1 Ina d awařen ineggura n Dawud.

Dawud, mmis n Yassa issawař, bu-teɣruḍt i ittwassɛuǧan issawař, amedhun n AREBBI n Yaɛqub, amedyaz iɛizzen n Israil.

2 Arruḥ n SIDI issiweř zzayi u awař nnes x iřes inu.

3 AREBBI n Israil inna, aqa Taṣḍart n Israil tessiweř akidi:

“Ijj n řḥakem jar iwdan, ijj n umsegged,

ijj n řḥakem nni itteggʷeden AREBBI,

4 wenni iggin am tfawt ɣar tuffut

xmi dd-tneqqar tfuct,

ɣar ict n tuffut

břa iseynuten iɛbubbzen,

xmi, s tissiqt n tfawt

awarni i wenẓar,

aqa issfuffuy aɣemmuy aziza

zi temmurt.”

5 “Ma war teǧi taddart inu

ɣar Arebbi amenni?

Aqa igga ayi ijj n Řɛahd i řebda,

msettef di marra u ittwaḥḍa.

Qaɛ asenjem inu

d marra min issnekkaran řefraḥet,

ma Netta war issɣemmi aya?

6 Maca inni war isekkwin

ad ttwammenḍaren

am ict n tseṭṭa ak-d isennanen,

marra nitni,

maɣar war izemmar

ad ttwaṭṭfen s ufus.

7 Aryaz i ixsen ad tent iḥada,

ad iḥezzem ixef nnes s wuzzař

d ukeccuḍ n lansa

u nitni ad ttwasscemḍen s tmessi

deg wemcan nsen.”

8 Ina d ismawen n ayt n bu-teɣruḍt i iǧan ɣar Dawud: Yucayb Bacabbat, mmis n Atahkamuni, azeǧif n ineɣrafen. Lansa nnes tuɣa d řehzuṭ nnes, issnuqqeb temn-mya n yeryazen deg ijj n umenɣi. ◼23:8 deg ijj n umenɣi - s Tɛibranit ‘deg icten ticti’.  ◘23:8 [1 Im. 11:10-47] 9 Awarni as yusa-dd Aliɛazar, mmis n Dudu, mmis n Axuxi. Netta tuɣa d ijjen zi třata n ayt n bu-teɣruḍt nni iǧan ak-d Dawud, řami nitni stehzan zeg Ifilisṭiniyyen nni tuɣa din munen i umenɣi, am geɛɛden iryazen n Israil ɣarsen i umenɣi. 10 Netta ikkar, iwta deg Ifilisṭiniyyen ař yuḥeř ufus nnes. Iřṣeq ufus nnes di ssif. SIDI yiwiḍ ijj n usenjem d ameqqran deg wass nni uca iryazen n řgens ɛeqben awarni as, maca mɣir ḥima ad keccḍen. 11 Awarni as yusa-dd Camma, mmis n Aji, Aharari. Řami nnjarwen Ifilisṭiniyyen ɣar Laxi, tuɣa dinni ijj n iyyar iccuren s řeɛdes. Řgens tuɣa yarweř zzat i wudem n Ifilisṭiniyyen. 12 Netta ibedd di řwest n ureqqiɛ n iyyar nni, ifekk i-t-i-dd uca iɣřeb x Ifilisṭiniyyen. Ammu yarra as SIDI ijj n weɣřab d ameqqran.

13 Třata zi třatin n izeǧifen hwan, usin-dd ɣar Dawud di řweqt n tmeyra, deg ifri n Abdullam. Tuɣa din ict n terbiɛt n Ifilisṭiniyyen tewta iqiḍan nsen di teɣzurt n Irafawiyyen. 14 Dawud tuɣa-t di lqelɛa u tuɣa din ict n teřbiḥt n řɛeskar n Ifilisṭiniyyen di Bayt-Laḥm. 15 Uca Dawud iřqef i-t ufadi, inna: “Wi d ayi i dd ɣa yawyen aman zi tařa n Bayt-Laḥm i iǧan ɣar tewwart n tendint?” 16 Xenni cuqen třata n ayt n bu-teɣruḍt nni řmargeḥ n řɛeskar n Ifilisṭiniyyen, uymen-dd aman zi tařa n Bayt-Laḥm, i iǧan ɣar tewwart n tendint. Ksin ten akidsen u iwḍen ɣar Dawud, maca netta yugi ad ten isu uca izeǧeɛ i-ten zzat i SIDI. 17 Netta inna: “Aya iggʷej xafi, a SIDI, aqa necc ad ggeɣ man aya. Ma ad sweɣ idammen n yeryazen, inni din iruḥen am sebbřen tudart nsen?” U netta war ixs ad ten isu. D man aya i t iggin třata n ayt n bu-teɣruḍt nni.

