1 Xenni innexřeɛ ujeǧid aṭṭas, igeɛɛed ɣar wexxam i iǧan sennej i tewwart, iru. Uca am ikka ssa d ssa, inna ammu: “A mmi Abcalum, a mmi, a mmi Abcalum! Iři necc mmuteɣ deg wemcan nnec, a Abcalum, a mmi, a mmi!” 2 Nnan i Yuwab: “Xzar, ajeǧid ittru, ittecḍin x Abcalum.” 3 Deg wass nni idweř usenjem n marra řgens ɣar wecḍan, maɣar řgens isřa deg wass nni: “Ajeǧid icḍen x mmis.” 4 Deg wass nni yudef-dd řgens ɣar tendint am mammec ittḥama řgens i ittseḍḥa ixef nnes, xmi ttarekkʷařen zeg umenɣi.

5 Ajeǧid tuɣa iřeḥḥef i uɣembub nnes, ittřaɣa ujeǧid s tmijja ijehden: “A Mmi Abcalum, Abcalum, a mmi, a mmi!” 6 Xenni yudef Yuwab ɣar ujeǧid di taddart, inna: “Cek ass-a tessḥecmed udem n marra imsexxaren nnec inni dd-ifekken ass-a řeɛmar nnec d řeɛmar n iḥenjiren nnec d tḥenjirin nnec uřa d řeɛmar n temɣarin nnec d řeɛmar n tiyya nnec, 7 umi texsed inni cek ittɛiffen u umi tɛiffed inni cek ittexsen. Maɣar cek tewcid aneɣ ass-a ad nessen, aqa ɣarek imeqqranen d imsexxaren war sekkwin walu. Iwa ass-a ssneɣ, mařa Abcalum iddar u neccin marra tuɣa nemmut, man aya ad yiři nican di tiṭṭawin nnec. 8 Xenni řexxu, kkar, ffeɣ ɣar barra, uca siweř ɣar wuř n imsexxaren nnec, maɣar necc ad ac jjaǧeɣ ɣar SIDI, mařa cek war teffiɣed ɣar barra, xenni ǧiřet-a war ittɣimi ad ɣarek issens uřa d ijj n weryaz. D man aya ad yiři mahu i cek x marra tuɛeffna i cek iřeqfen zi temẓi nnec ař iḍa.” 9 Xenni ikkar ujeǧid, iqqim di tewwart n tendint. U nitni xebbaren marra řgens, nnan: “Xzar, ajeǧid iqqim di tewwart.” Uca yusa-dd marra řgens zzat i wudem n ujeǧid. Maca Israil yarweř, kuř aryaz ɣar iqiḍan nnes.

10 Uca marra řgens, di marra tiqebbař n Israil, tuɣa ittemcubbec, nitni nnan: “Ajeǧid issenjem aneɣ zeg ufus n řɛedyan nneɣ u netta ifekk aneɣ zeg ufus n Ifilisṭiniyyen u řexxu yarweř zi temmurt zi ssibbet n Abcalum, 11 umi Abcalum, wenni nedhen neccin d ajeǧid xaneɣ, immut deg umenɣi. Xenni řexxu, mayemmi tessusmem ammu ḥima ad dd-tarrem ajeǧid ɛawed ɣar da?” 12 Xenni issekk ajeǧid Dawud ijj n ureqqas ɣar ikehhanen Ṣaduq d Abyatar, inna: “Siweř ak-d imɣaren n Yahuda, ini: ‘Mayemmi texsem ad tiřim d ineggura ḥima ad tarrem ajeǧid ɣar taddart nnes?’ - minzi awařen n marra Israil iwḍen ɣar ujeǧid di taddart nnes - 13 ‘Kenniw d aytma inu, kenniw d iɣsan inu d weysum inu. Mayemmi texsem xenni ad tiřim d ineggura i d ɣa yarren ajeǧid?’ 14 Uca i Ɛamasa ad as tinim: ‘Ma war iǧi cek d iɣsan inu d aysum inu? Ejj AREBBI ad ayi igg ta d ta, mařa war tᵉttiřid d akumandar n řɛeskar deg wemcan n Yuwab zzat i wudem inu marra ussan.’ ” ◘19:14 2 Ṣm. 17:25 15 Ammu izemmar Dawud ad ɣares dd-ijbedd uř n marra iryazen n Yahuda am uř n ijj n weryaz u nitni ssekken ɣar ujeǧid nnan: “Ɛqeb, cek d marra imsexxaren nnec.”

