1 “ⴰⵎ ⵙⵙⴳⴻⵏⴼⵉⵖ ⵉⵙⵔⴰⵉⵍ, ⵜᵉⵜⵜⵡⴰⵄⴰⵔⵔ ⵍⵎⵓⵄⵚⵉⵢⵢⴻⵜ ⵏ ⵉⴼⵔⴰⵢⵉⵎ ⴷ ⵜⵓⵄⴻⴼⴼⵏⴰ ⵏ ⵙⴰⵎⴰⵔⵢⴰ, ⵎⴰⵖⴰⵔ ⵏⵉⵜⵏⵉ ⵜⵜⴻⴳⴳⴻⵏ ⵙ ⵍⵖⴻⵛⵛ. ⴰⵛⴻⴼⴼⴰⵔ ⵉⵜⵜⴰⴷⴻⴼ ⵓ ⵉⵛⵜ ⵏ ⴱⴰⵏⴷⵉⵢⵢⴰ ⵜᵉⵜⵜⴽⴻⵛⵛⴰⴹ ⴷⵉ ⴱⴰⵔⵔⴰ. 2 ⵎⴰⵛⴰ ⵡⴰⵔ ⵇⵇⴰⵔⴻⵏ ⵄⴻⵎⵎⴰⵔⵚ ⴷⴻⴳ ⵡⵓⵍ ⵏⵙⴻⵏ, ⴰⵇⴰ ⵏⴻⵛⵛ ⴰⴷ ⵅⴰⵔⵔⵚⴻⵖ ⴷⵉ ⵎⴰⵔⵔⴰ ⵍⵖⴰⵔ ⵏⵙⴻⵏ. ⵅⴻⵏⵏⵉ ⵍⴻⵅⵅⵓ, ⵏⵏⴹⴻⵏⵜ ⴰⵙⴻⵏ ⵜⵎⴻⴳⴳⴰ ⵏⵙⴻⵏ, ⴰⵇⴰ ⴰⵜⴻⵏⵜ ⵣⵣⴰⵜ ⵉ ⵡⵓⴷⴻⵎ ⵉⵏⵓ. 3 ⵏⵉⵜⵏⵉ ⵙⵙⴼⵔⴰⵃⴻⵏ ⴰⵊⴻⴵⵉⴷ ⵙ ⵍⵖⴰⵔ ⵏⵙⴻⵏ ⵓ ⵍⵃⵓⴽⴽⴰⵎ ⵙⵙⴼⵔⴰⵃⴻⵏ ⵜⴻⵏ ⵙ ⵉⵅⴰⵔⵔⵉⵇⴻⵏ ⵏⵙⴻⵏ. 4 ⵏⵉⵜⵏⵉ ⵎⴰⵔⵔⴰ ⴷ ⵉⵎⵣⴻⵏⵏⴰⵢⴻⵏ, ⴰⵇⴰ ⴰⵜⴻⵏ ⴰⵎ ⵢⵉⵊⵊ ⵏ ⵓⴼⴰⵔⵔⴰⵏ ⵏⵏⵉ ⵉⵜⵜⵡⴰⵙⵙⴻⵃⵎⴰⵏ ⵣⴻⴳ ⵓⵅⴻⴱⴱⴰⵣ. ⵡⴰⵏⵉⵜⴰ ⴰⴷ ⵉⵙⵙⴱⴻⴷⴷ ⵣⴻⴳ ⵓⵛⴻⵎⵎⵓⴹ ⴰⵡⴰⵔⵏⵉ ⵍⴰⵎⵉ ⴳⴳⵯⵉⵏ ⴰⵔⴻⵛⵜⵉ ⴰⵍ ⵉⵙⵎⴻⵎ ⵇⴰⵄ. 5 ⴷⴻⴳ ⵡⴰⵙⵙ ⵏ ⵓⵊⴻⴵⵉⴷ ⵏⵏⴻⵖ ⵙⵙⵀⴻⵍⵛⴻⵏ ⵍⵃⵓⴽⴽⴰⵎ ⵉⵅⴻⴼ ⵏⵙⴻⵏ ⵙ ⵍⵃⴰⴷⵓⵇ ⵏ ⴱⵉⵏⵓ. ⵏⴻⵜⵜⴰ ⵉⵙⵙⵡⵉⵥⵥⴻⴹ ⴰⴼⵓⵙ ⵏⵏⴻⵙ ⵉ ⵢⵉⵎⴻⵙⵜⴻⵀⵣⴰⵢⴻⵏ. 6 ⵅⵎⵉ ⴷⴷ-ⵜⵜⵇⴰⵔⵔⴰⴱⴻⵏ, ⵢⴰⵔⴻⵇⵇ ⵓⵍ ⵏⵙⴻⵏ ⴰⵎ ⵢⵉⵊⵊ ⵏ ⵓⴼⴰⵔⵔⴰⵏ ⵣⵉ ⵜⵃⵔⴰⵢⵎⴻⵛⵜ ⵏⵙⴻⵏ. ⵉⵜⵜⴻⵟⵟⴻⵚ ⵓⵅⴻⴱⴱⴰⵣ ⵏⵙⴻⵏ ⴵⵉⵍⴻⵜ ⵜⴻⴽⵎⴻⵍ. ⵖⴰⵔ ⵚⵚⴱⴻⵃ ⵢⴰⵔⴻⵇⵇ ⵓⴼⴰⵔⵔⴰⵏ ⴰⵎ ⵜⵎⴻⵙⵙⵉ ⵉⵜⵜⴻⵃⴷⵓⴷⵓⵇⴻⵏ. 7 ⵏⵉⵜⵏⵉ ⵎⴰⵔⵔⴰ ⵃⴻⵎⵎⴰⵏ ⴰⵎ ⵢⵉⵊⵊ ⵏ ⵓⴼⴰⵔⵔⴰⵏ ⵓ ⵏⵉⵜⵏⵉ ⵜⵜᵉⵜⵜⴻⵏ ⵍⵇⵓⴹⴰⵜ ⵏⵙⴻⵏ. ⵎⴰⵔⵔⴰ ⵉⵊⴻⴵⵉⴷⴻⵏ ⵏⵙⴻⵏ ⴰⴷ ⵡⴹⴰⵏ, ⵡⴰⵔ ⴷⵉⵏ ⵓⵍⴰ ⴷ ⵉⵊⵊ ⵊⴰⵔ ⴰⵙⴻⵏ ⵉ ⴷⴷ ⵅⴰⴼⵉ ⵖⴰ ⵉⵍⴰⵖⴰⵏ.”

8 “ⵉⴼⵔⴰⵢⵉⵎ ⵉⵊⵊⴰ ⵉⵅⴻⴼ ⵏⵏⴻⵙ ⵉⵙⵙⵓⵔ ⵊⴰⵔ ⵍⴻⴳⵏⵓⵙ, ⵉⴼⵔⴰⵢⵉⵎ ⴷ ⵉⵛⵜ ⵏ ⵜⴻⴼⴹⵉⵍⵜ ⵡⴰⵔ ⵜᵉⵜⵜⵡⴰⵙⵙⵏⴻⵇⵍⴻⴱ ⵛⴰ. ◘7:8 ⵉⵥⵀⴷ. 106:35 9 ⵉⴱⴰⵔⵔⴰⵏⵉⵢⵢⴻⵏ ⵙⴰⵔⴹⴻⵏ ⵊⵊⴻⵀⴷ ⵏⵏⴻⵙ, ⵡⴰⵔ ⴰⴽⵉⴷⴻⵙ ⵉⵜⵜⵉⵛⵉ. ⵓⵍⴰ ⴷ ⴰⵛⵓⵡⵡⴰⴼ ⵏⵏⴻⵙ ⵉⵜⵜⵛⴰⴱ, ⵡⴰⵔ ⴰⴽⵉⴷⴻⵙ ⵉⵜⵜⵉⵛⵉ. 10 ⴰⵄⴻⴼⴼⴰⵔ ⵏ ⵉⵙⵔⴰⵉⵍ ⴰⴷ ⵅⴰⵙ ⵉⴷⵄⴰ, ⵎⴰⵖⴰⵔ ⵏⵉⵜⵏⵉ ⵡⴰⵔ ⴷⴷⵉⴽⴽⵡⵉⵍⴻⵏ ⵛⴰ ⵖⴰⵔ ⵙⵉⴷⵉ, ⴰⵔⴻⴱⴱⵉ ⵏⵙⴻⵏ, ⵓ ⵡⴰⵔ ⵜ ⴰⵔⵣⵓⵏ ⵛⴰ ⴷⵉ ⵎⴰⵔⵔⴰ ⵎⴰⵏ ⴰⵢⴰ. ◘7:10 ⵃⵓⵛ. 5:5 11 ⵉⴼⵔⴰⵢⵉⵎ ⵉⴳⴳⴰ ⴰⵎ ⵢⵉⵛⵜ ⵏ ⵜⴻⴷⴱⵉⵔⵜ ⴰⵃⴰⴼⵉ, ⵡⴰⵔ ⴷⴰⵢⴻⵙ ⵍⴻⴼⵀⴰⵎⴻⵜ. ⵏⵉⵜⵏⵉ ⵜⵜⵍⴰⵖⴰⵏ ⵅ ⵎⵉⵚⵔⴰ, ⴳⴳⵓⵔⴻⵏ ⵖⴰⵔ ⴰⵛⵛⵓⵔ. 