1 ⵍⴰⵎⵉ ⵛⴰⴼⴰⵟⵢⴰ, ⵎⵎⵉⵙ ⵏ ⵎⴰⵜⵜⴰⵏ, ⴷ ⵊⴰⴷⴰⵍⵢⴰ, ⵎⵎⵉⵙ ⵏ ⴼⴰⵛⵃⵓⵔ, ⴷ ⵢⵓⵅⴰⵍ, ⵎⵎⵉⵙ ⵏ ⵛⴰⵍⴰⵎⵢⴰ, ⴷ ⴼⴰⵛⵃⵓⵔ, ⵎⵎⵉⵙ ⵏ ⵎⴰⵍⴽⵉⵢⴰ, ⵙⵍⵉⵏ ⵉ ⵡⴰⵡⴰⵍⴻⵏ ⵏⵏⵉ ⵉⵙⵙⵉⵡⴻⵍ ⵉⵔⵎⵉⵢⴰ ⵖⴰⵔ ⵎⴰⵔⵔⴰ ⵍⴳⴻⵏⵙ, ⵓⵎⵉ ⵡⴰⵏⵉⵜⴰ ⵉⵏⵏⴰ: 2 “ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ: ‘ⵡⴻⵏⵏⵉ ⵉ ⵖⴰ ⵉⵇⵇⵉⵎⴻⵏ ⴷⵉ ⵜⴻⵏⴷⵉⵏⵜ-ⴰ, ⴰⴷ ⵉⵜⵜⵡⴰⵏⴻⵖ ⵙ ⵙⵙⵉⴼ, ⵙ ⵍⴰⵥ ⵏⵉⵖ ⵙ ⵟⵟⴰⵄⵓⵏ, ⵎⴰⵛⴰ ⵡⴻⵏⵏⵉ ⵉ ⵖⴰ ⵉⴼⴼⵖⴻⵏ ⵖⴰⵔ ⵉⴽⴰⵍⴷⴰⵏⵉⵢⵢⴻⵏ, ⴰⴷ ⵉⵇⵇⵉⵎ ⵉⴷⴷⴰⵔ. ⵏⴻⵜⵜⴰ ⴰⴷ ⵢⴰⵡⵉ ⴰⴽⵉⴷⴻⵙ ⴱⵓⵃⴱⴻⵍ ⵏⵏⴻⵙ ⴰⵎ ⵜⴽⴻⵛⵛⴰⴹⵜ, ⴰⴷ ⵉⵇⵇⵉⵎ ⵉⴷⴷⴰⵔ!’. ◘38:2 ⵉⵔⵎ. 21:9 3 ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ: ‘ⵜⴰⵏⴷⵉⵏⵜ-ⴰ ⴰⴷ ⵜⴻⵎⵎⴻⵡⵛ ⴷⴻⴳ ⵓⴼⵓⵙ ⵏ ⵍⵄⴻⵙⴽⴰⵔ ⵏ ⵓⵊⴻⴵⵉⴷ ⵏ ⴱⴰⴱⵉⵍ ⵓ ⵏⴻⵜⵜⴰ ⴰⴷ ⵜⵜ ⵉⵟⵟⴻⴼ!’ ”, 4 ⵍⴻⵅⴷⴻⵏⵏⵉ ⵏⵏⴰⵏ ⵍⵃⵓⴽⴽⴰⵎ ⵉ ⵓⵊⴻⴵⵉⴷ: “ⵉⵜⵜⵅⴻⵚⵚⴰ ⴰⴷ ⵉⵜⵜⵡⴰⵏⴻⵖ ⵡⴻⵔⵢⴰⵣ-ⴰ, ⵎⵉⵏⵣⵉ ⴰⵎⵎⵓ ⵉ ⵉⵙⵙⴻⴼⵛⴰⵍ ⵉⴼⴰⵙⵙⴻⵏ ⵏ ⵉⵄⴻⵙⴽⴰⵔⵉⵢⵢⴻⵏ ⵏⵏⵉ ⵄⴰⴷ ⵉⵇⵇⵉⵎⴻⵏ ⴷⵉ ⵜⴻⵏⴷⵉⵏⵜ-ⴰ ⵓⵍⴰ ⴷ ⵉⴼⴰⵙⵙⴻⵏ ⵏ ⵎⴰⵔⵔⴰ ⵍⴳⴻⵏⵙ ⵓⵎⵉ ⵖⴰⵔⵙⴻⵏ ⵉⵙⵙⴰⵡⴰⵍ ⴰⵡⴰⵍⴻⵏ-ⴰ, ⵎⴰⵖⴰⵔ ⴰⵔⵢⴰⵣ-ⴰ ⵡⴰⵔ ⵢⴰⵔⴻⵣⵣⵓ ⵛⴰ ⵍⴻⵀⵏⴰ ⵉ ⵜⴻⵏⴷⵉⵏⵜ-ⴰ, ⵎⴰⵛⴰ ⵢⴰⵔⴻⵣⵣⵓ ⵍⵖⴰⵔ.” 5 ⵉⵏⵏⴰ ⵓⵊⴻⴵⵉⴷ ⵚⵉⴷⵇⵉⵢⴰ: “ⵅⵣⴰⵔ, ⵏⴻⵜⵜⴰ ⴰⵇⴰ-ⵜ ⴷⴻⴳ ⵓⴼⵓⵙ ⵏⵏⴻⵎ, ⵎⴰⵖⴰⵔ ⴰⵊⴻⴵⵉⴷ ⵡⴰⵔ ⵉⵣⴻⵎⵎⴰⵔ ⴰⴷ ⴰⵡⴻⵎ ⵉⴳⴳ ⵡⴰⵍⵓ.” 6 ⵟⵟⴼⴻⵏ ⵏⵉⵜⵏⵉ ⵉⵔⵎⵉⵢⴰ ⵓⵛⴰ ⵏⴹⴰⵔⴻⵏ ⵜ ⴷⴻⴳ ⵡⴰⵏⵓ ⵏ ⵎⵎⵉⵙ ⵏ ⵓⵊⴻⴵⵉⴷ ⵎⴰⵍⴽⵉⵢⴰ, ⵡⴻⵏⵏⵉ ⵉⴵⴰⵏ ⴷⵉ ⵍⴻⵎⵔⴰⵃ ⵏ ⵍⴻⵃⴱⴻⵙ. ⵙⴻⵢⵢⴱⴻⵏ ⵉⵔⵎⵉⵢⴰ ⵙ ⵉⵙⴻⵖⵡⴰⵏ ⵙⵡⴰⴷⴷⴰⵢ. ⵜⵓⵖⴰ ⵡⴰⵔ ⴷⵉⵏ ⴱⵓ ⵡⴰⵎⴰⵏ ⴷⴻⴳ ⵡⴰⵏⵓ, ⵎⴰⵛⴰ ⵎⵖⵉⵔ ⴰⴱⴰⵔⵢⵓⴹ ⵓⵛⴰ ⵉⵖⴹⴻⵙ ⵉⵔⵎⵉⵢⴰ ⴷⴻⴳ ⵓⴱⴰⵔⵢⵓⴹ.

