12
Yaftaḥ d Ifrayim
1 Xenni ttwassmunen iryazen n Ifrayim i umenɣi u nitni ẓwan ɣar Zafun. Nnan i Yaftaḥ: “Mayemmi teẓwid ḥima ad temmenɣed ak-d ayt n Ɛammun u war d aneɣ třiɣid ḥima ad nuyur akidek? Neccin ad ac neqqed timessi i taddart nnec tiwa i uzeǧif nnec d cek akides.” ◘12:1 Řqḍ. 8:1 2 Yaftaḥ inna asen: “Necc d řgens inu tuɣa aneɣ deg ijj n umcubbec d ameqqran ak-d ayt n Ɛammun. Řaɣiɣ-dd xawem, maca kenniw war dd-tusim ḥima ad ayi tfekkem zeg ufus nsen. 3 Umi ẓriɣ, belli kenniw war dd-tusim i usenjem, sebbřeɣ tudart inu uca ẓwiɣ L’Urdun ɣar ayt n Ɛammun u SIDI igga ayi ten deg ufus. Mayemmi i dd ɣari tgeɛɛdem ass-a ḥima akidi temmenɣem?” 4 Xas uca issmun Yaftaḥ marra iryazen zi Jilɛad uca immneɣ ak-d Ifrayim u iryazen n Jilɛad ɣeřben x Ifrayim, minzi iryazen n Ifrayim nnan: “Kenniw d inni yarewřen zeg Ifrayim!”, aqa Jilɛad yusa-dd jar Ifrayim d Manassa. 5 Jilɛad iḥewwes imucan n uẓekkwu n L’Urdun inni iǧan n Ifrayim. D marra inni yarewřen n Ifrayim nnan: “Ejj ayi ad ẓwiɣ”, xenni sseqsan t iryazen zi Jilɛad: “Ma cek zi Ifrayim?” Mařa netta inna: “Lla!”, 6 xenni nnan as: “Ini ‘Cibbulit!’ ” Inna netta xenni: ‘Sibbulit!’ u iban-dd netta war izmir ad t inṭeq mliḥ, xenni ṭṭfen t uca nɣin t ɣar imucan n uẓekkwu n L’Urdun. Ammu i wḍan tnayen u-rebɛin-ařef n yeryazen n Ifrayim di řweqt nni. 7 Tuɣa Yaftaḥ iḥekkem Israil setta n iseggʷusa. Xenni immut Yaftaḥ, Ajilɛadi, u netta ittwanḍeř deg ict zi tneddam n Jilɛad.
Ibṣan, Ilun d Ɛabdun
8 Awarni as tuɣa Ibṣan zi Bayt-Laḥm d řqaḍi x Israil. 9 Netta tuɣa ɣares třatin n iḥenjiren u issmeǧec třatin n yessis ɣar barra u i třatin n arrawen nnes ijja i-ten ad awyen třatin n yessis zi barra. Tuɣa netta iḥekkem x Israil sebɛa n iseggʷusa. 10 Xenni immut Ibṣan uca ittwanḍeř di Bayt-Laḥm.
11 Awarni as tuɣa Ilun, Azabuluni, d řqaḍi x Israil. Netta iḥkem x Israil ɛecra n iseggʷusa. ◼12:11 Azabuluni - ijjen zi teqbič n Zabulun. 12 Xenni immut Ilun, Azabuluni, uca ittwanḍeř di Ayalun di temmurt n Zabulun.
13 Awarni as tuɣa Ɛabdun, mmis n Hillal, zi Firɛatun, d řqaḍi x Israil. 14 Netta tuɣa ɣares arebɛin n iḥenjiren d třatin n wayyawen, inni innayen x sebɛin n iɣyař. Netta tuɣa d řqaḍi x Israil tmenya n iseggʷusa. ◘12:14 Řqḍ. 10:4 15 Xenni immut Ɛabdun, mmis n Hillel, zi Firɛatun, uca ittwanḍeř di Firɛatun, di temmurt n Ifrayim, x idurar n Ɛamaliq.