1 ⴷⵉ ⵍⵡⴻⵇⵜ ⵏⵏⵉ ⵉⵙⵙⴻⴽⴽ ⴱⴰⵔⴰⴷⵓⵅ-ⴱⴰⵍⴰⴷⴰⵏ, ⵎⵎⵉⵙ ⵏ ⴱⴰⵍⴰⴷⴰⵏ, ⴰⵊⴻⴵⵉⴷ ⵏ ⴱⴰⴱⵉⵍ, ⵜⵉⴱⵔⴰⵜⵉⵏ ⴷ ⵉⵛⵜ ⵏ ⵜⴰⵔⵣⴻⴼⵜ ⵖⴰⵔ ⵃⵉⵣⵇⵉⵢⴰ, ⵎⴰⵖⴰⵔ ⵜⵓⵖⴰ ⵉⵙⵍⴰ ⴰⵇⴰ ⵃⵉⵣⵇⵉⵢⴰ ⵉⵀⵍⴻⵛ ⵓⵛⴰ ⵉⴳⴳⴻⵏⴼⴰ. 2 ⵉⴼⴰⵔⵃ ⵣⵣⴰⵢⵙⴻⵏ ⵃⵉⵣⵇⵉⵢⴰ ⵓⵛⴰ ⵉⵙⵙⵛⴻⵏ ⴰⵙⴻⵏ ⵎⴰⵔⵔⴰ ⵜⴰⴷⴷⴰⵔⵜ ⵏ ⵜⵅⵓⴱⴰⵢ ⵏⵏⴻⵙ: ⵏⵏⵓⵇⴰⵔⵜ ⴷ ⵡⵓⵔⴻⵖ ⴷ ⵍⴻⵄⵟⵓⵔ ⴷ ⵣⵣⴻⵛⵜ ⴷ ⵍⴻⵀⵔⵉ ⵏ ⵍⴻⵙⵏⴰⵃ ⵏⵏⴻⵙ ⴷ ⵎⴰⵔⵔⴰ ⵎⵉⵏ ⵉⵜⵜⵡⴰⴼⴻⵏ ⴷⴻⴳ ⵉⵅⵅⴰⵎⴻⵏ ⵏⵏⴻⵙ ⵏ ⵜⵅⵓⴱⴰⵢ. ⵡⴰⵔ ⵉⵇⵇⵉⵎ ⵡⴰⵍⵓ ⴷⵉ ⵜⴰⴷⴷⴰⵔⵜ ⵏⵏⴻⵙ ⵓ ⴷⵉ ⵎⴰⵔⵔⴰ ⵍⴻⵃⴽⴰⵎⴻⵜ ⵏⵏⴻⵙ ⵏⵏⵉ ⵡⴰⵔ ⵜⵓⵖⵉ ⴷ ⴰⵙⴻⵏ ⵜ ⵉⵙⵙⵛⴻⵏ.

3 ⵅⴻⵏⵏⵉ ⵢⵓⵙⴰ-ⴷⴷ ⵓⵏⴰⴱⵉ ⵉⵛⴰⵄⵢⴰ ⵖⴰⵔ ⵓⵊⴻⴵⵉⴷ ⵃⵉⵣⵇⵉⵢⴰ, ⵉⵏⵏⴰ ⴰⵙⴻⵏ: “ⵎⵉⵏ ⵏⵏⴰⵏ ⵉⵔⵢⴰⵣⴻⵏ ⵏⵏⵉ ⵓ ⵎⴰⵏⵉⵙ ⵖⴰⵔⴻⴽ ⴷⴷ-ⵓⵙⵉⵏ?” ⵃⵉⵣⵇⵉⵢⴰ ⵉⵏⵏⴰ: “ⵏⵉⵜⵏⵉ ⵓⵙⵉⵏ-ⴷⴷ ⵣⴻⴳ ⵉⵛⵜ ⵏ ⵜⴻⵎⵎⵓⵔⵜ ⵜⵉⴳⴳⵯⴻⵊ, ⵣⵉ ⴱⴰⴱⵉⵍ.” 