1 Yuciya tuɣa ɣares tmenya n iseggʷusa umi idweř d ajeǧid. Netta iḥkem waḥit u-třatin n iseggʷusa di Urcalim. Yemmas qqaren as Yadidya, yeǧis n Ɛadaya zi Buṣqat. ◘22:1 [2 Im. 34:1-28] — 2 Im. 34:1 2 Netta igga min iǧan nican di tiṭṭawin n SIDI. Netta yuyur di kuř abrid n babas Dawud, war iḥeyyed x webrid ɣar yefus uřa ɣar uzeřmaḍ.

3 Deg useggʷas wiss tmenṭac n ujeǧid Yuciya, imsar belli ajeǧid Yuciya issekk amarir Cafan, mmis n Aṣalya, mmis n Macullam, ɣar Taddart n SIDI, inna: 4 “Geɛɛed ɣar Ḥilqiya, arrays n ikehhanen, ḥima ad yegg ad sswejden tmenyat n nnuqart i dd yiwyen di Taddart n SIDI, d tinni i dd-yarwen iɛessasen n tewwura zi řgens. 5 Ejj i-ten ad tent ggen deg ifassen n yinni itteggen řxedmet, deg ifassen n imeḥḍayen n Taddart n SIDI, ḥima nitni ad tent wcen i yinni itteggen řxedmet i din iǧan di Taddart n SIDI, ḥima ad areqqɛen řeḥyuḍ ihruran n Taddart, 6 i ineqqacen n ukeccuḍ d weẓru, i ibennayen d imaṣṣuten, u i tmesɣiwt n ukeccuḍ d tṣuḍar ittwassuydan i weɛdař n Taddart.” 7 Maca war ittxeṣṣi maḥend ad kidsen ggen řeḥsab zi jjihet n ttmenyat n nnuqart i d asen immewcen, maɣar nitni tteggen s utiqqi.

8 Xenni inna arrays n ikehhanen Ḥilqiya i umarir Cafan: “Necc ufiɣ adlis ittwannḍen n Ccariɛa di Taddart n SIDI.” Uca iwca Ḥilqiya i Cafan adlis ittwannḍen u wanita iɣra i-t. 9 Awarni as yuyur umarir Cafan ɣar ujeǧid uca issiweḍ řexbar i ujeǧid, inna: “Imsexxaren nnec ssmunen ttmenyat n nnuqart nni ittwafen di Taddart, farrɣen tent uca wcin tent deg ifassen n yinni iggin řxedmet, i imeḥḍayen n Taddart n SIDI.” 10 Ɛawed iḥaja umarir Cafan i ujeǧid, inna: “Akehhan Ḥilqiya iwca ayi ijj n wedlis.” Cafan iɣra i-t zzat i wudem n ujeǧid.

11 Umi isřa ujeǧid awařen n wedlis ittwannḍen n Ccariɛa, icarreg arruḍ nnes. ◼22:11 Umi isřa - s Tɛibranit ‘Imsar umi isřa ...’. 12 Ajeǧid yumur i ukehhan Ḥilqiya u i Axiqam, mmis n Cafan, u i Ɛakbur, mmis n Mixa-Yah, u i Cafan, amarir, u i Ɛasaya, amsexxar n ujeǧid, inna: 13 “Uyurem, arzum SIDI di ṭṭweɛ inu u di ṭṭweɛ n řgens u di ṭṭweɛ n marra Yahuda zi jjihet n wawařen-a n wedlis-a ittwannḍen i ittwafen, maɣar asɛar n SIDI i yarɣin ḍidd nneɣ d ameqqran, minzi řejdud nneɣ war sřin ca ɣar wawařen n wedlis-a ittwannḍen, ḥima ad ggen am mammec marra min dayes yuran i neccin.”

14 Xenni yuyur ukehhan Ḥilqiya ak-d Axiqam, Ɛakbur, Cafan d Ɛasaya ɣar tnabit Xulda, tamɣart n Callum, mmis n Tiqwa, mmis n Ḥarḥas, wenni iḥeṭṭan x warruḍen. Nettat tezdeɣ di Urcalim, deg wezyen nneɣni. Nitni ssiwřen akides. 15 Nettat tenna asen: “Ammu i iqqar SIDI, AREBBI n Israil: ‘Ini i weryaz nni kenniw i ɣari dd-issekken: 16 Ammu i iqqar SIDI: Xzar, Necc ad awyeɣ tuɛeffna x wemcan-a u x imezdaɣ nnes, aqa marra awařen n wedlis-a ittwannḍen i iɣra ujeǧid n Yahuda, 17 maɣar nitni semḥen dayi, iwyen tiwhibin n řebxur i irebbiten nneɣni ařami dayi sɛaren s marra řxedmet n ifassen nsen. Asɛar inu ad ittwassarɣ ḍidd i wemcan-a u war ixessi ca ɛad. 18 Maca inim i ujeǧid n Yahuda, wenni kenniw dd-issekken da ḥima ad tᵉttarem i SIDI: Ammu i iqqar SIDI, AREBBI n Israil, x wawařen i tesřid cek: 19 Minzi uř nnec idweř yarḍeb u tesswaḍɛed ixef nnec zzat i wudem n SIDI umi tesřid x min ssiwřeɣ x wemcan-a u x imezdaɣ nnes - aqa nitni ad dewřen d ict n řqecɛet n unexřiɛ d nneɛřet - u umi tcarrged arruḍ nnec uca trud zzat i wudem inu, x uya ad ac sřiɣ, iqqar SIDI. 20 S uya, aqa Necc ad cek ssmuneɣ ɣar řejdud nnec uca ad ttwassarsed deg wenḍeř di řehna u tiṭṭawin nnec war ẓarrent tuɛeffna i d ɣa awyeɣ x wemcan-a.’ ” Xenni ssiwḍen nitni awař-a ɣar ujeǧid.