1 ⴷⴻⴳ ⵓⵙⴻⴳⴳⵯⴰⵙ ⵡⵉⵙⵙ ⵃⵉⵟⴰⵛ, ⴷⴻⴳ ⵓⵢⵓⵔ ⵡⵉⵙⵙ ⵜⵍⴰⵜⴰ, ⴷⴻⴳ ⵡⴰⵙⵙ ⴰⵎⴻⵣⵡⴰⵔⵓ ⵏ ⵓⵢⵓⵔ ⵉⵎⵙⴰⵔ ⴱⴻⵍⵍⵉ ⵢⵓⵙⴰ-ⴷⴷ ⵖⴰⵔⵉ ⵡⴰⵡⴰⵍ ⵏ ⵙⵉⴷⵉ, ⵉⵏⵏⴰ: 2 “ⴰ ⵎⵎⵉⵙ ⵏ ⴱⵏⴰⴷⴻⵎ, ⵉⵏⵉ ⵉ ⴼⵉⵔⵄⵓⵏ, ⴰⵊⴻⴵⵉⴷ ⵏ ⵎⵉⵚⵔⴰ, ⵓ ⵉ ⵎⴰⵔⵔⴰ ⵍⵖⴰⵛⵉ ⵏⵏⴻⵙ ⵉⵏⵀⴻⵡⵍⴻⵏ:

‘ⵡⵉ ⴰⴽⵉⴷⴻⴽ ⵉⵎⵇⵓⴷⴷⴰⵏ

ⵙ ⵎⴰⵔⵔⴰ ⵍⴻⵎⵖⴰⵔⴻⵜ ⵏⵏⴻⵛ?

3 ⵅⵣⴰⵔ, ⵜⵓⵖⴰ ⴰⵛⵛⵓⵔ ⴷ ⵜⴰⵛⴻⵊⵊⴰⵔⵜ ⵏ ⵜⴻⵏⴳⴻⵍⵜ

ⵅ ⵉⴷⵓⵔⴰⵔ ⵏ ⵍⵓⴱⵏⴰⵏ

ⴰⴽ-ⴷ ⵜⵙⴻⴹⵡⵉⵏ ⵉⵛⵏⴰⵏ ⴷ ⵜⵉⴼⵔⴰⵢ ⵉ ⵉⵜⵜⵉⵛⴻⵏ ⵜⵉⵍⵉ ⵎⵍⵉⵃ

ⵓ ⴰⴽ-ⴷ ⵜⵉⴷⴷⵉ ⴷ ⴰⵣⵉⵔⴰⵔ ⵢⵓⵄⵍⴰⵏ,

ⴰⵍⴰⵎⵉ ⵜⵓⵛⵛⴻⵏⵜ ⵏⵏⴻⵙ

ⵜⵉⵡⴻⴹ-ⴷⴷ ⴰⵍ ⵉⵙⴻⵢⵏⵓⵜⴻⵏ. ◘31:3 ⴷⴰⵏ. 4:7

4 ⴰⵎⴰⵏ ⴰⵔⵔⵉⵏ ⵜⵜ ⴰⴷ ⵉⵢⵎⴰ,

ⴰⵎⴰⵏ ⵉⵀⴻⵡⵍⴻⵏ ⵙⵙⴳⴻⵄⵄⴷⴻⵏ ⵜⵜ ⴰⵟⵟⴰⵙ.

ⵉⵖⴻⵣⵔⴰⵏ ⵏ ⵡⴰⵎⴰⵏ ⵏⵏⴻⵙ ⵙⵙⵉⵣⵣⵍⴻⵏ

ⴷⴻⴳ ⵡⴻⵏⵏⴻⴹ ⵏ ⵜⴻⴱⵀⵉⵔⵜ ⵏⵏⴻⵙ

ⵓⵛⴰ ⴰⵎⴰⵏ ⵉⵀⴻⵡⵍⴻⵏ ⴰⵔⵔⵉⵏ

ⵉⵖⴻⵣⵔⴰⵏ ⵏⵏⴻⵙ ⴰⴷ ⵔⴰⵃⴻⵏ

ⵖⴰⵔ ⵎⴰⵔⵔⴰ ⵜⵉⵛⴻⵊⵊⵓⵔⴰ ⵏ ⵢⴻⵢⵢⴰⵔ.

