1 “ⴷⴻⴳ ⵓⵙⴻⴳⴳⵯⴰⵙ ⴰⵎⴻⵣⵡⴰⵔⵓ ⵏ ⴷⴰⵔⵉⵢⵓⵙ, ⴰⵎⴰⴷⴰⵢ, ⴱⴻⴷⴷⴻⵖ ⵏⴻⵛⵛ ⴰⴽⵉⴷⴻⵙ ⵎⴰⵃⴻⵏⴷ ⴰⴷ ⵜ ⵙⵙⴻⵊⴻⵀⴷⴻⵖ ⵓ ⴰⴷ ⴰⵙ ⵙⵙⴻⵏⴷⴻⵖ.

2 ⵍⴻⵅⵅⵓ ⴰⴷ ⴰⵛ ⵉⵏⵉⵖ ⵉⵊⵊ ⵏ ⵡⴰⵡⴰⵍ ⴷ ⵜⵉⴷⴻⵜⵜ! ⵅⵣⴰⵔ, ⴰⴷ ⴽⴽⴰⵔⴻⵏ ⵄⴰⴷ ⵜⵍⴰⵜⴰ ⵏ ⵉⵊⴻⴵⵉⴷⴻⵏ ⴷⵉ ⵍⴼⵓⵔⵙ ⵓⵛⴰ ⵡⴻⵏⵏⵉ ⵡⵉⵙⵙ ⴰⵔⴻⴱⵄⴰ ⴰⴷ ⵉⴳⴳ ⴰⴳⵍⴰ ⴰⵎⴻⵇⵇⵔⴰⵏ ⵉ ⵢⵉⵅⴻⴼ ⵏⵏⴻⵙ, ⴽⵜⴰⵔ ⵅ ⵎⴰⵔⵔⴰ ⵉⵏⵏⴻⵖⵏⵉ. ⵓ ⴰⵡⴰⵔⵏⵉ ⵅⵎⵉ ⵖⴰ ⵉⵟⵟⴻⴼ ⵜⵉⵣⴻⵎⵎⴰⵔ ⵙ ⵡⴰⴳⵍⴰ ⵏⵏⴻⵙ, ⴰⴷ ⵉⵙⵙⵏⴻⴽⴽⴰⵔ ⵎⴰⵔⵔⴰ ⵎⵉⴷⴷⴻⵏ ⵏⵏⴻⵙ ⴹⵉⴷⴷ ⵉ ⵜⴳⴻⵍⴷⵉⵜ ⵏ ⵢⴰⵡⴰⵏ. ◼11:2 ⴹⵉⴷⴷ-ⵏⵉⵖ ‘ⵎⴳⴰⵍ’.

3 ⵅⴻⵏⵏⵉ ⴰⴷ ⵉⴽⴽⴰⵔ ⵉⵊⵊ ⵏ ⵓⵊⴻⴵⵉⴷ ⵉⵊⵀⴻⴷ ⵡⴻⵏⵏⵉ ⵉ ⵖⴰ ⵉⵚⴻⵍⵍⵟⴻⵏ ⵙ ⵚⵚⵓⵍⵟⴰ ⵜⴰⵎⴻⵇⵇⵔⴰⵏⵜ ⵓ ⵏⴻⵜⵜⴰ ⴰⴷ ⵉⴳⴳ ⵎⵉⵏ ⵉⵅⵙ ⵏⴻⵜⵜⴰ. 4 ⵅⵎⵉ ⵖⴰ ⵉⴽⴽⴰⵔ, ⵍⴻⵅⴷⴻⵏⵏⵉ ⴰⴷ ⵜⴰⵔⴻⵥ ⵜⴳⴻⵍⴷⵉⵜ ⵏⵏⴻⵙ, ⴰⴷ ⵜᵉⵜⵜⵡⴰⵎⵚⴻⴱⴹⴰ ⵅ ⴰⵔⴻⴱⵄⴰ ⵏ ⵜⵖⴻⵎⵎⵓⵔⴰ ⵏ ⵓⵙⴻⵎⵎⵉⴹ ⵏ ⵓⵊⴻⵏⵏⴰ, ⵎⴰⵛⴰ ⵡⴰⵔ ⵜᵉⵜⵜⵉⵍⵉ ⵜⴳⴻⵍⴷⵉⵜ ⵉ ⵜⴰⵔⵡⴰ ⵏⵏⴻⵙ ⵓ ⵡⴰⵔ ⵖⴰⵔⴻⵙ ⵜᵉⵜⵜⵉⵍⵉ ⵚⵚⵓⵍⵟⴰ ⴰⵎ ⵜⴻⵏⵏⵉ ⵉ ⵣⵉ ⵜⵓⵖⴰ ⵉⵜⵜⵚⴻⵍⵍⴻⴹ ⵏⴻⵜⵜⴰ, ⵎⴰⵖⴰⵔ ⵜⴰⴳⴻⵍⴷⵉⵜ ⴰⴷ ⵜᵉⵜⵜⵡⴰⵇⵍⴻⵄ ⵓ ⴰⴷ ⵜⵉⵍⵉ ⵉ ⵉⵏⵏⴻⵖⵏⵉ ⵡⴰⵔ ⵉⴵⵉ ⵉ ⵢⵉⵏⴰ.

