1 “ⵛⴻⴽ ⵅⴻⵏⵏⵉ, ⵙⴳⴻⵄⵄⴻⴷ ⵉⵊⵊ ⵏ ⵢⴻⵥⵔⵉ ⵏ ⵡⴻⵛⴹⴰⵏ

ⵅ ⵍⵃⵓⴽⴽⴰⵎ ⵏ ⵉⵙⵔⴰⵉⵍ 2 ⵓⵛⴰ ⵉⵏⵉ:

‘ⵎⴰⵎⵎⴻⵛ ⵜⵓⵖⴰ ⵜⴻⵣⵣⴻⵍ ⵢⴻⵎⵎⴰⵜⵡⴻⵎ

ⴰⵎ ⵜⴻⵢⵔⴰⴷⵜ ⵜⴻⵣⵣⴻⵍ ⵊⴰⵔ ⵜⴻⵢⵔⴰⴷⵉⵏ!

ⵜⴻⵙⵙⵢⴻⵎ ⵉⵎⴻⵥⵢⴰⵏⴻⵏ ⵏⵏⴻⵙ

ⵊⴰⵔ ⵡⴰⵢⵔⴰⴷⴻⵏ ⵉⵎⴻⵥⵢⴰⵏⴻⵏ!

3 ⵏⴻⵜⵜⴰⵜ ⵜⴻⵙⵢⴻⵎ ⵉⵊⵊ ⵣⴻⴳ ⵉⵎⴻⵥⵢⴰⵏⴻⵏ ⵏⵏⴻⵙ.

ⵡⴰⵏⵉⵜⴰ ⵉⴷⵡⴻⵍ ⴷ ⴰⵢⵔⴰⴷ ⴰⵎⴻⵥⵢⴰⵏ,

ⵉⵍⵎⴻⴷ ⴰⴷ ⵉⵛⴰⵔⵔⴻⴳ ⵜⴰⵢⵎⴰⵔⵜ ⵏⵏⴻⵙ,

ⵄⴰⴷ ⵉⵡⴷⴰⵏ ⵉⵛⵛⴰ ⵉ-ⵜⴻⵏ.

4 ⵍⴰⵎⵉ ⵙⵍⵉⵏ ⵍⴻⴳⵏⵓⵙ ⵎⴰⵏ ⴰⵢⴰ,

ⵃⴻⴱⴱⵙⴻⵏ ⵜ ⴷⴻⴳ ⵡⴻⵃⴼⵓⵔ ⵏ ⵜⵓⵔⵚⵓⴹⵉ ⵏⵙⴻⵏ,

ⵓⵛⴰ ⵉⵡⵢⴻⵏ ⵜ ⵙ ⵜⵙⴻⵏⵏⴰⵔⵉⵏ ⴷⴻⴳ ⵡⴻⵏⵣⴰⵔ ⵏⵏⴻⵙ

ⵖⴰⵔ ⵜⴻⵎⵎⵓⵔⵜ ⵏ ⵎⵉⵚⵔⴰ.’ ◘19:4 2 ⵉⵊ. 23:33; ⵉⵔⵎ. 22:11

5 ‘ⵓⵎⵉ ⵜⴻⵥⵔⴰ ⴰⵇⴰ ⵍⴰⵢⴰⵙ ⵏⵏⴻⵙ ⵉⵔⵓⵃ, ⵉⴱⴹⴻⵍ,

ⵅⴻⵏⵏⵉ ⵜⴻⴽⵙⵉ ⵉⵊⵊⴻⵏ ⵣⴻⴳ ⵉⵎⴻⵥⵢⴰⵏⴻⵏ ⵏⵏⴻⵙ,

ⵓⵛⴰ ⵉⴳⴳⴰ ⵉ-ⵜ ⴷ ⴰⵢⵔⴰⴷ ⴰⵎⴻⵥⵢⴰⵏ.

6 ⵡⴰⵏⵉⵜⴰ ⵜⵓⵖⴰ ⵉⴳⴳⵓⵔ ⵊⴰⵔ ⵡⴰⵢⵔⴰⴷⴻⵏ,

ⵓⵛⴰ ⵉⴷⵡⴻⵍ ⴷ ⴰⵢⵔⴰⴷ ⴷ ⴰⵎⴻⵥⵢⴰⵏ,

ⵉⵍⵎⴻⴷ ⴰⴷ ⵉⵛⴰⵔⵔⴻⴳ ⵜⴰⵢⵎⴰⵔⵜ ⵏⵏⴻⵙ,

ⵄⴰⴷ ⵉⵡⴷⴰⵏ ⵉⵛⵛⴰ ⵉ-ⵜⴻⵏ.

