1 “ⵅⵎⵉ ⵖⴰ ⵢⴰⵡⵉ ⵉⵊⵊ ⵏ ⵡⴻⵔⵢⴰⵣ ⵉⵛⵜ ⵏ ⵜⴻⵎⵖⴰⵔⵜ ⵓⵛⴰ ⵉⵎⵍⴻⵛ ⴰⴽⵉⴷⴻⵙ ⵓⵛⴰ ⵡⴰⵔ ⴷ ⴰⵙ ⵜⴻⵄⵊⵉⴱ ⵓⵎⵉ ⴷⴰⵢⴻⵙ ⵢⵓⴼⴰ ⵛⴰ ⵏ ⵍⴻⴼⴹⵉⵃⴻⵜ, ⵓⵛⴰ ⵅⴻⵏⵏⵉ ⴰⴷ ⴰⵙ ⵢⴰⵔⵉ ⵜⴰⴱⵔⴰⵜ ⵏ ⵡⴻⴵⴰⴼ, ⴰⴷ ⴰⵙ ⵜⵜ ⵉⵡⵛ ⴷⴻⴳ ⵓⴼⵓⵙ ⵏⵏⴻⵙ ⵓⵛⴰ ⴰⴷ ⵜⵜ ⵉⵙⵙⵓⴼⴻⵖ ⵣⵉ ⵜⴰⴷⴷⴰⵔⵜ ⵏⵏⴻⵙ, ◘24:1 ⵎⵜ. 5:31; 19:7; ⵎⴽ. 10:4 2 ⵓⵛⴰ ⵅⴻⵏⵏⵉ ⵜⴻⴼⴼⴻⵖ ⵏⴻⵜⵜⴰⵜ ⵣⵉ ⵜⴰⴷⴷⴰⵔⵜ ⵏⵏⴻⵙ, ⵜⵔⵓⵃ ⵓⵛⴰ ⵜⴻⴷⵡⴻⵍ ⴷ ⵜⴰⵎⵖⴰⵔⵜ ⵖⴰⵔ ⵉⵊⵊ ⵏ ⵡⴻⵔⵢⴰⵣ ⵏⵏⴻⵖⵏⵉ, 3 ⵓⵛⴰ ⴰⵔⵢⴰⵣ ⴰⵏⴻⴳⴳⴰⵔⵓ ⵉⵛⴰⵔⵀ ⵉ-ⵜⵜ, ⴰⴷ ⴰⵙ ⵢⴰⵔⵉ ⵜⴰⴱⵔⴰⵜ ⵏ ⵡⴻⴵⴰⴼ ⵓⵛⴰ ⴰⴷ ⴰⵙ ⵜⵜ ⵉⵡⵛ ⴷⴻⴳ ⵓⴼⵓⵙ ⵏⵏⴻⵙ ⵓⵛⴰ ⴰⴷ ⵜⵜ ⵉⵙⵙⴻⴽⴽ ⵣⵉ ⵜⴰⴷⴷⴰⵔⵜ ⵏⵏⴻⵙ, ⵏⵉⵖ ⴰⵔⵢⴰⵣ ⴰⵏⴻⴳⴳⴰⵔⵓ ⵏⵏⵉ ⵉ-ⵜⵜ ⵢⵉⵡⵢⴻⵏ ⴷ ⵜⴰⵎⵖⴰⵔⵜ ⵏⵏⴻⵙ, ⵉⵎⵎⵓⵜ, 4 ⵅⴻⵏⵏⵉ ⵡⴰⵔ ⵉⵄⴻⴷⴷⴻⵍ ⵉ ⵡⴻⵔⵢⴰⵣ ⵏⵏⴻⵙ ⴰⵎⴻⵣⵡⴰⵔⵓ, ⵡⴻⵏⵏⵉ ⴷ ⴰⵙ ⵉⵟⴻⵍⵍⵇⴻⵏ, ⴰⴷ ⵜⵜ ⵢⴻⴳⴳ ⵄⴰⵡⴻⴷ ⴷ ⵜⴰⵎⵖⴰⵔⵜ ⵉ ⵢⵉⵅⴻⴼ ⵏⵏⴻⵙ, ⴰⵡⴰⵔⵏⵉ ⵓⵎⵉ ⵜᵉⵜⵜⵡⴰⵙⵙⴻⵅⵎⴻⵊ ⵏⴻⵜⵜⴰⵜ, ⵎⵉⵏⵣⵉ ⵎⴰⵏ ⴰⵢⴰ ⴷ ⵊⵊⵄⵉⴼⴻⵛⵜ ⵣⵣⴰⵜ ⵉ ⵡⵓⴷⴻⵎ ⵏ ⵙⵉⴷⵉ. ⵡⴰⵔ ⵉⵄⴻⴷⴷⴻⵍ ⴰⴷ ⵜⴻⵙⵙⵉⵡⵉⴹ ⴷⴷⴻⵏⴱ ⵅ ⵜⴻⵎⵎⵓⵔⵜ ⵉ ⴷ ⴰⵛ ⵉⵡⵛⴰ ⵙⵉⴷⵉ, ⴰⵔⴻⴱⴱⵉ ⵏⵏⴻⵛ, ⴷ ⵍⵡⴰⵔⵜ.”

5 “ⵅⵎⵉ ⵉⵊⵊ ⵏ ⵡⴻⵔⵢⴰⵣ ⵜⵓⵖⴰ ⴰⵎ ⵉⵎⵍⴻⵛ, ⵅⴻⵏⵏⵉ ⵡⴰⵔ ⵉⵜⵜⴻⴼⴼⴻⵖ ⵛⴰ ⴰⴽ-ⴷ ⵍⵄⴻⵙⴽⴰⵔ ⵓ ⵡⴰⵔ ⵅⴰⵙ ⵜᵉⵜⵜⵡⴰⴳⴳ ⵓⵍⴰ ⴷ ⵉⵛⵜ ⵏ ⵜⵎⴻⵙⵍⴰⵛⵜ. ⴰⴷ ⵢⵉⵍⵉ ⵉⵊⵊ ⵏ ⵓⵙⴻⴳⴳⵯⴰⵙ ⵉ ⵜⴰⴷⴷⴰⵔⵜ ⵏⵏⴻⵙ ⵡⴰⵀⴰ ⵓ ⴰⴷ ⵉⵙⵙⴼⴰⵔⵃ ⵜⴰⵎⵖⴰⵔⵜ ⵏⵏⴻⵙ ⵉ ⵢⵉⵡⵉ ⵉ ⵢⵉⵅⴻⴼ ⵏⵏⴻⵙ.” ◘24:5 ⴰⵄⵡⴷ. 20:7

6 “ⵡⴰⵔ ⵉⵄⴻⴷⴷⴻⵍ ⴰⴷ ⵜⴻⴽⵙⵉⴷ ⵉⵥⵔⴰ ⵏ ⵜⵙⵉⵔⵜ ⵙ ⵜⵏⴰⵢⴻⵏ ⴷ ⴰⴹⵎⴰⵏ, ⵏⵉⵖ ⴰⵥⵔⵓ ⵏⵏⵉ ⵣⵣⴰⵢⵙⴻⵏ ⵉⵜⵜⴻⵏⵀⴻⵣⵣⴰⵏ ⵡⴰⵀⴰ, ⵎⵉⵏⵣⵉ ⴰⵇⴰ ⵅⴻⵏⵏⵉ ⴰⴷ ⵢⵉⵍⵉ ⵍⴻⵄⵎⴰⵔ ⴷ ⴰⴹⵎⴰⵏ.”

