1 Awarni ca n wussan, deg wussan n tmeyra n irden, imsar, issijji Camcun x temɣart nnes, yiwi akides ijj n iɣayḍ d ameẓyan zeg iɣayḍen, inna i babas: “Ejj ayi ad adfeɣ ɣar temɣart inu deg wexxam!” Maca babas war t ijji ad yadef. 2 Inna babas: “S tidett necc nniɣ deg yixef inu, cek tɛiffed tt, s uyenni wciɣ tt i umɛacar nnec. Ma war teǧi učmas tamaẓuẓt ɛad tecna xas? Ejj i-tt ad ɣarek tiři deg wemcan nnes.” 3 Maca Camcun inna asen: “Twařat-a ad iřiɣ d acemrař zi jjihet n Ifilisṭiniyyen, mařa ggiɣ daysen min iǧan d aɛeffan.”

4 U Camcum yuyur, iymar-dd teřt-mya n iceɛbawen. Iksi iṣefḍawen uca issneqřeb i-ten ijj x wenneɣni s ikennasen nsen uca di řwesṭ, jar tnayen n ikennasen, icedd ijj n uṣefḍaw. 5 Netta issarɣ iṣefḍawen uca ijja iceɛbawen ad uyuren deg imendi ibedden n Ifilisṭiniyyen. Ammu issarɣ icuwwafen n imendi d imendi ibedden, uřa d iyyaren n uzemmur.

6 Xenni nnan Ifilisṭiniyyen: “Wi iggin aya?” Nnan; “Aqa d Camcun, aḍeggʷař n weryaz. zi Timnata, minzi wanita yiwi as tamɣart nnes, iwca i-tt i umɛacar nnes.” Xenni geɛɛden Ifilisṭiniyyen uca qqden timessi i temɣart d babas. 7 Xas uca inna asen Camcun: “Mařa kenniw teggim ammu, xenni ḥsen ad zzaywem ntaqmeɣ d amezwaru uca awarni aya waha ad ssbeddeɣ amenɣi.” 8 Netta yarẓa asen iɣsan x tnayen, aqa iwta i-ten s ict n tecti d tameqqrant. Xenni ihwa, yuyur izdeɣ deg ifri n teṣḍart n Ɛiṭam. ◼15:8 yarẓa asen ixsan x tnayen - s Tɛibranit ‘aḍar x tmeṣṣaḍt’.

9 Xenni geɛɛden Ifilisṭiniyyen uca wtin iqiḍan nsen di Yahuda uca areyycen ixef nsen ař Laḥi. 10 Iryazen n Yahuda nnan: “Mayemmi i dd xaneɣ tgeɛɛdem?” Nitni arrin-dd nnan: “Neccin ngeɛɛed, ḥima ad ncarf Camcun maḥend ad kides negg am mammec i kidneɣ igga netta.”

11 Uca hwan teřt-ařaf n yeryazen zi Yahuda ɣar ifri n teṣḍart n Ɛiṭam, nnan i Camcun: “Ma war tessined cek, aqa Ifilisṭiniyyen ḥekkmen xaneɣ? Mayemmi d aneɣ teggid aya?” Netta yarra-dd xasen: “Am mammec akidi ggin, ammu akidsen i ɣa ggeɣ.” 12 Nitni nnan as: “Neccin nehwa-dd ḥima ad cek ncarf u ad cek negg deg ifassen n Ifilisṭiniyyen.” Xenni inna Camcun: “Jaǧem ayi, aqa kenniw war xafi thejjmem.” 13 Nitni ssiwřen akides, nnan as: “Man aya war ittiři, maca neccin ad cek ncarf u ad cek negg deg ufus nsen, maca s tidett war cek neneqq.” Uca carfen t nitni s tnayen n tseɣwin d timaynutin uca nedhen t zeg ifri ɣar sennej. 14 Řami yiweḍ ɣar Laḥi, ffɣen-dd ɣares Ifilisṭiniyyen s iɣuyyan n umenɣi. Řexdenni iṭṭef i-tt Arruḥ n SIDI uca tiseɣwin nni ɣar iɣaǧen nnes dewřent am tiffest i ittwasscemḍen s tmessi d iceddiyyen nnes fesyen zeg iɣaǧen nnes. 15 Netta yufa ijj n yiɣes n uqabsi d ṭṭri n ijj n weɣyuř. Xenni isswiẓẓeḍ afus nnes, iḥart xas uca inɣa zzayes ařef n yeryazen. 16 Inna Camcun: “S yijj n yiɣes n uqabsi n weɣyuř, ijj n uɛurric, tnayen n iɛurricen, aqa s yijj n iɣes n uqabsi n teɣyuč nɣiɣ ařef n yeryazen.” 17 Imsar, umi ikemmeř awař nnes, inḍar iɣes n uqabsi zeg ufus nnes uca igga as i wemcan nni Ramat-Laḥi, ‘Řgeɛɛdet n yiɣes n uqabsi’.◼15:17 Ramat-Laḥi - isem wanita ixs ad yini ‘řgaɛɛdet n yiɣes n uqabsi’.

18 Řexdenni tuɣa dayes afadi aṭṭas uca iřaɣa ɣar SIDI inna: “Cek tewcid i umsexxar nnec asenjem-a ameqqran. Ma xenni ittxeṣṣa ad mmteɣ s ufadi, ad wḍiɣ deg ifassen n ina inni war ixetnen?” ◘15:18 1 Ṣm. 17:26, 36; 2 Ṣm. 1:2 19 Xas uca issfeǧeq AREBBI aḥfur n Laḥi, ffɣen-dd zzayes waman. Netta isu uca buḥbeř nnes idweř-dd uca idweř-dd ɣar tudart. X uya igga as i tařa nni ‘Ɛayn-Haqurey’, ixs ad yini ‘Tařa n wenni ittřaɣan’. Tanita aqa-tt di Laḥi ař ass-a. 20 Tuɣa netta d řqaḍi x Israil deg wussan n Ifilisṭiniyyen, ɛicrin n iseggʷusa.