5 ⵅⴻⵏⵏⵉ ⴰⵊⴻⴵⵉⴷ ⵏ ⵍⵊⴰⵏⵓⴱ ⴰⴷ ⵉⴷⵡⴻⵍ ⵉⵊⵀⴻⴷ, ⵎⴰⵛⴰ ⵉⵊⵊ ⵣⵉ ⵍⵃⵓⴽⴽⴰⵎ ⵏⵏⴻⵙ ⴰⴷ ⵉⴷⵡⴻⵍ ⵉⵊⵀⴻⴷ ⵅⴰⵙ ⵓ ⵡⴰⵏⵉⵜⴰ ⴰⴷ ⵉⵚⴻⵍⵍⴻⵟ ⵙ ⵚⵚⵓⵍⵟⴰ ⵜⴰⵎⴻⵇⵇⵔⴰⵏⵜ ⵅ ⵚⵚⵓⵍⵟⴰ ⵏⵏⴻⵙ. 6 ⴰⵡⴰⵔⵏⵉ ⵍⴰⵎⵉ ⵄⴷⵓⵏ ⵛⴰ ⵏ ⵉⵙⴻⴳⴳⵯⵓⵙⴰ, ⵏⵉⵜⵏⵉ ⴰⴷ ⴳⴳⴻⵏ ⵉⵊⵊ ⵏ ⵍⵄⴰⵀⴷ ⵓ ⵢⴻⴵⵉⵙ ⵏ ⵓⵊⴻⴵⵉⴷ ⵏ ⵍⵊⴰⵏⵓⴱ ⴰⴷ ⴷⴷ-ⵜⴰⵙ ⵖⴰⵔ ⵓⵊⴻⴵⵉⴷ ⵏ ⵛⵛⴰⵎⴰⵍ ⵎⴰⵃⴻⵏⴷ ⴰⴷ ⵜⵜ ⵜⵙⴻⴳⴳⴻⵎ, ⵎⴰⵛⴰ ⵏⴻⵜⵜⴰⵜ ⵡⴰⵔ ⵜⵣⴻⵎⵎⴰⵔ ⴰⴷ ⵜⴻⵃⴹⴰ ⵊⵊⴻⵀⴷ ⵏ ⵓⵖⵉⵍ ⵏⵏⴻⵙ ⵓ ⵏⴻⵜⵜⴰ ⵡⴰⵔ ⵉⵣⴻⵎⵎⴰⵔ ⴰⴷ ⵉⵇⵇⵉⵎ ⵉⴱⴻⴷⴷ, ⵓ ⴰⵖⵉⵍ ⵏⵏⴻⵙ ⴰⵎ ⵏⵏⴻⵖⵏⵉ. ⵏⴻⵜⵜⴰⵜ ⴰⴷ ⵜᵉⵜⵜⵡⴰⵙⴻⵍⵍⴻⵎ ⵓⵍⴰ ⴷ ⵢⵉⵏⵏⵉ ⵜⵜ ⵉⵡⵢⴻⵏ ⴷ ⵡⴻⵏⵏⵉ ⵉ-ⵜⵜ-ⵉ-ⴷⴷ ⵢⵓⵔⵡⴻⵏ ⴷ ⵡⴻⵏⵏⵉ ⵜⵜ ⵉⵙⵙⵊⴻⵀⴷⴻⵏ ⴷⴻⴳ ⵡⵓⵙⵙⴰⵏ ⵏⵏⵉ.

7 ⵎⴰⵛⴰ ⵣⴻⴳ ⵉⵛⵜ ⵏ ⵜⵖⴻⴷⴷⵓⵜ ⵏ ⵉⵥⴻⵡⵔⴰⵏ ⵏⵏⴻⵙ ⴰⴷ ⵉⴽⴽⴰⵔ ⵉⵊⵊⴻⵏ ⴷⴻⴳ ⵡⴻⵎⵛⴰⵏ ⵏⵏⴻⵙ. ⵏⴻⵜⵜⴰ ⴰⴷ ⵉⴼⴼⴻⵖ ⴹⵉⴷⴷ ⵉ ⵍⵄⴻⵙⴽⴰⵔ ⵓⵛⴰ ⴰⴷ ⵢⴰⴷⴻⴼ ⵍⴱⵓⵔⵊ ⵉⵊⴻⵀⴷⴻⵏ ⵏ ⵓⵊⴻⴵⵉⴷ ⵏ ⵛⵛⴰⵎⴰⵍ ⵓ ⴰⴷ ⴷⴰⵢⵙⴻⵏ ⵉⴳⴳ ⵎⵉⵏ ⵉⵅⵙ ⵓ ⴰⴷ ⴷⴷ-ⵉⴱⴰⵏ ⵉⵊⵀⴻⴷ ⵇⴰⵄ. 8 ⴰⵔⴻⴱⴱⵉⵜⴻⵏ ⵏⵙⴻⵏ ⴰⴽ-ⴷ ⵍⴻⵅⵢⴰⵍⴰⵜ ⵏⵙⴻⵏ ⵉⴼⴻⵙⵢⴻⵏ ⴷ ⵍⴻⵇⵛⵓⵄ ⵏⵙⴻⵏ ⵉⵖⵍⴰⵏ ⵉ ⵉⵜⵜⵡⴰⴳⴳⴻⵏ ⵙ ⵏⵏⵓⵇⴰⵔⵜ ⴷ ⵡⵓⵔⴻⵖ ⴰⴷ ⵜⴻⵏ ⵢⴰⵡⵉ ⴷ ⵜⴽⴻⵛⵛⴰⴹⵜ ⵖⴰⵔ ⵎⵉⵚⵔⴰ ⵓ ⵅⴻⵏⵏⵉ ⴰⴷ ⵉⴱⴻⵄⵄⴻⴷ ⵛⴰ ⵏ ⵉⵙⴻⴳⴳⵯⵓⵙⴰ ⵅ ⵓⵊⴻⴵⵉⴷ ⵏ ⵛⵛⴰⵎⴰⵍ. 9 ⵓ ⵏⴻⵜⵜⴰ ⴰⴷ ⵢⴰⴷⴻⴼ ⵜⴰⴳⴻⵍⴷⵉⵜ ⵏ ⵍⵊⴰⵏⵓⴱ ⵓ ⴰⴷ ⵉⵄⵇⴻⴱ ⵖⴰⵔ ⵜⴻⵎⵎⵓⵔⵜ ⵏⵏⴻⵙ.

