1 ⵉⵏⴰ ⵉ ⴷⴷ-ⵢⵓⵙⵉⵏ ⵖⴰⵔ ⴷⴰⵡⵓⴷ ⵖⴰⵔ ⵚⵉⵇⵍⴰⵖ, ⵓⵎⵉ ⵜⵓⵖⴰ ⵉⵜⵜⵅⴻⵚⵚⴰ ⵄⴰⴷ ⴰⴷ ⵉⵇⵇⵉⵎ ⴷⴰⵡⵓⴷ ⵉⵜⵜⴻⴳⴳⵯⴻⵊ ⵅ ⵡⵓⴷⴻⵎ ⵏ ⵛⴰⵡⵓⵍ, ⵎⵎⵉⵙ ⵏ ⵇⵉⵛ. ⵏⵉⵜⵏⵉ ⵜⵓⵖⴰ ⵜⵜⴻⵇⵇⴻⵏ ⵉ ⴰⵢⵜ ⵏ ⴱⵓ-ⵜⴻⵖⵔⵓⴹⵜ ⵉⵏⵏⵉ ⵉⵡⵛⵉⵏ ⴰⴼⵓⵙ ⵉ ⴷⴰⵡⵓⴷ ⴷⴻⴳ ⵓⵎⴻⵏⵖⵉ. 2 ⵏⵉⵜⵏⵉ ⵜⵓⵖⴰ ⵃⴻⵣⵎⴻⵏ ⵙ ⵍⴻⵇⵡⴰⵙ ⵓ ⵣⴻⵎⵎⴰⵔⴻⵏ ⴰⴷ ⵃⴻⵊⵊⴰⵔⴻⵏ ⵙ ⵢⴻⵥⵔⴰ ⵓ ⴰⴷ ⵡⵜⴻⵏ ⴼⵍⵉⵜⵛⴰⵜ ⵙ ⵍⵇⴻⵡⵙ ⵙ ⵓⴼⵓⵙ ⴰⴼⵓⵙⵉ ⵓ ⵙ ⵓⴼⵓⵙ ⴰⵣⴻⵍⵎⴰⴹ. ⵏⵉⵜⵏⵉ ⵜⵓⵖⴰ ⴰⵜⴻⵏ ⵣⴻⴳ ⴰⵢⵜⵎⴰⵙ ⵏ ⵛⴰⵡⵓⵍ, ⵣⵉ ⴱⵉⵏⵢⴰⵎⵉⵏ.

3 ⴰⵅⵉⵄⴰⵣⴰⵔ ⵜⵓⵖⴰ ⴷ ⴰⵣⴻⴵⵉⴼ ⵏⵙⴻⵏ, ⵅⴻⵏⵏⵉ ⵢⵓⵡⴰⵛ, ⵏⵉⵜⵏⵉ ⵙ ⵜⵏⴰⵢⴻⵏ ⵉⴷⵙⴻⵏ ⴷ ⴰⵔⵔⴰⵡⴻⵏ ⵏ ⵛⴰⵎⴰⵄⴰ, ⵣⵉ ⵊⵉⴱⵄⴰ,

ⵅⴻⵏⵏⵉ ⵢⴰⵣⵓ’ⵉⵍ ⴷ ⴼⴰⵍⴰⵟ, ⵏⵉⵜⵏⵉ ⵙ ⵜⵏⴰⵢⴻⵏ ⵉⴷⵙⴻⵏ ⴷ ⴰⵔⵔⴰⵡⴻⵏ ⵏ ⵄⴰⵣⵎⴰⵡⴻⵜ,

ⵓ ⴱⴰⵔⴰⵅⵢⴰ ⴷ ⵢⴰⵀⵓ, ⵣⵉ ⵄⴰⵏⴰⵜⵓⵜ,

4 ⵓ ⵢⴰⵛⵎⴰⵄⵢⴰ, ⵣⵉ ⵊⵉⴱⵄⵓⵏ, ⵡⴻⵏⵏⵉ ⵜⵓⵖⴰ ⴷ ⵉⵊⵊ ⵏ ⴱⵓ-ⵜⴻⵖⵔⵓⴹⵜ ⵊⴰⵔ ⵜⵍⴰⵜⵉⵏ ⵓ ⵜⵓⵖⴰ ⵅ ⵜⵍⴰⵜⵉⵏ,