5 ⵅ ⵓⵢⴰ ⵉⵜⵜⵡⴰⵙⵙⵓⵄⵍⴰ ⵜⵉⴷⴷⵉ ⵏⵏⴻⵙ

ⵅ ⵎⴰⵔⵔⴰ ⵜⵉⵛⴻⵊⵊⵓⵔⴰ ⵏ ⵢⴻⵢⵢⴰⵔ,

ⵓ ⵜⵉⵙⴻⴹⵡⵉⵏ ⵏⵏⴻⵙ ⴷⴻⵡⵍⴻⵏⵜ ⵙ ⵡⴰⵟⵟⴰⵙ

ⵓ ⵉⴼⴻⵜⵡⴰⵏ ⵏⵏⴻⵙ ⵣⵣⵓⴳⴳⴰⵔⵜⴻⵏ

ⵙ ⵡⴰⵎⴰⵏ ⵉⴼⴻⵢⵢⴹⴻⵏ,

ⵅⵎⵉ ⵜⵓⵖⴰ ⵜⴻⵙⵙⵖⴻⵎⵎⵉ.

6 ⵎⴰⵔⵔⴰ ⵉⵊⴹⴰⴹ ⵏ ⵓⵊⴻⵏⵏⴰ

ⴳⴳⵉⵏ ⵍⵄⵓⵛⵛ ⵏⵙⴻⵏ ⴷⵉ ⵜⵙⴻⴹⵡⵉⵏ ⵏⵏⴻⵙ,

ⵎⴰⵔⵔⴰ ⵍⵎⴰⵍ ⵏ ⵢⴻⵢⵢⴰⵔ

ⴼⴻⵔⵅⴻⵏ ⵙⴰⴷⵓ ⵉⴼⴻⵜⵡⴰⵏ ⵏⵏⴻⵙ

ⵓ ⵎⴰⵔⵔⴰ ⵍⴻⴳⵏⵓⵙ ⵎⵖⴰⵔⴻⵏ

ⵜⵓⵖⴰ ⵜⵜⵖⵉⵎⴰⵏ ⴷⵉ ⵜⵉⵍⵉ ⵏⵏⴻⵙ. ◘31:6 ⴷⴰⵏ. 4:9

7 ⵜⵓⵖⴰ-ⵜⵜ ⵜⴻⵛⵏⴰ ⵙ ⵍⴻⵎⵖⴰⵔⴻⵜ ⵏⵏⴻⵙ

ⵓ ⵙ ⵜⵓⵣⵣⴻⴳⴳⴰⵔⵜ ⵏ ⵜⵙⴻⴹⵡⵉⵏ ⵏⵏⴻⵙ,

ⵎⴰⵖⴰⵔ ⴰⵥⵡⴰⵔ ⵏⵏⴻⵙ

ⵜⵓⵖⴰ-ⵜ ⴰⴽ-ⴷ ⵡⴰⵟⵟⴰⵙ ⵏ ⵡⴰⵎⴰⵏ.

8 ⵜⵉⵛⴻⵊⵊⵓⵔⴰ ⵏ ⵜⴻⵏⴳⴻⵍⵜ ⴷⵉ ⵊⵊⴻⵏⵏⴻⵜ ⵏ ⴰⵔⴻⴱⴱⵉ

ⵡⴰⵔ ⵅⴰⵙ ⵄⴷⵓⵏⵜ,

ⵜⵉⵛⴻⵊⵊⵓⵔⴰ ⵏ ⵓⵎⴻⵔⵣⵉ

ⵡⴰⵔ ⵙⴻⴽⴽⵡⵉⵏⵜ ⵜⵙⴻⴹⵡⵉⵏ ⵏⵏⴻⵙ

ⵓⵛⴰ ⵜⵉⵛⴻⵊⵊⵓⵔⴰ ⵏ ⴷⵓⵍⴱ

ⵡⴰⵔ ⵙⴻⴽⴽⵡⵉⵏⵜ ⵉⴼⴻⵜⵡⴰⵏ ⵏⵏⴻⵙ.