7 “ⵎⴰⵍⴰ ⵉⵜⵜⵡⴰⴼ ⵉⵊⵊ ⵏ ⵡⴻⵔⵢⴰⵣ ⵢⵓⵛⴰⵔ ⵛⴰ ⵏ ⵢⵉⵊⵊ ⵣⴻⴳ ⵡⴰⵡⵎⴰⵜⴻⵏ ⵏⵏⴻⵙ, ⵣⴻⴳ ⴰⵢⵜ ⵏ ⵉⵙⵔⴰⵉⵍ, ⵓⵛⴰ ⵏⴻⵜⵜⴰ ⵢⴰⵔⵔⴰ ⵉ-ⵜ ⴷ ⵉⵙⵎⴻⵖ ⵓⵛⴰ ⵉⵣⵣⴻⵏⵣ ⵉ-ⵜ, ⵅⴻⵏⵏⵉ ⴰⴷ ⵉⵎⵎⴻⵜ ⵓⵛⴻⴼⴼⴰⵔ ⵏⵏⵉ. ⵉⵜⵜⵅⴻⵚⵚⴰ ⴰⴷ ⵜⴻⴽⴽⵙⴻⴷ ⵍⵖⴰⵔ ⵣⵉ ⵍⵡⴻⵙⵟ ⵏⵏⴻⵛ.” ◘24:7 ⵓⴼ. 21:16

8 “ⵅⵎⵉ ⴷⵉⵏ ⵜⴻⴵⴰ ⵊⵊⵔⵉⵃⴻⵛⵜ ⵏ ⵍⴱⴰⵔⵚ, ⵃⴹⴰ ⴰⴷ ⵜⴻⵃⴹⵉⴷ ⵓ ⴰⴷ ⵜⴻⴳⴳⴻⴷ ⵏⵉⵛⴰⵏ ⵄⵍⴰⵃⵙⴰⴱ ⵎⴰⵔⵔⴰ ⵎⵉⵏ ⴷ ⴰⵛ ⵖⴰ ⵙⵙⵍⴻⵎⴷⴻⵏ ⵉⴽⴻⵀⵀⴰⵏⴻⵏ ⵉⵍⴰⵡⵉⵢⵢⴻⵏ. ⴰⴷ ⵜⴻⵃⴹⴰⵎ ⵎⴰⵃⴻⵏⴷ ⴰⴷ ⵜⴻⴳⴳⴻⵎ ⵎⴰⵔⵔⴰ ⴰⵎ ⵎⴰⵎⵎⴻⵛ ⵜⴻⵏ ⵓⵎⵓⵔⴻⵖ. ◘24:8 ⵍⴰⵡⵉ 13:2 9 ⵉⴷⴰⵔ ⵎⵉⵏ ⵉⴳⴳⴰ ⵙⵉⴷⵉ, ⴰⵔⴻⴱⴱⵉ ⵏⵏⴻⵛ, ⴰⴽ-ⴷ ⵎⴰⵔⵢⴰⵎ ⴷⴻⴳ ⵡⴻⴱⵔⵉⴷ ⵓⵎⵉ ⴷⴷ-ⵜⴻⴼⴼⵖⴻⵎ ⵣⵉ ⵎⵉⵚⵔⴰ.”◘24:9 ⵍⵅⵍ. 12:10

10 “ⵎⴰⵍⴰ ⵜⴰⵔⴹⵍⴻⴷ ⵛⴰ ⵉ ⵊⵊⴰⵔ ⵏⵏⴻⵛ, ⵅⴻⵏⵏⵉ ⵡⴰⵔ ⵜⵜⵉⴷⴻⴼ ⵖⴰⵔ ⵜⴰⴷⴷⴰⵔⵜ ⵏⵏⴻⵙ ⵃⵉⵎⴰ ⴰⴷ ⵣⵣⴰⵢⴻⵙ ⵜⴻⴽⵙⵉⴷ ⵛⴰ ⴷ ⴰⴹⵎⴰⵏ ⵉ ⵢⵉⵅⴻⴼ ⵏⵏⴻⵛ. 11 ⴰⴷ ⵜⴻⵇⵇⵉⵎⴻⴷ ⴱⴰⵔⵔⴰ ⵓⵛⴰ ⴰⵔⵢⴰⵣ ⵉ ⵓⵎⵉ ⵜⴰⵔⴹⵍⴻⴷ ⴰⴷ ⴰⵛ ⴷⴷ-ⵢⴰⵡⵉ ⴷⴷⵉⵢⵢⴻⵜ ⵖⴰⵔ ⴱⴰⵔⵔⴰ. 