5 ⵓⵍⴰ ⴷ ⵉⵔⵎⵉⵢⴰ, ⵢⴰⵃⵣⵉⵢⵉⵍ, ⵢⵓⵃⴰⵏⴰⵏ ⴷ ⵢⵓⵣⴰⴱⴰⴷ, ⴰⵊⴰⴷⵉⵔⵉ,

6 ⵉⵍⵄⵓⵣⴰⵢ, ⵢⴰⵔⵉⵎⵓⵜ, ⴱⴰⵄⵍⵉⵢⴰ, ⵛⴰⵎⴰⵔⵢⴰ, ⵛⴰⴼⴰⵟⵢⴰ, ⴰⵃⴰⵔⵓⴼⵉ,

7 ⵉⵍⵇⴰⵏⴰ, ⵢⴰⵛⵛⵉ-ⵢⴰⵀ, ⵄⴰⵣⵔⵉⵢⵉⵍ, ⵢⵓⵄⴰⵣⴰⵔ ⴷ ⵢⴰⵛⵓⴱⵄⴰⵎ, ⵏⵉⵜⵏⵉ ⴷ ⵉⵇⵓⵔⴰⵃⵉⵢⵢⴻⵏ,

8 ⵓ ⵖⴰⵔ ⵓⵏⴻⴳⴳⴰⵔ ⵢⵓⵄⵉⵍⴰ ⴷ ⵣⴰⴱⴰⴷⵢⴰ, ⵏⵉⵜⵏⵉ ⵙ ⵜⵏⴰⵢⴻⵏ ⵉⴷⵙⴻⵏ ⴷ ⴰⵔⵔⴰⵡⴻⵏ ⵏ ⵢⴰⵔⵓⵃⴰⵎ ⵣⵉ ⵊⴰⴷⵓⵔ.

9 ⵣⴻⴳ ⴰⵢⵜ ⵏ ⵊⴰⴷ ⴰⵇⴰ ⴷⵉⵏ ⵉⵏⵏⵉ ⵉⵎⵎⵙⴻⴱⴹⴰⵏ ⵉⵅⴻⴼ ⵏⵙⴻⵏ ⵃⵉⵎⴰ ⴰⴷ ⵥⵡⴰⵏ ⵖⴰⵔ ⴷⴰⵡⵓⴷ, ⴷⵉ ⵍⵇⴻⵍⵄⴰ ⴷⵉ ⵍⴻⵅⵍⴰ. ⴰⵢⵜ ⵏ ⴱⵓ-ⵜⴻⵖⵔⵓⴹⵜ ⵉⵎⴻⵃⴹⴻⵏ, ⵉⵄⴻⵙⴽⴰⵔⵉⵢⵢⴻⵏ ⵡⴻⵊⴷⴻⵏ ⵉ ⵓⵎⴻⵏⵖⵉ, ⵜⵜⵡⴰⵃⴻⵣⵎⴻⵏ ⵙ ⵜⵙⴻⴷⴷⴰⵔⵉⵢⵉⵏ ⵏ ⵓⵄⴻⵙⴽⴰⵔⵉ ⵜⵉⵎⴻⵇⵇⵔⴰⵏⵉⵏ ⵓ ⵙ ⵉⵃⵔⵉⵛⴻⵏ. ⵓⴷⵎⴰⵡⴻⵏ ⵏⵙⴻⵏ ⴰⵎ ⵡⵓⴷⵎⴰⵡⴻⵏ ⵏ ⵡⴻⵢⵔⴰⴷⴻⵏ ⵓ ⵏⵉⵜⵏⵉ ⵓⵢⵓⵔⴻⵏ ⵙ ⵜⴰⵣⵍⴰ ⴰⵎⴻⵛⵏⴰⵡ ⵉⵖⴰⵢⴹⴻⵏ ⵏ ⵡⴻⵣⵖⴰⵔ ⵅ ⵉⴷⵓⵔⴰⵔ.

10 ⵄⴰⵣⴰⵔ ⵜⵓⵖⴰ-ⵜ ⴷ ⴰⵣⴻⴵⵉⴼ,

ⵄⵓⴱⴰⴷⵢⴰ ⴷ ⵡⵉⵙⵙ ⵜⵏⴰⵢⴻⵏ, ⵉⵍⵉⵢⴰⴱ ⴷ ⵡⵉⵙⵙ ⵜⵍⴰⵜⴰ,

11 ⵎⵉⵛⵎⴰⵏⵏⴰ ⴷ ⵡⵉⵙⵙ ⴰⵔⴻⴱⵄⴰ, ⵉⵔⵎⵉⵢⴰ ⴷ ⵡⵉⵙⵙ ⵅⴻⵎⵙⴰ,

12 ⵄⴰⵜⵜⴰⵢ ⴷ ⵡⵉⵙⵙ ⵙⴻⵜⵜⴰ, ⵉⵍⵉⵢⵉⵍ ⴷ ⵡⵉⵙⵙ ⵙⴻⴱⵄⴰ,

13 ⵢⵓⵃⴰⵏⴰⵏ ⴷ ⵡⵉⵙⵙ ⵜⵎⴻⵏⵢⴰ, ⵉⵍⵣⴰⴱⴰⴷ ⴷ ⵡⵉⵙⵙ ⵜⴻⵙⵄⴰ,

14 ⵉⵔⵎⵉⵢⴰ ⴷ ⵡⵉⵙⵙ ⵄⴻⵛⵔⴰ, ⵎⴰⵅⴱⴰⵏⴰⵢ ⴷ ⵡⵉⵙⵙ ⵃⵉⵟⴰⵛ.