ⵓⵍⴰ ⴷ ⵉⵛⵜ ⵏ ⵜⵛⴻⵊⵊⴰⵔⵜ ⴷⵉ ⵊⵊⴻⵏⵏⴻⵜ ⵏ ⴰⵔⴻⴱⴱⵉ

ⵜⴰⵔⵡⴻⵙ ⴷⴰⵢⴻⵙ ⴷⴻⴳ ⵡⴰⵥⵔⵉ ⵏⵏⴻⵙ. ◼31:8 ⵜⵉⵛⴻⵊⵊⵓⵔⴰ-ⵏⵉⵖ ‘ⵉⴷⴷⴰⴳⴻⵏ’. ⴰⵎⴻⵔⵥⵉ-ⵏⵉⵖ ‘ⴰⵎⴻⴹⵥⵉ’.  ◘31:8 ⴰⵎⵥ. 2:8

9 ⴳⴳⵉⵖ ⵜⵜ ⵜⴻⵛⵏⴰ ⴰⴽ-ⴷ ⵡⴰⵟⵟⴰⵙ ⵏ ⵜⵙⴻⴹⵡⵉⵏ ⵏⵏⴻⵙ,

ⴰⵍⴰⵎⵉ ⵣⵣⴰⵢⴻⵙ ⵓⵙⵎⴻⵏⵜ

ⵎⴰⵔⵔⴰ ⵜⵉⵛⴻⵊⵊⵓⵔⴰ ⵏ ⵄⴰⴷⵏ,

ⵜⵉⵏⵏⵉ ⵜⵓⵖⴰ ⴷⵉ ⵊⵊⴻⵏⵏⴻⵜ ⵏ ⴰⵔⴻⴱⴱⵉ.’ ”

10 “ⵙ ⵓⵢⴰ, ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵉⵏⵓ, ⵙⵉⴷⵉ:

‘ⵓⵎⵉ ⵜⴻⵙⵙⴳⴻⵄⵄⴷⴻⴷ ⵉⵅⴻⴼ ⵏⵏⴻⵎ ⵙ ⵜⵉⴷⴷⵉ ⵏⵏⴻⵎ,

ⵡⴰⵀ ⵏⴻⵜⵜⴰⵜ ⵜⴻⴳⴳⴰ ⵜⵓⵛⵛⴻⵏⵜ ⵏⵏⴻⵙ

ⵊⴰⵔ ⵉⵙⴻⵢⵏⵓⵜⴻⵏ

ⵓ ⵓⵍ ⵏⵏⴻⵙ ⵉⵙⵙⴳⴻⵄⵄⴻⴷ ⵉⵅⴻⴼ ⵏⵏⴻⵙ

ⵣⵉ ⵙⵙⵉⴱⴱⴻⵜ ⵏ ⵍⵓⵄⵍⴰ ⵏⵏⴻⵙ,

11 ⵙ ⵓⵢⴻⵏⵏⵉ ⵡⵛⵉⵖ ⵜⵜ ⴷⴻⴳ ⵓⴼⵓⵙ

ⵏ ⵡⴻⵏⵏⵉ ⴷ ⴰⵎⵣⴻⵎⵎⴰⵔ ⵇⴰⵄ ⵊⴰⵔ ⵍⴻⴳⵏⵓⵙ,

ⵡⴻⵏⵏⵉ ⵉⴳⴳⵉⵏ ⵙ ⵜⵉⴷⴻⵜⵜ

ⴰⵎ ⴷⴷ-ⵉⵜⵜⵍⵉⵇⴻⵏ ⴰⴽ-ⴷ ⵜⵓⵄⴻⴼⴼⵏⴰ ⵏⵏⴻⵙ,

ⵓⵛⴰ ⴰⵎⵎⵓ ⵉ ⵓⵥⵥⵍⴻⵖ ⵅⴰⵙ.

