1 ⵍⵃⵓⴽⵎ ⵉⵙⵙⴰⴳⴳⵯⴰⴷⴻⵏ ⵏⵏⵉ ⵉⵥⵔⴰ ⵓⵏⴰⴱⵉ ⵃⴰⴱⴰⵇⵇⵓⵇ.

2 “ⴰ ⵙⵉⴷⵉ, ⴰⵍ ⵎⴻⵍⵎⵉ ⵉ ⵖⴰ ⵇⵇⵉⵎⴻⵖ ⵜⵜⵍⴰⵖⵉⵖ

ⵓ ⵛⴻⴽ ⵡⴰⵔ ⴷ ⴰⵢⵉ ⵜᵉⵜⵜⴻⵙⵍⵉⴷ,

ⴰⵍ ⵎⴻⵍⵎⵉ ⵉ ⵖⴰ ⵇⵇⵉⵎⴻⵖ ⵜⵜⵍⴰⵖⵉⵖ ‘ⵍⵄⵓⵏⴼ!’,

ⵓ ⵛⴻⴽ ⵡⴰⵔ ⴷ ⴰⵢⵉ ⵜⴻⵙⵙⴻⵏⵊⴰⵎⴻⴷ!

3 ⵎⴰⵢⴻⵎⵎⵉ ⴷ ⴰⵢⵉ ⵜⴻⵙⵙⴻⵛⵏⴻⴷ ⵍⵎⵓⵄⵚⵉⵢⵢⴻⵜ,

ⵓ ⵜᵉⵜⵜⵖⵉⵎⵉⴷ ⵜⵅⴻⵣⵣⴰⵔⴻⴷ ⵖⴰⵔ ⵍⴻⵖⴱⴻⵏ?

ⵎⴰⵖⴰⵔ ⴰⵔⴻⴷⴷⴻⴵ ⴷ ⵍⵄⵓⵏⴼ

ⴰⵇⴰ ⴰⵜⴻⵏ ⴰⵔⴻⵏⴷⴰⴷ ⵉⵏⵓ,

ⵓ ⵉⵎⵙⴰⵔ ⵓⵎⵛⵓⴱⴱⴻⵛ, ⵉⴽⴽⴰⵔ-ⴷⴷ ⵓⵔⵓⴷⴷⴻⵣ.

4 ⵅ ⵓⵢⴰ ⵜⴻⴷⵡⴻⵍ ⵛⵛⴰⵔⵉⵄⴰ ⴱⵍⴰ ⵊⵊⴻⵀⴷ,

ⵓ ⵡⴰⵔ ⴷⴷ-ⵉⵜⵜⴻⴼⴼⴻⵖ ⵄⴻⵎⵎⴰⵔⵚ ⵍⵃⴻⵇⵇ,

ⵎⴰⵖⴰⵔ ⴰⵄⴻⴼⴼⴰⵏ ⵉⵜⵜⴻⵏⵏⴻⴹ ⵉ ⵓⵎⵙⴻⴳⴳⴻⴷ.

ⵅ ⵓⵢⴰ ⵉ ⴷⴷ-ⵉⵜⵜⴻⴼⴼⴻⵖ ⵍⵃⴻⵇⵇ ⵉⴼⴰⵔⵖ.