15 ⵉⵏⴰ ⵜⵓⵖⴰ ⴰⵜⴻⵏ ⵣⴻⴳ ⵡⴰⵔⵔⴰⵡⴻⵏ ⵏ ⵊⴰⴷ, ⵉⵎⴻⵇⵇⵔⴰⵏⴻⵏ ⵏ ⵍⵄⴻⵙⴽⴰⵔ. ⴰⵎⴻⵥⵢⴰⵏ ⵃⴻⵙⴱⴻⵏ ⵜ ⴰⵎ ⵎⵢⴰ ⵏ ⵢⴻⵔⵢⴰⵣⴻⵏ ⵓ ⴰⵎⴻⵇⵇⵔⴰⵏ ⴰⵎ ⴰⵍⴻⴼ. 16 ⵉⵏⴰ ⴷ ⵉⵏⵏⵉ ⵉⵥⵡⴰⵏ ⵍ’ⵓⵔⴷⵓⵏ ⴷⴻⴳ ⵓⵢⵓⵔ ⴰⵎⴻⵣⵡⴰⵔⵓ, ⵓⵎⵉ ⵉⵙⴼⵉ ⵍ’ⵓⵔⴷⵓⵏ ⴱⴰⵔⵔⴰ ⵎⴰⵔⵔⴰ ⵜⵉⵎⵓⵡⵡⴰ ⵏⵏⴻⵙ ⵓ ⵏⵉⵜⵏⵉ ⵓⵥⵥⵍⴻⵏ ⵅ ⵎⴰⵔⵔⴰ ⵉⵎⴻⵣⴷⴰⵖ ⵏ ⵍⴻⵡⴹⴰⵜ ⵏ ⵜⴻⵖⵣⵓⵔⵜ ⵉ ⵉⴵⴰⵏ ⵖⴰⵔ ⵛⵛⴰⵔⵇ ⴷ ⵍⵖⴰⵔⴱ.

17 ⵓⵍⴰ ⵣⴻⴳ ⵡⴰⵔⵔⴰⵡⴻⵏ ⵏ ⴱⵉⵏⵢⴰⵎⵉⵏ ⵓ ⵣⴻⴳ ⵡⴰⵔⵔⴰⵡⴻⵏ ⵏ ⵢⴰⵀⵓⴷⴰ ⵓⵙⵉⵏ-ⴷⴷ ⵢⴻⵔⵢⴰⵣⴻⵏ ⵖⴰⵔ ⴷⴰⵡⵓⴷ ⵖⴰⵔ ⵍⵇⴻⵍⵄⴰ ⵏ ⵡⴻⴷⵔⴰⵔ. 18 ⴷⴰⵡⵓⴷ ⵉⴼⴼⴻⵖ-ⴷⴷ ⵖⴰⵔⵙⴻⵏ ⵃⵉⵎⴰ ⴰⴷ ⵜⴻⵏ ⵉⵍⵇⴰ, ⵓⵛⴰ ⵉⵟⵟⴻⴼ ⴷⴻⴳ ⵡⴰⵡⴰⵍ, ⵉⵏⵏⴰ ⴰⵙⴻⵏ: “ⵎⴰⵍⴰ ⴽⴻⵏⵏⵉⵡ ⵜⵓⵙⵉⵎ-ⴷⴷ ⵖⴰⵔⵉ ⵃⵉⵎⴰ ⴰⴷ ⴰⵢⵉ ⵜⴻⵡⵛⴻⵎ ⴰⴼⵓⵙ, ⵅⴻⵏⵏⵉ ⵏⴻⵛⵛ ⴰⴷ ⵉⵍⵉⵖ ⵙ ⵡⵓⵍ ⴷ ⵉⵊⵊ ⴰⴽⵉⴷⵡⴻⵎ, ⵎⴰⵛⴰ ⵎⴰⵍⴰ ⴽⴻⵏⵏⵉⵡ ⵜⵓⵙⵉⵎ-ⴷⴷ ⵃⵉⵎⴰ ⴰⴷ ⴰⵢⵉ ⵜⵙⴻⵍⵍⵎⴻⵎ ⵉ ⵉⵖⵔⵉⵎⴻⵏ ⵉⵏⵓ, ⵡⴰⵅⵅⴰ ⵡⴰⵔ ⴷⵉⵏ ⵜⴻⴵⵉ ⵍⴻⵅⵛⵓⵏⴻⵜ ⵖⴰⵔ ⵉⴼⴰⵙⵙⴻⵏ ⵉⵏⵓ, ⵅⴻⵏⵏⵉ ⵉⵍⵉ ⴰⴷ ⵜ ⵉⵥⴰⵔ ⴰⵔⴻⴱⴱⵉ ⵏ ⵍⴻⵊⴷⵓⴷ ⵏⵏⴻⵖ ⵓ ⴰⴷ ⴽⴻⵏⵏⵉⵡ ⵉⵅⴻⴵⴻⵙ!” 19 ⵉⵡⴹⴰ-ⴷⴷ ⴰⵔⵔⵓⵃ ⴰⵎ ⵡⴰⵔⵔⵓⴹ ⵅ ⵄⴰⵎⴰⵙⴰⵢ, ⴰⵣⴻⴵⵉⴼ ⵏ ⵜⵍⴰⵜⵉⵏ, ⵏⴻⵜⵜⴰ ⵉⵏⵏⴰ: “ⵏⴻⵛⵛⵉⵏ ⴰⴽⵉⴷⴻⴽ, ⴷⴰⵡⵓⴷ, ⵓ ⵏⴻⵛⵛⵉⵏ ⴰⴽⵉⴷⴻⴽ, ⵎⵎⵉⵙ ⵏ ⵢⴰⵙⵙⴰ. ⵍⴻⵀⵏⴰ, ⵍⴻⵀⵏⴰ ⴰⴷ ⴽⵉⴷⴻⴽ ⵢⵉⵍⵉ ⵓ ⵍⴻⵀⵏⴰ ⴰⴷ ⵢⵉⵍⵉ ⴰⴽ-ⴷ ⵢⵉⵏⵏⵉ ⴷ ⴰⵛ ⵉⵡⵛⵉⵏ ⴰⴼⵓⵙ, ⵎⴰⵖⴰⵔ ⴰⵔⴻⴱⴱⵉ ⵏⵏⴻⵛ ⵉⵡⵛⴰ ⴰⵛ ⴰⴼⵓⵙ.” ⵅⴻⵏⵏⵉ ⵉⵙⵙⵉⴷⴻⴼ ⵉ-ⵜⴻⵏ ⴷⴰⵡⵓⴷ ⵓ ⵉⴳⴳⴰ ⵉ-ⵜⴻⵏ ⴷ ⵉⵣⴻⴵⵉⴼⴻⵏ ⵅ ⵜⴻⵔⴱⵉⵄⵜ ⵏ ⵍⵄⴻⵙⴽⴰⵔ.