12 ⵣⴻⴷⵎⴻⵏ ⵜⵜ ⵉⴱⴰⵔⵔⴰⵏⵉⵢⵢⴻⵏ,

ⵍⴻⴳⵏⵓⵙ ⵉⵇⴻⵙⵃⴻⵏ ⴰⵟⵟⴰⵙ,

ⵣⴻⴷⵎⴻⵏ ⵜ ⵓⵛⴰ ⵊⵊⵉⵏ ⵜⵜ.

ⵜⵉⵙⴻⴹⵡⵉⵏ ⵏⵏⴻⵙ ⵡⴹⴰⵏⵜ ⵅ ⵉⴷⵓⵔⴰⵔ

ⵓ ⴷⵉ ⵎⴰⵔⵔⴰ ⵜⵉⵖⵣⵓⵔⵜⵉⵏ,

ⵉⴼⴻⵜⵡⴰⵏ ⵏⵏⴻⵙ ⵜⵜⵡⴰⵔⵥⴻⵏ

ⴷⵉ ⵎⴰⵔⵔⴰ ⵜⵉⵖⴻⵣⵔⴰⵜⵉⵏ ⵏ ⵜⴻⵎⵎⵓⵔⵜ

ⵓ ⵎⴰⵔⵔⴰ ⵍⴻⴳⵏⵓⵙ ⵏ ⵜⴻⵎⵎⵓⵔⵜ

ⵀⵡⴰⵏ-ⴷⴷ ⵣⵉ ⵙⴰⴷⵓ ⵜⵉⵍⵉ ⵏⵏⴻⵙ

ⵓⵛⴰ ⵊⵊⵉⵏ ⵜⵜ. ◘31:12 ⵃⵉⵥ. 28:7; 30:11

13 ⵎⴰⵔⵔⴰ ⵉⵊⴹⴰⴹ ⵏ ⵓⵊⴻⵏⵏⴰ ⵣⴻⴷⵖⴻⵏ

ⵅ ⵓⴽⴻⵛⵛⵓⴹ ⵏⵏⴻⵙ ⵏⵏⵉ ⵉⵡⴹⴰⵏ

ⵓⵛⴰ ⵎⴰⵔⵔⴰ ⵍⵎⴰⵍ ⵏ ⵢⴻⵢⵢⴰⵔ

ⵜⵓⵖⴰ ⴰⵜⴻⵏ ⵅ ⵉⴼⴻⵜⵡⴰⵏ ⵏⵏⴻⵙ.