12 ⵎⴰⵍⴰ ⵜⵓⵖⴰ ⴷ ⴰⵔⵢⴰⵣ ⴷ ⴰⵎⴻⵣⵍⵓⴹ, ⵅⴻⵏⵏⵉ ⵡⴰⵔ ⵜⵜᵉⵜⵜⵏⵓⵙⵉ ⴷⴻⴳ ⵡⴻⵔⵀⴰⵏ ⵏⵏⴻⵙ ⴰⵎⴻⵛⵏⴰⵡ ⵉ ⵢⴻⴵⴰ ⴷ ⵜⴰⵙⵙⵓⵜ ⵏⵏⴻⵙ. 13 ⴰⴷ ⴰⵙ ⴷⴷ-ⵜⴰⵔⵔⴻⴷ ⴷⴷⵉⵢⵢⴻⵜ ⵏⵏⵉ ⵏⵉⵛⴰⵏ ⵖⴰⵔ ⵓⵖⴻⴵⵉ ⵏ ⵜⴼⵓⵛⵜ, ⵃⵉⵎⴰ ⴰⴷ ⵉⵟⵟⴻⵚ ⴷⵉ ⵜⴰⵙⵙⵓⵜ ⵏⵏⴻⵙ ⵓⵛⴰ ⴰⴷ ⴰⵛ ⵉⴱⴰⵔⴻⴽ. ⵎⴰⵏ ⴰⵢⴰ ⴰⴷ ⴰⵛ ⵜⵉⵍⵉ ⴷ ⵜⴰⵙⴻⴳⴷⴰ ⵣⵣⴰⵜ ⵉ ⵡⵓⴷⴻⵎ ⵏ ⵙⵉⴷⵉ, ⴰⵔⴻⴱⴱⵉ ⵏⵏⴻⵛ.”◘24:13 ⵓⴼ. 22:26

14 “ⵡⴰⵔ ⵙⵃⵉⵙⵙⴼⴻⵎ ⴰⵛⴻⵡⵡⴰⵍ ⴰⵎⴻⵃⴷⴰⵊ ⴰⵎⴻⵣⵍⵓⴹ ⵣⴻⴳ ⴰⵢⵜⵎⴰⵛ ⵏⵉⵖ ⵣⴻⴳ ⵉⴱⴰⵔⵔⴰⵏⵉⵢⵢⴻⵏ ⵉ ⵉⵣⴻⴷⴷⵖⴻⵏ ⴷⵉ ⵜⴻⵎⵎⵓⵔⵜ ⵏⵏⴻⵛ ⵓ ⴷⴰⵅⴻⵍ ⵉ ⵜⴻⵡⵡⵓⵔⴰ ⵏⵏⴻⵛ. ◘24:14 ⵍⴰⵡⵉ 19:13; ⵢⴰⵄ. 5:4 15 ⴰⴷ ⴰⵙ ⵜⴻⵡⵛⴻⴷ ⵍⵎⵓⵏⴻⵜ ⵏⵏⴻⵙ ⴽⵓⵍ ⴰⵙⵙ. ⵡⴰⵔ ⵅⴰⵙ ⵜⵖⴻⴵⵉ ⵜⴼⵓⵛⵜ ⵅ ⵎⴰⵏ ⴰⵢⴰ, ⵎⵉⵏⵣⵉ ⵏⴻⵜⵜⴰ ⴷ ⴰⵎⴻⵣⵍⵓⴹ ⵓⵛⴰ ⵉⵎⵎⴻⵥⵔⵉ ⴷⴰⵢⴻⵙ, ⵃⵉⵎⴰ ⵏⴻⵜⵜⴰ ⵡⴰⵔ ⵉⵜⵜⵍⵉⵖⵉ ⵉ ⵙⵉⴷⵉ ⴷⵉ ⵙⵙⵉⴱⴱⴻⵜ ⵏⵏⴻⵛ ⵓⵛⴰ ⴰⴷ ⴷⴰⵢⴻⴽ ⵢⵉⵍⵉ ⴷⴷⴻⵏⴱ.”

