1 Uca issiweř Musa ak-d ayt n Israil ɛlaḥsab marra min yumur SIDI i Musa. 2 Issiweř Musa ak-d izeǧifen n tqebbař n ayt n Israil, inna: “Aqa d ta min xef yumur SIDI:

3 ‘Xmi ɣa tafed ijj n weryaz iwca awař niɣ ijjuǧ ict n tjaǧit ḥima ad iqqen ixef nnes s yijj n řɛahd, xenni war ittareẓẓi awař nnes. Ittxeṣṣa as ad igg ɛlaḥsab min dd-iffɣen zeg uqemmum nnes. ◘30:3 Aɛwd. 23:20

4 Xmi ɣa tafed ict n temɣart tewca awař nnes i SIDI uca ad teqqen ixef nnes s yijj n řɛahd di temẓi nnes di taddart n babas, 5 uca babas isřa i wawař n lwaɛd nnes d řɛahd nnes i zi teqqen ixef nnes, uca babas isqar zzates, xenni marra lwuɛud nnes ad iřin ṣeřḥen d kuř aqqan nnes ad yiři iṣřeḥ. 6 Maca mařa babas issbedd i-tt zi man aya deg wass nni di isřa aya, xenni uřa d ijj zi lwuɛud nnes u uřa d ijj zeg waqqan nnes i zi teqqen ixef nnes, war iṣeǧeḥ ca. SIDI ad as iɣfar, minzi babas issbedd i-tt x man aya.

7 Mařa tuɣa-tt temřec ak-d yijj n weryaz uca xas lwuɛud niɣ nettat tuɣa teqqen ixef nnes s yijj n wawař iffeɣ-dd s tcarfayeḥ zeg iyencicen nnes, 8 uca aryaz nnes isřa as uca isqar zzates deg wass i di isřa aya, xenni ad seřḥen lwuɛud nnes d kuř aqqan nnes ad yiři iṣřeḥ. 9 Maca mařa aryaz nnes deg wass nni di isřa aya, inhar i-tt, xenni netta issebḍeř lwaɛd nni xas uřa d awař s tcarfayeḥ zeg iyencicen nnes i zi tuɣa teqqen ixef nnes uca AREBBI ad as iɣfar aya.’ ”

10 “X lwaɛd n tajjač niɣ n tenni ittwaǧfen: marra min zi tuɣa teqqen ixef nnes, ad yiři iṣeǧeḥ. 11 Mařa tuɣa tewca awař niɣ teqqen ixef nnes s ict n tjaǧit i yijj n řɛahd di taddart n weryaz nnes, 12 uca aryaz nnes isřa i uya uca isqar zzates uca war tt issbedd x man aya, xenni ad ṣeřḥen marra lwuɛud nnes u kuř aqqan nnes i zi tuɣa teqqen ixef nnes ad yiři iṣřeḥ. 13 Maca mařa aryaz nnes issebḍeř aya qaɛ deg wass i di isřa, xenni war ittiři iṣeǧeḥ ca qaɛ zi min dd-iffɣen zeg iyencicen nnes n lwuɛud niɣ n waqqan. Aryaz nnes issebḍeř aya uca AREBBI ad as iɣfar.

14 Kuř lwaɛd d kuř aqqan s ict n tjaǧit i umi ɣa tesswaḍeɛ ixef nnes, aryaz nnes izemmar ad t issemten niɣ aryaz nnes izemmar ad t issebḍeř. 15 Mařa aryaz nnes isqar qaɛ zeg wass x wass, xenni issemten marra lwuɛud nnes niɣ kuř aqqan nnes i xas iǧan. Aqa issemten i-ten minzi isqar zzates deg wass i di ten isřa. 16 Mařa netta, awarni řami d asen isřa, ad ten issebḍeř, xenni ad yarbu netta řmuɛṣiyyet n temɣart nnes.”

17 Aqa d tina d tiweṣṣa i zi yumur SIDI i Musa, i iǧan jar weryaz d temɣart, jar babas d yessis, tenni iqqimen di taddart n babas di temẓi nnes.