10 ⵉⵃⴻⵏⵊⵉⵔⴻⵏ ⵏⵏⴻⵙ ⴰⴷ ⵃⴻⵣⵣⵎⴻⵏ ⵉ ⵓⵎⴻⵏⵖⵉ ⵓ ⴰⴷ ⵙⵙⵎⵓⵏⴻⵏ ⵉⵊⵊ ⵏ ⵓⴱⴰⵔⵔⵓ ⵏ ⵍⵄⴻⵙⴽⴰⵔ ⴰⵎⴻⵇⵇⵔⴰⵏ ⵓ ⵏⴻⵜⵜⴰ ⴰⴷ ⴷⴷ-ⵢⴰⵙ ⵓ ⴰⴷ ⵉⵄⴻⵎⵎⴰⵔ ⵜⴰⵎⵎⵓⵔⵜ ⵓ ⴰⴷ ⵅⴰⵙ ⵉⵄⴷⵓ. ⵓ ⴰⵡⴰⵔⵏⵉ ⵍⴰⵎⵉ ⴷⴷ-ⵉⵄⵇⴻⴱ, ⴰⴷ ⵃⴻⵣⵣⵎⴻⵏ ⵄⴰⵡⴻⴷ ⵉ ⵓⵎⴻⵏⵖⵉ ⴰⴷ ⵢⴰⴷⴻⴼ ⴰⵍ ⵍⴱⵓⵔⵊ ⵏⵏⴻⵙ ⵉⵊⴻⵀⴷⴻⵏ. 11 ⵓⵛⴰ ⴰⴷ ⵉⵎⵎⵓⵣⵣⴰⵔ ⵓⵊⴻⴵⵉⴷ ⵏ ⵍⵊⴰⵏⵓⴱ ⵓⵛⴰ ⵉⴳⴳⵓⵔ ⴰⴷ ⵉⴼⴼⴻⵖ ⴰⴽⵉⴷⴻⵙ ⵉⵎⵎⵏⴻⵖ ⴰⴽ-ⴷ ⵓⵊⴻⴵⵉⴷ ⵏ ⵛⵛⴰⵎⴰⵍ, ⵡⴻⵏⵏⵉ ⵉ ⵖⴰ ⵉⵙⵙⵎⵓⵏⴻⵏ ⵉⵊⵊ ⵏ ⵓⴱⴰⵔⵔⵓ ⴰⵎⴻⵇⵇⵔⴰⵏ ⵏ ⵍⵄⴻⵙⴽⴰⵔ, ⵎⴰⵛⴰ ⴰⴱⴰⵔⵔⵓ ⵏⵏⵉ ⴰⴷ ⵉⵜⵜⵡⴰⵙⴻⵍⵍⴻⵎ ⴷⴻⴳ ⵓⴼⵓⵙ ⵏⵏⴻⵙ.

12 ⵎⴰⵍⴰ ⵉⵎⵎⴻⴽⵙⵉ ⵓⴱⴰⵔⵔⵓ ⵏⵏⵉ, ⵅⴻⵏⵏⵉ ⵓⵍ ⵏⵏⴻⵙ ⴰⴷ ⵉⵙⵙⴳⴻⵄⵄⴻⴷ ⵉⵅⴻⴼ ⵏⵏⴻⵙ ⵓ ⵏⴻⵜⵜⴰ ⴰⴷ ⵉⵙⵙⴻⵖⴷⴻⵍ ⵄⴻⵛⵔⴰ ⵏ ⵍⵓⵍⵓⴼ, ⵎⴰⵛⴰ ⵏⴻⵜⵜⴰ ⵡⴰⵔ ⵉⵜⵜⵎⴰⵔⵏⵉ ⴷⵉ ⵊⵊⴻⵀⴷ. 13 ⴰⵊⴻⴵⵉⴷ ⵏ ⵛⵛⴰⵎⴰⵍ ⴰⴷ ⴷⴷ-ⵉⴷⵡⴻⵍ ⵓ ⴰⴷ ⵉⵙⵙⵎⵓⵏ ⵉⵊⵊ ⵏ ⵓⴱⴰⵔⵔⵓ ⴰⵎⴻⵇⵇⵔⴰⵏ ⴽⵜⴰⵔ ⵣⴻⴳ ⵓⵎⴻⵣⵡⴰⵔⵓ. ⴰⵡⴰⵔⵏⵉ ⵍⵎⵉⵊⴰⵍⴰⵜ ⵏ ⵍⵡⴻⵇⵜ ⴷ ⵉⵙⴻⴳⴳⵯⵓⵙⴰ ⴰⴷ ⴷⴷ-ⵢⴰⵙ ⵙ ⵢⵉⵊⵊ ⵏ ⵍⵄⴻⵙⴽⴰⵔ ⴰⵎⴻⵇⵇⵔⴰⵏ ⵓ ⵙ ⵡⴰⵟⵟⴰⵙ ⵏ ⵍⴻⵙⵏⴰⵃ. 14 ⴷⴻⴳ ⵡⵓⵙⵙⴰⵏ ⵏⵏⵉ ⴰⴷ ⵖⴻⵡⵡⵖⴻⵏ ⴰⵟⵟⴰⵙ ⵅ ⵓⵊⴻⴵⵉⴷ ⵏ ⵍⵊⴰⵏⵓⴱ ⵓ ⴰⵢⵜ ⵏ ⴱⵓ-ⵍⴻⵅⵛⵓⵏⴻⵜ ⵏ ⵍⴳⴻⵏⵙ ⵏⵏⴻⵛ ⴰⴷ ⵙⵙⴳⴻⵄⵄⴷⴻⵏ ⵉⵅⴻⴼ ⵏⵙⴻⵏ ⵃⵉⵎⴰ ⴰⴷ ⵙⵙⵇⴻⴼⵍⴻⵏ ⵉⵊⵊ ⵏ ⵍⴻⵡⵃⵉⵢ, ⵎⴰⵛⴰ ⵏⵉⵜⵏⵉ ⴰⴷ ⵡⴹⴰⵏ. 15 ⵅⴻⵏⵏⵉ ⴰⴷ ⴷⴷ-ⵢⴰⵙ ⵓⵊⴻⴵⵉⴷ ⵏ ⵛⵛⴰⵎⴰⵍ, ⴰⴷ ⵉⵙⵙⴱⴻⴷⴷ ⵉⵊⵊ ⵏ ⵍⵃⵉⴹ ⵉ ⵍⴻⵃⵚⴰⵔⴻⵜ ⵓ ⴰⴷ ⵉⵟⵟⴻⴼ ⵉⵛⵜ ⵏ ⵜⴻⵏⴷⵉⵏⵜ ⵉⴼⴰⵔⵢⴻⵏ. ⵉⵖⴰⴵⴻⵏ ⵏ ⵍⵊⴰⵏⵓⴱ ⵉⵊⴻⵀⴷⴻⵏ ⵡⴰⵔ ⵣⴻⵎⵎⴰⵔⴻⵏ ⴰⴷ ⵇⵇⵉⵎⴻⵏ ⵜⵜⵇⴰⵡⴰⵎⴻⵏ ⵓⵍⴰ ⴷ ⵍⴳⴻⵏⵙ ⵏ ⵢⵉⵏⵏⵉ ⵣⵣⴰⵢⴻⵙ ⵉⵜⵜⵡⴰⴼⴰⵔⵣⴻⵏ ⵍⵍⴰ. ⵡⴰⵔ ⴷⵉⵏ ⵉⵜⵜⵉⵍⵉ ⵊⵊⴻⵀⴷ ⵃⵉⵎⴰ ⴰⴷ ⵇⵇⵉⵎⴻⵏ ⵜⵜⴱⴻⴷⴷⴰⵏ. 