16 Xenni iɛqeb-dd ujeǧid uca yiweḍ-dd ɣar L’Urdun, uca ayt n Yahuda usin-dd ɣar Jiljal i umsagar ak-d ujeǧid maḥend ad raḥen ad ɛawnen aẓekkʷi n ujeǧid x L’Urdun. 17 Uca Cimɛi, mmis n Jira, ijj zeg ayt n Binyamin zi Baxurim iksi deg uḍar nnes, ihwa ak-d yeryazen n Yahuda i umsagar ak-d ujeǧid Dawud. ◘19:17 2 Ṣm. 16:5; 1 Ij. 2:8 18 Tuɣa akides ɛawed ařef n yeryazen zi Binyamin, uřa d Ṣiba, amsexxar n taddart n Cawul ak-d xemmesṭac n iḥenjiren nnes d ɛicrin n imsexxaren nnes akides. Nitni iwḍen ad ɛdun L’Urdun qbeř i dd ɣa yas dinni ujeǧid. 19 Teẓwa tɣarrabut i useẓwi n taddart n ujeǧid u ḥima ad tegg min iǧan d lemliḥ di tiṭṭawin nnes. U Cimɛi, mmis n Jira, iwḍa s uɣembub nnes ɣar temmurt zzat i wudem n ujeǧid, umi dd-iẓwa wanita L’Urdun, 20 u netta inna i ujeǧid: “Ejj sidi inu war d ayi iḥesseb řmuɛṣiyyet inu, ejj i-t war ittidar ɛad deg ufaryeḍ i igga umsexxar nnec deg wass umi iffeɣ sidi inu ajeǧid zi Urcalim, ḥima ajeǧid war tt ikessi ammu ɣar wuř ḥima ad zzayi intaqem. 21 Maɣar amsexxar nnec issen: Necc, wah, necc xḍiɣ, maca xzar, necc ass-a d amezwaru zi marra taddart n Yusuf i dd-ihwan, ḥima ad msagareɣ sidi inu ajeǧid.”

22 Xenni yarra-dd Abicay, mmis n Ṣaruya, inna: “Zeɛma war ittxeṣṣi Cimɛi ad immet x man aya? Aqa netta inɛeř amedhun n SIDI.” 23 Maca Dawud inna: “Min jar ayi-dd akidwem, arraw n Ṣaruya, umi tdewřem ayi ass-a am ijj n weɣrim? Ma ittxeṣṣa ad ittwaneɣ ass-a ca n ijj di Israil? Axmi necc war ssineɣ, aqa necc ass-a dewřeɣ d ajeǧid x Israil?” 24 Ajeǧid inna i Cimɛi: “Cek war tᵉttmettid ca!” Uca ajeǧid ijjuǧ as t.

25 Uřa d Mafibucat, mmis n Cawul, yusa-dd i umsagar ak-d ujeǧid. Netta tuɣa war issird iḍaren nnes, u war iḥeff acřaɣem nnes u war iṣebben arruḍ nnes zeg wass i di iffeɣ ujeǧid ař ass i di dd-iɛqeb netta di řehna. 26 Umi dd-yusa di Urcalim i umsagar ak-d ujeǧid, imsar, aqa inna as ujeǧid: “Mayemmi war kidi truḥed, Mafibucat?” 27 Netta inna as: “Sidi inu ajeǧid, amsexxar inu iɣdar ayi, maɣar amsexxar nnec inna: ‘Necc xseɣ ad bardɛeɣ i weɣyuř, ad xas nyeɣ, ad raḥeɣ ak-d ujeǧid!’, maɣar amsexxar nnec d aqejdaḥ. 28 Netta iceqqef deg umsexxar nnec ɣar sidi inu ajeǧid. Maca sidi inu ajeǧid, am yijj n lmalak n AREBBI. Egg min iǧan d lemliḥ di tiṭṭawin nnec. ◘19:28 2 Ṣm. 16:3 29 Minzi marra taddart n baba tuɣa war teǧi mɣir iryazen imettinen i sidi inu ajeǧid. Waxxa amenni cek tessɣimed amsexxar nnec ɣar yinni ittetten ɣar ṭṭabřa nnec! Min ɣari ɛad d tasɣart u i umi ɣa ttareɣ ɛad ktar ɣar ujeǧid?” 30 Ajeǧid inna as: “Mayemmi tessawařed ɛad ammu x tmesřayin nnec? Necc qqareɣ ac: Cek d Ṣiba, kenniw ad tebḍam tammurt.” 31 Inna Mafibucat i ujeǧid: “Netta izemmar ad tt iksi marra, maɣar sidi inu ajeǧid, aqa iɛqeb ɣar taddart nnes di řehna.”