20 ⵓⵍⴰ ⵣⵉ ⵎⴰⵏⴰⵙⵙⴰ ⵜⵓⵖⴰ ⴷⵉⵏ ⵉⵏⵏⵉ ⵉⵄⴷⵓⵏ ⵖⴰⵔ ⴷⴰⵡⵓⴷ, ⵓⵎⵉ ⴷⴷ-ⵉⴼⴼⴻⵖ ⴰⴽ-ⴷ ⵉⴼⵉⵍⵉⵙⵟⵉⵏⵉⵢⵢⴻⵏ ⵖⴰⵔ ⵓⵎⴻⵏⵖⵉ ⴰⴽ-ⴷ ⵛⴰⵡⵓⵍ. ⵉⴼⵉⵍⵉⵙⵟⵉⵏⵉⵢⵢⴻⵏ ⵎⴰⵛⴰ ⵡⴰⵔ ⴷ ⴰⵙⴻⵏ ⵊⵊⵉⵏ ⴰⴷ ⵡⵛⴻⵏ ⴰⴼⵓⵙ, ⵎⵉⵏⵣⵉ ⵍⴱⴰⵛⴰⵜ ⵏ ⵜⵏⴻⴷⴷⴰⵎ ⵏ ⵉⴼⵉⵍⵉⵙⵟⵉⵏⵉⵢⵢⴻⵏ ⵙⵙⴻⴽⴽⴻⵏ ⵜ, ⵏⵏⴰⵏ: “ⵣⴻⵄⵎⴰ ⵏⴻⵜⵜⴰ ⵉⵣⴻⵎⵎⴰⵔ ⴰⴷ ⵉⵄⴷⵓ ⵙ ⵉⵣⴻⴵⵉⴼⴻⵏ ⵏⵏⴻⵖ ⴷⴻⴳ ⵓⴼⵓⵙ ⵏⵏⴻⵙ ⵖⴰⵔ ⵛⴰⵡⵓⵍ, ⵙⵉⴷⴻⵙ.” 21 ⵓⵎⵉ ⴷⴷ-ⵉⵄⵇⴻⴱ ⵖⴰⵔ ⵚⵉⵇⵍⴰⵖ, ⵄⴷⵓⵏ ⵉⵏⴰ ⵖⴰⵔⴻⵙ ⵣⴻⴳ ⴰⵢⵜ ⵏ ⵎⴰⵏⴰⵙⵙⴰ: ⵄⴰⴷⵏⴰⵃ, ⵢⵓⵣⴰⴱⴰⴷ, ⵢⴰⴷⵉⵄⵉⵍ, ⵎⵉⵅⴰⵢⵉⵍ, ⵢⵓⵣⴰⴱⴰⴷ, ⵉⵍⵉⵀⵓ ⴷ ⵚⵉⵍⵍⵜⴰⵢ, ⵍⵇⴻⴱⵟⴰⵏⴰⵜ ⵅ ⵍⵓⵔⵓⴼ ⵏ ⵎⴰⵏⴰⵙⵙⴰ. 22 ⵏⵉⵜⵏⵉ ⵡⵛⵉⵏ ⴰⴼⵓⵙ ⵉ ⴷⴰⵡⵓⴷ ⵃⵉⵎⴰ ⴰⴷ ⵉⴳⴻⵡⵡⴻⴷ ⵜⵉⵔⴱⵉⵄⵉⵏ ⵏ ⵍⵄⴻⵙⴽⴰⵔ, ⵎⴰⵖⴰⵔ ⵏⵉⵜⵏⵉ ⵎⴰⵔⵔⴰ ⵜⵓⵖⴰ ⴰⵜⴻⵏ ⴷ ⴰⵢⵜ ⵏ ⴱⵓ-ⵜⴻⵖⵔⵓⴹⵜ ⵉⵎⴻⵃⴹⴻⵏ ⵓ ⵏⵉⵜⵏⵉ ⵜⵓⵖⴰ ⴰⵜⴻⵏ ⴷ ⵉⴽⵓⵎⴰⵏⴷⴰⵔⴻⵏ ⵏ ⵍⵄⴻⵙⴽⴰⵔ. 23 ⵎⴰⵖⴰⵔ ⴷⵉ ⵍⵡⴻⵇⵜ ⵏⵏⵉ ⵓⵙⵉⵏ-ⴷⴷ ⵢⴻⵔⵢⴰⵣⴻⵏ ⵖⴰⵔ ⴷⴰⵡⵓⴷ ⵣⴻⴳ ⵡⴰⵙⵙ ⴰⵍ ⴰⵙⵙ ⵃⵉⵎⴰ ⴰⴷ ⴰⵙ ⵡⵛⴻⵏ ⴰⴼⵓⵙ, ⴰⵍⴰⵎⵉ ⴷⴻⵡⵍⴻⵏ ⴷ ⵍⵄⴻⵙⴽⴰⵔ ⴷ ⴰⵎⴻⵇⵇⵔⴰⵏ, ⴰⵎ ⵍⵄⴻⵙⴽⴰⵔ ⵏ ⴰⵔⴻⴱⴱⵉ.

24 ⵡⴰ ⴷ ⵍⵇⴻⴷⴷ ⵏ ⵉⵣⴻⴵⵉⴼⴻⵏ ⵏⵏⵉ ⵉⵜⵜⵡⴰⵃⴻⵙⴱⴻⵏ ⵏ ⵢⵉⵏⵏⵉ ⵉ ⵜⵓⵖⴰ ⵉⵙⵙⵡⴻⵊⴷⴻⵏ ⵉ ⵓⵎⴻⵏⵖⵉ, ⵉⵏⵏⵉ ⴷⴷ-ⵢⵓⵙⵉⵏ ⵖⴰⵔ ⴷⴰⵡⵓⴷ ⴷⵉ ⵃⴰⴱⵔⵓⵏ ⵎⴰⵃⴻⵏⴷ ⴰⴷ ⵖⴰⵔⴻⵙ ⵙⵙⴻⵄⴷⵓⵏ ⵜⴰⴳⴻⵍⴷⴰ ⵏ ⵛⴰⵡⵓⵍ, ⴰⵎ ⵎⴰⵎⵎⴻⵛ ⵜ ⵢⵓⵎⵓⵔ ⵙⵉⴷⵉ:

25 ⵣⴻⴳ ⵡⴰⵔⵔⴰⵡⴻⵏ ⵏ ⵢⴰⵀⵓⴷⴰ ⵜⵓⵖⴰ ⵍⵇⴻⴷⴷ ⵏ ⵢⵉⵏⵏⵉ ⵢⴰⵔⴱⵓⵏ ⵜⵉⵙⴻⴷⴷⴰⵔⵉⵢⵉⵏ ⵏ ⵓⵄⴻⵙⴽⴰⵔⵉ ⵜⵉⵎⴻⵇⵇⵔⴰⵏⵉⵏ ⴷ ⵉⵃⵔⵉⵛⴻⵏ ⵙⴻⵜⵜⴰ-ⴰⵍⴰⴼ ⵓ-ⵜⴻⵎⵏ-ⵎⵢⴰ ⵏ ⵢⴻⵔⵢⴰⵣⴻⵏ. ⵏⵉⵜⵏⵉ ⵜⵓⵖⴰ ⵡⴻⵊⴷⴻⵏ ⵉ ⵓⵎⴻⵏⵖⵉ.

26 ⵣⴻⴳ ⵡⴰⵔⵔⴰⵡⴻⵏ ⵏ ⵛⵉⵎⵄⵓⵏ ⵜⵓⵖⴰ ⵍⵇⴻⴷⴷ ⵏ ⴰⵢⵜ ⵏ ⴱⵓ-ⵜⴻⵖⵔⵓⴹⵜ ⵉⵎⴻⵃⴹⴻⵏ ⵉ ⵍⵄⴻⵙⴽⴰⵔ ⵙⴻⴱⵄⴰ-ⴰⵍⴰⴼ ⵓ-ⵎⵢⴰ ⵏ ⵢⴻⵔⵢⴰⵣⴻⵏ.

