1 “ⵎⴰⵖⴰⵔ, ⵅⵣⴰⵔ, ⴷⴻⴳ ⵡⵓⵙⵙⴰⵏ ⵏⵏⵉ ⵓ ⴷⵉ ⵍⵡⴻⵇⵜ ⵏⵏⵉ, ⵅⵎⵉ ⵖⴰ ⵙⵙⴻⵏⵇⴻⵍⴱⴻⵖ ⵜⴰⵎⴻⵃⴱⴰⵙⵜ ⵏ ⵢⴰⵀⵓⴷⴰ ⴷ ⵓⵔⵛⴰⵍⵉⵎ, 2 ⴰⴷ ⵙⵙⵎⵓⵏⴻⵖ ⵎⴰⵔⵔⴰ ⵍⴻⴳⵏⵓⵙ, ⴰⴷ ⵜⴻⵏ ⵏⴻⴷⵀⴻⵖ ⵖⴰⵔ ⵜⴻⵖⵣⵓⵔⵜ ⵏ ⵢⴰⵀⵓⵛⴰⴼⴰⵟ. ⴷⵉⵏⵏⵉ ⴰⴷ ⴰⴽⵉⴷⵙⴻⵏ ⵎⵛⴰⵔⵔⴰⵄⴻⵖ ⵎⵉⵏⵣⵉ ⵏⵉⵜⵏⵉ ⵣⵓⵣⵣⴰⵔⴻⵏ ⵍⴳⴻⵏⵙ ⵉⵏⵓ ⴷ ⵜⴻⵙⵖⴰⵔⵜ ⵉⵏⵓ ⵊⴰⵔ ⵍⴻⴳⵏⵓⵙ ⵓ ⵎⵉⵏⵣⵉ ⵏⵉⵜⵏⵉ ⴱⴹⴰⵏ ⵜⴰⵎⵎⵓⵔⵜ ⵉⵏⵓ. 3 ⵏⵉⵜⵏⵉ ⴳⴳⵉⵏ ⵜⴰⵇⴻⴷⴷⵓⵃⵜ ⵅ ⵍⴳⴻⵏⵙ ⵉⵏⵓ ⵓ ⵡⵛⵉⵏ ⵉⵊⵊ ⵏ ⵡⴻⵃⵔⴰⵎ ⴷ ⵜⵜⴻⵅⵍⵉⵚⴻⵜ ⵉ ⵜⴻⵎⵖⴰⵔⵜ ⵏ ⴼⴰⵔⵇ-ⵛⵛⵖⴻⵍ ⵓ ⵉⵛⵜ ⵏ ⵜⴻⵃⵔⴰⵎⵜ ⵜⴻⵎⵎⴻⵏⵣ ⵉ ⴱⵉⵏⵓ, ⵃⵉⵎⴰ ⵏⵉⵜⵏⵉ ⵣⴻⵎⵎⴰⵔⴻⵏ ⴰⴷ ⵙⵡⴻⵏ.