5 ⵅⵣⴰⵔⴻⵎ ⵊⴰⵔ ⵍⴻⴳⵏⵓⵙ, ⵅⵣⴰⵔⴻⵎ,

ⵉⵏⵏⵓⵔⵣⴻⵎ ⵓⵇⴻⵎⵎⵓⵎ ⵙ ⵓⵜⴻⴱⵀⴻⵜ,

ⵎⴰⵖⴰⵔ ⵏⴻⵛⵛ ⴰⴷ ⴳⴳⴻⵖ

ⵉⵛⵜ ⵏ ⵍⵅⴻⴷⵎⴻⵜ ⴷⴻⴳ ⵡⵓⵙⵙⴰⵏ ⵏⵡⴻⵎ

ⵉ ⵡⴰⵔ ⵜᵉⵜⵜⵉⵎⵏⴻⵎ ⵎⴰⵍⴰ ⵜⵜ ⵃⴰⵊⴰⵏ. ◘1:5 ⵍⴻⵅ. 13:41

6 ⵎⴰⵖⴰⵔ ⵅⵣⴰⵔⴻⵎ,

ⵏⴻⵛⵛ ⵙⵙⴻⴽⴽⴰⵔⴻⵖ ⵉⴽⴰⵍⴷⴰⵏⵉⵢⵢⴻⵏ,

ⵍⴳⴻⵏⵙ ⵉⵇⴻⵙⵃⴻⵏ ⵓ ⵉⵎⵇⴻⴵⵇⴻⵏ,

ⵡⴻⵏⵏⵉ ⵉⴳⴳⵓⵔⴻⵏ ⴷⵉ ⵍⴻⵡⵙⴻⵄ ⵏ ⵜⴻⵎⵎⵓⵔⵜ,

ⵃⵉⵎⴰ ⴰⴷ ⵉⵟⵟⴻⴼ ⵜⵉⵣⴻⴷⴷⵉⵖⵉⵏ

ⵏⵏⵉ ⵡⴰⵔ ⵉⴵⵉⵏ ⵏⵏⴻⵙ.

7 ⵉⵙⵙⴰⴳⴳⵯⴰⴷⴻⵏ ⵓ ⵉⵙⵙⵏⴻⵅⵍⴰⵄⴻⵏ ⵉⴵⴰⵏ!

ⵍⵃⴻⵇⵇ ⵏⵏⴻⵙ ⴷ ⵓⵄⵓⴵⵉ ⵏⵏⴻⵙ

ⵜⵜⴻⴼⴼⵖⴻⵏ-ⴷⴷ ⵣⵣⴰⵢⴻⵙ.

8 ⵉⵢⵙⴰⵏ ⵏⵏⴻⵙ ⴼⵙⵓⵙⴻⵏ ⵅ ⵓⵖⵉⵍⴰⵙ,

ⵏⵉⵜⵏⵉ ⵎⵎⵓⵣⵣⴰⵔⴻⵏ

ⵎⴰⵀⵓ ⵓⵛⵛⴰⵏⴻⵏ ⵏ ⴵⵉⵍⴻⵜ,

ⵉⵎⵏⴰⵢⴻⵏ ⵏⵏⴻⵙ ⵜⵜⵔⴰⴱⴰⵄⴻⵏ.

ⵉⵎⵏⴰⵢⴻⵏ ⵏⵏⴻⵙ ⵜⵜⴰⵙⴻⵏ-ⴷⴷ ⵣⵉ ⵍⴰⴳⴳⵯⴰⵊ,

ⵏⵉⵜⵏⵉ ⵟⵟⴰⵡⴻⵏ ⴰⵎ ⵓⴳⵉⴷⴻⵔ

ⵏⵏⵉ ⵉⵜⵜⵇⴻⴵⵇⴻⵏ ⵎⴰⵃⴻⵏⴷ ⴰⴷ ⵢⴻⵛⵛ.

9 ⴰⵇⴰ ⵏⴻⵜⵜⴰ ⵉⵜⵜⴰⵙ-ⴷⴷ, ⴰⵎⴻⵏ ⵉⴽⵎⴻⵍ, ⵉ ⵍⵄⵓⵏⴼ,

ⵉⵖⴻⵎⴱⴰⴱ ⵏⵙⴻⵏ ⵅⴻⵣⵣⴰⵔⴻⵏ ⵖⴰⵔ ⵣⵣⴰⵜ,

ⵓ ⵏⴻⵜⵜⴰ ⵉⵙⵙⵎⵓⵏⴰ ⵉⵎⴻⵃⴱⴰⵙ ⴰⵎ ⵢⴻⵊⴷⵉ.