32 Barzillay, Ajilɛadi, ihwa zi Rujalim maḥend ad t iwc afus i ujeǧid ɣar uẓekkwu n L’Urdun, ḥima ad t issqebbeḍ ammu x L’Urdun. 33 Barzillay tuɣa iwsar aṭṭas, ijj n weryaz n tmenyin n iseggʷusa. Netta tuɣa iksi ɣares ajeǧid umi t tuɣa di Maḥanayim, minzi netta tuɣa-t d ijj n weryaz ɣares agřa aṭṭas. ◘19:33 2 Ṣm. 17:27-29; 1 Ij. 2:7 34 Ajeǧid inna i Barzillay: “Ẓwa akidi. Necc ad cek ɣari ksiɣ di Urcalim.” 35 Maca Barzillay inna i ujeǧid: “Mecḥař n wussan n iseggʷusa n tudart inu ɛad din ařami ɣa ffɣeɣ ak-d ujeǧid ɣar Urcalim? 36 Ass-a necc ɣari tmenyin n iseggʷusa. Ma zemmareɣ ad farzeɣ ɛad min iṣebḥen zi min war iḥřin? Ma izemmar umsexxar nnec ad iqqas min ɣa cceɣ d min ɣa sweɣ? Ma zemmareɣ ad sřeɣ ɛad i tmijja n imedyazen d tmedyazin? Mayemmi ɣa issedqeř umsexxar nnec ɛad x sidi inu ajeǧid? 37 Amsexxar nnec ad iẓwa L’Urdun ak-d ujeǧid mɣir cwayt. Mayemmi d ayi ɣa iwc ujeǧid tarebbaḥt-a? 38 Ejj amsexxar nnec ad iɛqeb ḥima ad mmteɣ di tendint inu, ɣar wenḍeř n baba d yemma. Xzar, aqa da amsexxar nnec Kimham! Ejj i-t ad iẓwa ak-d sidi inu ajeǧid. Egg as min tᵉttwařid mliḥ di tiṭṭawin nnec.” 39 Xenni inna ujeǧid: “Kimham ad kidi iẓwa u min tᵉttwařid mliḥ di tiṭṭawin nnec, ad as t ggeɣ. Marra min zzayi tessutared, ad ac t ggeɣ.”

40 Umi iẓwa marra řgens L’Urdun, iẓwa uřa d ajeǧid. Ajeǧid issudem Barzillay, ibarek i-t. Xas uca idweř netta ɣar temmurt nnes.

41 Ajeǧid maca yarni iɛdu ɣar Jiljal u Kimham iɛdu akides. Marra řgens n Yahuda tuɣa isseɛdu ajeǧid, uřa d azyen n řgens n Israil. 42 U xzar, marra iryazen n Israil usin-dd ɣar ujeǧid, nnan i ujeǧid: “Mayemmi aytmatneɣ, iryazen n Yahuda, ucaren cek i neccin u nedhen ajeǧid d taddart nnes řami tuɣa iẓwa L’Urdun d marra iryazen n Dawud akides?” 43 Xenni arrin-dd marra iryazen n Yahuda x yeryazen n Israil: “Minzi ajeǧid itteɛna aneɣ-dd. Mayemmi txeyyqem x uya? Ma necca neccin zi macca n ujeǧid niɣ yiwi-dd netta ict n tarzeft i neccin?” 44 Iryazen n Israil arrin-dd x yeryazen n Yahuda, nnan: “Neccin ɣarneɣ ɛecra n ifassen ɣar ujeǧid, uřa ak-d Dawud ɣarneɣ xenni ktar xawem. Mayemmi d aneɣ tesseḥqarem? Ma war iǧi wawař nneɣ d amezwaru, maḥend ad narr ajeǧid nneɣ?” Uca tuɣa awař n yeryazen n Yahuda ijhed x wawař n yeryazen n Israil.