1 ⵎⴰⵔⵔⴰ ⵖⴰⵔⴻⵙ ⵍⵎⵉⵊⴰⵍ ⵏⵏⴻⵙ ⵓ ⴰⵇⴰ ⴷⵉⵏ ⵄⴰⵡⴻⴷ ⵜⴰⵙⴰⵄⵄⴻⵜ ⵉⵜⵜⵡⴰⴳⴳⴻⵏ ⵉ ⴽⵓⵍ ⴰⵏⵡⴰⵢ ⵙⴰⴷⵓ ⴰⵊⴻⵏⵏⴰ.

2 ⴰⵇⴰ ⴷⵉⵏ ⵉⵛⵜ ⵏ ⵜⵙⴰⵄⵄⴻⵜ ⵏ ⵜⴰⵔⵡⴰ

ⴷ ⵉⵛⵜ ⵏ ⵜⵙⴰⵄⵄⴻⵜ ⵏ ⵍⵎⴻⵡⵜ,

ⵉⵛⵜ ⵏ ⵜⵙⴰⵄⵄⴻⵜ ⵏ ⵜⴰⵥⵥⵓⵜ

ⴷ ⵉⵛⵜ ⵏ ⵜⵙⴰⵄⵄⴻⵜ ⵏ ⵡⴻⵇⵍⴰⵄ ⵏ ⵎⵉⵏ ⵉⵜⵡⴰⵥⵥⵓⵏ,

3 ⵉⵛⵜ ⵏ ⵜⵙⴰⵄⵄⴻⵜ ⵏ ⵜⵎⴻⵏⵖⵉⵡⵜ

ⴷ ⵉⵛⵜ ⵏ ⵜⵙⴰⵄⵄⴻⵜ ⵏ ⵓⵙⴳⴻⵏⴼⵉ,

ⵉⵛⵜ ⵏ ⵜⵙⴰⵄⵄⴻⵜ ⵏ ⵡⴻⵀⴷⴰⵎ

ⴷ ⵉⵛⵜ ⵏ ⵜⵙⴰⵄⵄⴻⵜ ⵏ ⵍⴻⴱⵏⵉ,

4 ⵉⵛⵜ ⵏ ⵜⵙⴰⵄⵄⴻⵜ ⵏ ⵉⵎⴻⵟⵟⴰⵡⴻⵏ

ⴷ ⵉⵛⵜ ⵏ ⵜⵙⴰⵄⵄⴻⵜ ⵏ ⵜⴹⴻⵃⵃⴰⵛⵜ,

ⵉⵛⵜ ⵏ ⵜⵙⴰⵄⵄⴻⵜ ⵏ ⵡⴻⵛⴹⴰⵏ

ⴷ ⵉⵛⵜ ⵏ ⵜⵙⴰⵄⵄⴻⵜ ⵏ ⵛⵛⴹⵉⵃ,

5 ⵉⵛⵜ ⵏ ⵜⵙⴰⵄⵄⴻⵜ ⵏ ⵓⵃⴻⵊⵊⴰⵔ ⵏ ⵡⴻⵥⵔⵓ

ⴷ ⵉⵛⵜ ⵏ ⵜⵙⴰⵄⵄⴻⵜ ⵏ ⵡⴻⵊⵔⴰⵡ ⵏ ⵡⴻⵥⵔⵓ,

ⵉⵛⵜ ⵏ ⵜⵙⴰⵄⵄⴻⵜ ⵏ ⵓⴷⴰⵔⵔⴻⵄ

ⴷ ⵉⵛⵜ ⵏ ⵜⵙⴰⵄⵄⴻⵜ ⵏ ⵍⴰⴳⴳⵯⴰⵊ ⵅ ⵓⴷⴰⵔⵔⴻⵄ, ◘3:5 1 ⴽⵓⵔ. 7:5

6 ⵉⵛⵜ ⵏ ⵜⵙⴰⵄⵄⴻⵜ ⵏ ⵜⴰⵔⴻⵣⵣⵓⵜ

ⴷ ⵉⵛⵜ ⵏ ⵜⵙⴰⵄⵄⴻⵜ ⵏ ⵓⵡⴻⴷⴷⴰⵔ,

ⵉⵛⵜ ⵏ ⵜⵙⴰⵄⵄⴻⵜ ⵏ ⵓⵅⴻⵎⵎⴻⵔ

ⴷ ⵉⵛⵜ ⵏ ⵜⵙⴰⵄⵄⴻⵜ ⵏ ⵡⴻⵏⴹⴰⵔ,

7 ⵉⵛⵜ ⵏ ⵜⵙⴰⵄⵄⴻⵜ ⵏ ⵓⵛⴰⵔⵔⴻⴳ

