1 ⵙⴰⵔⴰⵢ, ⵜⴰⵎⵖⴰⵔⵜ ⵏ ⴰⴱⵔⴰⵎ, ⵡⴰⵔ ⴷ ⴰⵙ ⴷⴷ-ⵜⵉⵔⵓⵡ ⵛⴰ. ⵜⵓⵖⴰ ⵖⴰⵔⴻⵙ ⵉⵛⵜ ⵏ ⵜⴰⵢⵢⴰ ⵣⵉ ⵎⵉⵚⵔⴰ ⵇⵇⴰⵔⴻⵏⵜ ⴰⵙ ⵀⴰⵊⴰⵔ. 2 ⵜⴻⵏⵏⴰ ⵙⴰⵔⴰⵢ ⵉ ⴰⴱⵔⴰⵎ: “ⴰⵇⴰ ⵜⴻⵥⵔⵉⴷ ⴱⴻⵍⵍⵉ ⵙⵉⴷⵉ ⵉⵟⵟⴻⴼ ⵅⴰⴼⵉ ⵜⴰⵔⵡⴰ. ⴰⴷⴻⴼ ⵅ ⵜⴰⵢⵢⴰ ⵉⵏⵓ, ⴱⴰⵍⴰⴽ ⴰⴷ ⵣⵣⴰⵢⴻⵙ ⴽⵙⵉⵖ ⵜⴰⵔⵡⴰ.” ⴰⴱⵔⴰⵎ ⵜⵓⵖⴰ ⵉⵙⵙⵃⴻⵙⵙⴰ ⵖⴰⵔ ⵙⴰⵔⴰⵢ. ◼16:2 ⵖⴰⵔ ⵙⴰⵔⴰⵢ-ⴰⵎ ⵉⴽⵎⴻⵍ ‘ⵖⴰⵔ ⵜⵎⵉⵊⵊⴰ ⵏ ⵙⴰⵔⴰⵢ’. 3 ⴰⵡⴰⵔⵏⵉ ⵍⴰⵎⵉ ⵉⵣⴷⴻⵖ ⴰⴱⵔⴰⵎ ⵄⴻⵛⵔⴰ ⵏ ⵉⵙⴻⴳⴳⵯⵓⵙⴰ ⴷⵉ ⵜⴻⵎⵎⵓⵔⵜ ⵏ ⴽⴻⵏⵄⴰⵏ, ⵜⵉⵡⵉ-ⴷⴷ ⵙⴰⵔⴰⵢ, ⵜⴰⵎⵖⴰⵔⵜ ⵏ ⴰⴱⵔⴰⵎ, ⵜⴰⵢⵢⴰ ⵏⵏⴻⵙ ⵀⴰⵊⴰⵔ, ⵜⴻⵏⵏⵉ ⵣⵉ ⵎⵉⵚⵔⴰ, ⵓⵛⴰ ⵜⴻⵡⵛⴰ ⴰⵙ-ⴷⴷ ⵉ ⴰⴱⵔⴰⵎ, ⴰⵔⵢⴰⵣ ⵏⵏⴻⵙ, ⴷ ⵜⴰⵎⵖⴰⵔⵜ ⵏⵏⴻⵙ. 4 ⵢⵓⴷⴻⴼ ⵅ ⵀⴰⵊⴰⵔ ⵓⵛⴰ ⵏⴻⵜⵜⴰⵜ ⵜⴻⴽⵙⵉ ⴷⴷⴻⵢⵙⴻⵜ. ⵓⵎⵉ ⵜⴻⵥⵔⴰ ⴱⴻⵍⵍⵉ ⵜⴻⴽⵙⵉ ⴷⴷⴻⵢⵙⴻⵜ, ⵅⴻⵏⵏⵉ ⵜⴻⴷⵡⴻⵍ ⵍⴰⵍⵍⴰⵙ ⵜᵉⵜⵜⵡⴰⵙⵙⴻⵃⵇⴰⵔ ⴷⵉ ⵜⵉⵟⵟⴰⵡⵉⵏ ⵏⵏⴻⵙ. 5 ⵜⴻⵏⵏⴰ ⵙⴰⵔⴰⵢ ⵉ ⴰⴱⵔⴰⵎ: “ⵣⵉ ⵙⵙⵉⴱⴱⴻⵜ ⵏⵏⴻⵛ ⴳⴳⵉⵏ ⴷⴰⵢⵉ ⵍⵎⵓⵏⴽⴰⵔ. ⵏⴻⵛⵛ ⴳⴳⵉⵖ ⵜⴰⵢⵢⴰ ⵉⵏⵓ ⴷⴻⴳ ⵡⴻⵃⵙⵉⵏ ⵏⵏⴻⵛ. ⵓⵎⵉ ⵜⴻⵥⵔⴰ ⴱⴻⵍⵍⵉ ⵜⴻⴽⵙⵉ ⴷⴷⴻⵢⵙⴻⵜ, ⴷⴻⵡⵍⴻⵖ ⴷ ⵜⴰⵎⴻⵃⴳⵓⵔⴻⵜ ⴷⵉ ⵜⵉⵟⵟⴰⵡⵉⵏ ⵏⵏⴻⵙ. ⴻⵊⵊ ⴰⴷ ⵉⵃⴽⴻⵎ ⵙⵉⴷⵉ ⵊⴰⵔ ⴰⵢⵉ ⴷ ⵛⴻⴽ!” 6 ⵉⵏⵏⴰ ⴰⴱⵔⴰⵎ ⵉ ⵙⴰⵔⴰⵢ: “ⵅⵣⴰⵔ, ⵜⴰⵢⵢⴰ ⵏⵏⴻⵎ ⴷⴻⴳ ⵉⴼⴰⵙⵙⴻⵏ ⵏⵏⴻⵎ. ⴻⴳⴳ ⵣⵣⴰⵢⴻⵙ ⵎⵉⵏ ⵜᵉⵜⵜⵡⴰⵍⵉⴷ ⵛⴻⵎ ⵎⵍⵉⵃ ⴷⵉ ⵜⵉⵟⵟⴰⵡⵉⵏ ⵏⵏⴻⵎ.” ⵓⵛⴰ ⵙⴰⵔⴰⵢ ⵜⵇⴻⵎⵎⴻⵄ ⵉ-ⵜⵜ ⵓ ⵅⴻⵏⵏⵉ ⵏⴻⵜⵜⴰⵜ ⵜⴰⵔⵡⴻⵍ ⵣⵣⴰⵢⴻⵙ.

7 ⵓⵛⴰ ⵍⵎⴰⵍⴰⴽ ⵏ ⵙⵉⴷⵉ ⵉⵍⵇⴰ ⵉ-ⵜⵜ ⵖⴰⵔ ⵜⴰⵍⴰ ⵏ ⵡⴰⵎⴰⵏ ⴷⵉ ⵍⴻⵅⵍⴰ, ⵖⴰⵔ ⵜⴰⵍⴰ ⴷⴻⴳ ⵡⴻⴱⵔⵉⴷ ⵉⵜⵜⴰⵡⵢⴻⵏ ⵖⴰⵔ ⵛⵓⵔ. ◼16:7 ⵛⵓⵔ-ⵉⵙⴻⵎ ⵡⴰⵏⵉⵜⴰ ⵉⵅⵙ ⴰⴷ ⵢⵉⵏⵉ ‘ⵍⵃⵉⴹ’. ⵜⴰⵏⴷⵉⵏⵜ-ⴰ ⵜⵓⵖⴰ ⵖⴰⵔ ⵡⴻⵢⵎⵉⵔ ⵊⴰⵔ ⴽⴻⵏⵄⴰⵏ ⴷ ⵎⵉⵚⵔⴰ. 8 ⵉⵏⵏⴰ: “ⵀⴰⵊⴰⵔ, ⵜⴰⵢⵢⴰ ⵏ ⵙⴰⵔⴰⵢ, ⵎⴰⵏⵉⵙ ⴷⴷ-ⵜⵓⵙⵉⴷ ⵓ ⵎⴰⵏⵉ ⵖⴰ ⵜⵔⴰⵃⴻⴷ?” ⵏⴻⵜⵜⴰⵜ ⵜⴻⵏⵏⴰ: “ⵜⵜⵔⴰⴽⴽⵡⴰⵍⴻⵖ ⵣⴻⴳ ⵡⵓⴷⴻⵎ ⵏ ⵍⴰⵍⵍⴰ ⵙⴰⵔⴰⵢ!” 9 ⵅⴻⵏⵏⵉ ⵉⵏⵏⴰ ⴰⵙ ⵍⵎⴰⵍⴰⴽ ⵏ ⵙⵉⴷⵉ: “ⴷⵡⴻⵍ ⵖⴰⵔ ⵍⴰⵍⵍⴰⵎ, ⵓⴹⴰⵔ ⵙⴰⴷⵓ ⵉⴼⴰⵙⵙⴻⵏ ⵏⵏⴻⵙ.” 10 ⵉⵏⵏⴰ ⴰⵙ ⵄⴰⵡⴻⴷ ⵍⵎⴰⵍⴰⴽ ⵏ ⵙⵉⴷⵉ: “ⴰⴷ ⴽⴻⵜⵜⴰⵔⴻⵖ ⴰⵟⵟⴰⵙ ⵣⵣⴰⵔⵉⵄⴻⵜ ⵏⵏⴻⵎ, ⴰⵍ ⵡⴰⵔ ⵉⵣⴻⵎⵎⴰⵔ ⴰⴷ ⵜᵉⵜⵜⵡⴰⵃⵙⴻⴱ ⵍⴰⵎⵉ ⵉ ⵖⴰ ⵜⵉⵍⵉ ⴷⴻⴳ ⵡⴰⵟⵟⴰⵙ.” 11 ⵉⵏⵏⴰ ⴰⵙ ⵍⵎⴰⵍⴰⴽ ⵏ ⵙⵉⴷⵉ ⵄⴰⵡⴻⴷ: “ⴰⵇⴰ ⵍⴻⵅⵅⵓ, ⵜⴻⴽⵙⵉⴷ ⴷⴷⴻⵢⵙⴻⵜ ⵓⵛⴰ ⴰⴷ ⵜⴰⵔⵡⴻⴷ ⴰⵙⴻⵢⵎⵉ. ⴰⴷ ⴰⵙ ⵜⴻⴳⴳⴻⴷ ⵉⵙⵎⴰⵄⵉⵍ, ⵎⵉⵏⵣⵉ ⵙⵉⴷⵉ ⵉⵙⵍⴰ ⴰⵎ ⴷⵉ ⵍⴻⵎⵃⴰⵢⴻⵏ ⵏⵏⴻⵎ. ◼16:11 ⵉⵙⵎⴰⵄⵉⵍ-ⵉⵙⴻⵎ-ⴰ ⵡⴰⵏⵉⵜⴰ ⵉⵅⵙ ⴰⴷ ⵢⵉⵏⵉ ‘ⴰⵔⴻⴱⴱⵉ ⴰⴷ ⵉⵙⴻⵍ’ ⵏⵉⵖ ‘ⵡⴻⵏⵏⵉ ⵓⵎⵉ ⵉ ⵖⴰ ⵉⵙⴻⵍ ⴰⵔⴻⴱⴱⵉ’ ⵏⵉⵖ ‘ⵡⴻⵏⵏⵉ ⵉ ⴷ ⴰⵙ ⵉⵜⵜⴻⵙⵍⴰⵏ ⴰⵔⴻⴱⴱⵉ’. 12 ⵓⵛⴰ ⵏⴻⵜⵜⴰ ⴰⴷ ⵢⵉⵍⵉ ⴷ ⵉⵊⵊ ⵏ ⴱⵏⴰⴷⴻⵎ ⴰⵎⴻⵛⵏⴰⵡ ⴰⵙⵏⵓⵙ ⵏ ⵍⴻⵅⵍⴰ. ⴰⴼⵓⵙ ⵏⵏⴻⵙ ⴰⴷ ⵢⵉⵍⵉ ⵅ ⵎⴰⵔⵔⴰ, ⵓ ⴰⴼⵓⵙ ⵏ ⵎⴰⵔⵔⴰ ⴰⴷ ⵢⵉⵍⵉ ⵅⴰⵙ. ⴰⴷ ⵉⵣⴷⴻⵖ ⴰⵔⴻⵏⴷⴰⴷ ⵏ ⵎⴰⵔⵔⴰ ⴰⵢⵜⵎⴰⵙ.” ◘16:12 ⴰⵎⵥ. 25:18. 