أَذْلِيسْ إِقدّْسنْ زَاكَارِييَّا ١٠

١٠

أَعْذَاڒْ ن يَاهُوذَا ذ إِسْرَائِيل

١ ”تَّارمْ أَنْژَارْ زِي سِيذِي،

ذِي ڒْْوقْثْ ن ونْژَارْ ن ثفْسُوثْ.

سِيذِي إِتّڭّْ أَسَّامنْ،

وَاهْ، نتَّا أَذْ أَسنْ إِوْشْ

إِبُوذَا ن ونْژَارْ،

إِ كُوڒْ إِجّْ ن وفْسُو ذڭْ إِيَّارْ. ◼

٢ مَاغَارْ ڒخْيَاڒَاثْ ن لْ-أَصْنَامْ سَّاوَاڒنْ ڒْْغشّْ،

ؤُ إِڭزَّاننْ تّْوَاڒَانْ إِخَارِّيقنْ

ؤُ نِيثْنِي تّْعَاوَاذنْ ثِيرْجَا إِشمّْثنْ،

نِيثْنِي سّْفوَّاجنْ س ڒعْوِينْ.

خْ ؤُيَا إِ تّْوَاسِّيڭّْوجنْ أَمْ وُودْجِي،

تّْوَاحْصَارنْ، مِينْزِي أَمكْسَاوْ وَارْ ذِينْ إِدْجِي.“ ◼ ◘

٣ ”خْ إِمكْسَاونْ يَارْغَا وغْضَابْ إِنُو

ؤُ نشّْ أَذْ خدْجْصغْ إِغَايْضنْ،

مَاغَارْ سِيذِي ن ڒْْعسْكَارَاثْ

أَذْ إِسِّيجّْ خْ ثْحِيمَارْثْ نّسْ،

خْ ثَادَّارْثْ ن يَاهُوذَا،

ؤُ نتَّا أَذْ ثنْ إِسدّْ

أَمْ ؤُيِيسْ نّسْ إِتِّيسِّيقنْ غَارْ ؤُمنْغِي.

٤ زَّايسْ أَژْرُو ن ثغْمَارْثْ،

زَّايسْ ڒوْثذْ،

زَّايسْ ڒْْقوْسْ ن ؤُمنْغِي،

أَذْ زَّايسْ د-فّْغنْ خنِّي

مَارَّا إِمْزيَّارنْ جْمِيعْ. ◘

٥ نِيثْنِي مَارَّا أَذْ ذوْڒنْ

أَمْ أَيْثْ ن بُو-ثغْرُوضْثْ

إِنِّي ذڭْ ؤُمنْغِي أَذْعفْسنْ

خْ ؤُبدْجَاعْ ذِي زّْنَاقِي.

وَاهْ، نِيثْنِي أَذْ مّنْغنْ،

مَاغَارْ سِيذِي أَذْ يِيڒِي أَكِيذْسنْ،

ؤُ نِيثْنِي أَذْ سضْحَانْ إِنِّي إِنْيِينْ خْ ييْسَانْ.

٦ نشّْ أَذْ سّْجهْذغْ ثَادَّارْثْ ن يَاهُوذَا

ؤُ أَذْ سّْنجْمغْ ثَادَّارْثْ ن يُوسُوفْ

ؤُ نشّْ أَذْ أَسنْ وْشغْ ثَازذِّيغْثْ،

مَاغَارْ نشّْ أَرّحْمغْ ذَايْسنْ

ؤُ نِيثْنِي أَذْ إِڒِينْ أَخْمِي نشّْ

وَارْ ثنْ نْضَارغْ،

مَاغَارْ نشّْ ذ سِيذِي، أَربِّي نْسنْ،

ؤُ نشّْ أَذْ غَارْسنْ سْڒغْ.“

٧ ”إِنِّي ن إِفْرَايِيمْ أَذْ إِڒِينْ

أَمْ يِيجّْ ن بُو-ثغْرُوضْثْ

ؤُ ؤُڒْ نْسنْ أَذْ إِفَارْحْ أَمْ غَارْ بِينُو،

ؤُ إِحنْجِيرنْ نْسنْ

أَذْ ث ژَترنْ ؤُ أَذْ فَارْحنْ،

ؤُڒْ نْسنْ أَذْ إِفَارْحْ ذِي سِيذِي.

٨ نشّْ أَذْ خَاسنْ صفَّارغْ

ؤُ أَذْ ثنْ سّْمُونغْ،

مَاغَارْ نشّْ فْذِيغْ ثنْ،

ؤُ نِيثْنِي أَذْ د-ذوْڒنْ ذڭْ وَاطَّاسْ،

أَمْ مَامّشْ ثنْ ثُوغَا ذڭْ وَاطَّاسْ.

٩ نشّْ أَذْ ثنْ زَارْعغْ جَارْ ڒڭْنُوسْ

ؤُ نِيثْنِي أَذْ أَيِي إِذَارنْ

ذِي جّْوَايهْ إِڭّْوجّنْ.

خنِّي أَذْ دَّارنْ أَكْ-ذ إِحنْجِيرنْ نْسنْ

ؤُشَا أَذْ د-ذوْڒنْ. ◘

١٠ نشّْ أَذْ ثنْ جّغْ أَذْ د -عقْبنْ زِي مِيسْڒَا،

أَذْ ثنْ د-سّْمُونغْ زِي أَشُّورْ

ؤُ أَذْ ثنْ د-أَوْيغْ غَارْ ثمُّورْثْ ن جِيلْعَاذْ

ؤُ غَارْ لُوبْنَانْ،

مَاشَا أَيَا وَارْ ثنْ إِتّْقذِّي. ◘

١١ نتَّا أَذْ إِژْوَا ڒبْحَارْ ن ڒحْصَارثْ نْسنْ

ؤُ أَذْ إِوّثْ ڒمْوَاجْ ن ڒبْحَارْ

ؤُ مَارَّا إِمُوشَانْ يُودْجْغنْ

ن إِغْزَارْ ن نِيلْ أَذْ أَژْغنْ.

نّْفَاخثْ ن أَشُّورْ أَذْ ثتّْوَاسّْوَاضعْ،

ؤُ أَزدْجَاضْ ن مِيسْڒَا أَذْ إِتّْوَاودَّارْ.

١٢ نشّْ أَذْ ثنْ سّْجهْذغْ ذِي سِيذِي

ؤُ نِيثْنِي أَذْ ؤُيُورنْ ذڭْ يِيسمْ نّسْ!“،

أَمُّو إِ إِقَّارْ سِيذِي.

◼١٠:١ 10:‏1 ’أَنْژَارْ ن ثَافْسُوثْ‘ - أَنْژَارْ ن ثفْسُوثْ ذِي شَّارْقْ أَمڒْوَاسُو إِشَّاثْ قْبڒْ ڒْوقْثْ ن ثْميْرَا ذڭْ ؤُيُورْ ن مَارْسْ ذ وَابْرِيلْ.

◼١٠:٢ 10:‏2 ’أَمكْسَاوْ‘ - نِيغْ ’أَنِيتْشيِ‘.

◘١٠:٢ 10:‏2 أَمب. 5‏:‏6

◘١٠:٤ 10:‏4 إِشا. 28‏:‏16؛ إِشا. 22‏:‏23

◘١٠:٩ 10:‏9 حِز. 37‏:‏13‏-‏14

◘١٠:١٠ 10:‏10 إِرْم. 22‏:‏6؛ حُوش. 9‏:‏3؛ زَاك. 10‏:‏11