1 ⵉⵏⵏⴰ ⴰⵢⵉ: “ⴰ ⵎⵎⵉⵙ ⵏ ⴱⵏⴰⴷⴻⵎ, ⴽⴽⴰⵔ ⵅ ⵉⴹⴰⵔⴻⵏ ⵏⵏⴻⵛ ⵓⵛⴰ ⵏⴻⵛⵛ ⴰⴷ ⴽⵉⴽ ⵙⵙⵉⵡⵍⴻⵖ.” 2 ⵍⴰⵎⵉ ⴰⴽⵉⴷⵉ ⵉⵙⵙⵉⵡⴻⵍ, ⵢⵓⴷⴻⴼ-ⴷⴷ ⴷⴰⵢⵉ ⴰⵔⵔⵓⵃ ⵓⵛⴰ ⵉⵙⵙⴻⴽⴽⴰⵔ-ⴷⴷ ⴰⵢⵉ ⵅ ⵉⴹⴰⵔⴻⵏ ⵉⵏⵓ ⵓ ⵏⴻⵛⵛ ⵙⵍⵉⵖ ⵉ ⵜⵎⵉⵊⵊⴰ ⵏ ⵡⴻⵏⵏⵉ ⴽⵉⴷⵉ ⵉⵙⵙⴰⵡⴰⵍⴻⵏ. ◘2:2 ⵃⵉⵥ. 3:24; ⴷⴰⵏ. 10:10 3 ⵏⴻⵜⵜⴰ ⵉⵏⵏⴰ ⴰⵢⵉ:

“ⴰ ⵎⵎⵉⵙ ⵏ ⴱⵏⴰⴷⴻⵎ, ⵏⴻⵛⵛ ⵙⴻⴽⴽⴻⵖ ⵛⴻⴽ ⵖⴰⵔ ⴰⵢⵜ ⵏ ⵉⵙⵔⴰⵉⵍ, ⵖⴰⵔ ⵍⴻⴳⵏⵓⵙ ⵉⵖⴻⵡⵡⵖⴻⵏ, ⵉⵏⵏⵉ ⵅⴰⴼⵉ ⵉⵖⴻⵡⵡⵖⴻⵏ. ⵏⵉⵜⵏⵉ ⴷ ⵍⴻⵊⴷⵓⴷ ⵏⵙⴻⵏ ⵄⴻⴷⴷⴰⵏ ⵅⴰⴼⵉ ⴰⵍ ⴰⵙⵙ-ⴰ. ◘2:3 ⵉⵔⵎ. 3:25 4 ⵏⵉⵜⵏⵉ ⴷ ⴰⵔⵔⴰⵡ ⵏ ⵡⵓⴷⴻⵎ ⵉⵇⴻⵙⵃⴻⵏ ⴷ ⵡⵓⵍ ⵉⵣⴻⵍⴳⴻⵏ. ⵏⴻⵛⵛ ⵙⴻⴽⴽⴻⵖ ⵛⴻⴽ ⵖⴰⵔⵙⴻⵏ, ⵉⵜⵜⵅⴻⵚⵚⴰ ⴰⵛ ⴰⴷ ⴰⵙⴻⵏ ⵜⵉⵏⵉⴷ: ‘ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵉⵏⵓ, ⵙⵉⴷⵉ!’ 5 ⵎⴰ ⴰⴷ ⴰⵛ ⵙⵍⴻⵏ ⵏⵉⵖ ⴰⴷ ⵙⴻⵎⵃⴻⵏ ⴷⵉ ⵎⴰⵏ ⴰⵢⴰ, ⵎⵉⵏⵣⵉ ⵏⵉⵜⵏⵉ ⴷ ⵉⵛⵜ ⵏ ⵜⴰⴷⴷⴰⵔⵜ ⵉⵖⴻⵡⵡⵖⴻⵏ, ⵏⵉⵜⵏⵉ ⴰⴷ ⵙⵙⵏⴻⵏ ⴱⴻⵍⵍⵉ ⵜⵓⵖⴰ ⴰⵏⴰⴱⵉ ⴷⵉ ⵍⵡⴻⵙⵟ ⵏⵙⴻⵏ. ◘2:5 ⵃⵉⵥ. 33:33 6 ⵓⵛⴰ ⵛⴻⴽ, ⴰ ⵎⵎⵉⵙ ⵏ ⴱⵏⴰⴷⴻⵎ, ⵡⴰⵔ ⵣⵣⴰⵢⵙⴻⵏ ⵜⵜⴻⴳⴳⵯⴻⴷ ⵓ ⵡⴰⵔ ⵜⵜⴻⴳⴳⵯⴻⴷ ⵓⵍⴰ ⵣⴻⴳ ⵡⴰⵡⴰⵍⴻⵏ ⵏⵙⴻⵏ. ⵡⴰⵅⵅⴰ ⴰⵇⴰ ⴷⵉⵏ ⵖⴰⵔⴻⴽ ⵜⵉⵣⴻⴳⴳⵯⵓⵔⴰ ⴷ ⵉⵙⴻⵏⵏⴰⵏⴻⵏ ⵓ ⵡⴰⵅⵅⴰ ⵣⴻⴷⴷⵖⴻⵏⵜ ⵖⴰⵔⴻⴽ ⵜⵖⴰⵔⴹⵎⵉⵡⵉⵏ, ⵡⴰⵔ ⵜⵜⴻⴳⴳⵯⴻⴷ ⵛⴰ ⵣⴻⴳ ⵡⴰⵡⴰⵍⴻⵏ ⵏⵙⴻⵏ ⵓ ⵡⴰⵔ ⵣⵣⴰⵢⵙⴻⵏ ⵜⵜⵏⴻⵅⵍⵉⵄ, ⵎⵉⵏⵣⵉ ⵏⵉⵜⵏⵉ ⴷ ⵉⵛⵜ ⵏ ⵜⴰⴷⴷⴰⵔⵜ ⵉⵖⴻⵡⵡⵖⴻⵏ. ◘2:6 ⵉⵔⵎ. 1:8, 17; ⵃⵉⵥ. 3:9; ⵍⴽ. 12:4; 1 ⴱⵟ. 3:1 7 ⴰⴷ ⴽⵉⴷⵙⴻⵏ ⵜⴻⵙⵙⵉⵡⵍⴻⴷ ⵙ ⵡⴰⵡⴰⵍⴻⵏ ⵉⵏⵓ, ⵎⴰ ⴰⴷ ⵙⵍⴻⵏ ⵏⵉⵖ ⴰⴷ ⵙⴻⵎⵃⴻⵏ ⴷⵉ ⵎⴰⵏ ⴰⵢⴰ, ⵎⵉⵏⵣⵉ ⵏⵉⵜⵏⵉ ⴰⵇⴰ ⵜⵜⵖⴻⵡⵡⵖⴻⵏ. 8 ⵎⴰⵛⴰ ⵛⴻⴽ, ⴰ ⵎⵎⵉⵙ ⵏ ⴱⵏⴰⴷⴻⵎ, ⵙⴻⵍ ⵎⵉⵏ ⴷ ⴰⵛ ⵖⴰ ⵉⵏⵉⵖ, ⵡⴰⵔ ⵜⵜⵖⴻⵡⵡⵉⵖ ⴰⵎ ⵜⴰⴷⴷⴰⵔⵜ ⵏⵏⵉ ⵉⵖⴻⵡⵡⵖⴻⵏ. ⴰⵔⵣⴻⵎ ⴰⵇⴻⵎⵎⵓⵎ ⵏⵏⴻⵛ ⵏⵉⵛⴰⵏ ⵓⵛⴰ ⴻⵛⵛ ⵎⵉⵏ ⴷ ⴰⵛ ⵖⴰ ⵡⵛⴻⵖ.” ◘2:8 ⴰⵙⴰ. 10:9

9 ⵓⵛⴰ ⵥⵔⵉⵖ, ⵅⵣⴰⵔ, ⵉⵊⵊ ⵏ ⵓⴼⵓⵙ ⵉⵙⵙⵡⵉⵥⵥⴻⴹ-ⴷⴷ ⵖⴰⵔⵉ, ⵓ ⵅⵣⴰⵔ, ⴷⴰⵢⴻⵙ ⵉⵊⵊ ⵏ ⵡⴻⴷⵍⵉⵙ ⵉⵜⵜⵡⴰⵏⵏⴹⴻⵏ. ◘2:9 ⴰⵙⴰ. 10:8-11 10 ⵏⴻⵜⵜⴰ ⵉⴱⴻⵣⵣⴻⵄ ⵉ-ⵜ ⵣⵣⴰⵜⵉ. ⵜⵓⵖⴰ ⵢⵓⵔⴰ ⵣⵉ ⵙⴻⵏⵏⴻⵊ ⴷ ⵡⴰⴷⴷⴰⵢ ⵓⵛⴰ ⵜⵜⵡⴰⵔⵉⵏ ⴷⴰⵢⴻⵙ ⵉⵣⵍⴰⵏ ⵏ ⵡⴻⵛⴹⴰⵏ ⴷ ⵓⵙⵇⵉⵏⵏⴻⴼ ⴷ ⵓⵡⴻⵃⵡⴻⵃ ⵏ ⵜⴰⵎⴰⵔⴰ.