1 Raḥabɛam yusa-dd ɣar Urcalim uca issmun marra taddart n Yahuda d Binyamin, mya u-tmenyin-ařef n iryazen ittwafarzen, ttwadarrben x umenɣi, ḥima ad mmenɣen ak-d taddart n Israil, ḥima ad dd-arren tageldit ɣar Raḥubɛam. 2 Xenni yusa-dd wawař n AREBBI ɣar Camɛiya, aryaz n AREBBI, inna: 3 “Siweř ak-d Raḥabɛam, mmis n Suliman, ajeǧid n Yahuda, u ak-d marra Israil di temmurt n Yahuda d Binyamin, uca ini: 4 ‘Ammu i iqqar SIDI: War ttgeɛɛadem ca u war ttmenɣim ca ak-d aytmatwem. Ittxeṣṣa ad iɛqeb kuř ijj n weryaz ɣar taddart nnes, maɣar d man aya i imsaren zi ɣari.’ ” Nitni sřan ɣar wawař n SIDI uca ɛeqben, war uyuren ca ɣar Yarubɛam.

5 Raḥabɛam izdeɣ di Urcalim uca igga tineddam di Yahuda ad dewřent faryent. 6 Ibna Bayt-Laḥam, Ɛiṭam, Taquɛa, 7 Bayt-Ṣur, Suku, Ɛadullam, 8 Jat, Marica, Zif, 9 Adurayim, Laxis, Ɛaziqa, 10 Ṣurɛa, Ayyalun d Ḥabrun nni iǧan di Yahuda d Binyamin. Aqa-tent d tneddam ifaryen. 11 Issejhed lqelɛat u igga xasen řḥukkam u ixzen daysent macca, zzect d binu. 12 Issars tiseddariyin n uɛeskari timeqqranin d iḥricen di kuř tendint uca issejhed i-tent ař ṭṭarf. Ammu i tuɣa Yahuda d Binyamin deg ufus nnes.

13 Ikehhanen d Ilawiyyen nni iǧan di marra Israil, qqnen ɣares zi marra jjwayeh nsen. 14 Minzi Ilawiyyen jjin ddmani nsen d wagřa nsen uca usin-dd ɣar Yahuda d Urcalim, maɣar Yarubɛam d iḥenjiren nnes mmenḍaren ten zi tukehhant n SIDI. 15 Xenni yařeqqem Yarubɛam ikehhanen i yixef nnes i řegɛudi, i řexyařat n imuyan ijennen u i řexyařat n iɛejmiyyen nni tuɣa igga. ◼11:15 iɛejmiyyen - niɣ ‘amwa’, ‘ayenduz’ niɣ ‘yuggu’. 16 Awarni asen usin-dd ɛawed zi marra tiqebbař n Israil inni iwcin ixef nsen s wuř ḥima ad arzun SIDI, AREBBI n Israil, ḥima ad wehhben tiɣarṣa i SIDI, AREBBI n řejdud nsen. 17 Ammu ssjehden tageldit n Yahuda u ssmetnen Raḥabɛam, mmis n Suliman, třata n iseggʷusa. Maɣar nitni uyuren třata n iseggʷusa deg webrid n Dawud d Suliman.

18 Raḥabɛam yiwi Maḥlat, yeǧis n Yarimut, mmis n Dawud, uřa d Abiḥayil, yeǧis n Iliyab, mmis n Yassa, d tamɣart i yixef nnes. 19 Nettat turuw as-dd iḥenjiren-a: Yaɛuc, Camarya d Zaham. 20 Awarni as yiwi Maɛka, yeǧis n Abcalum d tamɣart. Nettat turuw as-dd Abiya, Ɛattay, Ziza d Calumit. 21 Raḥabɛam tuɣa ittexs Maɛka, yeǧis n Abcalum, aṭṭas x temɣarin nnes nneɣnit d x tiyya nnes. Aqa yiwi Raḥabɛam tmenṭac n temɣarin d settin n tiyya. Netta yejj-dd tmenya u-ɛicrin n iḥenjiren d settin n yessis. 22 Raḥabɛam igga Abiya, mmis n Maɛka, d azeǧif, ḥima ad yiři d řḥakem jar aytmas, ḥima ad t yarr d ajeǧid. 23 Raḥabɛam igga s řeɛqeř uca ibḍa marra iḥenjiren nnes x marra timmura n Yahuda d Binyamin u di marra tineddam ifaryen. Netta iwca asen macca s waṭṭas u yarzu asen ijj n ubarru n temɣarin.