ⴷ ⵉⵛⵜ ⵏ ⵜⵙⴰⵄⵄⴻⵜ ⵏ ⵓⵅⴻⵢⵢⴻⴹ,

ⵉⵛⵜ ⵏ ⵜⵙⴰⵄⵄⴻⵜ ⵏ ⵓⵙⴻⵖⴷⵉ

ⴷ ⵉⵛⵜ ⵏ ⵜⵙⴰⵄⵄⴻⵜ ⵏ ⵍⵀⴰⵔⴷ,

8 ⵉⵛⵜ ⵏ ⵜⵙⴰⵄⵄⴻⵜ ⵏ ⵜⴰⵢⵔⵉ

ⴷ ⵉⵛⵜ ⵏ ⵜⵙⴰⵄⵄⴻⵜ ⵏ ⵡⴻⵛⵔⴰⵀ,

ⵉⵛⵜ ⵏ ⵜⵙⴰⵄⵄⴻⵜ ⵏ ⴳⴰⵔⵔⴰ

ⴷ ⵉⵛⵜ ⵏ ⵜⵙⴰⵄⵄⴻⵜ ⵏ ⵍⴻⵀⵏⴰ.

9 ⵎⴰⵏ ⵜⵉⵣⵉ ⵖⴰⵔ ⵡⴻⵏⵏⵉ ⵉⵅⴻⴷⴷⵎⴻⵏ ⵅ ⵎⵉⵏ ⵅⴻⴼ ⵢⴰⵔⴻⴱⴱⴻⵔ? ◘3:9 ⴰⵎⴱ. 1:3 10 ⵏⴻⵛⵛ ⵥⵔⵉⵖ ⵛⵛⵖⴻⵍ ⵏⵏⵉ ⵉⵡⵛⴰ ⴰⵔⴻⴱⴱⵉ ⵉ ⵜⴰⵔⵡⴰ ⵏ ⴱⵏⴰⴷⴻⵎ ⵎⴰⵃⴻⵏⴷ ⴰⴷ ⵣⵣⴰⵢⴻⵙ ⵙⵙⵉⵃⵍⴻⵏ ⵉⵅⴻⴼ ⵏⵙⴻⵏ. 11 ⵏⴻⵜⵜⴰ ⵉⴳⴳⴰ ⵎⴰⵔⵔⴰ ⴷ ⴰⵚⴻⴱⵃⴰⵏ ⴷⵉ ⵍⵡⴻⵇⵜ ⵏⵏⴻⵙ. ⵉⴳⴳⴰ ⵓⵍⴰ ⴷ ⵍⵡⴻⵇⵜ ⵏ ⵍⴻⴱⴷⴰ ⴷⴻⴳ ⵡⵓⵍ ⵏⵙⴻⵏ, ⴱⵍⴰ ⵎⴰ ⵉⵣⴻⵎⵎⴰⵔ ⴱⵏⴰⴷⴻⵎ ⴰⴷ ⵉⵃⴰⴽⴰ ⴷⵉ ⵜⵎⴻⴳⴳⴰ ⵏⵏⵉ ⵉⴳⴳⴰ ⴰⵔⴻⴱⴱⵉ ⵣⴻⴳ ⵓⵎⴻⵣⵡⴰⵔⵓ ⴰⵍ ⴰⵏⴻⴳⴳⴰⵔⵓ. 12 ⵏⴻⵛⵛ ⵓⴼⵉⵖ ⵡⴰⵔ ⵖⴰⵔⵙⴻⵏ ⵉⴵⵉ ⵎⵉⵏ ⵉⵃⵍⴰⵏ ⵅ ⵎⵉⵏⵏⵉ ⴼⴰⵔⵔⵃⴻⵏ ⵉⵡⴷⴰⵏ ⵏⵉⵖ ⴰⴷ ⴰⵔⵔⴻⵏ ⵎⴻⵥⵔⵉ ⵎⴻⵍⵎⵉ ⵏⵉⵜⵏⵉ ⵄⴰⴷ ⴷⵉ ⵜⵓⴷⴰⵔⵜ ⵏⵙⴻⵏ, 13 ⵓ ⵄⴰⵡⴻⴷ ⴰⵇⴰ ⴽⵓⵍ ⴱⵏⴰⴷⴻⵎ ⴰⴷ ⵉⵛⵛ, ⴰⴷ ⵉⵙⵓ ⵓⵛⴰ ⴰⴷ ⵢⴰⵔⵔ ⵎⴻⵥⵔⵉ ⴷⵉ ⵎⵉⵏ ⵉⵚⴻⴱⵃⴻⵏ ⴷⵉ ⵎⴰⵔⵔⴰ ⴰⵎⴰⵔⵔⴻⵜ ⵏⵏⴻⵙ. ⴰⵢⴰ ⴷ ⵉⵛⵜ ⵏ ⵜⴰⵔⵣⴻⴼⵜ ⵏ ⴰⵔⴻⴱⴱⵉ.

