1 Ḥiram, ajeǧid n Ṣur, issekk ireqqasen ɣar Dawud ak-d tcejjura n tengelt, d ineqqacen n weẓru n řḥiḍ d ineqqacen n ukeccuḍ. Nitni ssbedden as ict n taddart. ◘14:1 [1 Ṣm. 5:11-25] 2 Dawud issen, aqa SIDI tuɣa igga i-t d ajeǧid x Israil, maɣar issgeɛɛed SIDI tagelda nnes aṭṭas di ṭṭweɛ n řgens nnes Israil.

3 Dawud iksi ɛad timɣarin nneɣnit di Urcalim u Dawud yarni ijja-dd ɛad arrawen d tḥenjirin nneɣni. 4 Ina d ismawen n warrawen i ɣares-dd ittwarwen di Urcalim: Cammuɛ, Cubab, Natan, Suliman, 5 Ibḥar, Ilicuɛ, Ilfalaṭ, 6 Nujah, Nafaj, Yafiɛ, 7 Ilicamaɛ, Baɛalyadaɛ d Ilifalaṭ.

8 Umi sřin Ifilisṭiniyyen, aqa dehnen Dawud d ajeǧid x Israil, geɛɛden marra Ifilisṭiniyyen ḥima ad arzun x Dawud. Dawud isřa i man aya uca iffeɣ maḥend ad kidsen imsagar. 9 Usin-dd Ifilisṭiniyyen uca bezzɛen ixef nsen di teɣzurt n Irafawiyyen. 10 Xenni isseqsa Dawud AREBBI, inna: “Ma ad geɛɛdeɣ ḍidd i Ifilisṭiniyyen? Ma ad ten tegged deg ufus inu?” Inna as SIDI: “Geɛɛed, Necc ad ten ggeɣ deg ufus nnec!” 11 Nitni geɛɛden ɣar Baɛl-Faraṣim. Dinni iwta Dawud Ifilisṭiniyyen, inna: “S ufus inu icuq AREBBI di řɛedyan inu am waman arẓin ijj n řḥiḍ.” X uya ggin as i wemcan nni Baɛl-Faraṣim. 12 Ifilisṭiniyyen jjin irebbiten nsen dinni, uca yumur Dawud maḥend ad ten sscemḍen s tmessi.

13 Ifilisṭiniyyen geɛɛden ɛawed uca bezzɛen ixef nsen di řewḍa n teɣzurt. 14 Dawud isseqsa AREBBI u AREBBI inna as: “War ttgiɛɛid ca awarni asen, maca nneḍ asen-dd, ad ɣarsen dd-tased zeg uɣezdis n tcejjura n umetti. 15 Xmi ɣa tesřed i tecři n iṣuraf di tqiccat n tcejjura n umetti, xenni ad teffɣed ɣar umenɣi, maɣar xenni ad ac yizwar AREBBI zzat i wudem nnec, ḥima ad iwwet řɛeskar n Ifilisṭiniyyen.” 16 Dawud igga am mammec d as yumur AREBBI, u nitni wtin řɛeskar n Ifilisṭiniyyen zi Jibɛun ař Jazar. 17 Ammu i iffeɣ isem n Dawud di marra timmura, uca SIDI issiweḍ tiggʷudi zzayes x marra řegnus.