1 ⵜⵓⵖⴰ ⴷⵉⵏ ⵉⵊⵊ ⵏ ⵡⴻⵔⵢⴰⵣ ⵣⵉ ⵔⴰⵎⴰⵜⴰⵢⵉⵎ-ⵚⵓⴼⵉⵎ, ⵣⴻⴳ ⵉⴷⵓⵔⴰⵔ ⵏ ⵉⴼⵔⴰⵢⵉⵎ, ⵇⵇⴰⵔⴻⵏ ⴰⵙ ⵉⵍⵇⴰⵏⴰ, ⵎⵎⵉⵙ ⵏ ⵢⴰⵔⵓⵃⴰⵎ, ⵎⵎⵉⵙ ⵏ ⴰⵍⵉⵀⵓ, ⵎⵎⵉⵙ ⵏ ⵜⵓⵃⵓ, ⵎⵎⵉⵙ ⵏ ⵚⵓⴼ, ⵉⵊⵊ ⵏ ⵡⴻⵔⵢⴰⵣ ⵣⵉ ⵉⴼⵔⴰⵢⵉⵎ. ◘1:1 1 ⵉⵎ. 6:11, 12 2 ⵏⴻⵜⵜⴰ ⵜⵓⵖⴰ ⵖⴰⵔⴻⵙ ⵜⵏⴰⵢⴻⵏ ⵏ ⵜⴻⵎⵖⴰⵔⵉⵏ. ⵉⵛⵜⴻⵏ ⵇⵇⴰⵔⴻⵏ ⴰⵙ ⵃⴰⵏⵏⴰ ⵓ ⵜⴻⵏⵏⴻⵖⵏⵉⵜ ⵇⵇⴰⵔⴻⵏ ⴰⵙ ⴼⴰⵏⵉⵏⵏⴰ. ⴼⴰⵏⵉⵏⵏⴰ ⵜⵓⵖⴰ ⵖⴰⵔⴻⵙ ⵉⵃⴻⵏⵊⵉⵔⴻⵏ, ⵎⴰⵛⴰ ⵃⴰⵏⵏⴰ ⵡⴰⵔ ⵖⴰⵔⴻⵙ ⵜⵓⵖⵉ ⴱⵓ ⵉⵃⴻⵏⵊⵉⵔⴻⵏ. 3 ⴰⵔⵢⴰⵣ-ⴰ ⵜⵓⵖⴰ ⵉⵜⵜⴳⴻⵄⵄⴰⴷ ⴰⵙⴻⴳⴳⵯⴰⵙ ⵅ ⵓⵙⴻⴳⴳⵯⴰⵙ ⵣⵉ ⵜⴻⵏⴷⵉⵏⵜ ⵏⵏⴻⵙ ⵃⵉⵎⴰ ⴰⴷ ⵉⵙⵊⴻⴷ ⵓ ⴰⴷ ⵉⵇⴻⴷⴷⴻⵎ ⵜⵉⵖⴰⵔⵚⴰ ⵉ ⵙⵉⴷⵉ ⵏ ⵍⵄⴻⵙⴽⴰⵔⴰⵜ ⵖⴰⵔ ⵜⴰⴷⴷⴰⵔⵜ ⵏ ⵙⵉⴷⵉ ⴷⵉ ⵛⵉⵍⵓ. ⴷⵉⵏⵏⵉ ⵜⵓⵖⴰ ⵜⵏⴰⵢⴻⵏ ⵏ ⵉⵃⴻⵏⵊⵉⵔⴻⵏ ⵏ ⵄⴰⵍⵉ, ⵃⵓⴼⵏⵉ ⴷ ⴼⵉⵏⴰⵃⴰⵙ. ⵏⵉⵜⵏⵉ ⴷ ⵉⴽⴻⵀⵀⴰⵏⴻⵏ ⵏ ⵙⵉⴷⵉ. ◘1:3 ⵓⴼ. 23:14; ⴰⵄⵡⴷ. 16:16.

