6
ⴰⵡⴰⵍ ⴹⵉⴷⴷ ⵉ ⵉⴷⵓⵔⴰⵔ ⵏ ⵉⵙⵔⴰⵉⵍ
1 ⵢⵓⵙⴰ-ⴷⴷ ⵖⴰⵔⵉ ⵡⴰⵡⴰⵍ ⵏ ⵙⵉⴷⵉ, ⵉⵏⵏⴰ: 2 “ⴰ ⵎⵎⵉⵙ ⵏ ⴱⵏⴰⴷⴻⵎ, ⴰⵔⵔ ⵓⴷⴻⵎ ⵏⵏⴻⵛ ⵖⴰⵔ ⵉⴷⵓⵔⴰⵔ ⵏ ⵉⵙⵔⴰⵉⵍ ⵓⵛⴰ ⵏⴰⴱⴱ ⵅⴰⵙⴻⵏ ◘6:2 ⵃⵉⵥ. 36:1 3 ⵓⵛⴰ ⵉⵏⵉ: ‘ⴰ ⵉⴷⵓⵔⴰⵔ ⵏ ⵉⵙⵔⴰⵉⵍ, ⵙⵍⴻⵎ ⵉ ⵡⴰⵡⴰⵍ ⵏ ⵙⵉⴷⵉ ⵉⵏⵓ, ⵙⵉⴷⵉ! ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵉⵏⵓ, ⵙⵉⴷⵉ, ⵉ ⵉⴷⵓⵔⴰⵔ ⵓ ⵉ ⵜⴻⵡⵔⵉⵔⵉⵏ, ⵉ ⵜⵖⴻⵣⵔⴰⵜⵉⵏ ⵓ ⵉ ⵜⴻⵖⵣⵓⵔⵜⵉⵏ: ⵅⵣⴰⵔ, ⵏⴻⵛⵛ ⴰⴷ ⵅⴰⵡⴻⵎ ⵙⵙⴻⴽⴽⴻⵖ ⵙⵙⵉⴼ ⵓⵛⴰ ⵍⴻⴳⵄⵓⴷⵉ ⵏⵡⴻⵎ ⵎⴰⵏⵉ ⵜᵉⵜⵜⵡⴻⵀⵀⴰⴱⴻⵎ ⴷⴷⴱⴰⵢⴻⵃ ⵏⵡⴻⵎ ⴰⴷ ⵜⴻⵏⵜ ⴰⵔⴻⴷⴷⴵⴻⵖ. 4 ⴰⴷ ⵜⵜⵡⴰⵔⴻⴷⴵⴻⵏ ⵉⵄⴰⵍⵟⴰⵔⴻⵏ ⵏⵡⴻⵎ ⵓ ⵉⴱⵉⵍⴰⵔⴻⵏ ⵏ ⴰⵔⴻⴱⴱⵉ ⵏ ⵜⴼⵓⵛⵜ ⵏⵡⴻⵎ ⴰⴷ ⵜⵜⵡⴰⵔⵥⴻⵏ ⵓ ⵏⴻⵛⵛ ⴰⴷ ⵏⴹⴰⵔⴻⵖ ⵉⵏⵏⵉ ⵉⵜⵜⵡⴰⵙⵙⵏⵓⵇⴱⴻⵏ ⵣⵣⴰⵜ ⵉ ⵡⵓⴷⴻⵎ ⵏ ⵉⵎⴻⵢⴹⴰ ⵏ ⵍ’ⴰⵚⵏⴰⵎ ⵏⵡⴻⵎ. 5 ⴰⴷ ⴳⴳⴻⵖ ⵍⵅⴻⵛⴱⴰⵜ ⵏ ⴰⵢⵜ ⵏ ⵉⵙⵔⴰⵉⵍ ⵣⵣⴰⵜ ⵉ ⵉⵎⴻⵢⴹⴰ ⵏ ⵍ’ⴰⵚⵏⴰⵎ ⵏⵙⴻⵏ ⵓⵛⴰ ⴰⴷ ⵣⵓⵣⵣⴰⵔⴻⵖ ⵉⵖⵙⴰⵏ ⵏⵡⴻⵎ ⵖⴰⵔ ⵎⵉⵏ ⴷⴷ-ⵉⵏⵏⴹⴻⵏ ⵉ ⵉⵄⴰⵍⵟⴰⵔⴻⵏ ⵏⵡⴻⵎ. 6 ⴷⵉ ⵎⴰⵔⵔⴰ ⵉⵎⵓⵛⴰⵏ ⵎⴰⵏⵉ ⵜⵣⴻⴷⴷⵖⴻⵎ ⴰⴷ ⵜⵜⵡⴰⵔⴻⴷⴷⴵⴻⵏⵜ ⵜⵏⴻⴷⴷⴰⵎ ⵓⵛⴰ ⵍⴻⴳⵄⵓⴷⵉ ⴰⴷ ⵜⴻⵏⵜ ⵊⵊⴻⵏ, ⴰⵍⴰⵎⵉ ⵉⵄⴰⵍⵟⴰⵔⴻⵏ ⵏⵡⴻⵎ ⴰⴷ ⵉⵍⵉⵏ ⴷ ⵍⵅⴰⵔⴱⴻⵜ ⴷ ⵜⵜⵡⴰⵊⵊⴻⵏ, ⵓⵛⴰ ⵉⵎⴻⵢⴹⴰ ⵏ ⵍ’ⴰⵚⵏⴰⵎ ⵏⵡⴻⵎ ⴰⴷ ⵜⵜⵡⴰⵔⵥⴻⵏ ⵓ ⵉⴱⵉⵍⴰⵔⴻⵏ ⵏⵡⴻⵎ ⵏ ⴰⵔⴻⴱⴱⵉ ⵏ ⵜⴼⵓⵛⵜ ⴰⴷ ⵜⵜⵡⴰⵇⴻⵙⵙⴻⵏ ⵓ ⵜⵉⵎⴻⴳⴳⴰ ⵏⵡⴻⵎ ⴰⴷ ⵜⵜⵡⴰⵎⵃⴰⵏⵜ. 7 ⵉⵏⵏⵉ ⵉⵜⵜⵡⴰⵏⵖⴻⵏ ⴰⴷ ⴷⵉⵏ ⵉⵍⵉⵏ ⴷⵉ ⵍⵡⴻⵙⵟ ⵏⵡⴻⵎ, ⵓⵛⴰ ⴰⵎⵎⵓ ⵉ ⵖⴰ ⵜⴻⵙⵙⵏⴻⵎ ⴰⵇⴰ ⵏⴻⵛⵛ ⴷ ⵙⵉⴷⵉ.’ ”
8 “ⴰⴷ ⴳⴳⴻⵖ ⴰⵇⴰ ⵉⵏⵏⵉ ⵉⵜⵜⵡⴰⵙⵙⵏⴻⵊⵎⴻⵏ ⵣⵉ ⵙⵙⵉⴼ ⵊⴰⵔ ⵍⴻⴳⵏⵓⵙ ⴰⴷ ⵇⵇⵉⵎⴻⵏ ⴷⴷⴰⵔⴻⵏ ⵓⵎⵉ ⴽⴻⵏⵏⵉⵡ ⵖⴰ ⵣⵓⵣⵣⴰⵔⴻⵖ ⵅ ⵜⴻⵎⵎⵓⵔⴰ. 9 ⵉⵏⵏⵉ ⵉⵜⵜⵡⴰⵏⴻⵊⵎⴻⵏ ⴰⴷ ⵅⴰⴼⵉ ⵄⴻⵇⵍⴻⵏ ⵊⴰⵔ ⵔⴻⴳⵏⵓⵙ ⵎⴰⵏⵉ ⵜⵜⵡⴰⵏⴻⴷⴷⵀⴻⵏ ⴷ ⵉⵎⴻⵃⴱⴰⵙ, ⵎⵉⵏⵣⵉ ⵏⴻⵛⵛ ⴰⵔⵥⵉⵖ ⵓⵍ ⵏⵙⴻⵏ ⵏⵏⵉ ⵅⴰⴼⵉ ⵉⵜⵜⴰⴳⴳⵯⴻⵊⴻⵏ, ⵉⵛⵛⵓⵔⴻⵏ ⵙ ⴼⴰⵔⵇ-ⵛⵛⵖⴻⵍ ⵓⵛⴰ ⵓⵍⴰ ⴷ ⵜⵉⵟⵟⴰⵡⵉⵏ ⵏⵙⴻⵏ ⵏⵏⵉ ⵉⴹⴼⴰⵔⴻⵏ ⴰⵡⴰⵔⵏⵉ ⵉ ⵉⵎⴻⵢⴹⴰ ⵏ ⵍ’ⴰⵚⵏⴰⵎ ⵏⵙⴻⵏ ⵛⵛⵓⵔⴻⵏⵜ ⵙ ⴼⴰⵔⵇ-ⵛⵛⵖⴻⵍ. ⵏⵉⵜⵏⵉ ⴰⴷ ⵄⵉⴼⴼⴻⵏ ⵉⵅⴻⴼ ⵏⵙⴻⵏ ⵣⵉ ⵙⵙⵉⴱⴱⴻⵜ ⵏ ⵜⵎⴻⴳⴳⴰ ⵉⵄⴻⴼⴼⵏⴻⵏ ⵏⵏⵉ ⴳⴳⵉⵏ ⵙ ⵎⴰⵔⵔⴰ ⵊⵊⴰⵄⴰⵢⴻⴼ ⵏⵙⴻⵏ. 10 ⵏⵉⵜⵏⵉ ⴰⴷ ⵙⵙⵏⴻⵏ ⴱⴻⵍⵍⵉ ⵏⴻⵛⵛ ⴷ ⵙⵉⴷⵉ. ⵏⴻⵛⵛ ⵡⴰⵔ ⵏⵏⵉⵖ ⴰⵎⴻⵏⵏⵉ ⵡⴰⵀⴰ ⴰⵇⴰ ⵏⴻⵛⵛ ⴰⴷ ⴷⴰⵢⵙⴻⵏ ⴳⴳⴻⵖ ⵍⵖⴰⵔ-ⴰ.”
11 “ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵉⵏⵓ, ⵙⵉⴷⵉ: ⵡⵡⴻⵜ ⵙ ⵓⴼⵓⵙ ⵏⵏⴻⵛ ⵓⵛⴰ ⴷⴰⵔⵔⴻⵛ ⵙ ⵓⴹⴰⵔ ⵏⵏⴻⵛ ⵓⵛⴰ ⵉⵏⵉ: ‘ⴰⵢ!’ ⵅ ⵎⴰⵔⵔⴰ ⵏⵏⵄⴰⵡⴰⵜ ⵜⵉⵄⴻⴼⴼⴰⵏⵉⵏ ⵏ ⵜⴰⴷⴷⴰⵔⵜ ⵏ ⵉⵙⵔⴰⵉⵍ, ⵎⴰⵖⴰⵔ ⵏⵉⵜⵏⵉ ⴰⴷ ⵡⴹⴰⵏ ⵙ ⵙⵙⵉⴼ, ⵙ ⵍⴰⵥ ⵓ ⵙ ⵟⵟⴰⵄⵓⵏ! ◘6:11 ⵃⵉⵥ. 21:22 12 ⵡⵉ ⵉⴵⴰⵏ ⵢⵉⴳⴳⵯⴻⵊ ⴰⴷ ⵉⵎⵎⴻⵜ ⵙ ⵟⵟⴰⵄⵓⵏ ⵓ ⵡⵉ ⵉⴵⴰⵏ ⵢⵓⴷⴻⵙ ⴰⴷ ⵉⵡⴹⴰ ⵙ ⵙⵙⵉⴼ ⵓ ⵡⵉ ⵉⵇⵇⵉⵎⴻⵏ ⵓ ⴰⵇⴰ ⵉⵜⵜⵡⴰⵃⵚⴰⵔ ⴰⴷ ⵉⵎⵎⴻⵜ ⵙ ⵍⴰⵥ, ⴰⵎⵎⵓ ⴰⴷ ⴷⴰⵢⵙⴻⵏ ⴽⴻⵎⵎⵍⴻⵖ ⴰⵙⵄⴰⵔ ⵉⵏⵓ. 13 ⵉⵜⵜⵅⴻⵚⵚⴰ ⴰⴷ ⵜⴻⵙⵙⵏⴻⵎ ⴱⴻⵍⵍⵉ ⵏⴻⵛⵛ ⴷ ⵙⵉⴷⵉ, ⵅⵎⵉ ⵉⵏⵏⵉ ⵣⵣⴰⵢⵙⴻⵏ ⵉⵜⵜⵡⴰⵏⵖⴻⵏ ⴰⴷ ⴷⵉⵏ ⵉⵍⵉⵏ ⵊⴰⵔ ⵉⵎⴻⵢⴹⴰ ⵏ ⵍ’ⴰⵚⵏⴰⵎ ⵏⵙⴻⵏ ⴷⴻⴳ ⵡⴻⵏⵏⴻⴹ ⵏ ⵉⵄⴰⵍⵟⴰⵔⴻⵏ ⵏⵙⴻⵏ ⵅ ⴽⵓⵍ ⵜⴰⵡⵔⵉⵔⵜ ⵜⵓⵄⵍⴰ, ⵅ ⵎⴰⵔⵔⴰ ⵜⵉⵇⵇⵉⵛⴰⵜⵉⵏ ⵏ ⵉⴷⵓⵔⴰⵔ, ⵙⴰⴷⵓ ⴽⵓⵍ ⵜⴰⵛⴻⵊⵊⴰⵔⵜ ⵜⴰⵣⵉⵣⴰⵡⵜ ⵓ ⵙⴰⴷⵓ ⴽⵓⵍ ⵜⴰⵛⴻⵊⵊⴰⵔⵜ ⵏ ⵢⵉⴳⴳ ⵙ ⵡⴰⵟⵟⴰⵙ ⵏ ⵜⴻⴼⵔⴰⵢ, ⴷⴻⴳ ⵡⴻⵎⵛⴰⵏ ⵎⴰⵏⵉ ⵏⵏⵓⵎⴻⵏ ⵙⵙⴻⵡⵊⴰⴷⴻⵏ ⵉⵛⵜ ⵏ ⵍⴻⴼⵡⴰⵃⴻⵜ ⵉⵜⵜⴼⵓⵃⴻⵏ ⵉ ⵎⴰⵔⵔⴰ ⵉⵎⴻⵢⴹⴰ ⵏ ⵍ’ⴰⵚⵏⴰⵎ ⵏⵙⴻⵏ. ◼6:13 ⵜⴰⵛⴻⵊⵊⴰⵔⵜ-ⵏⵉⵖ ‘ⴰⴷⴷⴰⴳ’ (‘ⵉⴷⴷⴰⴳⴻⵏ’). 14 ⴰⴷ ⵙⵙⵡⵉⵥⵥⴹⴻⵖ ⴰⴼⵓⵙ ⵉⵏⵓ ⴹⵉⴷⴷ ⵏⵙⴻⵏ ⵓⵛⴰ ⴰⴷ ⴳⴳⴻⵖ ⵜⴰⵎⵎⵓⵔⵜ ⴷ ⵉⵛⵜ ⵏ ⵜⴻⵎⵎⵓⵔⵜ ⵉⵜⵜⵡⴰⵔⴻⴷⴷⴵⴻⵏ, ⵉⵛⵜ ⵏ ⵜⴻⵎⵎⵓⵔⵜ ⵉⵜⵜⵡⴰⵔⴻⴷⴷⴵⴻⵏ ⵎⴰⵀⵓ ⵍⴻⵅⵍⴰ ⵏ ⴷⴰⴱⵍⴰ, ⴷⵉ ⵎⴰⵔⵔⴰ ⵉⵎⵓⵛⴰⵏ ⵎⴰⵏⵉ ⵣⴻⴷⴷⵖⴻⵏ. ⵓⵛⴰ ⵏⵉⵜⵏⵉ ⴰⴷ ⵙⵙⵏⴻⵏ ⴱⴻⵍⵍⵉ ⵏⴻⵛⵛ ⴷ ⵙⵉⴷⵉ.”