صَافَانْيَا
1
أَسّْ أَمقّْرَانْ ن سِيذِي
1 أَوَاڒْ نْ سِيذِي إِ د-يُوسِينْ إِ صَافَانْيَا، مِّيسْ ن كُوشِي، مِّيسْ ن جَاذَالْيَا، مِّيسْ ن أَمَارْيَا، مِّيسْ ن حِيزْقِييَا، ذڭْ وُوسَّانْ ن يُوشِييَا، مِّيسْ ن أَمُونْ، أَجدْجِيذْ ن يَاهُوذَا. ◼1:1 ’صَافَانْيَا‘ - إِسمْ-أَ وَانِيثَا إِخْسْ أَذْ يِينِي ’ونِّي ث إِسّْنُوفَّارنْ سِيذِي‘.
2 نشّْ أَذْ كّْسغْ قَاعْ مَارَّا مِينْ إِدْجَانْ
زڭْ وُوذمْ ن ثمُّورْثْ،
أَمُّو إِ إِقَّارْ سِيذِي.
3 أَذْ كّْسغْ بْنَاذمْ ذ ڒْمَاڒْ،
أَذْ كّْسغْ إِجْضَاضْ ن ؤُجنَّا
ذ إِسڒْمَانْ ن ڒبْحَارْ
ذ ثْعنْكْرِيفِينْ أَكْ-ذ إِعفَّاننْ،
وَاهْ نشّْ أَذْ قْضِيغْ بْنَاذمْ
خْ وُوذمْ ن ثمُّورْثْ،
أَمُّو إِ إِقَّارْ سِيذِي. ◘1:3 أَمز. 6:7
4 نشّْ أَذْ سّْوِيژّْضغْ س ؤُفُوسْ إِنُو
ضِيدّْ إِ يَاهُوذَا
ؤُ ضِيدّْ إِ مَارَّا إِمزْذَاغْ ن ؤُرْشَالِيمْ.
نشّْ أَذْ ثحِّيغْ مِينْ إِقِّيمنْ زِي بَاعْلْ
زڭْ ومْشَانْ-أَ
أَكْ-ذ يِيسمْ ن إِكهَّاننْ ن لْ-أَصْنَامْ، ◼1:4 ’أَذْ ثحِّيغْ‘ - س ثْعِيبْرَانِيثْ ’أَذْ قضْعغْ‘.
5 ذ يِينِّي إِسجْذنْ خْ ثْزغْوِينْ
زَّاثْ إِ ڒْعسْكَارْ ن إِجنْوَانْ،
ؤُ إِنِّي، أَمْ بنْذْقنْ، جُّودْجنْ غَارْ سِيذِي،
ؤُ أَقَا جُّودْجنْ إِ مَالْكَامْ،
6 ؤُڒَا ذ يِينِّي د-إِتّْعَاقَّابنْ
زِي ضفَّارْ ن سِيذِي،
ؤُ يِينِّي وَارْ أَرزُّونْ خْ سِيذِي
ؤُ وَارْ خَاسْ تّْسّقْسِينْ. ◘1:6 إِشا. 1:4؛ 59:13؛ إِرْم. 15:6
7 سغْذْ زَّاثْ إِ وُوذمْ ن سِيذِي إِنُو، سِيذِي،
مَاغَارْ أَسّْ ن سِيذِي يُوذسْ.
سِيذِي أَقَا إِسّوْجذْ إِشْثْ ن ثْغَارْصْثْ،
نتَّا إِسّْقدّسْ إِمعْرَاضنْ نّسْ.
8 أَذْ إِمْسَارْ ذڭْ وَاسّْ ن ثْغَارْصْثْ ن سِيذِي،
أَقَا نشّْ أَذْ عَاقْبغْ ڒْحُوكَّامْ
ذ إِحنْجِيرنْ ن ؤُجدْجِيذْ
ذ مَارَّا إِنِّي يَارّْضنْ أَرُّوضْ أَغْرِيبْ.
9 ذڭْ وَاسّْ نِّي أَذْ عَاقْبغْ
مَارَّا إِنِّي إِنڭّْزنْ ثَانبْذَاثْ،
إِنِّي إِتّْعمَّارنْ ثَادَّارْثْ ن سِيذِيثْسنْ
س لْعُونْفْ ذ ڒْغشّْ.
10 ذڭْ وَاسّْ نِّي، إِقَّارْ سِيذِي،
أَذْ ذِينْ يِيڒِي إِجّْ ن ڒْحسّْ ن إِغُويَّانْ
زِي ثوَّارْثْ ن إِسڒْمَانْ،
ؤُڒَا ذ ڒْحسّْ ن يِينِّي إِتّْرُونْ
زِي ثنْذِينْثْ ن جْذِيذْ
ذ إِشْثْ ن ثَارژِّيثْ ثمْغَارْ زِي ثوْرِيرِينْ.
11 رُومْ، إِمزْذَاغْ ن جِّيهثْ ن ؤُمهْرَازْ،
مِينْزِي مَارَّا إِسبَّابّنْ تّْوَاسغْضنْ،
مَارَّا إِنِّي إِوزّْننْ ثْمنْيَاثْ تّْوَاقضْعنْ.