14 ⵏⴻⵛⵛ ⵙⵙⵏⴻⵖ ⴰⵇⴰ ⵎⴰⵔⵔⴰ ⵎⵉⵏ ⵉⵜⵜⴻⴳⴳ ⴰⵔⴻⴱⴱⵉ, ⴰⴷ ⵢⵉⵍⵉ ⵉ ⵍⴻⴱⴷⴰ. ⵡⴰⵔ ⵉⵣⴻⵎⵎⴰⵔ ⴰⴷ ⵖⴰⵔⴻⵙ ⵉⵜⵜⵎⴰⵔⵏⵉ ⵡⴰⵍⵓ ⵓ ⵡⴰⵔ ⵣⵣⴰⵢⴻⵙ ⵉⵜⵜⵡⴰⵙⵙⴻⵏⵇⵉⵙ ⵡⴰⵍⵓ. ⴰⵔⴻⴱⴱⵉ ⵉⴳⴳⴰ ⵉ-ⵜ ⵎⴰⵃⴻⵏⴷ ⴰⴷ ⴳⴳⵯⴻⴷⴻⵏ ⵣⵣⴰⵜ ⵉ ⵡⵓⴷⴻⵎ ⵏⵏⴻⵙ. 15 ⵎⵉⵏ ⵉⴵⴰⵏ, ⵜⵓⵖⴰ ⵉⴵⴰ ⵇⴱⴻⵍ ⵓⵛⴰ ⵎⵉⵏ ⵉ ⵖⴰ ⵢⵉⵍⵉⵏ, ⵜⵓⵖⴰ ⵉⴵⴰ ⵇⴱⴻⵍ. ⴰⵔⴻⴱⴱⵉ ⵢⴰⵔⴻⵣⵣⵓ ⵅ ⵎⵉⵏ ⵉⵄⴷⵓⵏ ⵄⴰⴷ.