27 ⵣⴻⴳ ⵡⴰⵔⵔⴰⵡⴻⵏ ⵏ ⵍⴰⵡⵉ ⴰⵔⴻⴱⵄⴰ-ⴰⵍⴰⴼ ⵓ-ⵙⴻⵜⵜⴰ-ⵎⵢⴰ ⵏ ⵢⴻⵔⵢⴰⵣⴻⵏ.

28 ⵢⴰⵀⵓⵢⴰⴷⴰⵄ ⵜⵓⵖⴰ ⴷ ⵍⵃⴰⴽⴻⵎ ⵉ ⵡⴰⵔⵔⴰⵡⴻⵏ ⵏ ⵀⴰⵔⵓⵏ. ⵏⴻⵜⵜⴰ ⵢⵉⵡⵉ ⴰⴽⵉⴷⴻⵙ ⵜⴻⵍⵜ-ⴰⵍⴰⴼ ⵓ-ⵙⴻⴱⵄⴰ-ⵎⵢⴰ ⵏ ⵢⴻⵔⵢⴰⵣⴻⵏ.

29 ⵚⴰⴷⵓⵇ ⵜⵓⵖⴰ ⴷ ⴰⵃⵓⴷⵔⵉ, ⴱⵓ-ⵜⴻⵖⵔⵓⴹⵜ ⵉⵎⴻⵃⴹⴻⵏ. ⵣⵉ ⵜⴰⴷⴷⴰⵔⵜ ⵏ ⴱⴰⴱⴰⵙ ⵜⵓⵖⴰ ⴷⵉⵏ ⵜⵏⴰⵢⴻⵏ ⵓ-ⵄⵉⵛⵔⵉⵏ ⵏ ⵍⵇⴻⴱⵟⴰⵏⴰⵜ.

30 ⵣⴻⴳ ⵡⴰⵔⵔⴰⵡⴻⵏ ⵏ ⴱⵉⵏⵢⴰⵎⵉⵏ, ⴰⵢⵜⵎⴰⵙ ⵏ ⵛⴰⵡⵓⵍ, ⵜⵓⵖⴰ ⴷⵉⵏ ⵜⴻⵍⵜ-ⴰⵍⴰⴼ ⵏ ⵢⴻⵔⵢⴰⵣⴻⵏ, ⵎⵉⵏⵣⵉ ⴰⵣⵢⴻⵏ ⴰⵎⴻⵇⵇⵔⴰⵏ ⵣⵣⴰⵢⵙⴻⵏ ⵜⵓⵖⴰ ⵃⴻⵟⵟⴰⵏ ⵜⴰⴷⴷⴰⵔⵜ ⵏ ⵛⴰⵡⵓⵍ.

31 ⵣⴻⴳ ⵡⴰⵔⵔⴰⵡⴻⵏ ⵏ ⵉⴼⵔⴰⵢⵉⵎ ⵜⵓⵖⴰ ⴷⵉⵏ ⵄⵉⵛⵔⵉⵏ-ⴰⵍⴻⴼ ⵓ-ⵜⵎⴻⵏⵢⴰ-ⵎⵢⴰ ⵏ ⵢⴻⵔⵢⴰⵣⴻⵏ, ⴰⵢⵜ ⵏ ⴱⵓ-ⵜⴻⵖⵔⵓⴹⵜ ⵉⵎⴻⵃⴹⴻⵏ, ⵉⵔⵢⴰⵣⴻⵏ ⵙ ⵢⵉⵙⴻⵎ ⴷⵉ ⵜⴰⴷⴷⴰⵔⵜ ⵏ ⵉⴱⴰⴱⴰⵜⴻⵏ ⵏⵙⴻⵏ.

32 ⵣⴻⴳ ⵡⴻⵣⵢⴻⵏ ⵏ ⵜⴻⵇⴱⵉⵍⵜ ⵏ ⵎⴰⵏⴰⵙⵙⴰ ⵜⵓⵖⴰ ⴷⵉⵏ ⵜⵎⴻⵏⵟⴰⵛ-ⴰⵍⴻⴼ ⵏ ⵢⴻⵔⵢⴰⵣⴻⵏ, ⵉⵏⵏⵉ ⵜⵓⵖⴰ ⵜⵜⵡⴰⵍⴰⵖⴰⵏ ⵙ ⵢⵉⵙⵎⴰⵡⴻⵏ ⵏⵙⴻⵏ ⵎⴰⵃⴻⵏⴷ ⴰⴷ ⴷⴷ-ⴰⵙⴻⵏ ⴰⴷ ⴳⴳⴻⵏ ⴷⴰⵡⵓⴷ ⴷ ⴰⵊⴻⴵⵉⴷ.

