّوذْمغْ،
بْڒَا مَا ذ أَيِي سّحْقَارَانْ.
2 إِڒِي أَذْ شكْ نذْهغْ، أَذْ شكْ أَوْيغْ
غَارْ ثَادَّارْثْ ن يمَّا،
شكْ أَذْ أَيِي ثسّْڒمْذذْ ذِينْ.
أَذْ أَشْ وْشغْ بِينُو إِتّْفُوحنْ
س ڒعْثُوڒْ أَذْ ثسْوذْ،
أَژمِّي ن ثْشجَّارْثْ إِنُو ن وَارمَّانْ.
3 أَزڒْمَاضْ نّسْ سَاذُو ؤُزدْجِيفْ إِنُو،
أَفُوسِي نّسْ إِذَارّعْ أَيِي-د.
4 نشّْ أَذْ كنِّينْثْ سّْجَادْجَاغْ،
أَ يسِّيسْ ن ؤُرْشَالِيمْ:
مَايمِّي غَا ثْهوْڒنْثْ ثَايْرِي
نِيغْ أَذْ ت-إِ-د-ثسّكَّارنْثْ،
قْبڒْ مَا ثتّخْسْ نتَّاثْ؟“
ثَاسْڒِيثْ ثفّغْ-د زِي ڒخْڒَا أَكْ-ذ يسْڒِي نّسْ
5 ”مِينْ ثعْنَا نِّي ذِينْ إِتّْڭعَّاذنْ زِي ڒخْڒَا،
ثتّْعمّذْ خْ لِّيفْ نّسْ؟“
”سَاذُو ثْشجَّارْثْ ن تّفَّاحْثْ
أَرّغْ مژْرِي نّمْ،
مَانِي شمْ د-ثجَّا يمَّامْ
س ڒحْرِيقْ ن ثَارْوَا،
مَانِي شمْ د-ثجَّا
ثنِّي شمْ د-يُورْونْ.“ ◘8:5 إِزْڒِي 8:5
6 ”سَارْسْ أَيِي أَمْ طَّابعْ خْ وُوڒْ نّشْ،
أَمْ طَّابعْ خْ ؤُغِيڒْ نّشْ،
مَاغَارْ ثَايْرِي ثجْهذْ أَمْ ڒْموْثْ،
ثُوسْمِي ثقْسحْ أَمْ ڒَاخَارْثْ،
ثِيفطُّوثِينْ نّسْ ذ ثِيفطُّوثِينْ ن ثْمسِّي،
أَقَا أَثنْثْ أَمْ ؤُشعَّاڒْ ن سِيذِي.
7 أَطَّاسْ ن وَامَانْ
وَارْ زمَّارنْ أَذْ سّْخسْينْ ثَايْرِي،
ؤُڒَا ذ إِغزْرَانْ وَارْ ت تِّيوْينْ.
وَاخَّا إِوْشَا إِجّنْ إِ ثَايْرِي
مَارَّا أَڭْڒَا ن ثَادَّارْثْ نّسْ،
أَذْ ث سّحْقَارنْ ذ أَسحْقَارْ.“
ثَاسْڒِيثْ ذ أَيْثْمَاسْ
8 ”نشِّينْ غَارْنغْ
إِشْثْ ن ؤُتْشْمَاثْنغْ ثَامژْيَانْثْ،
عَاذْ وَارْ ذ أَسْ د-فِّيغنْ إِذْمَارنْ.
مِينْ غَا نڭّْ إِ ؤُتْشْمَاثْنغْ
ذڭْ وَاسّْ إِ ذِي خَاسْ إِ غَا سِّيوْڒنْ؟“
9 ”مَاڒَا نتَّاثْ ذ ڒْحِيضْ،
أَذْ خَاسْ نسّْبدّْ أَشْبَارْ
أَمْ إِجّْ ن تَّاجْ ن نُّوقَارْثْ.
مَاڒَا نتَّاثْ ذ ثَاوَّارْثْ،
أَذْ ت نقّنْ س ثْفڒْوِينْ ن ؤُكشُّوضْ ن ثنْڭلْثْ.“
10 ”نشّْ ذ ڒْحِيضْ ؤُ إِذْمَارنْ إِنُو أَمْ لْبُورْجَاثْ.
خنِّي ذوْڒغْ نشّْ ذِي ثِيطَّاوِينْ نّسْ
أَمْ ثنِّي يُوفِينْ ڒحْنَا.“
أَحْوِيشْ ن ثْزَايَارْثْ ن سُولِيمَانْ ذ وحْوِيشْ ن ثْزَايَارْثْ ن ثسْڒِيثْ
11 ”سُولِيمَانْ ثُوغَا غَارسْ
إِجّْ ن ؤُمَارْجعْ ن ؤُضِيڒْ ذِي بَاعْلْ-هَامُونْ.
إِوْشَا أَمَارْجعْ نِّي إِ إِعسَّاسنْ.
إِ ڒْغِيدْجثْ نّسْ قَاعْ إِجّْ يِيوِي-د
أَڒفْ ن ڒوْزنْ ن نُّوقَارْثْ.“ ◘8:11 إِشا. 7:23
12 ”أَحْوِيشْ ن ؤُضِيڒْ إِنُو،
أَقَا-ث زَّاثْ إِ ثِيطَّاوِينْ إِنُو.
أَڒفْ ن ڒوْزنْ ن نُّوقَارْثْ
أَقَا أَثنْ إِ شكْ، أَ سُولِيمَانْ،
ؤُ أَڒْفَاينْ إِ إِعسَّاسنْ ن ڒْغِيدْجثْ زَّايسْ.“
أَڒَاغِي ن يسْڒِي ذ ثسْڒِيثْ
13 ”أَ شمْ ثنِّي إِزدّْغنْ ذڭْ إِحْوِيشنْ،
إِعْشِيرنْ نّمْ تّسْڒَانْ س إِمزُّوغنْ نْسنْ
إِ ثْمِيجَّا نّمْ،
قَّارنْ: ’أجّْ أَيِي أَذْ ت سْڒغْ!“
14 ”ذغْيَا، أَ لِّيفْ إِنُو،
أڭّْ أَمْ يِيغَايْضْ ن وزْغَارْ
نِيغْ أَمْ ؤُمژْيَانْ ن ؤُذَاذنْ،
خْ إِذُورَارْ إِشُّورنْ س ڒعْشُوبْ إِتّْفُوحنْ.“