16 ⵡⴻⵏⵏⵉ ⴷⴷ-ⵢⵓⵙⵉⵏ ⴹⵉⴷⴷ ⵏⵏⴻⵙ, ⴰⴷ ⵉⴳⴳ ⵎⵉⵏ ⵉⵅⵙ. ⵓⵍⴰ ⴷ ⵉⵊⵊ ⵡⴰⵔ ⵉⵣⴻⵎⵎⴰⵔ ⴰⴷ ⵉⴱⴻⴷⴷ ⵣⵣⴰⵜ ⵉ ⵡⵓⴷⴻⵎ ⵏⵏⴻⵙ ⵓ ⵏⴻⵜⵜⴰ ⴰⴷ ⵉⴱⴻⴷⴷ ⴷⵉ ⵜⴻⵎⵎⵓⵔⵜ ⵏ ⵜⴻⵍⵡⵉⵣⵜ ⵓ ⴰⵔⴻⴷⴷⴻⴵ ⴰⴷ ⵢⵉⵍⵉ ⵙ ⵓⴼⵓⵙ ⵏⵏⴻⵙ. 17 ⵏⴻⵜⵜⴰ ⴰⴷ ⵢⴰⵔⵣⵓ ⴰⴷ ⵉⵙⵙⴻⵎⵜⴻⵏ ⵜⵉⵣⴻⵎⵎⴰⵔ ⵏⵏⴻⵙ ⴷⵉ ⵎⴰⵔⵔⴰ ⵜⴰⴳⴻⵍⴷⵉⵜ ⵏⵏⴻⵙ ⵓ ⵖⴰⵔⴻⵙ ⵉⵎⵜⴰⵡⵉⵢⵢⴻⵏ ⵉⵙⴻⴳⴳⴷⴻⵏ ⵓ ⴰⴷ ⵣⵣⴰⵢⵙⴻⵏ ⵉⴳⴳ. ⵏⴻⵜⵜⴰ ⴰⴷ ⴰⵙ ⵉⵡⵛ ⵢⴻⴵⵉⵙ ⵏ ⵜⴻⵎⵖⴰⵔⵉⵏ ⵃⵉⵎⴰ ⴰⴷ ⵢⴰⵔⴻⴷⴷⴻⴵ ⵜⴰⴳⴻⵍⴷⵉⵜ ⵏⵏⵉ, ⵎⴰⵛⴰ ⵏⴻⵜⵜⴰⵜ ⵡⴰⵔ ⵜᵉⵜⵜⴱⴻⴷⴷⴰ ⵓ ⵡⴰⵔ ⴷ ⴰⵙ ⵜⴻⴼⴼⵉⵖ.

18 ⵅⴻⵏⵏⵉ ⴰⴷ ⵢⴰⵔⵔ ⴰⵖⴻⵎⴱⵓⴱ ⵏⵏⴻⵙ ⵖⴰⵔ ⵜⴻⴳⵣⵉⵔⵉⵏ ⵓⵛⴰ ⴰⴷ ⵉⵟⵟⴻⴼ ⴰⵟⵟⴰⵙ ⵣⵣⴰⵢⵙⴻⵏⵜ. ⵎⴰⵛⴰ ⵉⵊⵊ ⵏ ⵓⴽⵓⵎⴰⵏⴷⴰⵔ ⵏ ⵍⵄⴻⵙⴽⴰⵔ ⴰⴷ ⵉⵙⵙⴱⴻⴷⴷ ⵍⵃⴻⴳⵔⴰ ⵏⵏⴻⵙ ⵅⴰⵙ, ⴱⵍⴰ ⵎⴰ ⵉⵣⴻⵎⵎⴰⵔ ⵏⴻⵜⵜⴰ ⴰⴷ ⴰⵙ ⵉⵅⴻⴵⴻⵚ ⵍⵃⴻⴳⵔⴰ ⵏⵏⴻⵙ. 19 ⵏⴻⵜⵜⴰ ⴰⴷ ⵢⴰⵔⵔ ⴰⵖⴻⵎⴱⵓⴱ ⵏⵏⴻⵙ ⵖⴰⵔ ⵍⴱⵓⵔⵊⴰⵜ ⵏ ⵜⴻⵎⵎⵓⵔⵜ ⵏⵏⴻⵙ ⵓ ⵅⴻⵏⵏⵉ ⴰⴷ ⵉⵏⵇⴰⵔⴹ, ⴰⴷ ⵉⵡⴹⴰ ⵓ ⵡⴰⵔ ⵉⵜⵜⵡⵉⴼⴼⵉ ⵄⴰⴷ. 20 ⴰⴷ ⵉⴽⴽⴰⵔ ⵉⵊⵊⴻⵏ ⴷⴻⴳ ⵡⴻⵎⵛⴰⵏ ⵏⵏⴻⵙ ⵡⴻⵏⵏⵉ ⵉ ⵖⴰ ⵉⵙⵙⴻⵄⴷⵓⵏ ⵉⵊⵊⴻⵏ ⵅ ⵜⴻⵎⵎⵓⵔⵜ ⵏⵏⵉ ⵉ ⵖⴰ ⵉⵙⵙⴻⵀⵡⴰⵏ ⴰⵄⵓⴵⵉ ⵏ ⵜⴳⴻⵍⴷⵉⵜ, ⵎⴰⵛⴰ ⵡⴰⵏⵉⵜⴰ ⴰⴷ ⵉⵜⵜⵡⴰⵔⵥ ⴷⵉ ⵛⴰ ⵏ ⵡⵓⵙⵙⴰⵏ, ⵡⴰⵔ ⵉⴵⵉ ⵙ ⵉⵎⵛⵓⴱⴱⴻⵛⴻⵏ ⵓⵍⴰ ⵙ ⵓⵎⴻⵏⵖⵉ.

