1 “Ina d ismawen n tqebbař.

Zi ṭṭarf n ccamal qaɛ, x webrid n Ḥitlun ařami ɣa tawḍed ɣar Ḥamat, Ḥaṣar-Ɛinan, tammurt n weymir n Dimacq, x uɣezdis n ccamal n Ḥamat umi xas tᵉttekked: ad as yiři am uɣezdis n ccarq am uɣezdis n řebḥar, ict n tesɣart i Dan.

2 X weymir n Dan, zeg uɣezdis n ccarq ař řebḥar:

ict n tesɣart i Acir.

3 X weymir n Acir, zeg uɣezdis n ccarq ař řebḥar:

ict n tesɣart i Naftali.

4 X weymir n Naftali, zeg uɣezdis n ccarq ař řebḥar:

ict n tesɣart i Manassa.

5 X weymir n Manassa, zeg uɣezdis n ccarq ař řebḥar:

ict n tesɣart i Ifrayim.

6 X weymir n Ifrayim, zeg uɣezdis n ccarq ař řebḥar:

ict n tesɣart i Rubin.

7 X weymir n Rubin, zeg uɣezdis n ccarq ař řebḥar:

ict n tesɣart i Yahuda.

8 X weymir n Yahuda, zeg uɣezdis n ccarq ař tma n řebḥar, ad tiři tewhibt n usgeɛɛed, tenni i ɣa twehhbem, s ict n tiru n xemsa u-ɛicrin-ařef n iɣunam n řeɛbar u s ict n tuzzeggart am tuzzeggart n icten zi tseqqar inneɣni zeg uɣezdis n ccarq ař tma n řebḥar. Zzawect Iqeddsen ad tiři di řwest nnes.

9 Tawhibt n usgeɛɛed i SIDI nni i ɣa tessgeɛɛdem, ad tiři s ict n tuzzeggart n xemsa u-ɛicrin-ařef n iɣunam n řeɛbar u s ict n tiru n ɛecra-ařaf n iɣunam n řeɛbar.

10 Tawhibt iqeddsen n usgeɛɛed ad tiři i ina:

I ikehhanen: ɣar ccamal xemsa u-ɛicrin-ařef n iɣunam n řeɛbar, u ɣar řɣarb tiru nnes ɛecra-ařaf n iɣunam n řeɛbar, u ɣar ccarq tiru nnes ɛecra-ařaf n iɣunam n řeɛbar, u ɣar ljanub tuzzeggart nnes xemsa u-ɛicrin-ařef n iɣunam n řeɛbar. Zzawect Iqeddsen n SIDI ad tiři di řwest nnes.

11 Ad tiři temmurt-a iqeddsen i ikehhanen zeg ayt n Ṣaduq, inni iḥḍan aḥeṭṭu inu, inni war dd-iffɣen ca zeg webrid zi ssibbet n uweddar n ayt n Israil, am ffɣen uřa d ayt n Lawi. 12 Ad tiři d ict n tewhibt n usgeɛɛed i nitni zi tewhibt n temmurt, ad tiři tqeddes qaɛ, ad tiři x weymir n Ilawiyyen.

13 Ɣar weymir ak-d ikehhanen ad ɣarsen tiři i Ilawiyyen ict n temmurt s ict n tuzzeggart n xemsa u-ɛicrin ařef n iɣunam n řeɛbar, s ict n tiru n ɛecra-ařaf n iɣunam n řeɛbar. Marra tuzzeggart ad tiři xemsa u-ɛicrin-ařef n iɣunam n řeɛbar, u tiru nnes ad tiři ɛawed ɛecra-ařaf n iɣunam n řeɛbar. 14 War iɛeddeř ad zzenzen uřa d ca zzayes, war iɛeddeř ad tt beddřen niɣ ad tt sseɛdun, aqa-tt d řemxeyyer n temmurt, minzi aqa-tt d tamqeddast qaɛ.

15 Xemsa-ařaf n iɣunam n řeɛbar nni i ɣa iqqimen ɣar tiru, ɣar zzat n xemsa u-ɛicrin-ařef n iɣunam n řeɛbar, ad iřin i tudart n kuř ass di tendint, i tzeddiɣt u i ddmani n tarewsa. Ad tiři tendint di řwesṭ nnes.

16 Ina ad iřin d řeɛburat nnes: ɣar uɣezdis n ccamal xemsa u-rebɛin-mya n iɣunam n řeɛbar, ɣar uɣezdis n ljanub xemsa u-rebɛin-mya n iɣunam n řeɛbar, ɣar uɣezdis n ccarq xemsa u-rebɛin-mya n iɣunam n řeɛbar, ɣar uɣezdis n řebḥar xemsa u-rebɛin-mya n iɣunam n řeɛbar. ◼48:16 ɣar uɣezdis n řebḥar - niɣ ‘ɣar uɣezdis n řɣarb’.