10 ⵏⴻⵜⵜⴰ ⵉⵜⵜⵇⴻⵚⵚⴰⵔ ⵅ ⵉⵊⴻⴵⵉⴷⴻⵏ

ⵓ ⵉⵏⵏⵉ ⵉ ⵖⴰⵔ ⵜⴻⴵⴰ ⵚⵚⵓⵍⵟⴰ

ⵉⵜⵜⴻⴳⴳ ⵉ-ⵜⴻⵏ ⴷ ⵜⴰⴹⴻⵃⵃⴰⵛⵜ.

ⵡⴰⵀ, ⵏⴻⵜⵜⴰ ⵉⴹⴻⵃⵃⴻⵛ ⵅ ⴽⵓⵍ ⵍⵇⴻⵍⵄⴰ,

ⵎⵉⵏⵣⵉ ⵏⴻⵜⵜⴰ ⵉⵜⵜⵄⵓⵔⵔⴻⵛ ⵓⵛⴰⵍ

ⵓⵛⴰ ⴰⴷ ⵜⴻⵏⵜ ⵉⵟⵟⴻⴼ.

11 ⵅⴻⵏⵏⵉ ⴰⴷ ⵉⵏⵏⴻⵄⵜⴰⵔ ⴰⵎ ⵓⵙⴻⵎⵎⵉⴹ,

ⴰⴷ ⵉⵄⴷⵓ, ⴰⴷ ⵉⴷⵡⴻⵍ ⴷ ⴰⵎⴻⴷⵏⵓⴱ,

ⵎⴰⵖⴰⵔ ⵊⵊⴻⵀⴷ ⵏⵏⴻⵙ ⵡⴰⵏⵉⵜⴰ ⴷ ⴰⵔⴻⴱⴱⵉ ⵏⵏⴻⵙ.

12 ⵣⵉ ⵎⴻⵛⵃⴰⵍ ⵓⵢⴰ

ⵎⴰ ⵛⴻⴽ ⵡⴰⵔ ⵜⴻⴵⵉⴷ ⴷ ⵙⵉⴷⵉ,

ⴰⵔⴻⴱⴱⵉ ⵉⵏⵓ, ⴰⵎⵇⴻⴷⴷⴰⵙ ⵉⵏⵓ?

ⵏⴻⵛⵛⵉⵏ ⵡⴰⵔ ⵏⴻⵜⵜⵎⴻⵜⵜⵉ ⵛⴰ!

ⴰ ⵙⵉⴷⵉ, ⵛⴻⴽ ⵜⴰⵔⵔⵉⴷ ⵉ-ⵜ ⵉ ⵍⵃⵓⴽⵎ,

ⴰ ⵜⴰⵚⴹⴰⵔⵜ, ⵛⴻⴽ ⵜⴼⴰⵔⵣⴻⴷ ⵜ

ⵎⴰⵃⴻⵏⴷ ⴰⴷ ⵢⵉⵍⵉ ⵉ ⵍⵄⵉⵇⴰⴱ.

13 ⵛⴻⴽ ⴷ ⴰⵎⴻⵣⴷⴰⴳ ⴰⵟⵟⴰⵙ ⵏ ⵜⵉⵟⵟⴰⵡⵉⵏ

ⵃⵉⵎⴰ ⴰⴷ ⵜⵡⴰⵍⴰⵏⵜ ⵍⵖⴰⵔ.

ⵛⴻⴽ ⵡⴰⵔ ⵜⵣⴻⵎⵎⴰⵔⴻⴷ

ⴰⴷ ⵜⵚⴻⵡⴹⴻⴷ ⴷⵉ ⵍⵎⵓⵄⵚⵉⵢⵢⴻⵜ.

ⵎⴰⵢⴻⵎⵎⵉ ⵜⵚⴻⵡⴹⴻⴷ ⵡⴰⵀⴰ

ⴷⴻⴳ ⵢⵉⵏⵏⵉ ⵉⵜⵜⴻⴳⴳⴻⵏ ⵙ ⵍⴻⵖⴷⴰⵔⴻⵜ?