4 ⴷⴻⴳ ⵡⴰⵙⵙ ⵍⴰⵎⵉ ⴷⴷ-ⵢⵉⵡⵉ ⵉⵍⵇⴰⵏⴰ ⵜⴰⵖⴰⵔⵚⵜ, ⵉⵎⵙⴰⵔ ⴰⵇⴰ ⵉⵡⵛⴰ ⵜⵉⵙⴻⵇⵇⴰⵔ ⵏ ⵜⵖⴰⵔⵚⵜ ⵉ ⵜⴻⵎⵖⴰⵔⵜ ⵏⵏⴻⵙ ⴼⴰⵏⵉⵏⵏⴰ ⵓ ⵉ ⵎⴰⵔⵔⴰ ⵉⵃⴻⵏⵊⵉⵔⴻⵏ ⵏⵏⴻⵙ ⴷ ⵜⵃⴻⵏⵊⵉⵔⵉⵏ ⵏⵏⴻⵙ, 5 ⵎⴰⵛⴰ ⵉ ⵃⴰⵏⵏⴰ ⵉⵡⵛⴰ ⴰⵙ ⵜⵏⴰⵢⴻⵏ ⵏ ⵜⵙⴻⵇⵇⴰⵔ, ⵎⴰⵖⴰⵔ ⵏⴻⵜⵜⴰ ⵜⵓⵖⴰ ⵉⵜⵜⴻⵅⵙ ⵃⴰⵏⵏⴰ, ⵡⴰⵅⵅⴰ ⵙⵉⴷⵉ ⵜⵓⵖⴰ ⵉⴱⴻⵍⵍⴻⵄ ⴰⵙ ⵍⴻⵎⵍⴰⵡⴻⵜ. 6 ⵜⴰⵖⵔⵉⵎⵜ ⵏⵏⴻⵙ ⵜⵓⵖⴰ ⵜⵙⴻⵄⵄⴰⵔ ⵉ-ⵜⵜ ⴰⵟⵟⴰⵙ ⵎⴰⵃⴻⵏⴷ ⴰⴷ ⵜⵜ ⵜⴻⵙⵙⴼⵓⴳⴻⵎ, ⵎⵉⵏⵣⵉ ⵙⵉⴷⵉ ⵜⵓⵖⴰ ⵉⴱⴻⵍⵍⴻⵄ ⴰⵙ ⵍⴻⵎⵍⴰⵡⴻⵜ.

7 ⴰⵎⵎⵓ ⵉ ⵉⴳⴳⴰ ⵉⵍⵇⴰⵏⴰ ⴰⵙⴻⴳⴳⵯⴰⵙ ⵅ ⵓⵙⴻⴳⴳⵯⴰⵙ. ⵓⵛⴰ ⵎⴻⵍⵎⵉ ⵎⴰ ⵜᵉⵜⵜⴳⴻⵄⵄⴻⴷ ⵃⴰⵏⵏⴰ ⴰⴽⵉⴷⴻⵙ ⵖⴰⵔ ⵜⴰⴷⴷⴰⵔⵜ ⵏ ⵙⵉⴷⵉ, ⵜⵙⴻⵄⵄⴰⵔ ⵉ-ⵜⵜ ⴼⴰⵏⵉⵏⵏⴰ ⵓ ⵏⴻⵜⵜⴰⵜ ⵜⵔⵓ, ⵡⴰⵔ ⵜⴻⵛⵛⵉ ⵡⴰⵍⵓ. 8 ⵅⴻⵏⵏⵉ ⵉⵏⵏⴰ ⴰⵔⵢⴰⵣ ⵏⵏⴻⵙ ⵉⵍⵇⴰⵏⴰ: “ⵃⴰⵏⵏⴰ, ⵎⴰⵢⴻⵎⵎⵉ ⵜᵉⵜⵜⵔⵓⴷ, ⵎⴰⵢⴻⵎⵎⵉ ⵡⴰⵔ ⵜᵉⵜⵜᵉⵜⵜⴻⴷ ⵛⴰ ⵓ ⵎⴰⵢⴻⵎⵎⵉ ⵓⵍ ⵏⵏⴻⵎ ⵉⵛⴹⴻⵏ? ⵎⴰ ⵏⴻⵛⵛ ⵡⴰⵔ ⴷ ⴰⵎ ⵛⵏⵉⵖ ⵅ ⵄⴻⵛⵔⴰ ⵏ ⵉⵃⴻⵏⵊⵉⵔⴻⵏ?” ◘1:8 ⵔⴰⵄ. 4:15.

