1 Deg wass nni ajeǧid iwca as i tjeǧidt Istir taddart n Haman, řeɛdu n Wudayen, uca yusa-dd Murdaxay zzat i wudem n ujeǧid, minzi Istir txebbar s minzi d as dd-ittas i nettat. 2 Ikkes-dd ujeǧid taxadent nnes n ucemmiɛ, tenni tuɣa dd-ikkes zi Haman uca iwca as-tt i Murdaxay, u Istir tegga Murdaxay x taddart n Haman. 3 Tessiweř Istir twařa nneɣni ak-d ujeǧid, tewḍa as ɣar iḍaren, tᵉtru u tḥeccem i-t maḥend ad issiggʷej taɛeffant n Haman, Ajaji, uřa d tameɛmuč i tuɣa ixarreṣ ḍidd i Wudayen. 4 Isswiẓẓeḍ ujeǧid i Istir azeǧaḍ nnes n wureɣ. Xenni Istir tekkar, tbedd zzat i wudem n ujeǧid, 5 tenna: “Mařa mliḥ i ujeǧid u necc ufiɣ řxaḍar zzat i wudem nnes u mařa tseggem tmesřact-a zzat i wudem n ujeǧid u necc udfeɣ as di řxaḍar di tiṭṭawin nnes, ejj ad arin ca ḥima ad ttwabeḍřent tebratin nni di teǧa tmeɛmuč n Haman, mmis n Hammadata, Ajaji, tinni i yura i uhellek n Wudayen di marra lɛamalat n ujeǧid. 6 Maɣar mammec zemmarey ad xzareɣ řɣar i ɣa iřeqfen řgens inu? U mammec zemmareɣ ad xzareɣ ahellek n jjadira inu?” 7 Xenni inna ujeǧid Aḥacwiruc i tjeǧidt Istir u i Wuday Murdaxay: “Xzar, wciɣ taddart n Haman i Istir u netta s yixef nnes uyřeɣ t ɣar tḥenact, minzi isswiẓẓed afus nnes ɣar Wudayen. 8 Ad tarim kenniw simant nwem s yisem n ujeǧid min iǧan icna di tiṭṭawin nwem di ṭṭweɛ n Wudayen. Cemmɛem t s txadent n ujeǧid, minzi tira i yuran s yisem n ujeǧid u cemmɛem tent s txadent n ucemmiɛ n ujeǧid, war izemmar ḥed ad tent ibḍeř.”

9 Xenni ttwařaɣan imariren n ujeǧid, deg wass nni, deg uyur wiss třata, wenni umi qqaren as ayur n Siwan, deg wass wiss třata u-ɛicrin zzayes, uca uran am mammec marra min yumur Murdaxay, aqa uran t i Wudayen, i ijeǧiden i iǧan sadu i ujeǧid u i lwulat u i řḥukkam n lɛamalat, zi Řhend ař Kuc, mya u-sebɛa u-ɛicrin n lɛamalat, i kuř lɛamala s tira nnes u i kuř řgens s yiřes nnes u ɛawed i Wudayen s tira nsen u s yiřes nsen. 10 Ittwari s yisem n ujeǧid Aḥacwiruc u tᵉttwacemmeɛ tebrat s txadent n ucemmiɛ n ujeǧid uca ssekken tibratin nni ak-d ireqqasen n tazřa x yeysan, nyin x yeysan n tazřa igellden n jjadira icnan qaɛ. 11 Di tebratin nni iwca ujeǧid ttesriḥ i Wudayen maḥend ad munen di kuř tandint i di ǧan, ad kkaren di ṭṭweɛ n tudart nsen, ḥima ad areddǧen, ad nɣen u ad teḥḥan kuř řɛeskar zi řgens d lɛamala nni ten i ɣa iḥṣaren, uřa d iḥenjiren imeẓyanen d temɣarin, u ḥima ad ṭṭfen min zzaysen, 12 d man aya deg wass d ijjen di marra lɛamalat n ujeǧid Aḥacwiruc, deg wass wiss třeṭṭac n uyur wiss tenɛac, aqa-t d ayur n Adar. 13 Tuɣa ittxeṣṣa ad tᵉttwassuffeɣ ict n tiřemt n tira-ya am uzerf di marra lɛamalat maḥend ad ittwassargeb i marra řegnus, aqa Udayen ad iřin ḥezzmen deg wass nni ḥima ad ntaqmen zi řɛedyan nsen. 14 Ireqqasen n tazřa, inni yenyin x yeysan n tazřa igellden, ffɣen deɣya, ttwacejjɛen s uzeyyar s wawař n ujeǧid. Ittwassuffeɣ uzerf ɛawed di lqelɛa n Cucan. 15 Xas uca iffeɣ-dd Murdaxay zzat i wudem n ujeǧid deg useřham igellden n ufiřu adehmani d ucemřař u s ijj n ttaj d ameqqran n wureɣ d useřham n řeqṭen azdad d ufiřu arjuwani, uca tandint n Cucan negzen dayes iwdan s řefraḥet. 16 Udayen tuɣa ɣarsen tfawt d řefraḥet, d warcuq d ccan. 17 Di kuř lɛamala u di kuř tandint mani ma dd-yiweḍ wawař n ujeǧid d uzerf nnes, tuɣa din řefraḥet d warcuq jar Wudayen d zzrud d wussan iṣebḥen u waṭṭas zi řegnus n temmurt dewřen d Udayen, minzi tewḍa-dd xasen tiggʷudi zeg Wudayen.