33 ⵣⴻⴳ ⵡⴰⵔⵔⴰⵡⴻⵏ ⵏ ⵉⵙⵙⴰⴽⴰⵔ, ⵉⵏⵏⵉ ⵖⴰⵔⵙⴻⵏ ⵍⴻⴼⴰⵀⵎⴻⵜ ⵏ ⵍⵎⵉⵊⴰⵍⴰⵜ ⵏ ⵍⵡⴻⵇⵜ ⵃⵉⵎⴰ ⴰⴷ ⵙⵙⵏⴻⵏ ⵎⵉⵏ ⵜⵓⵖⴰ ⵅ ⵉⵙⵔⴰⵉⵍ ⴰⴷ ⵉⴳⴳ, ⵜⵓⵖⴰ ⵍⵇⴻⴱⵟⴰⵏⴰⵜ ⵏⵙⴻⵏ ⵎⵉⵜⴰⵢⴻⵏ ⵏ ⵢⴻⵔⵢⴰⵣⴻⵏ, ⵓ ⵎⴰⵔⵔⴰ ⴰⵢⵜⵎⴰⵜⵙⴻⵏ ⵜⵓⵖⴰ ⴰⵜⴻⵏ ⵙⴰⴷⵓ ⴰⴼⵓⵙ ⵏⵙⴻⵏ. ◼12:33 ⵙⴰⴷⵓ ⴰⴼⵓⵙ ⵏⵙⴻⵏ-ⵙ ⵜⵄⵉⴱⵔⴰⵏⵉⵜ ‘ⵙⴰⴷⵓ ⴰⵇⴻⵎⵎⵓⵎ ⵏⵙⴻⵏ’.

34 ⵣⴻⴳ ⵡⴰⵔⵔⴰⵡⴻⵏ ⵏ ⵣⴰⴱⵓⵍⵓⵏ, ⵣⴻⴳ ⵢⵉⵏⵏⵉ ⴷⴷ-ⵉⴼⴼⵖⴻⵏ ⴰⴽ-ⴷ ⵍⵄⴻⵙⴽⴰⵔ ⵙ ⵎⴰⵔⵔⴰ ⵍⴻⵙⵏⴰⵃ ⵏⵙⴻⵏ, ⵜⵓⵖⴰ ⴷⵉⵏ ⵅⴻⵎⵙⵉⵏ-ⴰⵍⴻⴼ ⵏ ⵢⴻⵔⵢⴰⵣⴻⵏ. ⵏⵉⵜⵏⵉ ⵜⵓⵖⴰ ⵙⵙⵡⴻⵊⴷⴻⵏ ⵃⵉⵎⴰ ⴰⴷ ⵙⴻⵜⵜⴼⴻⵏ ⵉⵅⴻⴼ ⵏⵙⴻⵏ ⴷⴻⴳ ⵓⵙⴻⴷⴷⵉ ⵙ ⵡⵓⵍ ⵉⵎⵓⵏ ⵏⵉⵛⴰⵏ.

35 ⵣⴻⴳ ⵡⴰⵔⵔⴰⵡⴻⵏ ⵏ ⵏⴰⴼⵜⴰⵍⵉ ⵜⵓⵖⴰ ⴷⵉⵏ ⴰⵍⴻⴼ ⵏ ⵍⵇⴻⴱⵟⴰⵏⴰⵜ. ⵜⵓⵖⴰ-ⵜⴻⵏ ⴷⵉ ⵙⴻⴱⵄⴰ ⵓ-ⵜⵍⴰⵜⵉⵏ-ⴰⵍⴻⴼ ⵏ ⵢⴻⵔⵢⴰⵣⴻⵏ ⵉⵏⵏⵉ ⵢⴰⵔⴱⵓⵏ ⵜⴰⵙⴻⴷⴷⴰⵔⵜ ⵏ ⵓⵄⴻⵙⴽⴰⵔⵉ ⵜⴰⵎⴻⵇⵇⵔⴰⵏⵜ ⴷ ⵍⴰⵏⵙⴰ,

36 ⵣⴻⴳ ⵡⴰⵔⵔⴰⵡⴻⵏ ⵏ ⴷⴰⵏ ⵜⵓⵖⴰ ⴷⵉⵏ ⵜⵎⴻⵏⵢⴰ ⵓ-ⵄⵉⵛⵔⵉⵏ ⴰⵍⴻⴼ ⵓ-ⵙⴻⵜⵜⴰ-ⵎⵢⴰ ⵏ ⵢⴻⵔⵢⴰⵣⴻⵏ, ⵡⴻⵊⴷⴻⵏ ⵉ ⵓⵎⴻⵏⵖⵉ.

37 ⵣⴻⴳ ⵡⴰⵔⵔⴰⵡⴻⵏ ⵏ ⴰⵛⵉⵔ ⴼⴼⵖⴻⵏ-ⴷⴷ ⴰⵔⴻⴱⵄⴰ-ⴰⵍⴰⴼ ⵏ ⵢⴻⵔⵢⴰⵣⴻⵏ ⴰⴽ-ⴷ ⵍⵄⴻⵙⴽⴰⵔ ⵃⵉⵎⴰ ⴰⴷ ⵙⵙⴱⴻⴷⴷⴻⵏ ⵉⵅⴻⴼ ⵏⵙⴻⵏ ⴷⴻⴳ ⵓⵙⴻⴷⴷⵉ.

