11
Ixarriṣen war zemmaren ad beḍřen řxedmet
1 Sekk aɣrum nnec tiwa i waman, maɣar awarni i aṭṭas n wussan ad t tafed ɛawed. 2 Bḍa t di sebɛa niɣ ɛad di tmenya, maɣar cek war tessined man řɣar i ɣa yiřin di temmurt. ◘11:2 2 Kur. 9:10
3 Mařa ccuren iseynuten, ttzeǧaɛen anẓar x temmurt. Ma tacejjart tewḍa ɣar ljanub niɣ ɣar ccamal, deg wemcan mani tewḍa, tᵉttɣima din tezzeř. ◼11:3 tacejjart - niɣ ‘addag’ (‘iddagen’).
4 Wenni ixezzaren řebda ɣar usemmiḍ, war ittiwiḍ ad izarɛ, wenni iḥeṭṭan řebda iseynuten, war ittiwiḍ ad imjar.
5 Am mammec cek war tessined abrid n usemmiḍ, ammu i war tessined uřa mammec ttwaggen iɣsan deg uɛeddis n temɣart s ddeyset. Ammu i war tessined uřa d tmegga n AREBBI wenni itteggen marra min iǧan. ◘11:5 Yḥ. 3:8 6 Zarɛ zzariɛet nnec ɣar tuffut u war ttekkes afus nnec ɣar tmeddit, maɣar cek war tessined min i ɣa ifřeḥ, ta niɣ ta, niɣ ɛad s tnayen idsent ad iřint ṣebḥent.
Xarriṣ di temẓi nnek di řḥukm n Arebbi
7 Tafawt d tmiẓidt uca mliḥ i tiṭṭawin ad ẓarent tfuct. 8 Wah, mařa aryaz iddar aṭṭas n iseggʷusa, ejj i-t ad ifarḥ di marra iseggʷusa nni, u ejj i-t ad iɛqeř ɛawed, aqa ussan ibarcanen ad iřin deg waṭṭas. Marra min i d ɣa yasen ɛad, aqa-t di řbaṭeř.
9 Farḥ, a cek aḥudri, di temẓi nnec, sfarḥ uř nnec deg wussan n temẓi nnec. Uyur deg ibriden n wuř nnec u di min ttwařant tiṭṭawin nnec, maca ssen aqa SIDI ad cek issekk x marra aya i ccreɛ. 10 Siggʷej řhemm x wuř nnec u sḥeyyed řɣar x arrimet nnec, maɣar temẓi d řweqt s ucuwwaf abarcan n temẓi aqa aten di řbaṭeř.