4 ⵓ ⵄⴰⵡⴻⴷ, ⵎⵉⵏ ⵖⴰⵔⵡⴻⵎ ⴰⴽⵉⴷⵉ, ⵚⵓⵔ ⴷ ⵚⵉⴷⵓⵏ ⴷ ⵎⴰⵔⵔⴰ ⵊⵊⵡⴰⵢⴻⵀ ⵏ ⴼⵉⵍⵉⵛⵉⵜ. ⵎⴰ ⵜⴻⵅⵙⴻⵎ ⴰⴷ ⴰⵢⵉ ⵜⵅⴻⴵⵚⴻⵎ ⵎⵉⵏ ⴳⴳⵉⵖ? ⵎⴰⵍⴰ ⵜⴻⵅⵙⴻⵎ ⴰⴷ ⴰⵢⵉ ⵜⵅⴻⴵⵚⴻⵎ, ⵏⴻⵛⵛ ⴰⴷ ⵙⵙⵄⴻⵇⴱⴻⵖ ⴷⴻⵖⵢⴰ ⵓ ⵙ ⵜⴰⵣⵍⴰ ⵎⵉⵏ ⵜⴻⴳⴳⵉⵎ ⵅ ⵉⵣⴻⴵⵉⴼⴻⵏ ⵏⵡⴻⵎ, 5 ⵎⵉⵏⵣⵉ ⴽⴻⵏⵏⵉⵡ ⵜⴻⴽⴽⵙⵉⵎ ⵏⵏⵓⵇⴰⵔⵜ ⴷ ⵡⵓⵔⴻⵖ ⵉⵏⵓ ⵓ ⵎⵉⵏⵣⵉ ⴽⴻⵏⵏⵉⵡ ⵜⵉⵡⵢⴻⵎ ⵍⴻⵇⵛⵓⵄ ⵉⵏⵓ ⵢⵉⵖⵍⴰⵏ ⵖⴰⵔ ⵜⵣⴰⵡⵉⵢⵢⵉⵏ ⵏⵡⴻⵎ. 6 ⴽⴻⵏⵏⵉⵡ ⵜᵉⵣⵣⴻⵏⵣⴻⵎ ⵉⵃⴻⵏⵊⵉⵔⴻⵏ ⵏ ⵢⴰⵀⵓⴷⴰ ⴷ ⵉⵃⴻⵏⵊⵉⵔⴻⵏ ⵏ ⵓⵔⵛⴰⵍⵉⵎ ⵉ ⵉⵃⴻⵏⵊⵉⵔⴻⵏ ⵏ ⵢⴰⵡⴰⵏ, ⵃⵉⵎⴰ ⴰⴷ ⵜⴻⵏ ⵜⴻⵙⵙⵉⴳⴳⵯⴻⵊⴻⵎ ⵅ ⵜⴻⵎⵎⵓⵔⵜ ⵏⵙⴻⵏ. 7 ⵅⵣⴰⵔ, ⵏⴻⵛⵛ ⴰⴷ ⵜⴻⵏ ⵙⵙⴻⴽⴽⴰⵔⴻⵖ ⵣⴻⴳ ⵡⴻⵎⵛⴰⵏ ⵎⴰⵏⵉ ⵜⴻⵏ ⵜⴻⵣⵣⴻⵏⵣⴻⵎ ⵓ ⴰⴷ ⵙⵙⵄⴻⵇⴱⴻⵖ ⵎⵉⵏ ⵜⴻⴳⴳⵉⵎ ⵅ ⵉⵣⴻⴵⵉⴼⴻⵏ ⵏⵡⴻⵎ. 8 ⴰⴷ ⵣⵣⴻⵏⵣⴻⵖ ⵉⵃⴻⵏⵊⵉⵔⴻⵏ ⵏⵡⴻⵎ ⴷ ⵢⴻⵙⵙⵉⵜⵡⴻⵎ ⴷⴻⴳ ⵓⴼⵓⵙ ⵏ ⵉⵃⴻⵏⵊⵉⵔⴻⵏ ⵏ ⵢⴰⵀⵓⴷⴰ ⵓ ⵢⵉⵏⴰ ⴰⴷ ⵜⴻⵏ ⵣⵣⴻⵏⵣⴻⵏ ⵉ ⵉⵙⴰⴱⴰ’ⵉⵢⵢⴻⵏ, ⵉⵊⵊ ⵏ ⵍⴳⴻⵏⵙ ⵉⴳⴳⵯⴻⵊ ⴰⵟⵟⴰⵙ, ⵎⴰⵖⴰⵔ ⵙⵉⴷⵉ ⴰⵇⴰ ⵉⵙⵙⵉⵡⴻⵍ.”

