١ نشّْ سّْڭعّْذغْ ثِيطَّاوِينْ إِنُو ؤُشَا ژْرِيغْ، ؤُ خْزَارْ أَقَا ذِينْ أَربْعَا ن وَاشَّاونْ. ٢ نشّْ نِّيغْ إِ لْمَالَاكْ نِّي كِيذِي إِسَّاوَاڒنْ: ”مِينْ عْنَانْ إِنَا؟“ نتَّا يَارَّا-د خَافِي: ”إِنَا ذ أَربْعَا ن وَاشَّاونْ نِّي إِزُّوزَارنْ يَاهُوذَا، إِسْرَائِيل ذ ؤُرْشَالِيمْ.“

٣ خنِّي إِسّْشنْ أَيِي سِيذِي أَربْعَا ن إِمْزِيڒنْ. ٤ ڒخْذنِّي نشّْ نِّيغْ: ”مِينْ ؤُمِي د-ؤُسِينْ نِيثْنِي، مِينْ غَا ڭّنْ؟“ نتَّا إِسِّيوڒْ، إِنَّا: ”إِنَا ذ أَشَّاونْ نِّي إِزُّوزَارنْ يَاهُوذَا، أَڒَامِي وَارْ د-إِسّْڭعّذْ عَاذْ ؤُڒَا ذ إِجّْ أَزدْجِيفْ نّسْ، مَاشَا إِنَا ؤُسِينْ-د حِيمَا أَذْ ثنْ سّْنخْڒْعنْ، حِيمَا أَذْ نْضَارنْ أَشَّاونْ ن ڒڭْنُوسْ نِّي د-إِسّْڭعّْذنْ إِشّْ ضِيدّْ إِ ثمُّورْثْ ن يَاهُوذَا حِيمَا أَذْ ت زُوزَّارنْ.“

٥ نشّْ سّْڭعّْذغْ ثِيطَّاوِينْ إِنُو، ژْرِيغْ، ؤُ خْزَارْ، أَقَا ذِينْ إِجّْ ن ورْيَازْ س ؤُفِيڒُو ن ڒعْبَارْ ذڭْ ؤُفُوسْ نّسْ. ٦ نشّْ نِّيغْ: ”مَانِي غَا ثْرَاحذْ شكْ؟“ نتَّا يَارَّا-د ”نشّْ أَذْ رَاحغْ حِيمَا أَذْ عْبَارغْ ؤُرْشَالِيمْ مَاحنْذْ أَذْ ژَترغْ مشْحَاڒْ ثدْجَا ثِيرُو نّسْ ؤُ مشْحَاڒْ ثدْجَا ثُوزّڭَّارْثْ نّسْ.“ ٧ ؤُ خْزَارْ، إِفّغْ-د لْمَالَاكْ نِّي كِيذِي إِسَّاوَاڒنْ ؤُشَا إِجّْ ن لْمَالَاكْ نّغْنِي إِفّغْ-د حِيمَا أَذْ كِيذسْ إِمّڒْقَا، ٨ إِنَّا أَسْ: ”ذغْيثْ، سِيوڒْ أَكْ-ذ ؤُحُوذْرِي نِّي، إِنِي:

’ؤُرْشَالِيمْ أَذْ ذِينْ ثِيڒِي

ثشُّورْ س ثْندَّامْ نُورّْزْمنْثْ بْڒَا ڒحْيُوضْ

زِي سِّيبّثْ ن وَاطَّاسْ ن إِوْذَانْ ذ ڒْْمَاڒْ

إِ إِدْجَانْ ذِي ڒْْوسْطْ نّسْ.

٩ نشّْ أَذْ أَسْ إِڒِيغْ ذ إِجّْ ن ڒْْحِيضْ ن ثْمسِّي

إِ ذ أَسْ-د إِتّنّْضنْ، إِقَّارْ سِيذِي،

ؤُ ذِي ڒْْوسْطْ نّسْ أَذْ أَسْ إِڒِيغْ إِ ؤُعُودْجِي.

١٠ ذغْيَامْ، ذغْيَامْ، أَروْڒمْ

زِي ثمُّورْثْ ن شَّامَالْ،

أَمُّو إِ إِقَّارْ سِيذِي،

مَاغَارْ نشّْ بْضِيغْ كنِّيوْ

أَمْ أَربْعَا ن إِسمِّيضنْ ن ؤُجنَّا،

أَمُّو إِ إِقَّارْ سِيذِي.

١١ ذغْيَاثْ، صِيهْيُونْ، فكّثْ،

شمْ ذ ثنِّي إِزدّْغنْ

غَارْ يدْجِيسْ ن بَابِيلْ!‘ “

١٢ ”مَاغَارْ أَمُّو إِ إِقَّارْ سِيذِي ن ڒْْعسْكَارَاثْ:

’ذِي طّْوعْ ن ؤُعُودْجِي،

إِسّكّْ أَيِي-د نتَّا غَارْ ڒڭْنُوسْ

نِّي زَّايْسنْ تّْوَاكشّْضمْ،

مَاغَارْ ونِّي كنِّيوْ إِ غَا إِحَاذَانْ،

إِحَاذَا مُومُّو ن ثِيطّْ إِنُو.

١٣ مَاغَارْ خْزَارْ، نشّْ سّنْهزّغْ.

أَفُوسْ إِنُو خَاسنْ،

ؤُ نِيثْنِي أَذْ ذوْڒنْ ذ ثَاكشَّاضْثْ

ن إِمْسخَّارنْ نْسنْ.

كنِّيوْ أَذْ ثسّْنمْ

أَقَا إِسّكّْ أَيِي-د سِيذِي ن ڒْْعسْكَارَاثْ.

١٤ سْڒِيوْڒوْ ؤُ فَارْحْ، أَ يدْجِيسْ ن صِيهْيُونْ،

مَاغَارْ خْزَارْ، نشّْ أَذْ د-أَسغْ

ؤُ أَذْ زذْغغْ ذِي ڒْْوسْطْ نّمْ،

أَمُّو إِ إِقَّارْ سِيذِي.‘ ◘2:‏14 لَاوِي 26‏:‏12؛ حِز. 37‏:‏27؛ 2 كُور. 6‏:‏16

١٥ ’ذڭْ وَاسّْ نِّي،

أَذْ قّْننْ وَاطَّاسْ ن ڒڭْنُوسْ غَارْ سِيذِي،

ؤُ نِيثْنِي أَذْ إِڒِينْ ذ ڒْْڭنْسْ إِنُو.

نشّْ أَذْ زذْغغْ ذِي ڒْوسْثْ نّمْ

ؤُ أَذْ ثسّْنذْ، أَقَا سِيذِي ن ڒْْعسْكَارَاثْ

إِسّكّْ أَيِي-د غَارمْ. ◘2:‏15 إِزهد. 22‏:‏1 بُط. 2‏:‏9

١٦ سِيذِي أَذْ إِطّفْ يَاهُوذَا ذ ثَاسْغَارْثْ نّسْ

خْ ثمُّورْثْ إِقدّْسنْ.

نتَّا أَذْ إِفَارْزْ ؤُرْشَالِيمْ عَاذْ.

١٧ أجّْ مَارَّا دَّاثْ أَذْ إِسّغْذْ

زَّاثْ إِ وُوذمْ ن سِيذِي،

مَاغَارْ نتَّا إِفَاقْ-د

زِي ثْزذِّيغْثْ نّسْ إِقدّْسنْ.‘ “