7 ⵏⴻⵜⵜⴰ ⵉⵖⵚⴻⴱ ⵜⵉⵊⵊⴰⵍ ⵏⵙⴻⵏ,

ⵢⴰⵔⴻⴷⴷⴻⴵ ⵜⵉⵏⴻⴷⴷⴰⵎ ⵏⵙⴻⵏ,

ⴰⵍⴰⵎⵉ ⵜⵙⵓⵙⴻⵎ ⵜⴻⵎⵎⵓⵔⵜ ⴷ ⵎⴰⵔⵔⴰ ⵎⵉⵏ ⴷⴰⵢⴻⵙ

ⵣⵉ ⵙⵙⵉⴱⴱⴻⵜ ⵏ ⵍⵃⴻⵙⵙ ⵏ ⵓⵣⴻⵀⵀⴰⵔ ⵏⵏⴻⵙ.

8 ⵅⴻⵏⵏⵉ ⵙⵙⴱⴻⴷⴷⴻⵏ ⵅⴰⵙ ⵍⴻⴳⵏⵓⵙ

ⵣⵉ ⵜⴻⵎⵎⵓⵔⴰ ⵉ ⴷ ⴰⵙ ⴷⴷ-ⵉⵏⵏⴹⴻⵏ

ⵓⵛⴰ ⴱⴻⵣⵣⵄⴻⵏ ⵅⴰⵙ ⵜⵔⴰⵛⵛⴰ ⵏⵙⴻⵏ,

ⵟⵟⴼⴻⵏ ⵜ ⴷⴻⴳ ⵡⴻⵃⴼⵓⵔ ⵏⵙⴻⵏ ⵏ ⵜⵓⵔⵚⵓⴹⵉ.

9 ⵏⵉⵜⵏⵉ ⴱⴻⵍⵍⵄⴻⵏ ⵅⴰⵙ ⴷⴻⴳ ⵉⵊⵊ ⵏ ⵍⴻⵇⴼⴻⵣ

ⵙ ⵜⵙⴻⵏⵏⴰⵔⵉⵏ ⴷⴻⴳ ⵡⴻⵏⵣⴰⵔⴻⵏ ⵏⵏⴻⵙ,

ⵃⵉⵎⴰ ⴰⴷ ⵜ ⴰⵡⵢⴻⵏ ⵖⴰⵔ ⵓⵊⴻⴵⵉⴷ ⵏ ⴱⴰⴱⵉⵍ.

ⵏⵉⵜⵏⵉ ⵉⵡⵢⴻⵏ ⵜ ⴷⵉ ⵍⵇⴻⵍⵄⴰⵜ,

ⴰⵍⴰⵎⵉ ⵡⴰⵔ ⵉⵜⵜⵡⴰⵙⴻⵍ ⵄⴰⴷ ⵜⵎⵉⵊⵊⴰ ⵏⵏⴻⵙ

ⵅ ⵉⴷⵓⵔⴰⵔ ⵏ ⵉⵙⵔⴰⵉⵍ.’ ◘19:9 2 ⵉⵎ. 36:6

10 ’ⵜⵓⵖⴰ ⵢⴻⵎⵎⴰⵛ ⴰⵎ ⵜⵣⴰⵢⴰⵔⵜ

ⴷⵉ ⵍⵡⴻⵇⵜ ⵏ ⴰⵔⵔⴰⵃⴻⵜ ⵏⵏⴻⵛ,

ⵜᵉⵜⵜⵡⴰⵥⵥⵓ ⵖⴰⵔ ⵡⴰⵎⴰⵏ ⴰⵟⵟⴰⵙ.

ⵜⵓⵖⴰ ⵙ ⵍⵖⵉⴵⴻⵜ ⵓ ⵙ ⵡⴰⵟⵟⴰⵙ ⵏ ⵜⵙⴻⴹⵡⵉⵏ,

ⵣⵉ ⵙⵙⵉⴱⴱⴻⵜ ⵏ ⵡⴰⵟⵟⴰⵙ ⵏ ⵡⴰⵎⴰⵏ.