21 ⵅⴻⵏⵏⵉ ⴰⴷ ⴷⴷ-ⵉⴽⴽⴰⵔ ⵉⵊⵊ ⵏ ⴱⵏⴰⴷⴻⵎ ⴰⵃⴻⴳⴳⴰⵔ ⴷⴻⴳ ⵡⴻⵎⵛⴰⵏ ⵏⵏⴻⵙ ⵡⴻⵏⵏⵉ ⵡⴰⵔ ⴷ ⴰⵙ ⵜⵜⵉⵛⴻⵏ ⵍⵄⴰⴹⴰⵎⴰ ⵉⴳⴻⵍⵍⴷⴻⵏ. ⵏⴻⵜⵜⴰ ⴰⴷ ⴷⴷ-ⵢⴰⵙ ⵙ ⵍⵖⴻⴼⵍⴻⵜ ⵓ ⴰⴷ ⵉⵟⵟⴻⴼ ⵜⴰⴳⴻⵍⴷⵉⵜ ⵙ ⵜⴻⵃⵔⴰⵢⵎⴻⵛⵜ ⵏⵏⴻⵙ. 22 ⵉⵖⴰⴵⴻⵏ ⵉⵊⴻⵀⴷⴻⵏ ⵏⵏⵉ ⵉⴼⴻⵢⵢⴹⴻⵏ ⵜⴰⵎⵎⵓⵔⵜ, ⴰⴷ ⵜⵜⵡⴰⵎⵃⴰⵏ ⵣⵣⴰⵜ ⵉ ⵡⵓⴷⴻⵎ ⵉⵏⵓ ⵓ ⴰⴷ ⵜⵜⵡⴰⵔⵔⵥⴻⵏ ⵓⵍⴰ ⴷ ⵍⵃⴰⴽⴻⵎ ⵏ ⵍⵄⴰⵀⴷ. 23 ⵓ ⵣⴻⴳ ⵡⴰⵎⵉ ⵉ ⵖⴰ ⴳⴳⴻⵏ ⵉⵊⵊ ⵏ ⵍⵄⴻⵇⴷ ⴰⴽⵉⴷⴻⵙ, ⴰⴷ ⵉⴳⴳ ⵙ ⵍⵖⴻⵛⵛ. ⴰⴷ ⵉⵙⵙⴳⴻⵄⵄⴻⴷ ⵓ ⴰⴷ ⵉⴷⵡⴻⵍ ⵉⵣⴻⵎⵎⴰⵔ ⵅⴰⵙⴻⵏ ⵙ ⴷⵔⵓⵙ ⵏ ⵍⴳⴻⵏⵙ ⵡⴰⵀⴰ. 24 ⴰⴷ ⵢⴰⴷⴻⴼ ⵙ ⵍⵖⴻⴼⵍⴻⵜ ⴷⵉ ⵊⵊⵡⴰⵢⴻⵀ ⵉⵙⵙⵖⴻⵎⵎⴰⵢⴻⵏ ⵏ ⵍⵄⴰⵎⴰⵍⴰ ⵓⵛⴰ ⴰⴷ ⵉⴳⴳ ⵎⵉⵏ ⵡⴰⵔ ⴳⴳⵉⵏ ⵍⴻⵊⴷⵓⴷ ⵏⵏⴻⵙ ⵏⵉⵖ ⵍⴻⵊⴷⵓⴷ ⵏ ⵍⴻⵊⴷⵓⴷ ⵏⵏⴻⵙ: ⴰⴷ ⵢⴰⵛⴰⵔ ⵓ ⴰⴷ ⵉⴽⴻⵛⵛⴻⴹ ⵓ ⵎⴰⵔⵔⴰ ⴰⴳⵍⴰⵡⴻⵏ ⴰⴷ ⵜⴻⵏ ⵉⵣⴻⴵⴻⵄ ⵊⴰⵔ ⴰⵙⴻⵏ. ⵏⴻⵜⵜⴰ ⴳⴳⵓⵔ ⴰⴷ ⵉⵅⴰⵔⵔⴻⵚ ⴷⴻⴳ ⵉⵏⵡⴰⵢⴻⵏ ⴹⵉⴷⴷ ⵉ ⵍⵇⴻⵍⵄⴰⵜ, ⴰⵍ ⵉⵛⵜ ⵏ ⵍⵡⴻⵇⵜ ⵉⵜⵜⵡⴰⴳⴳⴻⵏ.

25 ⵙ ⵢⵉⵊⵊ ⵏ ⵍⵄⴻⵙⴽⴰⵔ ⴰⵎⴻⵇⵇⵔⴰⵏ ⴰⴷ ⵢⴰⵔⵔ ⵊⵊⴻⵀⴷ ⵏⵏⴻⵙ ⴷ ⵡⵓⵍ ⵏⵏⴻⵙ ⴹⵉⴷⴷ ⵉ ⵢⵉⵊⵊ ⵏ ⵓⵊⴻⴵⵉⴷ ⵏ ⵍⵊⴰⵏⵓⴱ ⵓⵛⴰ ⴰⵊⴻⴵⵉⴷ ⵏ ⵍⵊⴰⵏⵓⴱ ⴰⴷ ⵉⴼⴼⴻⵖ ⵖⴰⵔ ⵓⵎⴻⵏⵖⵉ ⵙ ⵢⵉⵊⵊ ⵏ ⵍⵄⴻⵙⴽⴰⵔ ⴰⵎⴻⵇⵇⵔⴰⵏ ⵉⵊⵀⴻⴷ, ⵎⴰⵛⴰ ⵡⴰⵔ ⵉⵣⴻⵎⵎⴰⵔ ⴰⴷ ⵉⴱⴻⴷⴷ, ⵎⵉⵏⵣⵉ ⴰⴷ ⵅⴰⵙ ⴳⴳⴻⵏ ⵜⵉⵎⴻⵄⵎⴰⵍⵜ, 26 ⴷ ⵢⵉⵏⵏⵉ ⵉⵜⵜⴻⵜⵜⴻⵏ ⵣⵉ ⵎⴰⵛⵛⴰ ⵏ ⵓⵊⴻⴵⵉⴷ, ⴰⴷ ⵜ ⴰⵔⵥⴻⵏ ⵓ ⵍⵄⴻⵙⴽⴰⵔ ⵏⵏⴻⵙ ⴰⴷ ⵉⵜⵜⵡⴰⵎⵃⴰ ⵓ ⴰⵟⵟⴰⵙ ⴰⴷ ⵜⵜⵡⴰⵏⵖⴻⵏ. 27 ⵓⵍ ⵏ ⵜⵏⴰⵢⴻⵏ ⵏ ⵉⵊⴻⴵⵉⴷⴻⵏ-ⴰ ⴰⴷ ⵢⵉⵍⵉ ⵉⵙⵙⴻⴳⴳⵓⵔ ⵖⴰⵔ ⵍⵖⴰⵔ ⵓ ⵅ ⵟⵟⴰⴱⵍⴰ ⴷ ⵉⵛⵜ ⴰⴷ ⵉⵏⵉⵏ ⵉⵅⴰⵔⵔⵉⵇⴻⵏ, ⵎⴰⵛⴰ ⵎⴰⵏ ⴰⵢⴰ ⵡⴰⵔ ⵉⵏⴻⴼⴼⴻⵄ, ⵎⴰⵖⴰⵔ ⴰⵏⴻⴳⴳⴰⵔ ⵉⵜⵜⵔⴰⵊⴰ ⵄⴰⴷ ⴰⵍ ⵍⵡⴻⵇⵜ ⵉⵜⵜⵡⴰⴳⴳⴻⵏ. 28 ⵙ ⵓⴱⴰⵔⵔⵓ ⵏ ⵡⴰⴳⵍⴰ ⴰⴷ ⵢⴰⵔⴻⴳⴳⵯⴻⵃ ⵖⴰⵔ ⵜⴻⵎⵎⵓⵔⵜ ⵏⵏⴻⵙ ⵓ ⵓⵍ ⵏⵏⴻⵙ ⴰⴷ ⵢⵉⵍⵉ ⴹⵉⴷⴷ ⵉ ⵍⵄⴰⵀⴷ ⵉⵇⴻⴷⴷⵙⴻⵏ ⵓ ⵏⴻⵜⵜⴰ ⴰⴷ ⵉⴳⴳ ⴰⵎⴻⵏⵏⵉ ⵓ ⵅⴻⵏⵏⵉ ⴰⴷ ⵉⵄⵇⴻⴱ ⵖⴰⵔ ⵜⴻⵎⵎⵓⵔⵜ ⵏⵏⴻⵙ.

