1 Yuwac tuɣa ɣares sebɛa n iseggʷusa umi idweř d ajeǧid. Netta iḥkem arebɛin n iseggʷusa di Urcalim. Yemmas qqaren as Ḍibya zi Bi’r-Sebɛa. ◘24:1 [2 Ij. 12:1-22] 2 Yuwac igga min iǧan nican di tiṭṭawin n SIDI, marra ussan i tuɣa akehhan Yahuyadaɛ iddar. 3 Yahuyadaɛ yiwi as tnayen n temɣarin u netta ijja-dd iḥenjiren d tḥenjirin. 4 Awarni uya tuɣa inwa Yuwac s wuř, ḥima ad iɛdeř Taddart n SIDI. 5 Issmun ikehhanen d Ilawiyyen, inna asen: “Kkem x tneddam n Yahuda u yarwem ijj n řqedd n nnuqart di kuř aseggʷas zi marra Israil, ḥima ad tɛedřem Taddart n AREBBI. Bdam deɣya s uya!” Maca Ilawiyyen war qeǧqen ca.

6 Ajeǧid iřaɣa i uzeǧif Yahuyadaɛ, inna as: “Mayemmi war tesseqsid Ilawiyyen x mammec dd-iffeɣ wesmuni zi Yahuda d Urcalim n tewhibt n usgeɛɛed n Musa, amsexxar n SIDI, uřa n wegraw n Israil di ṭṭweɛ n Uqiḍun n Cchadet? 7 Aqa iḥenjiren n Ɛatalya taɛeffant arẓin Taddart n AREBBI uca ssmuṭṭiyen marra řeqcuɛ iqeddsen n Taddart n SIDI ɣar ‘Ibaɛlen’.”

8 Ajeǧid yumur, ḥima ad ggen ict n tṣenduqt u nitni ssarsen tt barra ɣar tewwart n Taddart n SIDI. 9 Xenni řaɣan di Yahuda d Urcalim, ḥima ad yarwen i SIDI tawhibt n usgeɛɛed nni igga Musa, amsexxar n AREBBI, x Israil di řexřa. 10 Marra imeqqranen d marra řgens tuɣa farḥen u nitni iwyen-dd tiwhibin uca nḍaren tent di tṣenduqt ařami teccur. 11 Di řweqt umi dd-ssidfen tasenduqt x řumur n ujeǧid s ufus n Ilawiyyen uca ẓrin aqa dayes aṭṭas n nnuqart, imsar, aqa yusa-dd umarir n ujeǧid d uweqqaf n ukehhan ameqqran uca ssexwan nitni tasenduqt, ssgeɛɛden tt u iwyen tt ɛawed ɣar wemcan nnes. Ammu i ggin nitni ass iḍfar umas uca ssmunen-dd aṭṭas n nnuqart.

12 Ajeǧid d Yahuyadaɛ wcin aya xenni i imḍebbaren n řxedmet di ṭṭweɛ n Taddart n SIDI. Nitni cran isuydayen d ineqqacen n ukeccuḍ, ḥima ad ɛedřen Taddart n SIDI, uřa d imziřen n wuzzař d nnḥas, ḥima uřa d nitni ad ɛedřen Taddart n SIDI. 13 Ixeddamen tuɣa xeddmen řebda u sadu ufus nsen tuyur řxedmet nican ɣar zzat. Nitni arrin Taddart n AREBBI am mammec tt tuɣa amezwaru u arnin di řemten nnes. 14 Řami kemmřen nitni řxedmet, iwyen min iqqimen n nnuqart zzat i wudem n ujeǧid u zzat i Yahuyadaɛ uca igga zzayes řeqcuɛ i Taddart n SIDI, řeqcuɛ i tsexxart u i tewhibin n wecmaḍ, tiɣenjayin d řeqcuɛ n wureɣ d nnuqart. Marra ussan nni ikka Yahuyadaɛ iddar, ttawyen řebda tiɣarṣa n wecmaḍ i Taddart n SIDI.

15 Yahuyadaɛ iwsar u uzan ɣares wussan n tudart, uca immut. Netta tuɣa ɣares mya u-třatin n iseggʷusa umi immut. 16 Neḍřen t jar ijeǧiden di tendint n Dawud, maɣar tuɣa igga min iǧan nican di Israil, am i AREBBI, am i Taddart nnes.

17 Awarni i řmewt n Yahuyadaɛ usin-dd řḥukkam n Yahuda uca bendqen i ujeǧid, uca isřa ɣarsen ujeǧid. 18 Nitni semḥen di Taddart n SIDI, AREBBI n řejdud nsen, uca sexxaren i trebbin n cwarti d řexyařat n l’aṣnam. Xenni idweř uduqqez d ameqqran n weɣḍab x Yahuda u x Urcalim di ssibbet n řmuɛṣiyyet nsen. 19 Netta issekk jar asen inabiyyen, ḥima ad ten yarra ad ɛeqben ɣar SIDI. Nitni cehden xasen, maca war d asen sřin ca. ◼24:19 Netta - wanita d SIDI. 20 Arruḥ n AREBBI ihwa-dd x Zakariyya, mmis n ukehhan Yahuyadaɛ. Netta ibedd x ijj n ddruj zzat i řgens, inna asen: “Ammu i iqqar AREBBI: ‘Mayemmi tᵉttɛeddam x řumurat n SIDI? Ammu war tᵉttefřiḥem ca. Minzi tḥeyydem x SIDI, ad xawem iḥeyyed Netta.’ ” 21 Nitni ggin xas ict n tmeɛmuč u ḥejjaren t x řumur n ujeǧid di řemraḥ n Taddart n SIDI. 22 Ajeǧid Yuwac war ixarreṣ di tmexsiwt icewwaren, tenni i d as tuɣa isscen Yahuyadaɛ, babas n Zakariyya, uca Yuwac inɣa mmis n Yahuyadaɛ. Umi immut, inna Zekariya: “SIDI ad t iẓar, ad yarzu ad t ixřef!”

23 Ɣar uneqřeb n useggʷas, imsar, aqa issgeɛɛed řɛeskar n Aram x Yuwac. Nitni usin-dd ɣar Yahuda d Urcalim u sshellken zi řgens marra řḥukkam n řgens uca ssekken marra takeccaḍt nsen ɣar ujeǧid n Dimacq. 24 Waxxa tuɣa řɛeskar n Aram drus n yeryazen waha, aqa SIDI igga asen ijj n řɛeskar d ameqqran deg ufus nsen, umi nitni ḥeyyden x SIDI, AREBBI n řejdud nsen. Nitni ggin řeḥkamat x Yuwac. 25 Umi xas ffɣen nitni, aqa jjin t ihřec aṭṭas. Ggin xas imsexxaren nnes ict n tmeɛmuč di ssibbet n idammen i issizzeř Yuwac jar iḥenjiren n ukehhan Yahuyadaɛ. Nɣin t am iǧa di tassut nnes. Neḍřen t di tendint n Dawud, maca war t nḍiřen ca di tmeḍřin n ijeǧiden. 26 Ina d inni i xas iggin ict n tmeɛmuč: Zabad, mmis n Cimɛa, Taɛammunect, u Yahuzabad, mmis n Cimrit, Tamu’abect. 27 X iḥenjiren nnes u x řqedd n min i xas ggin inabiyyen u x dsas n Taddart n AREBBI, xzar, aqa man aya marra yura di tira n wedlis n ijeǧiden. Mmis Amaṣya idweř d ajeǧid deg wemcan nnes.