7 ⵓⵎⵉ ⵉⵙⵍⴰ ⵄⴰⴱⴷ-ⵎⴰⵍⵉⴽ, ⴰⴽⵓⵛⵉ, ⵉⵊⵊ ⵏ ⵓⵎⵙⴻⵅⵅⴰⵔ ⴰⵎⵛⴻⵏⵏⴻⵄ ⴷⵉ ⵜⴰⴷⴷⴰⵔⵜ ⵏ ⵓⵊⴻⴵⵉⴷ, ⴰⵇⴰ ⵏⴹⴰⵔⴻⵏ ⵉⵔⵎⵉⵢⴰ ⴷⴻⴳ ⵡⴰⵏⵓ, ⵓⵛⴰ ⵉⵇⵇⵉⵎ ⵓⵊⴻⴵⵉⴷ ⵖⴰⵔ ⵜⴻⵡⵡⴰⵔⵜ ⵏ ⴱⵉⵏⵢⴰⵎⵉⵏ, ◼38:7 ⴰⴽⵓⵛⵉ-ⵉⵊⵊ ⵏ ⵡⴻⵔⵢⴰⵥ ⵥⵉ ⵜⴻⵎⵎⵓⵔⵜ ⵏ ⴽⵓⵛ ⵏⵏⵉ ⵉⴵⴰⵏ ⴷ ⵙⵙⵓⴷⴰⵏ ⴷ ⵉⵜⵉⵢⵓⴱⵉⵢⵢⴰ ⵏ ⵢⵉⴹⴰ. 8 ⵉⴼⴼⴻⵖ ⵄⴰⴱⴷ-ⵎⴰⵍⵉⴽ ⵣⵉ ⵜⴰⴷⴷⴰⵔⵜ ⵏ ⵓⵊⴻⴵⵉⴷ ⵓⵛⴰ ⵉⵙⵙⵉⵡⴻⵍ ⴰⴽ-ⴷ ⵓⵊⴻⴵⵉⴷ, ⵉⵏⵏⴰ: 9 “ⴰ ⵙⵉⴷⵉ ⵉⵏⵓ ⴰⵊⴻⴵⵉⴷ, ⵉⵔⵢⴰⵣⴻⵏ-ⴰ ⴳⴳⵉⵏ ⵎⵉⵏ ⵡⴰⵔ ⵉⵃⵍⵉⵏ ⴷⵉ ⵎⴰⵔⵔⴰ ⵎⵉⵏ ⴳⴳⵉⵏ ⵉ ⵓⵏⴰⴱⵉ ⵉⵔⵎⵉⵢⴰ, ⵡⴻⵏⵏⵉ ⵏⴹⴰⵔⴻⵏ ⵏⵉⵜⵏⵉ ⴷⴻⴳ ⵡⴰⵏⵓ. ⵜⵓⵖⴰ ⵉⵣⴻⵎⵎⴰⵔ ⴰⴷ ⴷⵉⵏⵏⵉ ⵉⵎⵎⴻⵜ ⵙ ⵍⴰⵥ, ⵎⴰⵖⴰⵔ ⵄⴰⴷ ⵡⴰⵍⵓ ⴰⵖⵔⵓⵎ ⴷⵉ ⵜⴻⵏⴷⵉⵏⵜ.” 10 ⵅⴻⵏⵏⵉ ⵢⵓⵎⵓⵔ ⵓⵊⴻⴵⵉⴷ ⵄⴰⴱⴷ-ⵎⴰⵍⵉⴽ ⴰⴽⵓⵛⵉ ⵣⵉ ⵜⴻⵎⵎⵓⵔⵜ ⵏ ⴽⵓⵛ, ⵉⵏⵏⴰ: “ⴽⵙⵉ ⵙⵙⴻⵏⵏⵉ ⵜⵍⴰⵜⵉⵏ ⵏ ⵢⴻⵔⵢⴰⵣⴻⵏ ⵙⴰⴷⵓ ⵓⴼⵓⵙ ⵏⵏⴻⵛ ⵓⵛⴰ ⵙⴳⴻⵄⵄⴻⴷ ⴰⵏⴰⴱⵉ ⵉⵔⵎⵉⵢⴰ ⵣⴻⴳ ⵡⴰⵏⵓ ⵇⴱⴻⵍ ⵉ ⵖⴰ ⵉⵎⵎⴻⵜ.” 