29 ⴷⴻⴳ ⵉⵛⵜ ⵏ ⵍⵡⴻⵇⵜ ⵉⵜⵜⵡⴰⴳⴳⴻⵏ ⴰⴷ ⴷⴷ-ⵉⵄⵇⴻⴱ, ⴰⴷ ⵉⵔⴰⵃ ⵖⴰⵔ ⵍⵊⴰⵏⵓⴱ, ⵎⴰⵛⴰ ⵜⵡⴰⵍⴰ-ⵢⴰ ⵜⴰⵏⴻⴳⴳⴰⵔⵓⵜ ⵡⴰⵔ ⵜᵉⵜⵜⵉⵍⵉ ⴰⵎ ⵜⵡⴰⵍⴰ ⵜⴰⵎⴻⵣⵡⴰⵔⵓⵜ. 30 ⵎⴰⵖⴰⵔ ⵉⵖⴰⵔⵔⵓⴱⴰ ⵏ ⴽⵉⵜⵜⵉⵎ ⴰⴷ ⵖⴰⵔⴻⵙ ⴷⴷ-ⴰⵙⴻⵏ ⵓ ⵏⴻⵜⵜⴰ ⴰⴷ ⵉⵜⵜⵡⴰⵙⵙⵉⴳⴳⵯⴻⴷ, ⴰⴷ ⵉⵄⵇⴻⴱ ⵓ ⵅⴻⵏⵏⵉ ⴰⴷ ⵉⵙⵅⴻⴹ ⵅ ⵍⵄⴰⵀⴷ ⵉⵇⴻⴷⴷⵙⴻⵏ ⵓ ⴰⴷ ⵉⴳⴳ ⴰⵎⴻⵏⵏⵉ. ⵅⵎⵉ ⴷⴷ ⵖⴰ ⵉⵄⵇⴻⴱ ⴰⴷ ⵉⵎⵎⵙⴻⴼⵀⴻⵎ ⴰⴽ-ⴷ ⵢⵉⵏⵏⵉ ⴷⴷ-ⵉⴼⴼⵖⴻⵏ ⵣⵉ ⵍⵄⴰⵀⴷ ⵉⵇⴻⴷⴷⵙⴻⵏ. ◼11:30 ⴽⵉⵜⵜⵉⵎ-ⵉⵅⵙ ⴰⴷ ⵢⵉⵏⵉ ‘ⵇⵓⴱⵔⵓⵙ’. 31 ⴰⴷ ⵇⵇⵉⵎⴻⵏ ⴱⴻⴷⴷⴻⵏ ⵉⵖⴰⴵⴻⵏ ⵏ ⵍⵄⴻⵙⴽⴰⵔ ⵉ ⵣⵣⴰⵢⴻⵙ, ⵉⵏⵏⵉ ⵉ ⵖⴰ ⵉⵖⴻⵚⴱⴻⵏ ⵣⵣⴰⵡⴻⵛⵜ ⵉⵇⴻⴷⴷⵙⴻⵏ, ⵍⴱⵓⵔⵊ, ⵓⵛⴰ ⴰⴷ ⴽⴽⵙⴻⵏ ⵜⴰⵖⴰⵔⵚⵜ ⵏ ⵍⴻⴱⴷⴰ ⵓ ⴰⴷ ⴷⵉⵏ ⵙⵙⴱⴻⴷⴷⴻⵏ ⵏⵏⵄⵉ ⵏ ⵓⵅⴰⵔⵔⴻⴱ. 32 ⵉⵏⵏⵉ ⴷⴰⵢⵙⴻⵏ ⵏⵏⴻⵢⵢⴻⵜ ⵜⴰⵄⴻⴼⴼⴰⵏⵜ ⵅ ⵍⵄⴰⵀⴷ, ⴰⴷ ⵜⴻⵏ ⵉⵙⵙⵓⴼⴼⴻⵖ ⵣⴻⴳ ⵡⴻⴱⵔⵉⴷ ⵙ ⵜⴻⵃⵔⴰⵢⵎⴻⵛⵜ, ⵎⴰⵛⴰ ⵍⴳⴻⵏⵙ, ⴰⵇⴰ ⵉⵏⵏⵉ ⵉⵙⵙⵏⴻⵏ ⴰⵔⴻⴱⴱⵉ ⵏⵙⴻⵏ, ⴳⴳⵓⵔ ⴰⴷ ⵉⵍⵉⵏ ⵊⴻⵀⴷⴻⵏ ⵓ ⴰⴷ ⴳⴳⴻⵏ. 33 ⵉⴼⴻⵀⵀⴰⵎⴻⵏ ⵏ ⵍⴳⴻⵏⵙ ⴰⴷ ⵙⵙⴼⴻⵜⵏⴻⵏ ⴰⵟⵟⴰⵙ, ⵓⵛⴰ ⴰⵟⵟⴰⵙ ⴰⴷ ⵏⵏⵇⴰⵔⴹⴻⵏ ⵙ ⵙⵙⵉⴼ ⴷ ⵉⵃⵓⴷⴰⵇ ⵏ ⵜⵎⴻⵙⵙⵉ ⴷ ⵜⵎⴻⵃⴱⴰⵙⵜ ⴷ ⵓⴽⴻⵛⵛⴻⴹ, ⴰⵟⵟⴰⵙ ⵏ ⵡⵓⵙⵙⴰⵏ. 34 ⵅⵎⵉ ⵖⴰ ⵏⵇⴰⵔⴹⴻⵏ, ⴰⴷ ⴰⴼⴻⵏ ⵉⵛⵜ ⵏ ⵜⵡⵉⵣⴰ ⵜⴰⵎⴻⵥⵢⴰⵏⵜ ⵓ ⴰⵟⵟⴰⵙ ⴰⴷ ⵖⴰⵔⵙⴻⵏ ⴷⴷ-ⵎⵓⵏⴻⵏ ⵙ ⵜⴻⵃⵔⴰⵢⵎⴻⵛⵜ. 