9 ⴷⴻⴳ ⵉⵊⵊ ⵏ ⵡⴰⵙⵙ, ⴰⵡⴰⵔⵏⵉ ⵓⵎⵉ ⵜⴻⵛⵛⴰ ⵓ ⵜⴻⵙⵡⴰ ⴷⵉ ⵛⵉⵍⵓ, ⵜⴻⴽⴽⴰⵔ ⵃⴰⵏⵏⴰ. ⵜⵓⵖⴰ ⴰⴽⴻⵀⵀⴰⵏ ⵄⴰⵍⵉ ⵉⵇⵇⵉⵎ ⵅ ⵍⴽⵓⵔⵙⵉ ⵖⴰⵔ ⵜⴻⴼⵍⴰⵡⵜ ⵏ ⵓⵖⴻⵣⴹⵉⵙ ⵏ ⵜⴻⵡⵡⴰⵔⵜ ⵏ ⵣⵣⴰⵡⴻⵛⵜ ⵏ ⵙⵉⴷⵉ. 10 ⵜⵓⵖⴰ ⵍⴻⵄⵎⴰⵔ ⵏ ⵃⴰⵏⵏⴰ ⵢⴰⵔⵣⴻⴳ, ⵜᵉⵥⵥⵓⴵ ⵖⴰⵔ ⵙⵉⴷⵉ, ⵜⵔⵓ ⴰⵟⵟⴰⵙ. 11 ⵏⴻⵜⵜⴰⵜ ⵜⴻⴳⴳⴰ ⵉⵊⵊ ⵏ ⵍⵡⴰⵄⴷ, ⵜⴻⵏⵏⴰ: “ⴰ, ⵙⵉⴷⵉ ⵏ ⵍⵄⴻⵙⴽⴰⵔⴰⵜ, ⵎⴰⵍⴰ ⵛⴻⴽ ⵜⴻⵅⵣⴰⵔⴻⴷ ⵙ ⵜⵉⴷⴻⵜⵜ ⵖⴰⵔ ⵍⴻⵎⵃⴰⵢⴻⵏ ⵏ ⵜⴰⵢⵢⴰ ⵏⵏⴻⵛ ⵓ ⵜⵅⴰⵔⵔⵚⴻⴷ ⴷⴰⵢⵉ ⵓ ⵡⴰⵔ ⵜᵉⵜⵜᵉⵜⵜⵓⴷ ⵜⴰⵢⵢⴰ ⵏⵏⴻⵛ, ⴰⴷ ⵜⴻⵡⵛⴻⴷ ⵉ ⵜⴰⵢⵢⴰ ⵏⵏⴻⵛ ⵉⵊⵊ ⵏ ⵓⵃⴻⵏⵊⵉⵔ ⴷ ⴰⵡⵜⴻⵎ, ⵅⴻⵏⵏⵉ ⴰⴷ ⵜ ⵡⵛⴻⵖ ⵉ ⵙⵉⴷⵉ ⵎⵉⵏ ⵖⴰ ⵢⴻⴽⴽ ⵉⴷⴷⴰⵔ ⵓⵛⴰ ⵓⵍⴰ ⴷ ⵉⵊⵊ ⵏ ⵍⵎⵓⵙ ⵡⴰⵔ ⵉⵜⵜⵃⴻⴼⴼⵉ ⵉ ⵓⵣⴻⴵⵉⴼ ⵏⵏⴻⵙ.” ◼1:11 ⴰⵃⴻⵏⵊⵉⵔ-ⵙ ⵜⵄⵉⴱⵔⴰⵏⵉⵜ ‘ⵥⵥⴰⵔⵉⵄⴻⵜ’. ⵎⵉⵏ ⵖⴰ ⵢⴻⴽⴽ ⵉⴷⴷⴰⵔ-ⵙ ⵜⵄⵉⴱⵔⴰⵏⵉⵜ ‘ⵎⴰⵔⵔⴰ ⵓⵙⵙⴰⵏ ⵏ ⵜⵓⴷⴰⵔⵜ ⵏⵏⴻⵙ.’  ◘1:11 ⵍⵇⴹ. 13:5. 12 ⵓⵎⵉ ⵜⴻⴽⴽⴰ ⴰⵟⵟⴰⵙ ⵜᵉⵜⵜⵥⴰⴵⴰ ⵣⵣⴰⵜ ⵉ ⵡⵓⴷⴻⵎ ⵏ ⵙⵉⴷⵉ, ⵉⵎⵙⴰⵔ, ⴰⵇⴰ ⵄⴰⵍⵉ ⵉⵃⴹⴰ ⴰⵇⴻⵎⵎⵓⵎ ⵏⵏⴻⵙ. 13 ⵜⵓⵖⴰ ⵃⴰⵏⵏⴰ ⵜⴻⵙⵙⵉⵡⴻⵍ ⴷⴻⴳ ⵡⵓⵍ ⵏⵏⴻⵙ, ⵉⵢⴻⵏⵛⵉⵛⴻⵏ ⵏⵏⴻⵙ ⵜⵜⴻⵏⵀⴻⵣⵣⴰⵏ ⵡⴰⵀⴰ, ⵎⴰⵛⴰ ⵜⵎⵉⵊⵊⴰ ⵏⵏⴻⵙ ⵜⵓⵖⴰ ⵡⴰⵔ ⵜᵉⵜⵜⵡⴰⵙⴻⵍ. ⵄⴰⵍⵉ ⵉⵜⵜⵖⵉⵍ ⴰⵙ ⵜⴻⵙⵛⴰⵔ. 14 ⵉⵏⵏⴰ ⴰⵙ ⵄⴰⵍⵉ: “ⵎⴻⵛⵃⴰⵍ ⵄⴰⴷ ⵉ ⵖⴰ ⵜⴻⵇⵇⵉⵎⴻⴷ ⵜⴻⵙⵛⴰⵔⴻⴷ? ⴽⴽⴻⵙ ⵅⴰⵎ ⵙⵙⴻⴽⵔⴰ ⵏⵏⴻⵎ!” 15 ⵃⴰⵏⵏⴰ ⵜⴰⵔⵔⴰ-ⴷⴷ ⵅⴰⵙ, ⵜⴻⵏⵏⴰ: “ⵍⵍⴰ, ⵙⵉⴷⵉ ⵉⵏⵓ, ⵏⴻⵛⵛ ⴷ ⵉⵛⵜ ⵏ ⵜⴻⵎⵖⴰⵔⵜ ⵙ ⴱⵓⵃⴱⴻⵍ ⵉⵛⴹⴻⵏ. ⵏⴻⵛⵛ ⵡⴰⵔ ⵙⵡⵉⵖ ⴱⵉⵏⵓ ⵓⵍⴰ ⴷ ⵛⵛⵔⴰⴱ, ⵎⴰⵛⴰ ⴼⴰⵔⵔⵖⴻⵖ ⵓⵍ ⵉⵏⵓ ⵣⵣⴰⵜ ⵉ ⵡⵓⴷⴻⵎ ⵏ ⵙⵉⴷⵉ. ◘1:15 ⵉⵥⵀⴷ. 62:9. 