14 ⵏⴻⵛⵛ ⴳⴳⵉⵖ ⵜⵜ,

ⵃⵉⵎⴰ ⵎⴰⵔⵔⴰ ⵜⵉⵛⴻⵊⵊⵓⵔⴰ ⵡⴰⵔ ⴷⵉⴽⴽⵡⵉⵍⴻⵏⵜ ⵄⴰⴷ

ⵜⵜⵏⴻⴼⴼⵅⴻⵏⵜ ⵙ ⵜⵉⴷⴷⵉ ⵏⵙⴻⵏⵜ

ⵓⵛⴰ ⴰⴷ ⴳⴳⴻⵏⵜ ⵜⵓⵛⵛⴻⵏⵜ ⵏⵙⴻⵏ ⴷⴻⴳ ⵉⵙⴻⵢⵏⵓⵜⴻⵏ,

ⵓ ⵎⴰⵔⵔⴰ ⵜⵉⵛⴻⵊⵊⵓⵔⴰ ⵏⵏⵉ ⵉⵙⵡⵉⵏ ⴰⵎⴰⵏ

ⵙ ⵓⴼⴻⵢⵢⴻⴹ,

ⵡⴰⵔ ⵜⵜⴱⴻⴷⴷⵉⵏⵜ ⵄⴰⴷ ⵙ ⵢⵉⵅⴻⴼ ⵏⵙⴻⵏⵜ

ⴷⵉ ⵏⵏⴼⴰⵅⴻⵜ ⵏⵙⴻⵏⵜ,

ⵎⴰⵖⴰⵔ ⵏⵉⵜⴻⵏⵜⵉ ⵎⴰⵔⵔⴰ

ⵜⵜⵡⴰⵎⴻⵡⵛⴻⵏⵜ ⵉ ⵍⵎⴻⵡⵜ,

ⵖⴰⵔ ⵍⴰⴵⴰⵖ ⵏ ⵜⴻⵎⵎⵓⵔⵜ,

ⴷⵉ ⵍⵡⴻⵙⵟ ⵏ ⵜⴰⵔⵡⴰ ⵏ ⴱⵏⴰⴷⴻⵎ,

ⴰⴽ-ⴷ ⵉⵏⵏⵉ ⵉⵀⴻⴽⴽⵡⴰⵏ

ⴷⴻⴳ ⵡⴻⵃⴼⵓⵔ ⵏ ⵡⴻⵏⴹⴻⵍ.’ ”

15 “ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵉⵏⵓ, ⵙⵉⴷⵉ:

‘ⴷⴻⴳ ⵡⴰⵙⵙ ⵏⵏⵉ ⴷⵉ ⵜⴻⵀⵡⴰ ⵖⴰⵔ ⵍⴰⵅⴰⵔⵜ,

ⴳⴳⵉⵖ ⵉⵊⵊ ⵡⴻⵛⴹⴰⵏ.

ⴷⵉ ⵟⵟⵡⴻⵄ ⵏⵏⴻⵙ ⴷⵍⵉⵖ ⴰⵎⴰⵏ ⵉⵀⴻⵡⵍⴻⵏ

ⵓⵛⴰ ⵙⵙⴱⴻⴷⴷⴻⵖ ⵉⵖⴻⵣⵔⴰⵏ ⵏⵏⴻⵙ

ⵓⵛⴰ ⴼⴻⵛⵍⴻⵏ ⵡⴰⵎⴰⵏ ⵉⵎⵖⴰⵔⴻⵏ.

ⴷⵉ ⵟⵟⵡⴻⵄ ⵏⵏⴻⵙ ⵙⵙⴱⴰⵔⵔⴻⵛⵏⴻⵖ

ⵉⴷⵓⵔⴰⵔ ⵏ ⵍⵓⴱⵏⴰⵏ

ⵓⵛⴰ ⵎⴰⵔⵔⴰ ⵜⵉⵛⴻⵊⵊⵓⵔⴰ ⵏ ⵢⴻⵢⵢⴰⵔ ⵛⴻⴹⵏⴻⵏⵜ ⵅⴰⵙ.

16 ⵙ ⴷⴷⵔⵉⵣ ⵏ ⵓⵡⴻⵟⵟⵓ ⵏⵏⴻⵙ ⵙⵙⴰⵔⵊⵉⵊⴻⵖ ⵍⴻⴳⵏⵓⵙ,

ⵓⵎⵉ ⵜⵜ ⵙⵙⴻⵀⵡⵉⵖ ⵖⴰⵔ ⵍⴰⵅⴰⵔⵜ

ⴰⴽ-ⴷ ⵉⵏⵏⵉ ⵉⵀⴻⴽⴽⵡⴰⵏ ⴷⴻⴳ ⵡⴻⵃⴼⵓⵔ ⵏ ⵡⴻⵏⴹⴻⵍ.