35 ⵛⴰ ⵣⴻⴳ ⵉⴼⴻⵀⵀⴰⵎⴻⵏ ⴰⴷ ⵏⵇⴰⵔⴹⴻⵏ ⵎⴰⵃⴻⵏⴷ ⴰⴷ ⵜⵜⵡⴰⵚⴻⴼⴼⴰⵏ ⵓ ⴰⴷ ⵜⵜⵡⴰⵙⵙⵉⵣⴻⴷⴳⴻⵏ ⵓ ⴰⴷ ⵜⵜⵡⴰⵚⴻⴼⴼⴰⵏ ⴰⵍ ⵍⵡⴻⵇⵜ ⵏ ⵓⵏⴻⴳⴳⴰⵔ, ⵎⴰⵖⴰⵔ ⴰⴷ ⵢⵉⵍⵉ ⴰⵍ ⵍⵡⴻⵇⵜ ⵉⵜⵜⵡⴰⴳⴳⴻⵏ.

36 ⴰⵊⴻⴵⵉⴷ ⴰⴷ ⵉⴳⴳ ⵎⵉⵏ ⵉⵅⵙ ⵏⴻⵜⵜⴰ ⵓ ⴰⴷ ⵉⵙⵙⴳⴻⵄⵄⴻⴷ ⵉⵅⴻⴼ ⵏⵏⴻⵙ ⵓ ⴰⴷ ⵉⵙⵙⴻⵎⵖⴰⵔ ⵉⵅⴻⴼ ⵏⵏⴻⵙ ⵙⴻⵏⵏⴻⵊ ⵅ ⴽⵓⵍ ⴰⵔⴻⴱⴱⵉ ⵓ ⵏⴻⵜⵜⴰ ⴰⴷ ⵢⵉⵏⵉ ⵍⴻⵄⵊⴻⴱ ⵏ ⵜⵎⴻⵙⵍⴰⵢⵉⵏ ⴹⵉⴷⴷ ⵉ ⴰⵔⴻⴱⴱⵉ ⵅ ⵎⴰⵔⵔⴰ ⵉⵔⴻⴱⴱⵉⵜⴻⵏ. ⵏⴻⵜⵜⴰ ⴰⴷ ⵉⴼⵍⴻⵃ ⴰⵍ ⵖⴰ ⵉⵜⵜⵡⴰⴽⴻⵎⵎⴻⵍ ⵡⴻⵙⵅⴻⴹ ⵎⴰⵔⵔⴰ, ⵎⴰⵖⴰⵔ ⴰⵇⴰ ⵢⵓⵔⴰ ⵓⵛⴰ ⴰⴷ ⵢⵉⵍⵉ. ◘11:36 ⴷⴰⵏ. 7:25 37 ⵏⴻⵜⵜⴰ ⵡⴰⵔ ⴳⴳⵓⵔ ⴰⴷ ⵜ ⵛⵇⴰⵏ ⵉⵔⴻⴱⴱⵉⵜⴻⵏ ⵏ ⵍⴻⵊⴷⵓⴷ ⵏⵏⴻⵙ ⵓⵍⴰ ⴷ ⵍⴻⵖⵔⵉⵣⴻⵜ ⵏ ⵜⴻⵎⵖⴰⵔⵉⵏ. ⵏⴻⵜⵜⴰ ⵡⴰⵔ ⴷ ⴰⵙ ⵉⵛⵇⵉ ⵓⵍⴰ ⴷ ⵉⵊⵊ ⵏ ⴰⵔⴻⴱⴱⵉ, ⵎⴰⵛⴰ ⴰⴷ ⵉⵙⵙⴻⵎⵖⴰⵔ ⵉⵅⴻⴼ ⵏⵏⴻⵙ ⵙⴻⵏⵏⴻⵊ ⵅ ⵎⴰⵔⵔⴰ. 38 ⴷⴻⴳ ⵡⴻⵎⵛⴰⵏ ⵏⵏⴻⵙ ⴰⴷ ⵉⵡⴻⵇⵇⴰⵔ ⴰⵔⴻⴱⴱⵉ ⵏ ⵍⴱⵓⵔⵊⴰⵜ. ⴰⴷ ⵉⵡⴻⵇⵇⴰⵔ ⴰⵔⴻⴱⴱⵉ ⵏⵏⵉ ⵡⴰⵔ ⵙⵙⵉⵏⴻⵏ ⵛⴰ ⵍⴻⵊⴷⵓⴷ ⵏⵏⴻⵙ, ⵙ ⵡⵓⵔⴻⵖ ⴷ ⵏⵏⵓⵇⴰⵔⵜ ⴷ ⵢⴻⵥⵔⴰ ⵉⵖⵍⴰⵏ ⴷ ⵍⴻⵇⵛⵓⵄ ⵉⵖⵍⴰⵏ. 39 ⵏⴻⵜⵜⴰ ⴰⴷ ⵉⴳⴳ ⴹⵉⴷⴷ ⵉ ⵍⵇⴻⵍⵄⴰⵜ ⵙ ⴰⵔⴻⴱⴱⵉ ⴰⵖⵔⵉⴱ. ⵡⴻⵏⵏⵉ ⵜ ⵖⴰ ⵉⵇⴻⴱⵍⴻⵏ, ⴰⴷ ⵉⴽⵙⵉ ⴰⵟⵟⴰⵙ ⵏ ⵛⵛⴰⵏ ⵓ ⴰⴷ ⵉⵚⴻⵍⵍⴻⵟ ⵅ ⵡⴰⵟⵟⴰⵙ ⵓ ⵏⴻⵜⵜⴰ ⴰⴷ ⵅⴰⵙⴻⵏ ⵉⴱⴹⴰ ⵜⴰⵎⵎⵓⵔⵜ ⴷ ⵍⵎⵓⵏⴻⵜ.