16 ⵡⴰⵔ ⵃⴻⵙⵙⴻⴱ ⵛⴰ ⵜⴰⵢⵢⴰ ⵏⵏⴻⵛ ⴷ ⵉⵛⵜ ⵏ ⵜⵢⴻⴵⵉⵜ ⵉ ⵡⴰⵔ ⵜⵙⴻⴽⴽⵯⵉ, ⵎⴰⵖⴰⵔ ⴰⵍ ⵉ ⵍⴻⵅⵅⵓ ⵙⵙⵉⵡⵍⴻⵖ ⵡⴰⵀⴰ ⵣⵉ ⵍⵀⴻⵎⵎ ⵉⵏⵓ ⴰⵎⴻⵇⵇⵔⴰⵏ ⵓ ⵣⵉ ⵜⵉⵇⵇⴻⵙⵜ ⵏ ⵡⵓⵍ ⵉⵏⵓ.” 17 ⵄⴰⵍⵉ ⵢⴰⵔⵔⴰ-ⴷⴷ ⵅⴰⵙ, ⵉⵏⵏⴰ: “ⵓⵢⵓⵔ ⴷⵉ ⵍⴻⵀⵏⴰ ⵓⵛⴰ ⴰⵔⴻⴱⴱⵉ ⵏ ⵉⵙⵔⴰⵉⵍ ⴰⴷ ⴰⵎ ⵉⵡⵛ ⵎⵉⵏ ⵣⵣⴰⵢⴻⵙ ⵜᵉⵜⵜⴰⵔⴻⴷ.” 18 ⵏⴻⵜⵜⴰⵜ ⵜⴻⵏⵏⴰ: “ⵉⵍⵉ ⴰⴷ ⵜⴰⴼ ⵜⴰⵢⵢⴰ ⵏⵏⴻⵛ ⴷ ⴰⵃⵉⵏⵏⵉ ⵣⵣⴰⵜ ⵉ ⵜⵉⵟⵟⴰⵡⵉⵏ ⵏⵏⴻⵛ!” ⵅⴻⵏⵏⵉ ⵜⵓⵢⵓⵔ ⵜⴻⵎⵖⴰⵔⵜ ⴰⴱⵔⵉⴷ ⵏⵏⴻⵙ, ⵜⴻⵛⵛⴰ ⵓ ⵜⵓⵖⴰ ⴰⵖⴻⵎⴱⵓⴱ ⵏⵏⴻⵙ ⵡⴰⵔ ⵉⵛⴹⵉⵏ ⵄⴰⴷ. 19 ⵖⴰⵔ ⵜⵓⴼⴼⵓⵜ ⵏ ⵚⵚⴱⴻⵃ ⴽⴽⴰⵔⴻⵏ ⵣⵉⵛ, ⴱⴻⵏⴷⵇⴻⵏ ⵣⵣⴰⵜ ⵉ ⵡⵓⴷⴻⵎ ⵏ ⵙⵉⴷⵉ ⵓⵛⴰ ⵄⴻⵇⴱⴻⵏ ⵖⴰⵔ ⵜⴰⴷⴷⴰⵔⵜ ⵏⵙⴻⵏ ⴷⵉ ⵔⴰⵎⴰ. ⵜⵓⵖⴰ ⵉⵍⵇⴰⵏⴰ ⵉⵟⵟⴻⵚ ⴰⴽ-ⴷ ⵃⴰⵏⵏⴰ, ⵜⴰⵎⵖⴰⵔⵜ ⵏⵏⴻⵙ, ⵓⵛⴰ ⵙⵉⴷⵉ ⵉⵅⴰⵔⵔⴻⵚ ⴷⴰⵢⴻⵙ, ⴷⵉ ⵃⴰⵏⵏⴰ.