11 ⵄⴰⴱⴷ-ⵎⴰⵍⵉⴽ ⵉⴽⵙⵉ ⵉⵔⵢⴰⵣⴻⵏ ⵏⵏⵉ ⵙⴰⴷⵓ ⵓⴼⵓⵙ ⵏⵏⴻⵙ ⵓⵛⴰ ⵢⵓⴷⴻⴼ ⵖⴰⵔ ⵜⴰⴷⴷⴰⵔⵜ ⵏ ⵓⵊⴻⴵⵉⴷ ⴰⵍ ⵡⴰⴷⴷⴰⵢ ⵏ ⵡⴻⵅⵅⴰⵎ ⵏ ⵜⵅⵓⴱⴰⵢ. ⵙⵙⴻⵏⵏⵉ ⵉⴽⵙⵉ ⵉⴽⴻⵜⵜⴰⵏⴻⵏ ⵉⵇⴷⵉⵎⴻⵏ ⴷ ⵡⴰⵔⵔⵓⴹ ⵉⵇⵇⴰⵔⵚⴻⵏ ⵓⵛⴰ ⵉⵙⵙⴻⵀⵡⴰ ⵉ-ⵜⴻⵏ-ⴷⴷ ⵙ ⵉⵙⴻⵖⵡⴰⵏ ⵖⴰⵔ ⵉⵔⵎⵉⵢⴰ ⴷⴻⴳ ⵡⴰⵏⵓ. 12 ⵅⴻⵏⵏⵉ ⵉⵏⵏⴰ ⵄⴰⴱⴷ-ⵎⴰⵍⵉⴽ ⴰⴽⵓⵛⵉ ⵉ ⵉⵔⵎⵉⵢⴰ: “ⴻⴳⴳ ⵉⴽⴻⵜⵜⴰⵏⴻⵏ ⵉⵇⴷⵉⵎⴻⵏ ⴷ ⵡⴰⵔⵔⵓⴹ ⵉⵇⵇⴰⵔⵚⴻⵏ ⵙⴰⴷⵓ ⵜⵉⴷⴷⵉⵖⵉⵏ ⵏ ⵉⵖⴰⴵⴻⵏ ⵏⵏⴻⵛ ⵓⵛⴰ ⴻⴳⴳ ⵉⵙⴻⵖⵡⴰⵏ ⵙⵡⴰⴷⴷⴰⵢ!” ⵓⵛⴰ ⴰⵎⵎⵓ ⵉ ⵜⵜ ⵉⴳⴳⴰ ⵉⵔⵎⵉⵢⴰ. 13 ⵊⴻⴱⴷⴻⵏ-ⴷⴷ ⵏⵉⵜⵏⵉ ⵉⵔⵎⵉⵢⴰ ⵙ ⵉⵙⴻⵖⵡⴰⵏ ⵓⵛⴰ ⵙⵙⴳⴻⵄⵄⴷⴻⵏ ⵜ-ⵉ-ⴷⴷ ⵣⴻⴳ ⵡⴰⵏⵓ. ⵎⴰⵛⴰ ⵉⵔⵎⵉⵢⴰ ⵉⵇⵇⵉⵎ ⴷⵉ ⵍⴻⵎⵔⴰⵃ ⵏ ⵍⴻⵃⴱⴻⵙ.

14 ⵅⴻⵏⵏⵉ ⵉⵙⵙⴻⴽⴽ ⴰⵊⴻⴵⵉⴷ ⵚⵉⴷⵇⵉⵢⴰ ⵛⴰ ⵏ ⵉⵎⵙⴻⵅⵅⴰⵔⴻⵏ ⵏⵏⴻⵙ, ⵉⵊⵊⴰ ⴰⴷ ⴰⵙ ⴷⴷ-ⴰⵡⵢⴻⵏ ⴰⵏⴰⴱⵉ ⵉⵔⵎⵉⵢⴰ ⵖⴰⵔ ⵡⴰⴷⴰⴼ ⵡⵉⵙⵙ ⵜⵍⴰⵜⴰ ⵖⴰⵔ ⵜⴰⴷⴷⴰⵔⵜ ⵏ ⵙⵉⴷⵉ. ⵉⵏⵏⴰ ⵓⵊⴻⴵⵉⴷ ⵉ ⵉⵔⵎⵉⵢⴰ: “ⵏⴻⵛⵛ ⵅⵙⴻⵖ ⴰⴷ ⵛⴻⴽ ⵙⵙⴻⵇⵙⵉⵖ ⵅ ⵉⵛⵜ ⵏ ⵍⵃⴰⵊⵊⴻⵜ, ⵡⴰⵔ ⵅⴰⴼⵉ ⵜⵜ ⵜⵜⴻⴼⴼⴰⵔ ⵡⴰⵍⵓ.” 15 ⵢⴰⵔⵔⴰ-ⴷⴷ ⵉⵔⵎⵉⵢⴰ ⵅ ⵚⵉⴷⵇⵉⵢⴰ: “ⵎⴰⵍⴰ ⵏⴻⵛⵛ ⵙⵙⴰⵔⴳⴱⴻⵖ ⵛⴻⴽ, ⵎⴰ ⵡⴰⵔ ⴷ ⴰⵢⵉ ⵜⵏⴻⵇⵇⴻⴷ ⵣⴻⵄⵎⴰ? ⵓ ⵎⴰⵍⴰ ⵡⵛⵉⵖ ⴰⵛ ⵉⵊⵊ ⵏ ⴰⵔⵔⴰⵢ, ⵛⴻⴽ ⵡⴰⵔ ⵖⴰⵔⵉ ⵜᵉⵜⵜⴻⵙⵍⵉⴷ!” 16 ⵅⴰⵙ ⵓⵛⴰ ⵉⵊⵊⵓⴵ ⵓⵊⴻⴵⵉⴷ ⵚⵉⴷⵇⵉⵢⴰ ⵉ ⵉⵔⵎⵉⵢⴰ ⵙ ⵜⵏⵓⴼⴼⵔⴰ ⵉⵏⵏⴰ: “ⵙ ⵜⵉⴷⴻⵜⵜ ⴰⵎ ⵉⴷⴷⴰⵔ ⵙⵉⴷⵉ ⵡⴻⵏⵏⵉ ⴷ ⴰⵏⴻⵖ ⵉⵡⵛⵉⵏ ⵜⵓⴷⴰⵔⵜ-ⴰ: ‘ⵓⵛⵜ ⵅⴰⴼⵉ, ⵎⴰⵍⴰ ⵏⴻⵛⵛ ⵏⵖⵉⵖ ⵛⴻⴽ ⵏⵉⵖ ⵎⴰⵍⴰ ⵡⵛⵉⵖ ⵛⴻⴽ ⴷⴻⴳ ⵉⴼⴰⵙⵙⴻⵏ ⵏ ⵢⴻⵔⵢⴰⵣⴻⵏ ⵏⵏⵉ ⵢⴰⵔⴻⵣⵣⵓⵏ ⵜⵓⴷⴰⵔⵜ ⵏⵏⴻⵛ!’ ” ◘38:16 ⵉⵛⴰ. 57:16 17 ⵉⵏⵏⴰ ⵉⵔⵎⵉⵢⴰ ⵉ ⵚⵉⴷⵇⵉⵢⴰ: “ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ, ⴰⵔⴻⴱⴱⵉ ⵏ ⵍⵄⴻⵙⴽⴰⵔⴰⵜ, ⴰⵔⴻⴱⴱⵉ ⵏ ⵉⵙⵔⴰⵉⵍ: ‘ⵎⴰⵍⴰ ⵛⴻⴽ ⴰⴷ ⵜⴻⴼⴼⵖⴻⴷ ⵙ ⵜⵉⴷⴻⵜⵜ ⵖⴰⵔ ⵍⵃⵓⴽⴽⴰⵎ ⵏ ⵓⵊⴻⴵⵉⴷ ⵏ ⴱⴰⴱⵉⵍ, ⴰⴷ ⵜⴻⵇⵇⵉⵎⴻⴷ ⴰⴷ ⵜⴻⴷⴷⴰⵔⴻⴷ, ⵓⵛⴰ ⵜⴰⵏⴷⵉⵏⵜ-ⴰ ⵡⴰⵔ ⵜᵉⵜⵜⵡⴰⵙⵙⴻⵛⵎⴰⴹ ⵙ ⵜⵎⴻⵙⵙⵉ, ⵛⴻⴽ ⴰⴷ ⵜⴻⵇⵇⵉⵎⴻⴷ ⴰⴷ ⵜⴻⴷⴷⴰⵔⴻⴷ, ⵡⴰⵀ ⵛⴻⴽ ⴷ ⵜⴰⴷⴷⴰⵔⵜ ⵏⵏⴻⵛ. 18 ⵎⴰⵛⴰ ⵎⴰⵍⴰ ⵡⴰⵔ ⵜⴻⴼⴼⵉⵖⴻⴷ ⵛⴰ ⵖⴰⵔ ⵍⵃⵓⴽⴽⴰⵎ ⵏ ⵓⵊⴻⴵⵉⴷ ⵏ ⴱⴰⴱⵉⵍ, ⵅⴻⵏⵏⵉ ⴰⴷ ⵜⴻⵎⵎⴻⵡⵛ ⵜⴻⵏⴷⵉⵏⵜ-ⴰ ⴷⴻⴳ ⵓⴼⵓⵙ ⵏ ⵉⴽⴰⵍⴷⴰⵏⵉⵢⵢⴻⵏ. ⵏⵉⵜⵏⵉ ⴰⴷ ⵜⵜ ⵙⵙⵛⴻⵎⴹⴻⵏ ⵙ ⵜⵎⴻⵙⵙⵉ ⵓ ⵛⴻⴽ ⵡⴰⵔ ⵜⵏⴻⵊⵊⵎⴻⴷ ⵣⴻⴳ ⵉⴼⴰⵙⵙⴻⵏ ⵏⵙⴻⵏ.’ ” 19 ⴰⵊⴻⴵⵉⴷ ⵚⵉⴷⵇⵉⵢⴰ ⵉⵏⵏⴰ ⵉ ⵉⵔⵎⵉⵢⴰ: “ⵏⴻⵛⵛ ⵜⵜⴻⴳⴳⵯⴻⴷⴻⵖ ⵣⴻⴳ ⵡⵓⴷⴰⵢⴻⵏ ⵏⵏⵉ ⵢⴻⵄⴷⵓⵏ ⵖⴰⵔ ⵉⴽⴰⵍⴷⴰⵏⵉⵢⵢⴻⵏ, ⴰⵍⴰⵎⵉ ⵏⵉⵜⵏⵉ ⵡⴰⵔ ⴷ ⴰⵢⵉ ⵙⵙⵄⴻⴷⴷⵓⵏ ⵖⴰⵔ ⵓⴼⵓⵙ ⵏⵙⴻⵏ ⵓ ⵡⴰⵔ ⵣⵣⴰⵢⵉ ⵜⵜⴻⴳⴳⴻⵏ ⵎⵉⵏ ⵅⵙⴻⵏ.” 20 ⵉⵏⵏⴰ ⴰⵙ ⵉⵔⵎⵉⵢⴰ: “ⵏⵉⵜⵏⵉ ⵡⴰⵔ ⵛⴻⴽ ⵙⴻⵍⵍⵎⴻⵏ ⵛⴰ. ⵙⴻⵍ ⵎⴰⵛⴰ ⵖⴰⵔ ⵜⵎⵉⵊⵊⴰ ⵏ ⵙⵉⴷⵉ, ⵖⴰⵔ ⵍⵃⴰⵍⴹ ⵉⵏⵓ, ⵅⴻⵏⵏⵉ ⴰⴷ ⵜⵉⵍⵉⴷ ⵎⵍⵉⵃ ⵓ ⴰⴷ ⵜⴻⵇⵇⵉⵎⴻⴷ ⴰⴷ ⵜⴻⴷⴷⴰⵔⴻⴷ. ◼38:20 ⴰⴷ ⵜⴻⵇⵇⵉⵎⴻⴷ ⴰⴷ ⵜⴻⴷⴷⴰⵔⴻⴷ-ⵙ ⵜⵄⵉⴱⵔⴰⵏⵉⵜ ‘ⴰⴷ ⵉⴷⴷⴰⵔ ⵍⴻⵄⵎⴰⵔ ⵏⵏⴻⵛ’. 