1 Ařami yarzem Netta acemmiɛ wiss sebɛa, tuɣa ajenna yarsa ɛřaḥař azyen n tsaɛɛet.

2 Uca ẓriɣ sebɛa n lmalakat nni ibedden zzat i AREBBI uca immewc asent sebɛa n waccawen n uyicc n icarri.

3 Aqa ijj n lmalak nneɣni yusa-dd, yuyur ad ibedd ɣar uɛalṭar s ict n teqduḥt n wureɣ i řebxur. Immewc as waṭṭas n řebxur ḥima ad t iwehheb ak-d tẓaǧitin n marra imqeddasen x uɛalṭar qibač i řɛarc. 4 Uca arriḥet n řebxur ak-d tẓaǧitin n imqeddasen tuɣa tᵉttgeɛɛad zeg ufus n lmalak ɣar zzat n AREBBI. ◘8:4 Izhd. 141:2. 5 Lmalak iksi taqduḥt n řebxur, iccur i-tt s tmessi zeg uɛalṭar uca inḍar i-t ɣar temmurt uca usin-dd wajjajen d tmijjawin d wassamen d ijj n wenhezzi n temmurt.

6 Uca ḥezzment sebɛa n lmalakat tinni ɣar iǧa sebɛa n waccawen n uyicc n icarri ḥima ad daysen suḍent.

7 Uca isuḍ umezwaru di řbuq nnes uca tewḍa-dd tebruri d tmessi xeǧḍent ak-d waman, ttwamenḍarent x temmurt, uca tecmeḍ ict n ttuřut n temmurt d ict n ttuřut n tcejjura uřa d marra arbiɛ n temmurt icmeḍ.

8 Xenni isuḍ wenni d wiss tnayen di řbuq nnes uca ca n tmesřact am wedrar ameqqran icemmḍen, immenḍar di řebḥar uca ict n ttuřut n řebḥar idweř d idammen, ◘8:8 Ica. 13:13, 19; Irm. 51:25 9 u ict n ttuřut n imuddaren di řebḥar inni ɣarsen řeɛmar, mmuten, uca ict n ttuřut n iɣarruba tareddeǧ. ◼8:9 imuddaren - ixs ad yini ‘iwdan’ d ‘lḥayawanat’ d marra min iddaren nni izemmar ad yuyur.

10 Xenni isuḍ wenni d wiss třata di řbuq nnes uca iwḍa-dd ijj n itri ameqqran zeg ujenna, yurɣa am yijj n uɛeccař n tmessi, iwḍa-dd x ict n ttuřut n iɣezran u x tařawin n waman. 11 Itri-ya qqaren-as ‘Absinta’, niɣ ‘cciḥ’. Uca ict n ttuřut n waman tedweř tarzeg am ‘absint’, uca mmuten aṭṭas n yewdan s waman umi dewřen d imerzagen.

12 Xenni isuḍ wenni d wiss arebɛa di řbuq nnes uca tᵉttwaṭṭef ict n ttuřut n tfuct d ict n ttuřut n tziri d ict n ttuřut n itran, ařami tbbarcen ict n ttuřut zzaysen, war tᵉttiři ɛad tfawt i yict n ttuřut n uziř uca ammu uřa di ǧiřet.

13 Uca sřiɣ ijj n ugider iṭṭaw-dd di řwesṭ n ujenna, iqqar: “Uct, uct, uct x yinni izeddɣen x temmurt x ssibbet n tmijjawin inneɣni n waccawen n icarri n třata n lmalakat i ɣa isuḍen ɛad di řbuq!”