20 ⵓⵎⵉ ⵄⴷⵓⵏ ⵡⵓⵙⵙⴰⵏ ⴰⵡⴰⵔⵏⵉ ⵍⴰⵎⵉ ⵜⴻⴽⵙⵉ ⵃⴰⵏⵏⴰ ⵙ ⴷⴷⴻⵢⵙⴻⵜ, ⵜⵓⵔⵓⵡ-ⴷⴷ ⵉⵊⵊ ⵏ ⵓⵃⴻⵏⵊⵉⵔ. ⵜⴻⴳⴳⴰ ⴰⵙ ⵛⴰⵎⵡⵉⵍ, ⵓⵎⵉ ⵏⴻⵜⵜⴰⵜ ⵜⴻⵏⵏⴰ: “ⵎⴰⵖⴰⵔ ⵏⴻⵛⵛ ⵜⵜⴰⵔⴻⵖ ⵜ ⵣⵉ ⵙⵉⴷⵉ.” 21 ⵓⵛⴰ ⴰⵔⵢⴰⵣ ⵏⵏⵉ, ⵉⵍⵇⴰⵏⴰ, ⵉⴳⴻⵄⵄⴻⴷ ⵄⴰⵡⴻⴷ ⴰⴽ-ⴷ ⵎⴰⵔⵔⴰ ⵉⵏⵏⵉ ⵏ ⵜⴰⴷⴷⴰⵔⵜ ⵏⵏⴻⵙ, ⵃⵉⵎⴰ ⴰⴷ ⵢⴰⵡⵉ ⵜⴰⵖⴰⵔⵚⵜ ⵏ ⴽⵓⵍ ⴰⵙⴻⴳⴳⵯⴰⵙ ⴷ ⵜⵖⴰⵔⵚⵜ ⵏⵏⴻⵙ ⵏ ⵍⵡⴰⵄⴷ ⵉ ⵙⵉⴷⵉ. 22 ⵎⴰⵛⴰ ⵃⴰⵏⵏⴰ ⵡⴰⵔ ⴽⵉⴷⵙⴻⵏ ⵜⴳⵉⵄⵄⵉⴷ ⵛⴰ, ⵎⴰⵛⴰ ⵜⴻⵏⵏⴰ ⵉ ⵡⴻⵔⵢⴰⵣ ⵏⵏⴻⵙ: “ⵅⵎⵉ ⴷ ⴰⵙ ⵖⴰ ⴽⴽⵙⴻⵖ ⵓⵟⵟⵓⴹ ⵉ ⵓⵙⴻⵢⵎⵉ, ⵅⴻⵏⵏⵉ ⴰⴷ ⵜ-ⵉ-ⴷⴷ-ⴰⵡⵢⴻⵖ ⴷⵉⵏ, ⵓⵛⴰ ⴰⴷ ⵉⴹⵀⴰⵔ ⵓⵃⴻⵏⵊⵉⵔ ⵣⵣⴰⵜ ⵉ ⵡⵓⴷⴻⵎ ⵏ ⵙⵉⴷⵉ ⵓ ⵏⴻⵜⵜⴰ ⴰⴷ ⵉⵇⵇⵉⵎ ⴷⵉⵏⵏⵉ ⵉ ⵍⴻⴱⴷⴰ.” 23 ⴰⵔⵢⴰⵣ ⵏⵏⴻⵙ, ⵉⵍⵇⴰⵏⴰ, ⵉⵏⵏⴰ ⴰⵙ: “ⴻⴳⴳ ⵎⵉⵏ ⵜᵉⵜⵜⵡⴰⵍⵉⴷ ⵎⵍⵉⵃ ⴷⵉ ⵜⵉⵟⵟⴰⵡⵉⵏ ⵏⵏⴻⵎ. ⵇⵇⵉⵎ ⴷⴰ ⴷⵉ ⵜⴰⴷⴷⴰⵔⵜ ⴰⵍ ⴷ ⴰⵙ ⵉ ⵖⴰ ⵜⴻⴽⴽⵙⴻⴷ ⵓⵟⵟⵓⴹ. ⴰⴷ ⵉⵇⴼⴻⵍ ⵙⵉⴷⵉ ⴰⵡⴰⵍ ⵏⵏⴻⵙ!” ⴰⵎⵎⵓ ⵉ ⵜⴻⵇⵇⵉⵎ ⵜⴻⵎⵖⴰⵔⵜ ⴷⵉ ⵜⴰⴷⴷⴰⵔⵜ ⵓⵛⴰ ⵜⴻⵙⵙⵓⵟⵟⵓⴹ ⴰⵃⴻⵏⵊⵉⵔ ⵏⵏⴻⵙ ⴰⵍⴰⵎⵉ ⵉ ⴷ ⴰⵙ ⵜⴻⴽⴽⴻⵙ ⵓⵟⵟⵓⴹ. 