ⵎⴰⵢⴻⵎⵎⵉ ⵉ ⵜⴻⵙⵙⴻⵖⴹⴻⴷ

ⵅⵎⵉ ⵉⵚⴰⵔⵔⴻⴹ ⵓⵄⴻⴼⴼⴰⵏ

ⵉ ⵡⴻⵏⵏⵉ ⵉ ⵅⴰⵙ ⵉⵙⴻⴳⴳⴷⴻⵏ?

14 ⵛⴻⴽ ⵜⴻⴳⴳⵉⴷ ⵉⵡⴷⴰⵏ

ⴰⵎ ⵢⵉⵙⴻⵍⵎⴰⵏ ⵏ ⵍⴻⴱⵃⴰⵔ,

ⴰⵎ ⵉⵎⵎⵓⴷⴰⵔ ⵏⵏⵉ ⵉⵜⵜⴱⵓⵄⴻⵏ

ⵅ ⵜⴻⵎⵎⵓⵔⵜ ⵉ ⵡⴰⵔ ⵖⴰⵔ ⵉⴵⵉ ⵍⵃⴰⴽⴻⵎ!

15 ⵙ ⵜⵙⴻⵏⵏⴰⵔⵜ ⵉⵙⵙⴳⴻⵄⵄⴰⴷ ⵉ-ⵜⴻⵏ-ⴷⴷ ⵎⴰⵔⵔⴰ,

ⵉⵢⴰⵔⵔⵓ ⵉ-ⵜⴻⵏ ⵙ ⵜⵔⴰⵛⵛⴰ ⵏⵏⴻⵙ,

ⵓⵛⴰ ⵉⵙⵙⵎⵓⵏ ⵉ-ⵜⴻⵏ ⴷⵉ ⵜⵔⴰⵛⵛⴰ ⵏⵏⴻⵙ ⵏ ⵓⴷⴻⵍⵍⴰⵄ.

ⵅ ⵓⵢⴰ ⵉⴼⴰⵔⵔⴻⵃ ⵓ ⵉⵜⵜⴼⴰⵊⴰ.

16 ⵅ ⵓⵢⴰ ⵉⵡⴻⵀⵀⴻⴱ ⵜⵉⵖⴰⵔⵚⴰ ⵉ ⵜⵔⴰⵛⵛⴰ ⵏⵏⴻⵙ,

ⵓⵛⴰ ⵉⴱⴻⵅⵅⴰⵔ ⵜⵉⵡⵀⵉⴱⵉⵏ ⵏ ⵍⴻⴱⵅⵓⵔ

ⵉ ⵜⵔⴰⵛⵛⴰ ⵏ ⵓⴷⴻⵍⵍⴰⵄ ⵏⵏⴻⵙ.

ⵎⵉⵏⵣⵉ ⵣⵣⴰⵢⵙⴻⵏⵜ ⵉ ⵜⴻⴷⵡⴻⵍ

ⵜⴻⵙⵖⴰⵔⵜ ⵏⵏⴻⵙ ⵜⴻⵎⵖⴰⵔ,

ⵓⵍⴰ ⴷ ⵎⴰⵛⵛⴰ ⵏⵏⴻⵙ ⴰⵇⴰ ⵜⵍⴻⴷⴷ.

17 ⵎⴰ ⵉⵄⴻⴷⴷⴻⵍ ⴰⴷ ⵉⵇⵇⵉⵎ ⵉⵙⵙⴻⵅⵡⴰ

ⵜⵔⴰⵛⵛⴰ ⵏⵏⴻⵙ ⵅ ⵎⴰⵏ ⴰⵢⴰ,

ⵓⵛⴰ ⴰⴷ ⵉⵇⵇⵉⵎ ⵍⴻⴱⴷⴰ ⵉⵏⴻⵇⵇ ⵍⴻⴳⵏⵓⵙ

ⴱⵍⴰ ⵎⴰ ⴰⴷ ⵢⴻⵊⵊ ⵃⴻⴷ?