1 Deg useggʷas nni di dd-yusa ukumandar n řɛeskar ɣar Acdud, umi t issekk Sarjun, ajeǧid n Accur, u immneɣ netta ak-d Acdud uca iṭṭef i-t, 2 di řweqt nni tuɣa issawař SIDI, s uqemmum n Icaɛya, mmis n Amuṣ, inna: “Uyur, sars arruḍ n txancet n wecḍan nni x tejɛinna nnec u kkes sandaliyat nnec x iḍaren nnec!” Igga i-t Icaɛya, iggur d aɛaryan u s řeḥfa x iḍaren nnes. ◼20:2 aqemmum - s Tɛibranit ‘afus’. 3 Řexdenni inna SIDI: “Am mammec iggur umsexxar inu Icaɛya řexxu ɛad třata n iseggʷusa d aɛaryan u s řeḥfa da d diha, am řeɛřamet u am yijj n řeɛjeb i Miṣra u i Kuc, 4 ammu i ɣa indeh ujeǧid n Accur imeḥbas n Miṣra d imenfiyyen n Kuc, ameẓyan d umeqqran, aɛaryan d uḥefyan n iḍaren, uřa s ddabub iɛarran, aqa d řefḍiḥet i Miṣra. 5 Xenni ad ggʷeden u ad seḍḥan zi ssibbet n ayt n Kuc i ɣar tuɣa xezzaren d ca, u zi ssibbet n Imiṣriyyen, afeyyec nsen. ◼20:5 ayt n Kuc - ixs ad yini řgens n Ssudan d Itiyupiyya. 6 Imezdaɣ n temmurt-a x tma n řebḥar ad inin deg wass nni: ‘Xzar, ammu i imsar i wenni ɣar nxezzar d ca, d wenni ɣar narweř ḥima ad narzu twiza, ḥima ad nettwafekk zi zzat n wudem n ujeǧid n Accur. Mammec xenni nzemmar ad nenjem řexxu?’ ”