38 ⵣⴻⴳ ⵓⵊⴻⵎⵎⴰⴹ ⵏ ⵍ’ⵓⵔⴷⵓⵏ, ⵣⴻⴳ ⵡⴰⵔⵔⴰⵡⴻⵏ ⵏ ⵔⵓⴱⵉⵏ ⵓ ⵣⴻⴳ ⵡⴰⵔⵔⴰⵡⴻⵏ ⵏ ⵊⴰⴷ ⵓ ⵣⴻⴳ ⵡⴻⵣⵢⴻⵏ ⵏ ⵜⴻⵇⴱⵉⵍⵜ ⵏ ⵎⴰⵏⴰⵙⵙⴰ ⵜⵓⵖⴰ ⴷⵉⵏ ⵎⵢⴰ ⵓ-ⵄⵉⵛⵔⵉⵏ-ⴰⵍⴻⴼ ⵏ ⵢⴻⵔⵢⴰⵣⴻⵏ ⴰⴽ-ⴷ ⵎⴰⵔⵔⴰ ⵍⴻⵙⵏⴰⵃ ⵉ ⵓⵎⴻⵏⵖⵉ.

39 ⵎⴰⵔⵔⴰ ⵉⵄⴻⵙⴽⴰⵔⵉⵢⵢⴻⵏ-ⴰ ⵓⵙⵉⵏ-ⴷⴷ ⵖⴰⵔ ⵃⴰⴱⵔⵓⵏ, ⵜⵜⵡⴰⵙⴻⵜⵜⴼⴻⵏ ⴷⴻⴳ ⵉⵙⴻⴷⴷⵉⵢⵢⴻⵏ ⵙ ⵡⵓⵍ ⵉⵎⵓⵏ, ⵃⵉⵎⴰ ⴰⴷ ⴳⴳⴻⵏ ⴷⴰⵡⵓⴷ ⴷ ⴰⵊⴻⴵⵉⴷ ⵅ ⵎⴰⵔⵔⴰ ⵉⵙⵔⴰⵉⵍ. ⵓⵍⴰ ⴷ ⵎⵉⵏ ⵉⵇⵇⵉⵎⴻⵏ ⵏ ⴰⵢⵜ ⵏ ⵉⵙⵔⴰⵉⵍ ⵜⵓⵖⴰ ⴰⵜⴻⵏ ⵙ ⵡⵓⵍ ⴷ ⵉⵊⵊ ⵃⵉⵎⴰ ⴰⴷ ⴳⴳⴻⵏ ⴷⴰⵡⵓⴷ ⴷ ⴰⵊⴻⴵⵉⴷ. 40 ⵏⵉⵜⵏⵉ ⵇⵇⵉⵎⴻⵏ ⵜⵍⴰⵜⴰ ⵏ ⵡⵓⵙⵙⴰⵏ ⴷⵉⵏⵏⵉ ⵖⴰⵔ ⴷⴰⵡⵓⴷ, ⵛⵛⵉⵏ ⵙⵡⵉⵏ, ⵎⴰⵖⴰⵔ ⴰⵢⵜⵎⴰⵜⵙⴻⵏ ⵜⵓⵖⴰ ⴱⴻⴷⴷⴻⵏ ⴰⴽⵉⴷⵙⴻⵏ. 41 ⵓⵍⴰ ⴷ ⵢⵉⵏⵏⵉ ⵢⵓⴷⵙⴻⵏ ⴰⵍ ⵉⵙⵙⴰⴽⴰⵔ ⴷ ⵣⴰⴱⵓⵍⵓⵏ ⴷ ⵏⴰⴼⵜⴰⵍⵉ ⵓⵙⵉⵏ-ⴷⴷ, ⵉⵡⵢⴻⵏ-ⴷⴷ ⵡⴻⵖⵔⵓⵎ ⵅ ⵉⵖⵢⴰⵍ, ⵅ ⵉⵍⴻⵖⵎⴰⵏ, ⵅ ⵉⵙⴰⵔⴹⴰⵏ ⵓ ⵅ ⵉⴼⵓⵏⴰⵙⴻⵏ, ⵙ ⵍⴻⵄⵡⴻⵍⵜ ⴰⵎ ⴼⴰⵔⵉⵏⴰ ⴷ ⵉⵖⵔⵓⵎⴻⵏ ⵏ ⵜⴰⵣⴰⵔⵜ ⴷ ⵉⵖⵔⵓⵎⴻⵏ ⵏ ⵣⵣⴱⵉⴱ ⴷ ⴱⵉⵏⵓ ⴷ ⵣⵣⴻⵛⵜ ⴷ ⵉⴼⵓⵏⴰⵙⴻⵏ ⴷ ⵡⵓⴵⵉ ⵙ ⵓⴼⴻⵢⵢⴻⴹ, ⵎⴰⵖⴰⵔ ⵜⵓⵖⴰ ⴷⵉⵏ ⵍⴻⴼⵔⴰⵃⴻⵜ ⴷⵉ ⵉⵙⵔⴰⵉⵍ.