4 ⵏⴻⵜⵜⴰ ⵉⵏⵏⴰ: “ⵎⵉⵏ ⵥⵔⵉⵏ ⵏⵉⵜⵏⵉ ⴷⵉ ⵜⴰⴷⴷⴰⵔⵜ ⵏⵏⴻⵛ?” ⵃⵉⵣⵇⵉⵢⴰ ⵉⵏⵏⴰ: “ⵏⵉⵜⵏⵉ ⵥⵔⵉⵏ ⵎⴰⵔⵔⴰ ⵎⵉⵏ ⵉⴵⴰⵏ ⴷⵉ ⵜⴰⴷⴷⴰⵔⵜ ⵉⵏⵓ. ⵡⴰⵔ ⵉⵇⵇⵉⵎ ⵛⴰ ⵣⵉ ⵎⵉⵏ ⵉⴵⴰⵏ ⴷⴻⴳ ⵉⵅⵅⴰⵎⴻⵏ ⵏ ⵜⵅⵓⴱⴰⵢ ⵉⵏⵓ, ⵡⴰⵔ ⴷ ⴰⵙⴻⵏ ⵜ ⵙⵙⴻⵛⵏⴻⵖ.” 5 ⵅⴻⵏⵏⵉ ⵉⵏⵏⴰ ⵉⵛⴰⵄⵢⴰ ⵉ ⵃⵉⵣⵇⵉⵢⴰ: “ⵙⴻⵍ ⵉ ⵡⴰⵡⴰⵍ ⵏ ⵙⵉⴷⵉ ⵏ ⵍⵄⴻⵙⴽⴰⵔⴰⵜ: 6 ‘ⵅⵣⴰⵔ, ⴰⴷ ⴷⴷ-ⴰⵙⴻⵏ ⵡⵓⵙⵙⴰⵏ ⵎⴻⵍⵎⵉ ⵎⴰⵔⵔⴰ ⵎⵉⵏ ⵉⴵⴰⵏ ⴷⵉ ⵜⴰⴷⴷⴰⵔⵜ ⵏⵏⴻⵛ ⵓⵍⴰ ⴷ ⵎⵉⵏ ⵢⴰⵔⵡⴻⵏ ⵍⴻⵊⴷⵓⴷ ⵏⵏⴻⵛ ⴰⵍ ⴰⵙⵙ-ⴰ, ⴰⴷ ⵜ ⴰⵡⵢⴻⵏ ⵖⴰⵔ ⴱⴰⴱⵉⵍ. ⵡⴰⵔ ⵉⵜⵜⵖⵉⵎⵉ ⵡⴰⵍⵓ, ⵉⵇⵇⴰⵔ ⵙⵉⴷⵉ. 7 ⴰⴷ ⴰⵡⵢⴻⵏ ⵓⵍⴰ ⵣⴻⴳ ⵉⵃⴻⵏⵊⵉⵔⴻⵏ ⵏⵏⴻⵛ ⵉⵏⵏⵉ ⴷⴷ ⵖⴰ ⵉⴼⴼⵖⴻⵏ ⵣⵣⴰⵢⴻⴽ, ⵉⵏⵏⵉ ⴷⴷ ⵖⴰ ⵜⴻⵊⵊⴻⴷ, ⵃⵉⵎⴰ ⴰⴷ ⵉⵍⵉⵏ ⴷ ⵉⵎⵙⴻⵅⵅⴰⵔⴻⵏ ⵉⵎⵛⴻⵏⵏⵄⴻⵏ ⴷⵉ ⵍⴻⵇⵚⴰⵔ ⵏ ⵓⵊⴻⴵⵉⴷ ⵏ ⴱⴰⴱⵉⵍ.’ ” 8 ⵃⵉⵣⵇⵉⵢⴰ ⵉⵏⵏⴰ ⵉ ⵉⵛⴰⵄⵢⴰ: “ⴰⵡⴰⵍ ⵏ ⵙⵉⴷⵉ ⵉ ⴷ ⴰⵢⵉ ⵜⴻⵏⵏⵉⴷ ⵉⵚⴱⴻⵃ.” ⵏⴻⵜⵜⴰ ⵉⵏⵏⴰ ⵄⴰⵡⴻⴷ: “ⵎⴰⵍⴰ ⵅⴻⵏⵏⵉ ⴷⴻⴳ ⵡⵓⵙⵙⴰⵏ ⵉⵏⵓ ⴰⴷ ⴷⵉⵏ ⵢⵉⵍⵉ ⵍⴻⵀⵏⴰ ⴷ ⵍⴰⵎⴰⵏ!”