1 Issiweř Cawul ak-d mmis Yunatan u ak-d imsexxaren nnes belli ittxeṣṣa ad nɣen Dawud. Maca Yunatan, mmis n Cawul, tuɣa issɛizz xas Dawud aṭṭas. 2 Iḥaja Yunatan x uya i Dawud, inna: “Baba Cawul yarezzu ad cek ineɣ. Xenni řexxu, raja ař tiwecca. Adef ɣar wemcan n usneffar u xemmeř ixef nnec. 3 Necc ad ffɣeɣ, ad beddeɣ ak-d baba deg weḥwic mani ɣa tiřid cek. Ad xak ssiwřeɣ ak-d baba, ad xzareɣ mammec ggurent tmesřayin. Xenni ad cek ssargbeɣ.”

4 Yunatan issiweř s tizi n Dawud ak-d babas, inna as: “Ittxeṣṣa ujeǧid war ittegg ca ddenb deg umsexxar nnes Dawud, maɣar uřa d netta war dayek iggi ca ddenb, u timegga nnes aqa atent d řefḍeř i cek aṭṭas. 5 Netta isebbeř tudart nnes, iɣřeb x Ufilisṭini u SIDI yiwiḍ ijj n usenjem d ameqqran i marra Israil. Cek teẓrid t simant nnec u tfarḥed. Mayemmi texsed ad texḍid x idammen imezdagen ařami ɣa tenɣed Dawud břa ssibbet?” 6 Cawul isřa ɣar Yunatan u Cawul ijjuǧ: “S tidett am iddar SIDI, netta war ittwaneqq ca!” ◼19:6 ɣar Yunatan - s Tɛibranit ‘ɣar tmijja n Yunatan’. 7 Uca iřaɣa Yunatan x Dawud, iḥaja as Yunatan marra awařen-a. Xenni indeh Yunatan Dawud ɣar Cawul u netta tuɣa-t zzat i wudem nnes am iḍennaḍ d fariḍennaḍ.

8 Yiweḍ-dd umenɣi ɛawed uca iffeɣ Dawud, immneɣ ak-d Ifilisṭiniyyen. Netta ihettek i-ten s ict n tecti d tameqqrant u nitni ṭṭfen tarewřa zzat i wudem nnes.

9 Maca řaryaḥ d aɛeffan n SIDI iwḍa-dd ɛawed x Cawul. Umi netta iqqim di taddart nnes, imneɛ lansa deg ufus nnes umi tuɣa Dawud ittirar s ufus nnes x řgambri. ◘19:9 1 Ṣm. 16:14; 18:10 10 Cawul tuɣa yarezzu ad isemmar Dawud di řḥiḍ s lansa nnes, maca netta ixnes as i Cawul u netta iřqef řḥiḍ s lansa. Dawud yarweř, issenjem ixef nnes ǧiřet nni.

11 Issekk Cawul ireqqasen ɣar taddart n Dawud, ḥima ad t ḥḍan u ad t nɣen ɣar tuffut. Maca Mixal, tamɣart n Dawud, tḥaja xas i Dawud, tenna: “Mařa cek war tessnejmed ixef nnec di ǧiřet-a, ad tᵉttwanɣed tiwecca.” 12 Mixal tessehwa Dawud zi řkazi. Xenni yuyur, yarweř uca issenjem ixef nnes. 13 Xenni teksi Mixal ijj n řexyař n ṣṣanam, tessars i-t di qama uca tegga ict n thiḍurt n cɛar n iɣayḍ ɣar mani iǧa uzeǧif u tedřa i-t s yijj n warruḍ.

14 Cawul issekk ireqqasen maḥend ad dd-awyen Dawud, maca nettat tenna: “Netta ihřec.” 15 Xenni issekk Cawul ireqqasen maḥend ad ssijjen x Dawud, inna: “Awyem t-i-dd di tassut ɣari da, ḥima ad t nɣeɣ.” 16 Umi dd-usin ireqqasen, xzar, aqa din ijj n řexyař n ṣṣanam di qama d ict n thiḍurt n cɛar n iɣayḍ ɣar mani iǧa uzeǧif nnes. 17 Uca inna Cawul i Mixal: “Mayemmi d ayi teɣdared ammu, tejjid řeɛdu inu ad yarweř, ařami issenjem ixef nnes?” Mixal tarra-dd x Cawul: “Netta inna ayi: ‘Ejj ayi ad uyureɣ, mayemmi i cem i ɣa nɣeɣ?’ ”

18 Ammu yarweř Dawud, issenjem ixef nnes uca yusa-dd ɣar Camwil di Rama, iḥaja as marra min tuɣa i d as igga Cawul. Xenni yuyur netta jmiɛ ak-d Camwil, qqimen di Nayut. 19 Uca ḥajan aya i Cawul, nnan: “Dawud aqa-t di Nayut ɣar Rama.” 20 Xenni issekk Cawul ireqqasen, ḥima ad awyen Dawud. Nitni ẓrin tarbiɛt n inabiyyen nni ittnebban. Tuɣa Camwil ibedd ɣarsen d ameḥḍay, uca ihwa-dd Arruḥ n AREBBI x ireqqasen n Cawul ařami uřa d nitni bdan ad nebban. 21 Umi ittwanna aya i Cawul, issekk netta ireqqasen nneɣni, maca uřa d nitni bdan ad nebban. Yarni Cawul deg usekki n ireqqasen i twařa wiss třata, uca uřa d nitni bdan ad nebban. 22 Xas uca yuyur netta simant nnes ɣar Rama. Yiweḍ netta ɣar wanu ameqqran di Sixu, isseqsa, inna: “Mani ǧan Camwil d Dawud?” Nnan as: “Xzar, aqa aten di Nayut ɣar Rama.” 23 Xenni yuyur din ɣar Nayut ɣar Rama, u ihwa-dd xas Arruḥ n AREBBI. Netta tuɣa iggur am ittnebba ař dd-yiweḍ ɣar Nayut ɣar Rama. 24 Uřa d netta ikkes arruḍ nnes uca uřa d netta ittnebba zzat i wudem n Camwil. Ass nni d ǧiřet tmun izzeř din d aqeddid. X uya qqaren: “Ma uřa d Cawul jar inabiyyen?”