16 “ⵉⴱⴰⴱⴰⵜⴻⵏ ⵡⴰⵔ ⵜⵜⵡⴰⵏⴻⵇⵇⴻⵏ ⴷⵉ ⵙⵙⵉⴱⴱⴻⵜ ⵏ ⵉⵃⴻⵏⵊⵉⵔⴻⵏ ⵏⵙⴻⵏ ⵓ ⵉⵃⴻⵏⵊⵉⵔⴻⵏ ⵡⴰⵔ ⵜⵜⵡⴰⵏⴻⵇⵇⴻⵏ ⴷⵉ ⵙⵙⵉⴱⴱⴻⵜ ⵏ ⵉⴱⴰⴱⴰⵜⴻⵏ ⵏⵙⴻⵏ. ⴽⵓⵍ ⵉⵊⵊ ⴰⴷ ⵉⵜⵜⵡⴰⵏⴻⵖ ⴷⵉ ⵙⵙⵉⴱⴱⴻⵜ ⵏ ⴷⴷⴻⵏⴱ ⵏⵏⴻⵙ.”◘24:16 2 ⵉⵊ. 14:6; 2 ⵉⵎ. 25:4; ⵉⵔⵎ. 31:30; ⵃⵉⵥ. 18:20

17 “ⵡⴰⵔ ⵙⴼⴰⵔⵔⴰⵖ ⵍⴻⵃⴽⴰⵎ ⵏ ⵓⴱⴰⵔⵔⴰⵏⵉ ⴷ ⵓⵢⵓⵊⵉⵍ ⵏⵉⵖ ⴰⴷ ⵜⴻⴽⵙⵉⴷ ⴰⵔⵔⵓⴹ ⵏ ⵜⴰⵊⵊⴰⵍⵜ ⴷ ⴰⴹⵎⴰⵏ.◘24:17 ⵓⴼ. 22:21, 22; ⴰⵡⵍⵏ. 22:22; ⵉⵛⴰ. 1:23; ⵉⵔⵎ. 5:28; 22:3; ⵃⵉⵥ. 22:29; ⵣⴰⴽ. 7:10 18 ⴰⴷ ⵜⵄⴻⵇⵍⴻⴷ ⴱⴻⵍⵍⵉ ⵜⵓⵖⴰ ⵛⴻⴽ ⴷ ⵉⵙⵎⴻⵖ ⴷⵉ ⵎⵉⵚⵔⴰ ⵓⵛⴰ ⴰⵇⴰ ⵙⵉⴷⵉ, ⴰⵔⴻⴱⴱⵉ ⵏⵏⴻⵛ, ⵉⴼⴷⵉ ⵛⴻⴽ ⵙⵙⴻⵏⵏⵉ. ⵅ ⵓⵢⴰ ⵏⴻⵛⵛ ⵜⵜⵓⵎⵓⵔⴻⵖ ⵛⴻⴽ ⴰⴷ ⵜⴻⴳⴳⴻⴷ ⵎⴰⵏ ⴰⵢⴰ. ◼24:18 ⵉⴼⴷⵉ-ⵅⵥⴰⵔ ⵉⵥⵀⴷ. 78:35. 