16 ⴰⵇⴰ ⵥⵔⵉⵖ ⵙⴰⴷⵓ ⵜⴼⵓⵛⵜ ⵄⴰⵡⴻⴷ ⴰⵎⵛⴰⵏ ⵏ ⵍⵃⴻⵇⵇ: ⴰⵇⴰ ⵉⵙⴻⵍⵍⴻⵟ ⴷⵉⵏ ⵍⵖⴻⵛⵛ, ⵓⵛⴰ ⵥⵔⵉⵖ ⵓⵍⴰ ⴷ ⴰⵎⵛⴰⵏ ⵏ ⵜⵙⴻⴳⴷⴰ: ⴰⵇⴰ ⵉⵙⴻⵍⵍⴻⵟ ⴷⵉⵏ ⵍⵖⴰⵔ. 17 ⵏⴻⵛⵛ ⵏⵏⵉⵖ ⴷⴻⴳ ⵡⵓⵍ ⵉⵏⵓ: “ⴰⵔⴻⴱⴱⵉ ⴰⴷ ⵉⵃⴽⴻⵎ ⴰⵎⵙⴻⴳⴳⴻⴷ ⴷ ⵓⵄⴻⴼⴼⴰⵏ, ⵎⴰⵖⴰⵔ ⴷⵉⵏⵏⵉ ⵉⵛⵜ ⵏ ⵜⵙⴰⵄⵄⴻⵜ ⵉ ⴽⵓⵍ ⴰⵏⵡⴰⵢ ⵓ ⵉ ⵇⴰⵄ ⵍⵅⴻⴷⵎⴻⵜ.” 18 ⵏⴻⵛⵛ ⵏⵏⵉⵖ ⴷⴻⴳ ⵡⵓⵍ ⵉⵏⵓ: “ⴰⵇⴰ ⴷⵉ ⵟⵟⵡⴻⵄ ⵏ ⵜⴰⵔⵡⴰ ⵏ ⴱⵏⴰⴷⴻⵎ, ⴰⵇⴰ ⴰⵔⴻⴱⴱⵉ ⴰⴷ ⵜⴻⵏ ⵉⵙⵙⵉⴼⴻⴼ ⵓ ⵏⵉⵜⵏⵉ ⴰⴷ ⵜⵡⴰⵍⴰⵏ ⴰⵇⴰ ⵏⵉⵜⵏⵉ ⴰⵎ ⵍⵎⴰⵍ, ⵏⵉⵜⵏⵉ ⵙ ⵢⵉⵅⴻⴼ ⵏⵙⴻⵏ.” 19 ⵎⴰⵖⴰⵔ ⵅ ⵜⵉⵔⴰ ⵏ ⵜⴰⵔⵡⴰ ⵏ ⴱⵏⴰⴷⴻⵎ ⵓ ⵅ ⵜⵉⵔⴰ ⵏ ⵍⵎⴰⵍ: ⵏⵉⵜⵏⵉ ⵖⴰⵔⵙⴻⵏ ⵜⵉⵔⴰ ⴷ ⵉⵛⵜ. ⴰⵎ ⵎⴰⵎⵎⴻⵛ ⵉⵎⵎⵓⵜ ⵡⴰ, ⵉⵎⵎⵓⵜ ⵓⵍⴰ ⴷ ⵡⴻⵏⵏⴻⵖⵏⵉ, ⵎⴰⵔⵔⴰ ⵉⴷⵙⴻⵏ ⵖⴰⵔⵙⴻⵏ ⴷ ⵜⵡⴰⵔⵔⵉⵜ ⵏ ⵏⵏⴻⴼⵙ ⴷ ⵉⵊⵊ. ⵡⴰⵔ ⴷⵉⵏ ⵉⴵⵉ ⵍⴻⴼⴹⴻⵍ ⵉ ⴱⵏⴰⴷⴻⵎ ⵅ ⵍⵎⴰⵍ, ⵎⴰⵖⴰⵔ ⵎⴰⵔⵔⴰ ⴰⵇⴰ-ⵜ ⴷⵉ ⵍⴱⴰⵟⴻⵍ. 20 ⵎⴰⵔⵔⴰ ⵉⴷⵙⴻⵏ ⴳⴳⵓⵔⴻⵏ ⵖⴰⵔ ⵉⵊⵊ ⵏ ⵡⴻⵎⵛⴰⵏ, ⵎⴰⵔⵔⴰ ⵏⵉⵜⵏⵉ ⵣⴻⴳ ⵓⵛⴰⵍ ⵓⵛⴰ ⴰⴷ ⴷⴷ-ⴷⴻⵡⵍⴻⵏ ⵖⴰⵔ ⵓⵛⴰⵍ. ◘3:20 ⴰⵎⵥ. 3:19 21 ⵡⵉ ⵉⵙⵙⵏⴻⵏ, ⵎⴰ ⴱⵓⵃⴱⴻⵍ ⵏ ⵜⴰⵔⵡⴰ ⵏ ⴱⵏⴰⴷⴻⵎ ⴰⴷ ⵉⴳⴻⵄⵄⴻⴷ ⵖⴰⵔ ⵙⴻⵏⵏⴻⵊ ⵓ ⴱⵓⵃⴱⴻⵍ ⵏ ⵍⵎⴰⵍ ⴰⴷ ⴷⴷ-ⵉⵀⵡⴰ ⵖⴰⵔ ⵜⴻⵎⵎⵓⵔⵜ? 22 ⴰⵎⵎⵓ ⵉ ⵜⵜⵡⴰⵍⵉⵖ, ⵡⴰⵔ ⵉⴵⵉ ⵎⵉⵏ ⵉⵃⵍⴰⵏ ⵅ ⵎⵉⵏⵏⵉ ⵉⴼⴰⵔⵔⴻⵃ ⴱⵏⴰⴷⴻⵎ ⴷⵉ ⵜⵎⴻⴳⴳⴰ ⵏⵏⴻⵙ, ⵎⴰⵖⴰⵔ ⵎⴰⵏ ⴰⵢⴰ ⴷ ⵜⴰⵙⵖⴰⵔⵜ ⵏⵏⴻⵙ, ⵎⵉⵏⵣⵉ ⵎⴰⵏ ⵡⴻⵏ ⵉⵣⴻⵎⵎⴰⵔⴻⵏ ⴰⴷ ⵜ ⵢⴰⵔⵔ ⴰⵍ ⵖⴰ ⵉⵥⴰⵔ ⵎⵉⵏ ⵖⴰ ⵢⵉⵍⵉⵏ ⴰⵡⴰⵔⵏⵉ ⴰⵙ?