11 ⵜⵓⵖⴰ ⵖⴰⵔⴻⵙ ⵜⵉⵙⴻⴹⵡⵉⵏ ⵉⵊⴻⵀⴷⴻⵏ

ⴰⵎ ⵉⵣⴻⴵⴰⴹ ⵏ ⵍⵃⵓⴽⴽⴰⵎ.

ⵜⵔⵓⵏⴽⵓ ⵏ ⵢⵉⵊⵊⴻⵏ ⵣⵣⴰⵢⴻⵙ

ⵉⴳⴻⵄⵄⴻⴷ ⵊⴰⵔ ⵉⵙⴻⵢⵏⵓⵜⴻⵏ,

ⵓⵛⴰ ⵙ ⵍⵓⵄⵍⴰ ⵏⵏⴻⵙ ⵉⵜⵜⵡⴰⵥⴰⵔ ⵏⵉⵛⴰⵏ,

ⵙ ⵡⴰⵟⵟⴰⵙ ⵏ ⵍⴻⴼⵔⵓⵄ ⵏⵏⴻⵙ.

12 ⵎⴰⵛⴰ ⵜⴰⵣⴰⵢⴰⵔⵜ ⵜᵉⵜⵜⵡⴰⵇⵍⴻⵄ

ⵙ ⵉⵊⵊ ⵏ ⵓⴷⵓⵇⵇⴻⵣ ⵏ ⵡⴻⵙⵄⴰⵔ,

ⵜⴻⵎⵎⴻⵏⴹⴰⵔ ⵖⴰⵔ ⵜⴻⵎⵎⵓⵔⵜ,

ⵓⵛⴰ ⴰⵙⴻⵎⵎⵉⴹ ⵣⵉ ⵛⵛⴰⵔⵇ ⵢⵓⵥⴻⵖ ⵍⵖⵉⴵⴻⵜ ⵏⵏⴻⵙ.

ⴰⵔⵥⴻⵏ ⵓⵛⴰ ⵓⵥⵖⴻⵏ ⵍⴻⴼⵔⵓⵄ ⵏⵏⴻⵙ ⵉⵊⴻⵀⴷⴻⵏ,

ⵜⵉⵎⴻⵙⵙⵉ ⵜⴻⵛⵛⴰ ⵉ-ⵜⴻⵏ.

13 ⵍⴻⵅⵅⵓ ⵥⵥⵓⵏ ⵜ ⴷⵉ  ⵍⴻⵅⵍⴰ,

ⴷⴻⴳ ⵉⵛⵜ ⵏ ⵜⴻⵎⵎⵓⵔⵜ ⵢⵓⵥⵖⴻⵏ ⴷ ⵉⴼⴼⵓⴷⴻⵏ.

14 ⵜⴻⴼⴼⴻⵖ-ⴷⴷ ⵜⵎⴻⵙⵙⵉ ⵣⴻⴳ ⵉⵛⵜ ⵏ ⵜⵙⴻⵟⵟⴰ

ⵣⵉ ⵊⴰⵔ ⵜⵣⴻⵔⵎⵉⵏ ⵏⵏⴻⵙ,

ⵜⴻⵛⵛⴰ ⵍⵖⵉⴵⴻⵜ ⵏⵏⴻⵙ,

ⴰⵍⴰⵎⵉ ⵡⴰⵔ ⵖⴰⵔⴻⵙ ⵜⴻⵇⵇⵉⵎ ⵄⴰⴷ ⵜⵙⴻⵟⵟⴰ ⵉⵊⴻⵀⴷⴻⵏ

ⵓⵍⴰ ⴷ ⴰⵣⴻⴵⴰⴹ ⵎⴰⵃⴻⵏⴷ ⴰⴷ ⵉⵃⴽⴻⵎ.’ ”

ⵡⴰ ⴷ ⵉⵊⵊ ⵏ ⵢⴻⵥⵔⵉ ⵏ ⵡⴻⵛⴹⴰⵏ ⵓⵛⴰ ⴰⴷ ⵉⴷⵡⴻⵍ ⴷ ⵉⵊⵊ ⵏ ⵢⴻⵥⵔⵉ ⵏ ⵡⴻⵛⴹⴰⵏ ⵙ ⵜⵉⴷⴻⵜⵜ.