17 Ddmani n tarewsa n tendint: ɣar ccamal ad iřint mitayen u-xemsin n iɣunam n řeɛbar, ɣar ljanub mitayen u-xemsin n iɣunam n řeɛbar, ɣar ccarq mitayen u-xemsin n iɣunam n řeɛbar, ɣar řɣarb mitayen u-xemsin n iɣunam n řeɛbar.

18 Min iqqimen zi tuzzeggart ɣar zzat n tewhibt iqeddsen n usgeɛɛed, ɛecra-ařaf n iɣunam n řeɛbar ɣar ccarq d ɛecra-ařaf n iɣunam n řeɛbar ɣar uɣezdis n řɣarb, ad yiři zzat n temmurt n tewhibt iqeddsen n usgeɛɛed. Ṣṣabet nnes ad tiři d macca i imsexxaren n tendint. 19 Imsexxaren n tendint, aqa ad tt sexxaren zi marra tiqebbař n Israil.

20 Marra tawhibt n usgeɛɛed ad tiři xemsa u-ɛicrin-ařef x xemsa u-ɛicrin-ařef n iɣunam n řeɛbar. Ad ssgeɛɛden tawhibt n usgeɛɛed d ijj n ukwadrun ak-d tesɣart n tendint i dayes.

21 Min iqqimen ad yiři i řḥakem, ɣar ijj n uɣezdis u ɣar uɣezdis nneɣni n tewhibt iqeddsen n usgeɛɛed u n tesɣart n tendint. Min iǧan ɣar uɣezdis n zzat n xemsa u-ɛicrin-ařef n iɣunam n řeɛbar n tewhibt n usgeɛɛed ař aymir n ccarq, u ɣar uɣezdis n řɣarb ɣar zzat n xemsa u-ɛicrin-ařef n iɣunam n řeɛbar ař aymir n řɣarb ɣar řebḥar, zzat i tseqqar nneɣni n temmurt, d man aya ad yiři i řḥakem.

Ad tiři d ict n tewhibt iqeddsen n temmurt nni i ɣa ssgeɛɛden, u Zzawect Iqeddsen n Taddart ad tiři di řwest nnes. 22 Zi min iǧan d tasɣart n Ilawiyyen u zi min iǧan d tasɣart n tendint nni iǧan di řwesṭ n min ɣa yiři i řḥakem, ad yiři marra min iǧan jar temmurt n Yahuda d temmurt n Binyamin, i řḥakem.

23 Min iqqimen n tqebbař zeg uɣezdis n ccarq ař řebḥar:

ict n tesɣart i Binyamin.

24 X weymir n Binyamin, zeg uɣezdis n ccarq ař řebḥar:

ict n tesɣart i Cimɛun.

25 X weymir n Cimɛun, zeg uɣezdis n ccarq ař řebḥar:

ict n tesɣart i Issakar.

26 X weymir n Issakar, zeg uɣezdis n ccarq ař řebḥar:

ict n tesɣart i Zabulun.

27 X weymir n Zabulun, zeg uɣezdis n ccarq ař řebḥar:

ict n tesɣart i Jad.

28 X weymir n Jad, ɣar uɣezdis n ljanub di jjihet n ljanub, ad yiři weymir zi Tamar ař aman n Mariba-Qadac, xenni ad yekk x Teɣzart n Miṣra ař Řebḥar Ameqqran.

29 Ta d temmurt nni ittxeṣṣa kenniw ad tt tebḍam d tasɣart n řwart i tqebbař n Israil u tina d tiseqqar nsen, ammu i iqqar Sidi inu, SIDI.” *

30 “D yina i ɣa yiřin d uffuɣen n tendint:

Ɣar ccamal aqa din xemsa u-rebɛin-mya n řeɛburat. 31 Tiwwura n tendint ad ttwařaɣant ɛlaḥsab ismawen n tqebbař n Israil: třata n tewwura ad iřint ɣar ccamal: icten n Rubin, icten n Yahuda, icten n Lawi.

32 Ɣar uɣezdis n ccarq aqa din xemsa u-rebɛin-mya n řeɛburat, ak-d třata n tewwura: icten n Yusuf, icten n Binyamin, icten n Dan.

33 Ɣar uɣezdis n ljanub aqa din xemsa u-rebɛin-mya n řeɛburat, ak-d třata n tewwura: icten n Cimɛun, icten n Issakar, icten n Zabulun.

34 Ɣar uɣezdis n řɣarb aqa din xemsa u-rebɛin-mya n řeɛburat, ak-d třata n tewwura nsen: icten n Jad, icten n Acir, icten n Naftali.

35 Řeɛbar deg wenneḍ n tendint aqa-t di tmenṭac-ařef n řeɛburat u zeg wass nni ad yiři yisem n tendint d wa:

‘SIDI AQA-T DIN!’ ”