21 ⵎⴰⵛⴰ ⵎⴰⵍⴰ ⵜⵓⴳⵉⴷ ⴰⴷ ⵜⴻⴼⴼⵖⴻⴷ, ⵅⴻⵏⵏⵉ ⴷ ⵡⴰ ⴷ ⴰⵡⴰⵍ ⵏⵏⵉ ⴷ ⴰⵢⵉ ⵉⵙⵙⵛⴻⵏ ⵙⵉⴷⵉ: 22 ‘ⵅⵣⴰⵔ, ⵎⴰⵔⵔⴰ ⵜⵉⵎⵖⴰⵔⵉⵏ ⵏⵏⵉ ⵜⵓⵖⴰ ⵉⵇⵇⵉⵎⴻⵏ ⴷⵉ ⵜⴰⴷⴷⴰⵔⵜ ⵏ ⵓⵊⴻⴵⵉⴷ ⵏ ⵢⴰⵀⵓⴷⴰ, ⴰⴷ ⵜⵜⵡⴰⵏⴻⴷⵀⴻⵏⵜ ⵖⴰⵔ ⵍⵃⵓⴽⴽⴰⵎ ⵏ ⵓⵊⴻⴵⵉⴷ ⵏ ⴱⴰⴱⵉⵍ. ⵅⵣⴰⵔ, ⵏⵉⵜⴻⵏⵜⵉ ⴰⴷ ⵉⵏⵉⵏⵜ:

ⵉⵔⵢⴰⵣⴻⵏ ⵏⵏⵉ ⴰⴽ-ⴷ ⵜⵓⵖⴰ ⵜⴻⴷⴷⴰⵔⴻⴷ ⴷⵉ ⵍⴻⵀⵏⴰ,

ⴰⵇⴰ ⵖⴷⴰⵔⴻⵏ ⵛⴻⴽ ⵓ ⵣⴻⵎⵎⴰⵔⴻⵏ ⵅⴰⴽ,

ⵏⵏⵓⵖⴻⵏ ⵉⴹⴰⵔⴻⵏ ⵏⵏⴻⵛ ⴷⴻⴳ ⵓⴱⴰⵔⵢⵓⴹ,

ⵓⵛⴰ ⵏⵉⵜⵏⵉ ⵙ ⵢⵉⵅⴻⴼ ⵏⵙⴻⵏ ⴷⴻⵡⵍⴻⵏ ⵖⴰⵔ ⴹⴻⴼⴼⴰⵔ! ◼38:22 ⵉⵔⵢⴰⵥⴻⵏ ⵏⵏⵉ ⴰⴽ-ⴷ ⵜⵓⵖⴰ ⵜⴻⴷⴷⴰⵔⴻⴷ ⴷⵉ ⵍⴻⵀⵏⴰ-ⵉⵔⵢⴰⵥⴻⵏ-ⴰ ⴷ ⵉⵔⵢⴰⵥⴻⵏ ⵉⵛⴻⵏⵄⴻⵏ ⴷ ⵉⵏⴰⴱⵉⵢⵢⴻⵏ ⵏⵏⵉ ⵜⵓⵖⴰ ⵉⵙⵙⵎⵓⵏⴰ ⵓⵊⴻⴵⵉⴷ ⵖⴰⵔⴻⵙ.

23 ⵎⴰⵔⵔⴰ ⵜⵉⵎⵖⴰⵔⵉⵏ ⵏⵏⴻⵛ ⴷ ⵉⵃⴻⵏⵊⵉⵔⴻⵏ ⵏⵏⴻⵛ ⴰⴷ ⵜⵜⵡⴰⵏⴻⴷⵀⴻⵏ ⵖⴰⵔ ⵉⴽⴰⵍⴷⴰⵏⵉⵢⵢⴻⵏ, ⵓⵛⴰ ⵓⵍⴰ ⴷ ⵛⴻⴽ ⵙⵉⵎⴰⵏⵜ ⵏⵏⴻⵛ ⵡⴰⵔ ⵜⵏⴻⵊⵊⵎⴻⴷ ⵣⴻⴳ ⵓⴼⵓⵙ ⵏⵙⴻⵏ, ⵎⵉⵏⵣⵉ ⴰⴷ ⵜᵉⵜⵜⵡⴰⵟⵟⴼⴻⴷ ⵣⴻⴳ ⵓⵊⴻⴵⵉⴷ ⵏ ⴱⴰⴱⵉⵍ ⵓ ⵜⴰⵏⴷⵉⵏⵜ-ⴰ ⴰⴷ ⵜᵉⵜⵜⵡⴰⵙⵙⴻⵛⵎⴻⴹ ⵙ ⵜⵎⴻⵙⵙⵉ.’ ”