24 ⴰⵡⴰⵔⵏⵉ ⵍⴰⵎⵉ ⵉ ⴷ ⴰⵙ ⵜⴻⴽⴽⴻⵙ ⵓⵟⵟⵓⴹ, ⵜⵉⵡⵢⵉ ⵜ ⴰⴽⵉⴷⴻⵙ ⴰⴽ-ⴷ ⵜⵍⴰⵜⴰ ⵏ ⵉⴼⵓⵏⴰⵙⴻⵏ ⵉⵎⴻⵥⵢⴰⵏⴻⵏ ⴷ ⵉⵊⵊ ⵏ ⵉⴼⴰ ⵏ ⵡⴰⵔⴻⵏ ⴷ ⵉⵛⵜ ⵏ ⵜⵅⴰⵏⵛⴻⵜ ⵏ ⴱⵉⵏⵓ. ⵏⴻⵜⵜⴰⵜ ⵜⵉⵡⵢⵉ ⵜ ⵖⴰⵔ ⵜⴰⴷⴷⴰⵔⵜ ⵏ ⵙⵉⴷⵉ ⴷⵉ ⵛⵉⵍⵓ. ⵜⵓⵖⴰ-ⵜ ⴰⵃⴻⵏⵊⵉⵔ ⵄⴰⴷ ⴷ ⴰⵎⴻⵥⵢⴰⵏ. ◘1:24 ⵍⴽ. 2:41. 25 ⵏⵉⵜⵏⵉ ⵖⴰⵔⵚⴻⵏ ⵉ ⵓⴼⵓⵏⴰⵙ ⴰⵎⴻⵥⵢⴰⵏ ⵓⵛⴰ ⵉⵡⵢⴻⵏ ⴰⵃⴻⵏⵊⵉⵔ ⵖⴰⵔ ⵄⴰⵍⵉ. 26 ⵏⴻⵜⵜⴰⵜ ⵜⴻⵏⵏⴰ: “ⴰ, ⵙⵉⴷⵉ ⵉⵏⵓ, ⵙ ⵜⵉⴷⴻⵜⵜ ⴰⵎ ⵉⴷⴷⴰⵔ ⵍⴻⵄⵎⴰⵔ ⵏⵏⴻⵛ, ⴰ ⵙⵉⴷⵉ ⵉⵏⵓ, ⵏⴻⵛⵛ ⴷ ⵜⴰⵎⵖⴰⵔⵜ ⵏⵏⵉ ⵜⵓⵖⴰ ⵉ ⴷⴰ ⵉⴱⴻⴷⴷⴻⵏ ⵖⴰⵔ ⵓⵖⴻⵣⴷⵉⵙ ⵏⵏⴻⵛ, ⵃⵉⵎⴰ ⴰⴷ ⵥⵥⴰⴵⴻⵖ ⵖⴰⵔ ⵙⵉⴷⵉ. 27 ⵏⴻⵛⵛ ⵜⵜⴰⵔⴻⵖ ⴰⵃⴻⵏⵊⵉⵔ-ⴰ ⵓ ⵙⵉⴷⵉ ⵉⵙⵍⴰ ⵉ ⵜⵓⵜⵔⴰ ⵉⵏⵓ ⵏⵏⵉ ⵣⵣⴰⵢⴻⵙ ⵜⵜⴰⵔⴻⵖ. 28 ⵙ ⵓⵢⴻⵏⵏⵉ ⴰⵇⴰ ⵙⴻⵍⵍⵎⴻⵖ ⵜ ⵉ ⵙⵉⴷⵉ ⵎⴰⵔⵔⴰ ⵓⵙⵙⴰⵏ ⵎⵉⵏ ⵖⴰ ⵢⴻⴽⴽ ⵉⴷⴷⴰⵔ. ⴰⵇⴰ ⵉⵎⵎⴻⵡⵛ ⵉ ⵙⵉⴷⵉ.” ⵓⵛⴰ ⵏⴻⵜⵜⴰ ⵉⴱⴻⵏⴷⴻⵇ ⴷⵉⵏ ⵣⵣⴰⵜ ⵉ ⵡⵓⴷⴻⵎ ⵏ ⵙⵉⴷⵉ.