12 ذِي ڒْوقْثْ نِّي أَذْ بقّْشغْ
ذِي ؤُرْشَالِيمْ س ڒقْنَاذڒْ،
ؤُ نشّْ أَذْ عَاقْبغْ إِرْيَازنْ
إِنِّي إِتّْوَاڭْذَارنْ زِي ڒَاثَارْ
نِّي إِقِّيمنْ ن بِينُو،
إِنِّي إِقَّارنْ ذڭْ وُوڒْ نْسنْ:
’سِيذِي وَارْ إِتّڭّْ ڒْخَارْ
ؤُ وَارْ إِتّڭّْ ڒْغَارْ!‘
13 أَڭْڒَا نْسنْ أَذْ يِيڒِي إِ ثْكشَّاضْثْ
ذ ثُوذْرِينْ نْسنْ أَذْ ذوْڒنْثْ ذ ڒْخَارْبثْ.
نِيثْنِي أَذْ بْنَانْ ثُوذْرِينْ إِ يِيخفْ نْسنْ،
مَاشَا وَارْ ذَايْسنْثْ زدّْغنْ شَا،
نِيثْنِي أَذْ ژُّونْ ثِيزَايَارِينْ،
مَاشَا وَارْ سسّنْ زِي بِينُو نّسْ.
14 أَسّْ أَمقّْرَانْ ن سِيذِي يُوذسْ،
أَقَا-ث يُوذسْ، ذغْيَا يُوسَا-د.
ڒْْحسّْ ن وَاسّْ ن سِيذِي!
أَذْ إِسْغُويْ بُو-ثغْرُوضْثْ ذِينْ
س يِيشْثْ ن ثْغُويِّيثْ ثَارْزڭْ. ◘1:14 يُووِ. 2:10، 31؛ 3:15؛ إِشا. 13:6-13؛ 24:23؛ Am. 8:9؛ مت. 24:29؛ ڒخ. 2:20؛ أَسَا. 6:12-13
15 أَسّْ نِّي أَذْ يِيڒِي
ذ أَسّْ ن ؤُذُوقّزْ ن ؤُفُوڭمْ،
ذ أَسّْ ن ڒحْصَارثْ ذ ضِّيقَا،
ذ أَسّْ ن ؤُخَارّبْ ذ وَاردّدْجْ،
ذ أَسّْ ن طّْڒَامْ ذ ثَادْجسْثْ،
ذ أَسّْ ن إِسيْنُوثنْ ذ ؤُسيْنُو إِبُّومْبسْ،
16 إِجّْ ن وَاسّْ ن ؤُسُوضِي ذڭْ ؤُيِيشّْ ن إِشَارِّي
ؤُ ن إِغُويَّانْ ن ؤُمنْغِي
ضِيدّْ إِ ثْندَّامْ إِفَارْينْ
ؤُ ضِيدّْ إِ صُّومْعَاثْ نِّي إِدْجَانْ
غَارْ ثْغمُّورَا.
17 نشّْ أَذْ حْصَارغْ إِوْذَانْ
ؤُ نِيثْنِي أَذْ ؤُيُورنْ أَمْ يِيذَارْغَاڒنْ،
مِينْزِي نِيثْنِي ڭِّينْ دّنْبْ خْ سِيذِي.
إِذَامّنْ نْسنْ أَذْ تّْوَازدْجْعنْ
أَمشْنَاوْ ثْعجَّاجْثْ،
ذ ويْسُومْ نْسنْ أَمشْنَاوْ إِخَّانْ.
18 ؤُڒَا ذ نُّوقَارْثْ نْسنْ ذ وُورغْ نْسنْ
وَارْ زمَّارنْ أَذْ ثنْ سّْنجْمنْ
ذڭْ وَاسّْ ن ؤُذُوقّزْ ن ؤُفُوڭمْ ن سِيذِي.
ثِيمسِّي ن ثُوسْمِي نّسْ إِقدّْسنْ
أَذْ ثشّْ مَارَّا ثَامُّورْثْ،
مَاغَارْ ذغْيَا نتَّا أَذْ إِقْضَا
مَارَّا إِمزْذَاغْ ن ثمُّورْثْ. ◘1:18 أَوڒن. 11:4؛ حِز. 7:19؛ صَاف.1:14-16
◼1:1 1:1 ’صَافَانْيَا‘ - إِسمْ-أَ وَانِيثَا إِخْسْ أَذْ يِينِي ’ونِّي ث إِسّْنُوفَّارنْ سِيذِي‘.
◘1:3 1:3 أَمز. 6:7
◼1:4 1:4 ’أَذْ ثحِّيغْ‘ - س ثْعِيبْرَانِيثْ ’أَذْ قضْعغْ‘.
◘1:6 1:6 إِشا. 1:4؛ 59:13؛ إِرْم. 15:6
◘1:14 1:14 يُووِ. 2:10، 31؛ 3:15؛ إِشا. 13:6-13؛ 24:23؛ Am. 8:9؛ مت. 24:29؛ ڒخ. 2:20؛ أَسَا. 6:12-13
◘1:18 1:18 أَوڒن. 11:4؛ حِز. 7:19؛ صَاف.1:14-16