18 Abicay, mmis n Yuwab, mmis n Ṣaruya, tuɣa d azeǧif n třata nni. Netta iḥenneḍ lansa nnes x teřt-mya, issnuqqeb i-ten. Netta ɣares ijj n isem ittwacenneɛ jar třata nni. 19 Ma war iǧi netta d wenni ittwacennɛen aṭṭas zi třata-ya? S uya tuɣa netta d řqebṭan nsen. Maca netta war yiwiḍ uřa ɣar třata n imezwura.

20 Xenni Banaya, mmis n Yahuyadaɛ, mmis n ijj weryaz imeḥḍen, timegga nnes mɣarent, netta zi Qabḍiyil. Netta iɣřeb x tnayen n iyraden ijehden. Ɛawed tuɣa netta ihwa ict n twařa, iɣřeb x ijj n weyrad di řwesṭ n ijj n wanu deg ijj n wass umi iwta wedfeř. 21 Netta iɣřeb uřa x yijj n weryaz d Amiṣri, ijj n weryaz isseggʷaden. Amiṣri tuɣa ɣares ict n lansa deg ufus nnes. Ihwa ɣares s yijj n weɛmud, ikkes lansa zeg ufus n Umiṣri u inɣa i-t s lansa nnes. 22 D man aya i igga Banaya, mmis n Yahuyadaɛ. S uya ɣares isem icneɛ jar třata n ayt n bu-teɣruḍt. 23 Netta tuɣa d wenni ittwacennɛen aṭṭas zi třatin, maca war yiweḍ ař třata imezwura. Dawud igga i-t jar imtiqqan nnes.

24 Tuɣa Ɛasa’il, umas n Yuwab, jar třatin;

Ilḥanan, mmis n Dudu, zi Bayt-Laḥm;

25 Camɛa, Aḥarudi;

Iliqa, Aḥarudi;

26 Halaṣ, Afalṭi;

Ɛira, mmis n Ɛiqqic, Atiqquɛi;

27 Abiɛazar, Aɛanatuti;

Mabunnay, Aḥucayi;

28 Ṣalmun, Axuxi;

Mahray, Anaṭufati;

29 Xalab, mmis n Baɛna, Anaṭufati;

Ittay, mmis n Ribay,

zi Jibɛa zeg ayt n Binyamin;

30 Banaya, zi Firɛatun;

Hidday, zi teɣzurin n Jaɛac;

31 Abu-Ɛalbun, Aɛarabati;

Ɛazmawet, Abarḥumi;

32 Ilyaḥba, Acaɛlubuni;

zeg iḥenjiren n Yacan, mɣir Yunatan;

33 Camma, Aharari;

Axiyam, mmis Carar, Arari;

34 Ilifalaṭ, mmis n Aḥasbay,

mmis n Umaɛki;

Iɛam, mmis n Axiṭufil, Ajiluni;

35 Ḥaṣray, Akarmali;

Faɛray, Alarbi;

36 Yijɛal, mmis n Natan, zi Ṣuba;

Bani, Ajadi;

37 Ṣalaq, Aɛammuni;

Naḥray, Abiɛruti,

aḥemmař n řesnaḥ n Yuwab, mmis n Ṣaruya;

38 Ɛira, Ayitri;

Jarib, Ayitri;

39 Uriya, Aḥitti.

Marra jmiɛ sebɛa u-třatin n yeryazen.