ⵎⴰⵔⵔⴰ ⵜⵉⵛⴻⵊⵊⵓⵔⴰ ⵏ ⵄⴰⴷⵏ,

ⵜⵉⵏⵏⵉ ⵉⵄⵉⵣⵣⴻⵏ ⴰⵟⵟⴰⵙ ⴷ ⵜⵉⵏⵏⵉ ⵉⵛⵏⴰⵏ ⵇⴰⵄ

ⵣⵉ ⵍⵓⴱⵏⴰⵏ,

ⵜⵉⵏⵏⵉ ⵉⵙⵡⵉⵏ ⴰⵟⵟⴰⵙ ⵏ ⵡⴰⵎⴰⵏ ⵎⴰⵔⵔⴰ,

ⴰⵇⴰ ⵜⵜⵡⴰⵙⵙⴼⴻⵡⵡⵊⴻⵏⵜ ⵙ ⵎⴰⵏ ⴰⵢⴰ

ⴷⵉ ⵍⴰⴵⴰⵖ ⵏ ⵜⴻⵎⵎⵓⵔⵜ. ◘31:16 ⵉⵛⴰ. 14:9

17 ⵓⵍⴰ ⴷ ⵏⵉⵜⴻⵏⵜⵉ ⵀⵡⴰⵏⵜ ⴰⴽⵉⴷⴻⵙ ⵖⴰⵔ ⵍⴰⵅⴰⵔⵜ,

ⵖⴰⵔ ⵉⵏⵏⵉ ⵉⵜⵜⵡⴰⵏⵖⴻⵏ ⵙ ⵙⵙⵉⴼ,

ⵉⵏⵏⵉ ⵜⵓⵖⴰ ⴰⵖⵉⵍ ⵏⵏⴻⵙ ⵉⵊⴻⵀⴷⴻⵏ,

ⵉⵏⵏⵉ ⵜⵓⵖⴰ ⵉⵇⵇⵉⵎⴻⵏ ⴷⵉ ⵜⵉⵍⵉ ⵏⵏⴻⵙ

ⴷⵉ ⵍⵡⴻⵙⵜ ⵏ ⵍⴻⴳⵏⵓⵙ.

18 ⴰⴽ ⵡⵉ ⵜⵙⴰⵡⵉⴷ ⴰⵎⵎⵓ ⴷⵉ ⵍⵄⴻⵣⵣ ⴷ ⵍⴻⵎⵖⴰⵔⴻⵜ

ⵊⴰⵔ ⵜⵛⴻⵊⵊⵓⵔⴰ ⵏ ⵄⴰⴷⵏ?

ⵡⴰⵅⵅⴰ ⴰⵎⴻⵏⵏⵉ ⴰⴷ ⵜᵉⵜⵜⵡⴰⵙⵙⴻⵀⵡⵉⴷ

ⴰⴽ-ⴷ ⵜⵛⴻⵊⵊⵓⵔⴰ ⵏ ⵄⴰⴷⵏ

ⴰⵍ ⵔⴰⴵⴰⵖ ⵏ ⵜⴻⵎⵎⵓⵔⵜ.

ⴰⴷ ⵜⴱⵓⵣⵣⵍⴻⴷ ⴷⵉ ⵍⵡⴻⵙⵜ ⵏ ⵢⵉⵏⵏⵉ ⵡⴰⵔ ⵉⵜⵜⵡⴰⵅⴻⵜⵏⴻⵏ,

ⴰⴽ-ⴷ ⵉⵏⵏⵉ ⵉⵜⵜⵡⴰⵏⵖⴻⵏ ⵙ ⵙⵙⵉⴼ.

ⵓⵛⴰ ⴰⴷ ⵉⵏⵉⵏ: ⵡⴰ ⴷ ⴼⵉⵔⵄⵓⵏ

ⴷ ⵎⴰⵔⵔⴰ ⵍⵖⴰⵛⵉ ⵏⵏⴻⵙ ⵉⵏⵀⴻⵡⵍⴻⵏ!’,

ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵉⵏⵓ, ⵙⵉⴷⵉ.” ◘31:18 ⵃⵉⵥ. 28:10