24 ⵅⴻⵏⵏⵉ ⵚⵉⴷⵇⵉⵢⴰ ⵉⵏⵏⴰ ⵉ ⵉⵔⵎⵉⵢⴰ: “ⵉⵜⵜⵅⴻⵚⵚⴰ ⵓⵍⴰ ⴷ ⵉⵊⵊ ⵡⴰⵔ ⵉⵜⵜⴻⵙⵙⴻⵏ ⴰⵡⴰⵍⴻⵏ-ⴰ, ⴰⵎⵎⵓ ⵡⴰⵔ ⵜⵎⵎⴻⵜⵉⴷ. 25 ⵎⴰⵍⴰ ⵍⵃⵓⴽⴽⴰⵎ ⵙⵍⵉⵏ ⴰⵇⴰ ⵏⴻⵛⵛ ⵙⵙⵉⵡⵍⴻⵖ ⴰⴽⵉⴷⴻⴽ, ⴰⴷ ⵖⴰⵔⴻⴽ ⴷⴷ-ⴰⵙⴻⵏ, ⴰⴷ ⴰⵛ ⵉⵏⵉⵏ: ‘ⵉⵏⵉ ⴰⵏⴻⵖ ⵎⵉⵏ ⵜⴻⵏⵏⵉⴷ ⵉ ⵓⵊⴻⴵⵉⴷ! ⵡⴰⵔ ⵅⴰⵏⴻⵖ ⵜⴻⴼⴼⴰⵔ ⵡⴰⵍⵓ, ⵏⵉⵖ ⴰⵇⴰ ⴰⴷ ⵛⴻⴽ ⵏⴻⵏⵏⴻⵖ: ⵎⵉⵏ ⵅⴰⵙ ⴽⵉⴷⴻⴽ ⵉⵙⵙⵉⵡⴻⵍ ⵓⵊⴻⴵⵉⴷ?’ 26 ⵅⴻⵏⵏⵉ ⵉⵜⵜⵅⴻⵚⵚⴰ ⴰⴷ ⴰⵙⴻⵏ ⵜⵉⵏⵉⴷ: ‘ⵏⴻⵛⵛ ⵡⴹⵉⵖ ⵙ ⵍⵇⴻⴷⴷ ⵉⵏⵓ ⵣⵣⴰⵜ ⵉ ⵡⵓⴷⴻⵎ ⵏ ⵓⵊⴻⴵⵉⴷ ⵃⵉⵎⴰ ⵡⴰⵔ ⵉⵜⵜⴻⵊⵊⵉ ⴰⴷ ⴰⵢⵉ ⴰⵔⵔⴻⵏ ⵖⴰⵔ ⵜⴰⴷⴷⴰⵔⵜ ⵏ ⵢⵓⵏⴰⵜⴰⵏ ⵎⴰⵃⴻⵏⴷ ⴰⴷ ⴷⵉⵏⵏⵉ ⵎⵎⵜⴻⵖ.’ ”

27 ⵍⴰⵎⵉ ⴷⴷ-ⵓⵙⵉⵏ ⵎⴰⵔⵔⴰ ⵍⵃⵓⴽⴽⴰⵎ ⵖⴰⵔ ⵉⵔⵎⵉⵢⴰ, ⵉⵃⴰⵊⴰ ⵜⴻⵏ ⵎⴰⵔⵔⴰ ⴰⵡⴰⵍⴻⵏ-ⴰ ⵉⵏⵏⵉ ⵜⵓⵖⴰ ⵢⵓⵎⵓⵔ ⵓⵊⴻⴵⵉⴷ. ⵅⴰⵙ ⵓⵛⴰ ⵊⵊⵉⵏ ⵜ ⵎⴰⵖⴰⵔ ⵓⵍⴰ ⴷ ⵉⵊⵊ ⵡⴰⵔ ⵉⵙⵍⵉ ⵜⴰⵎⴻⵙⵍⴰⵛⵜ ⵙⵉⵎⴰⵏⵜ ⵏⵏⴻⵙ. 28 ⴰⵎⵎⵓ ⵉ ⵉⵇⵇⵉⵎ ⵉⵔⵎⵉⵢⴰ ⴷⵉ ⵍⴻⵎⵔⴰⵃ ⵏ ⵍⴻⵃⴱⴻⵙ ⴰⵍ ⴰⵙⵙ ⵏⵏⵉ ⴷⵉ ⵜᵉⵜⵜⵡⴰⵟⵟⴻⴼ ⵓⵔⵛⴰⵍⵉⵎ, ⵡⴰⵀ, ⵏⴻⵜⵜⴰ ⵜⵓⵖⴰ-ⵜ ⵄⴰⴷ ⴷⵉⵏ ⵓⵎⵉ ⵜᵉⵜⵜⵡⴰⵟⵟⴻⴼ ⵓⵔⵛⴰⵍⵉⵎ.