13 ⵓ ⵏⴻⵜⵜⴰⵜ ⵜⵍⴰⵖⴰ ⵅ ⵢⵉⵙⴻⵎ ⵏ ⵙⵉⴷⵉ ⵉ ⵖⴰⵔⴻⵙ-ⴷⴷ ⵉⵙⵙⵉⵡⵍⴻⵏ, ⵜⴻⵏⵏⴰ: “ⵛⴻⴽ ⴷ ⴰⵔⴻⴱⴱⵉ ⵉ ⵉⵜⵜⵡⴰⵍⴰⵏ!”, ⵎⵉⵏⵣⵉ ⵜⴻⵏⵏⴰ: “ⵎⴰ ⵡⴰⵔ ⴷⴰ ⵥⵔⵉⵖ ⵡⴻⵏⵏⵉ ⴷ ⴰⵢⵉ ⵉⵜⵜⵡⴰⵍⴰⵏ?” 14 ⵅ ⵓⵢⴰ ⵙⴻⵎⵎⴰⵏ ⴰⵏⵓ ⵏⵏⵉ: ⴰⵏⵓ ‘ⵍⴰⵃⴰⵢ-ⵔⵓ’ⵉ’. ⵅⵣⴰⵔ, ⴰⵇⴰ-ⵜ ⵊⴰⵔ ⵇⴰⴷⴰⵛ ⴷ ⴱⴰⵔⴰⴷ. ◼16:14 ⴰⵏⵓ ⵍⴰⵃⴰⵢ-ⵔⵓ’ⵉ-ⵉⵙⴻⵎ-ⴰ ⵡⴰⵏⵉⵜⴰ ⵉⵅⵙ ⴰⴷ ⵢⵉⵏⵉ ‘ⴰⵏⵓ ⵏ ⵡⴻⵏⵏⵉ ⵉⴷⴷⴰⵔⴻⵏ ⵓ ⵉⵅⵥⴰⵔ ⴷⴰⵢⵉ’. ⴱⴰⵔⴰⴷ-ⵉⵙⴻⵎ-ⴰ ⵡⴰⵏⵉⵜⴰ ⵉⵅⵙ ⴰⴷ ⵢⵉⵏⵉ ‘ⵜⴻⴱⵔⵓⵔⵔⵉ’.  ◘16:14 ⴰⵎⵥ. 24:62; 25:11. 15 ⵓⵛⴰ ⵜⵓⵔⵓⵡ-ⴷⴷ ⵀⴰⵊⴰⵔ ⵉ ⴰⴱⵔⴰⵎ ⴰⵙⴻⵢⵎⵉ. ⵉⴳⴳⴰ ⴰⵙ ⴰⴱⵔⴰⵎ ⵉⵙⴻⵎ ⵏ ⵎⵎⵉⵙ ⵏⵏⵉ ⵉ ⴷ ⴰⵙ ⴷⴷ-ⵜⵓⵔⵓⵡ ⵀⴰⵊⴰⵔ ‘ⵉⵙⵎⴰⵄⵉⵍ’. ◘16:15 ⴳⴰⵍ. 4:22. 16 ⴰⴱⵔⴰⵎ ⵜⵓⵖⴰ ⵖⴰⵔⴻⵙ ⵙⴻⵜⵜⴰ ⵓ-ⵜⵎⴰⵏⵢⵉⵏ ⵏ ⵉⵙⴻⴳⴳⵯⵓⵙⴰ, ⵓⵎⵉ ⴷⴷ-ⵜⵓⵔⵓⵡ ⵀⴰⵊⴰⵔ ⵉⵙⵎⴰⵄⵉⵍ ⵉ ⴰⴱⵔⴰⵎ.