19 ⵅⵎⵉ ⵜⵎⴻⵊⵊⴰⵔⴻⴷ ⵚⵚⴰⴱⴻⵜ ⵏⵏⴻⵛ ⴷⴻⴳ ⵉⵢⵢⴰⵔ ⵏⵏⴻⵛ ⵓⵛⴰ ⵜᵉⵜⵜⵓⴷ ⵛⴰ ⵏ ⵜⵇⴻⴱⴱⵉⴹⵜ ⴷⴻⴳ ⵉⵢⵢⴰⵔ, ⵅⴻⵏⵏⵉ ⵡⴰⵔ ⴷⴷ-ⵜᵉⴷⴷⵉⴽⴽⵯⵉⵍⴻⴷ ⵎⴰⵃⴻⵏⴷ ⴰⴷ ⵜⵜ ⵜⴻⴽⵙⵉⴷ. ⴰⴷ ⵜⵉⵍⵉ ⴷ ⵜⴰⵙⵖⴰⵔⵜ ⵉ ⵓⴱⴰⵔⵔⴰⵏⵉ, ⵉ ⵓⵢⵓⵊⵉⵍ ⵓ ⵉ ⵜⴰⵊⵊⴰⵍⵜ, ⵃⵉⵎⴰ ⴰⴷ ⵛⴻⴽ ⵉⴱⴰⵔⴻⴽ ⵙⵉⴷⵉ, ⴰⵔⴻⴱⴱⵉ ⵏⵏⴻⵛ, ⴷⵉ ⵎⴰⵔⵔⴰ ⵍⵅⴻⴷⵎⴻⵜ ⵏ ⵉⴼⴰⵙⵙⴻⵏ ⵏⵏⴻⵛ.◘24:19 ⵍⴰⵡⵉ 19:9; 23:22 20 ⵅⵎⵉ ⵖⴰ ⵜⵥⴻⵡⴹⴻⴷ ⵜⴰⵛⴻⵊⵊⴰⵔⵜ ⵏⵏⴻⵛ ⵏ ⵣⵣⵉⵜⵓⵏ, ⵡⴰⵔ ⵜⵜⵉⵛ ⵜⴰⵢⵏⵉⵜ ⵄⴰⴷ ⵉ ⵎⵉⵏ ⵉⵇⵇⵉⵎⴻⵏ ⴰⵡⴰⵔⵏⵉ ⴰⵛ. ⴷ ⵎⴰⵏ ⴰⵢⴰ ⵉ ⵖⴰ ⵢⵉⵍⵉⵏ ⵉ ⵓⴱⴰⵔⵔⴰⵏⵉ, ⵉ ⵓⵢⵓⵊⵉⵍ ⵓ ⵉ ⵜⴰⵊⵊⴰⵍⵜ. 21 ⴰⵡⴰⵔⵏⵉ ⵍⴰⵎⵉ ⵜⵍⴻⵇⴹⴻⴷ ⴰⴹⵉⵍ ⵏ ⵓⵎⴰⵔⵊⴻⵄ ⵏⵏⴻⵛ ⵏ ⵓⴹⵉⵍ, ⵡⴰⵔ ⴰⵔⴻⵣⵣⵓ ⴰⴷ ⵜⵍⴻⵇⴹⴻⴷ ⵎⵉⵏ ⵉⵇⵇⵉⵎⴻⵏ ⴰⵡⴰⵔⵏⵉ ⴰⵛ ⵄⴰⵡⴻⴷ. ⴰⵇⴰ ⵎⴰⵏ ⴰⵢⴰ ⴰⴷ ⵢⵉⵍⵉ ⵉ ⵓⴱⴰⵔⵔⴰⵏⵉ, ⵉ ⵓⵢⵓⵊⵉⵍ ⵓ ⵉ ⵜⴰⵊⵊⴰⵍⵜ. 22 ⴰⴷ ⵜⵄⴻⵇⵍⴻⴷ ⴱⴻⵍⵍⵉ ⵜⵓⵖⴰ ⵛⴻⴽ ⴷ ⵉⵙⵎⴻⵖ ⴷⵉ ⵜⴻⵎⵎⵓⵔⵜ ⵏ ⵎⵉⵚⵔⴰ. ⵅ ⵓⵢⴰ ⵏⴻⵛⵛ ⵜⵜⵓⵎⵓⵔⴻⵖ ⵛⴻⴽ ⴰⴷ ⵜⴻⴳⴳⴻⴷ ⵎⴰⵏ ⴰⵢⴰ.”