42
Ayub inɛem i Arebbi
1 Ayub yarra-dd x SIDI, inna:
2 “Necc ssneɣ
aqa Cek tzemmared i kuřci
war issbeṭṭiř uřa d ijj n wenway nnec.
3 Cek teqqared:
‘Man wen issbarrcnen břa tussna
ccwar n Arebbi?’
S uya ssiwřeɣ x min war fhimeɣ,
x tmesřayin nni di ttbehteɣ aṭṭas,
war tent ssineɣ.” ◘42:3 Ayub 38:2; Izhd. 40:6; 131:1; 139:6
4 “Seř maca uca ad ssiwřeɣ,
xseɣ ad Cek sseqsiɣ
uca xenni Cek ad ayi xas tessargbed.
5 S umezzuɣ xak i sřiɣ waha,
maca řexxu tiṭṭ inu teẓri Cek.
6 X uya ttɛiffiɣ ixef inu uca ndemmeɣ,
qqimeɣ di tɛejjajt d yiɣɣeḍ.”
Arebbi idebbar x weṣřaḥ d usgenfi
7 Awarni řami tuɣa issiwiř SIDI awařen-a ak-d Ayub, inna SIDI i Ilifaz zi Tayman: “Lɣaḍab inu yarɣa xak u x tnayen n imeddukkař nnec, maɣar kenniw war xafi tessiwřem ca nican am mammec xafi issiweř umsexxar inu Ayub. 8 Xenni řexxu, ksim kenniw sebɛa n ifunasen imeẓyanen d sebɛa n icarriyyen, uca uyurem ɣar umsexxar inu Ayub uca qeddmem ten d taɣarṣt n wecmaḍ i yixef nwem. Jjem amsexxar inu Ayub ad xawem iẓẓaǧ. Maɣar Necc ad ssgeɛɛdeɣ aɣembub nnes i westajeb, ḥima war tteggeɣ akidwem am tubbuheřya nwem, minzi kenniw war xafi tessiwiřem nican am mammec xafi issiwiř umsexxar inu Ayub.”
9 Xenni iffeɣ Ilifaz zi Tayman, Bildad zi Cuḥa d Ṣufar zi Naɛmat uca ggin nitni am mammec d asen inna SIDI. SIDI issgeɛɛed aɣembub n Ayub i ustajeb n tẓaǧit nnes. 10 Awarni řami tuɣa ittẓaǧa Ayub di ṭṭweɛ n imeddukkař nnes, inneqřeb SIDI tameḥbast n Ayub i di iǧa netta zi ssibbet n řehřac nnes, uca yarni SIDI di marra agřa n Ayub tnayen n tseqqar.
11 Usin-dd ɣares marra aytmas d marra suyᵉtmas d marra inni t issnen zic. Nitni ccin akides aɣrum di taddart nnes uca ssecnen as aziǧez nsen uca ɛezzan t x marra řɣar xas dd-iɣḍeř SIDI. Iwca as kuř ijjen zzaysen ijj n řewzen n nnuqart uřa d ict n txadent n wureɣ.
12 Ibarek SIDI taneggarut n Ayub ktar zi tmezwarut nnes, maɣar tuɣa ɣares arebɛa-ařaf n wuǧi d setta-ařaf n iřeɣman d wařef n ifunasen n teɣnact d wařef n teɣyař.
13 Tuɣa ɣares sebɛa n iḥenjiren d třata n yessis. ◘42:13 Ayub 1:2
14 Tamezwarut igga as Yamima, wiss tnayen qqaren as Qaṣiɛa d wiss třata qqaren as Qarn-Haffuk. 15 War ufin di marra tammurt tiḥramin cnant am yessis n Ayub. Babatsent iwca asent tasɣart jar aytmatsent.
16 Ayub iddar awarni i uya mya u-rebɛin n iseggʷusa. Netta iẓra iḥenjiren nnes d iḥenjiren n iḥenjiren nnes ɣares ař jjiř wiss arebɛa.
17 Ayub immut awarni řami iwsar aṭṭas u tuɣa ijjiwen ussan n tudart nnes.