1 Mmenɣen Ifilisṭiniyyen ak-d Israil. Iryazen n Israil arewřen zzat i wudem n Ifilisṭiniyyen uca wḍan d imettan x temmurt n idurar n Jilbuɛa. ◘31:1 [1 Im. 10:1-12] 2 Ifilisṭiniyyen ḍfaren Cawul d arraw nnes břa qeṭṭu uca Ifilisṭiniyyen nɣin Yunatan d Abinadab d Malkicuɛa, arraw n Cawul. 3 Idweř umenɣi ak-d Cawul iwɛar. Imjebbaden, iryazen s řqews, ufin t u netta tuɣa itteggʷed aṭṭas zeg imjebbaden n řqews.

4 Xenni inna Cawul i uḥemmař n řesnaḥ nnes: “Suffeɣ-dd ssif nnec, snuqqeb ayi zzayes! Niɣ ad taɣ ad dd-asen inni war ittwaxetnen, maḥend ad ayi ssnuqqben u ad zzayi stehzan.” Maca aḥemmař n řesnaḥ nnes war ixs ad tt igg, maɣar netta tuɣa iggʷed aṭṭas. Xenni iksi Cawul ssif uca ijja ixef nnes ad xas iwḍa. 5 Umi aḥemmař n řesnaḥ iẓra, aqa Cawul immut, igga uřa d netta ad iwḍa s yixef nnes x ssif nnes uca immut akides. 6 Ammu i immut Cawul deg wass nni, imun ak-d třata n iḥenjiren nnes u ak-d uḥemmař n řesnaḥ nnes uřa ak-d marra iryazen nnes.

7 Umi ẓrin yeryazen n Israil, inni tuɣa ɣar uɣezdis nneɣni n řewḍa n teɣzurt d inni tuɣa x ujemmaḍ n L’Urdun, aqa iryazen n Israil arewřen u aqa Cawul d třata n iḥenjiren nnes ttwanɣen, semḥen nitni di tneddam nsen uca arewřen. Řexdenni usin-dd Ifilisṭiniyyen uca dewřen zeddɣen daysent. 8 Tiwecca nnes, umi dd-usin Ifilisṭiniyyen, ḥima ad keccḍen inni ittwanɣen, imsar, aqa ufin Cawul d třata n iḥenjiren nnes, inni tuɣa iwḍan x wedrar n Jilbuɛa. 9 Nitni qessen as azeǧif, ssarxun as řesnaḥ uca ssekken ireqqasen di temmurt n Ifilisṭiniyyen, ḥima ad ssiwḍen řexbar aṣebḥan ɣar taddart n řexyařat n l’aṣnam nsen u jar řgens. ◘31:9 1 Im. 10:9 10 Řesnaḥ n Cawul ssarsen t di taddart n zzawect n ‘Ɛactarutin’, u řxecbet nnes uyřen tt ɣar řḥiḍ n Bayt-Can.

11 Umi imezdaɣ n Yabic-Jilɛad sřan min ggin Ifilisṭiniyyen di Cawul, 12 kkaren marra iryazen imeḥḍen, uyuren ǧiřet tmun uca ksin řxecbet n Cawul d řxecbat n iḥenjiren nnes zi řḥiḍ n Bayt-Can uca iwḍen ɣar Yabic uca sscemḍen tent dinni. 13 Xenni ksin iɣsan nsen, neḍřen ten sadu tacejjart n tmarist n Yabic uca ẓummen sebɛa n wussan. ◼31:13 tacejjart n tmarist - s tlatinit ‘Tamarix’.