12 ⵅⵎⵉ ⴳⴳⵓⵔⴻⵏ ⵏⵉⵜⵏⵉ, ⵜⵜⴱⴻⵣⵣⴰⵄⴻⵖ ⵏⴻⵛⵛ ⵜⵔⴰⵛⵛⴰ ⵉⵏⵓ ⵅⴰⵙⴻⵏ, ⴰⴷ ⵜⴻⵏ ⴷⴷ-ⵙⵙⴻⵀⵡⵉⵖ ⴰⵎ ⵢⵉⵊⴹⴰⴹ ⵏ ⵓⵊⴻⵏⵏⴰ, ⴰⴷ ⵜⴻⵏ ⵡⴻⴱⴱⵅⴻⵖ ⵅ ⵍⴻⵃⵙⴰⴱ ⵏ ⵍⴻⵅⴱⴰⵔ ⵣⵉ ⵊⵊⵀⴻⵜ ⵏ ⵜⵎⴻⵙⵎⵓⵏⵜ ⵏⵙⴻⵏ. 13 ⵓⵛⵜ ⵅⴰⵙⴻⵏ ⵎⴰⵖⴰⵔ ⵏⵉⵜⵏⵉ ⴰⵔⴻⵡⵍⴻⵏ ⵣⵣⴰⵢⵉ. ⴰⴽⴻⵃⵃⴻⴹ ⵅⴰⵙⴻⵏ, ⵎⴰⵖⴰⵔ ⵏⵉⵜⵏⵉ ⵄⴻⴷⴷⴰⵏ ⵅⴰⴼⵉ. ⵏⴻⵛⵛ ⴳⴳⵉⵖ ⴰⴷ ⵜⴻⵏ ⴼⴷⵉⵖ, ⵎⴰⵛⴰ ⵏⵉⵜⵏⵉ ⵏⵏⴰⵏ ⵅⴰⴼⵉ ⵉⵅⴰⵔⵔⵉⵇⴻⵏ. 14 ⵏⵉⵜⵏⵉ ⵡⴰⵔ ⴷⴷ-ⵙⵖⵓⵢⴻⵏ ⵛⴰ ⵖⴰⵔⵉ ⵙ ⵡⵓⵍ ⵏⵙⴻⵏ, ⵅⵎⵉ ⵟⵟⵚⴻⵏ ⵏⵉⵜⵏⵉ ⵅ ⵍⴻⵛⵜⵓ ⵏⵙⴻⵏ ⵜⵜⵛⴻⵜⵛⴰⵏ. ⵏⵉⵜⵏⵉ ⵜⵜⵎⵓⵏⴰⵏ ⴷⵉ ⵟⵟⵡⴻⵄ ⵏ ⵉⵎⴻⵏⴷⵉ ⴷ ⴱⵉⵏⵓ ⵏ ⵊⴷⵉⴷ, ⴰⵇⴰ ⵜⵜⵖⴻⵏⵏⴰⵏ ⵅⴰⴼⵉ. 15 ⵏⴻⵛⵛ ⴷⴰⵔⵔⴱⴻⵖ ⵓ ⵙⵙⵊⴻⵀⴷⴻⵖ ⵉⵖⴰⴵⴻⵏ ⵏⵙⴻⵏ, ⵎⴰⵛⴰ ⵏⵉⵜⵏⵉ ⵜⵜⵅⴰⵔⵔⴰⵚⴻⵏ ⴷⴰⵢⵉ ⴷⵉ ⵍⵖⴰⵔ. 16 ⵏⵉⵜⵏⵉ ⵜⵜⵄⴰⵇⵇⴰⴱⴻⵏ, ⵎⴰⵛⴰ ⵡⴰⵔ ⵉⴵⵉ ⵖⴰⵔ ⵓⵎⵄⵓⴵⵉ ⵅ ⴽⵓⵍⵛⵉ. ⴰⵇⴰ ⴰⵜⴻⵏ ⴰⵎ ⵢⵉⵊⵊ ⵏ ⵍⵇⴻⵡⵙ ⵉⵅⴻⵟⵟⴰⵏ, ⵍⵃⵓⴽⴽⴰⵎ ⵏⵙⴻⵏ ⵡⴻⵟⵟⴰⵏ ⵣⵉ ⵙⵙⵉⴼ, ⵣⵉ ⵙⴻⵎⵎ ⵉⵏⴻⵇⵇⴻⵏ ⵏ ⵢⵉⵍⴻⵙ ⵏⵙⴻⵏ. ⵙ ⵓⵢⴻⵏⵏⵉ ⴰⴷ ⵅⴰⵙⴻⵏ ⴳⴳⴻⵏ ⵜⵉⴹⴻⵃⵃⴰⵛ ⴷⵉ ⵜⴻⵎⵎⵓⵔⵜ ⵏ ⵎⵉⵚⵔⴰ.” ◘7:16 ⵉⵥⵀⴷ. 78:57