1 Yutam tuɣa ɣares xemsa u-ɛicrin n iseggʷusa umi idweř d ajeǧid. Netta iḥkem seṭṭac n iseggʷusa di Urcalim. Yemmas qqaren as Yaruca, yeǧis n Ṣaduq. ◘27:1 [2 Ij.15:32-38] 2 Netta igga min iǧan nican di tiṭṭawin n SIDI, nican am mammec t igga babas Ɛuzziya, maca netta war yudif ca ɣar Zzawect Tameqqrant n SIDI. Řgens maca tuɣa ɛad ifsed ixef nnes aṭṭas. 3 Netta ibna Tawwart Yuɛřan n Taddart n SIDI. Uřa ɣar řḥiḍ n Ɛufil ibna aṭṭas. 4 Ibna tineddam di Temmurt n Idurar n Yahuda u deg izeɣran ibna lqelɛat d ṣṣumɛat. 5 Netta immneɣ ak-d ayt n Ɛammun u iɣřeb xasen, ařami ayt n Ɛammun ssiwḍen ɣares deg useggʷas nni ɛad mya talint n nnuqart d ɛecra-ařaf n ikuruten n irden d ɛecra-ařaf ikuruten n imendi. Uřa deg useggʷas wiss tnayen d wiss třata ssiwḍen ayt n Ɛammun ɣares man aya ɛawed. 6 Ammu i idweř Yutam ijhed, maɣar issewjed ibriden nnes zzat i wudem n SIDI, AREBBI nnes.

7 Imezruyen iqqimen n Yutam, d marra imenɣan i immneɣ d marra ibriden nnes, aqa ttwazemmemen deg wedlis n imezruyen n ijeǧiden n Yahuda. 8 Tuɣa ɣares xemsa u-ɛicrin n iseggʷusa umi idweř d ajeǧid. Netta iḥkem seṭṭac n iseggʷusa di Urcalim. 9 Yutam igga ad yareyyeḥ jar řejdud nnes. Netta ittwanḍeř di tendint n Dawud. Mmis Aḥaz idweř d ajeǧid deg wemcan nnes.