40 ⴷⵉ ⵍⵡⴻⵇⵜ ⵏ ⵓⵏⴻⴳⴳⴰⵔⵓ ⴰⴷ ⴰⵙ ⵉⵣⴷⴻⵎ ⵓⵊⴻⴵⵉⴷ ⵏ ⵍⵊⴰⵏⵓⴱ ⵙ ⵡⴰⵛⵛⴰⵡⴻⵏ ⵏⵏⴻⵙ ⵓ ⴰⵊⴻⴵⵉⴷ ⵏ ⵛⵛⴰⵎⴰⵍ ⴰⴷ ⵅⴰⵙ ⵉⴷⴷⵓⵇⵇⴻⵣ ⵙ ⵉⴽⴰⵔⵔⵓⵜⴻⵏ ⴷ ⵉⵎⵏⴰⵢⴻⵏ ⴷ ⵡⴰⵟⵟⴰⵙ ⵏ ⵉⵖⴰⵔⵔⵓⴱⴰ ⵓ ⵏⴻⵜⵜⴰ ⴰⴷ ⵢⴰⴷⴻⴼ ⵜⵉⵎⵎⵓⵔⴰ ⴰⵎ ⵍⵃⴻⵎⵍⴻⵜ ⵓⵛⴰ ⵅⴻⵏⵏⵉ ⴰⴷ ⵅⴰⵙⴻⵏ ⵉⵄⴷⵓ. 41 ⵏⴻⵜⵜⴰ ⴰⴷ ⵢⴰⴷⴻⴼ ⵜⴰⵎⵎⵓⵔⵜ ⵏ ⵜⴻⵍⵡⵉⵣⵜ ⵓ ⴰⵟⵟⴰⵙ ⴰⴷ ⵏⵏⵇⴰⵔⴹⴻⵏ, ⵎⴰⵛⴰ ⵉⵏⴰ ⴰⴷ ⴰⵔⴻⵡⵍⴻⵏ ⵣⴻⴳ ⵓⴼⵓⵙ ⵏⵏⴻⵙ: ⵉⴷⵓⵎ ⴷ ⵎⵓ’ⴰⴱ ⴷ ⵓⵎⴻⵣⵡⴰⵔ ⵏ ⴰⵢⵜ ⵏ ⵄⴰⵎⵎⵓⵏ. 42 ⵏⴻⵜⵜⴰ ⴰⴷ ⵉⵙⵙⵡⵉⵥⵥⴻⴹ ⵙ ⵓⴼⵓⵙ ⵏⵏⴻⵙ ⵖⴰⵔ ⵜⴻⵎⵎⵓⵔⴰ. ⵓⵍⴰ ⴷ ⵜⴰⵎⵎⵓⵔⵜ ⵏ ⵎⵉⵚⵔⴰ ⵡⴰⵔ ⵜⵏⴻⵊⵊⴻⵎ. 43 ⵏⴻⵜⵜⴰ ⴰⴷ ⵉⵚⴻⵍⵍⴻⵟ ⵅ ⵜⵅⵓⴱⴰⵢ ⵏ ⵡⵓⵔⴻⵖ ⴷ ⵏⵏⵓⵇⴰⵔⵜ ⴷ ⵎⴰⵔⵔⴰ ⵍⴻⵇⵛⵓⵄ ⵉⵖⵍⴰⵏ ⵏ ⵎⵉⵚⵔⴰ. ⴰⵢⵜ ⵏ ⵍⵉⴱⵢⴰ ⴷ ⴰⵢⵜ ⵏ ⴽⵓⵛ ⴰⴷ ⵜ ⴹⴼⴰⵔⴻⵏ ⴷⴻⴳ ⵉⵚⵓⵔⴰⴼ ⵏⵏⴻⵙ.

44 ⵎⴰⵛⴰ ⵍⴻⵅⴱⵓⵔⴰⵜ ⵣⵉ ⵛⵛⴰⵔⵇ ⵓ ⵣⵉ ⵛⵛⴰⵎⴰⵍ ⴰⴷ ⵜ ⵙⵙⵏⴻⵅⵍⴻⵄⴻⵏ. ⵅⴻⵏⵏⵉ ⴰⴷ ⵉⴼⴼⴻⵖ ⵙ ⵡⴻⵙⵄⴰⵔ ⴰⵎⴻⵇⵇⵔⴰⵏ ⵃⵉⵎⴰ ⴰⴷ ⵢⴰⵔⴻⴷⴷⴻⴵ ⴰⵟⵟⴰⵙ ⵓ ⵃⵉⵎⴰ ⴰⴷ ⵜⴻⵏ ⵉⵜⴻⵃⵃⴰ. 45 ⴰⴷ ⵉⵡⵡⴻⵜ ⵜⵉⵅⵓⵣⴰⵏ ⵏⵏⴻⵙ ⵉⴳⴻⵍⵍⴷⴻⵏ ⵊⴰⵔ ⵍⴻⴱⵃⵓⵔ ⴷ ⵡⴻⴷⵔⴰⵔ ⵏ ⵜⴻⵍⵡⵉⵣⵜ ⵉⵇⴻⴷⴷⵙⴻⵏ ⵓ ⵏⴻⵜⵜⴰ ⴰⴷ ⵢⴰⵡⴻⴹ ⵖⴰⵔ ⵓⵏⴻⴳⴳⴰⵔ ⵏⵏⴻⵙ ⵓ ⵡⴰⵔ ⴷⵉⵏ ⵉⵜⵜⵉⴼ ⵃⴻⴷ ⴰⴷ ⵜ ⵉⵄⴰⵡⴻⵏ.” ◘11:45 ⴷⴰⵏ. 8:25