9 “ⵍⴰⵖⴰⵎ ⴰⵢⴰ ⵊⴰⵔ ⵍⴻⴳⵏⵓⵙ, ⵇⴻⴷⴷⵙⴻⵎ ⴰⵎⴻⵏⵖⵉ, ⵙⴻⴽⴽⴰⵔⴻⵎ ⴰⵢⵜ ⵏ ⴱⵓ-ⵜⴻⵖⵔⵓⴹⵜ, ⵊⵊⴻⵎ ⵎⴰⵔⵔⴰ ⵉⵄⴻⵙⴽⴰⵔⵉⵢⵢⴻⵏ ⴰⴷ ⴷⴷ-ⵇⴰⵔⵔⴱⴻⵏ, ⴰⴷ ⴳⴻⵄⵄⴷⴻⵏ ⵉ ⵓⵎⴻⵏⵖⵉ. 10 ⵃⴻⴷⴷⴻⵎ ⴷⴷⵓⵣⴰⵏ ⵏⵡⴻⵎ ⴷ ⵍⴻⵙⵢⵓⴼ ⵓⵍⴰ ⴷ ⵍⴻⵎⵡⴰⵙ ⵏⵡⴻⵎ ⵏ ⵡⴻⵣⴱⴰⵔ ⴰⵍ ⵖⴰ ⴷⴻⵡⵍⴻⵏ ⴷ ⴼⵍⵉⵜⵛⴰⵜ, ⴻⵊⵊ ⵡⴻⵏⵏⵉ ⵉⴹⴻⵄⴼⴻⵏ ⴰⴷ ⵢⵉⵏⵉ: ‘ⵏⴻⵛⵛ ⴷ ⴱⵓ-ⵜⴻⵖⵔⵓⴹⵜ!’ 11 ⴰⵣⵣⵍⴻⵎ ⵓ ⵜⴰⵙⴻⵎ-ⴷⴷ, ⴰ ⵎⴰⵔⵔⴰ ⵍⴻⴳⵏⵓⵙ ⵉ ⴷⴷ-ⵉⵏⵏⴹⴻⵏ. ⵙⵏⴻⴷⴷⴻⵀ ⵖⴰⵔ ⴷⵉⵏⵏⵉ, ⴰ ⵙⵉⴷⵉ, ⴰⵢⵜ ⵏⵏⴻⵛ ⵏ ⴱⵓ-ⵜⴻⵖⵔⵓⴹⵜ! 12 ⵊⵊⴻⵎ ⵍⴻⴳⵏⵓⵙ ⴰⴷ ⴽⴽⴰⵔⴻⵏ ⴰⴷ ⴳⴻⵄⵄⴷⴻⵏ ⵖⴰⵔ ⵜⴻⵖⵣⵓⵔⵜ ⵏ ⵢⴰⵀⵓⵛⴰⴼⴰⵟ. ⵎⴰⵖⴰⵔ ⴷⵉⵏⵏⵉ ⴰⴷ ⵇⵇⵉⵎⴻⵖ ⵏⴻⵛⵛ ⵃⵉⵎⴰ ⴰⴷ ⵛⴰⵔⵔⵄⴻⵖ ⵎⴰⵔⵔⴰ ⵍⴻⴳⵏⵓⵙ ⵉ-ⴷⴷ-ⵉⵏⵏⴹⴻⵏ. 13 ⴳⴳⴻⵎ ⴰⵎⵊⴰⵔ ⴷⴰⵢⴻⵙ, ⵎⴰⵖⴰⵔ ⵚⵚⴰⴱⴻⵜ ⵜⴻⵏⵏⴳⵯⴰ, ⴰⵙⴻⵎ-ⴷⴷ, ⵀⵡⴰⵎ, ⵎⵉⵏⵣⵉ ⵜⴰⵙⵉⵔⵜ ⵏ ⵓⴹⵉⵍ ⵜⴻⵛⵛⵓⵔ ⵓ ⵚⵚⵡⴰⵔⴻⵊ ⵏ ⵜⵙⵉⵔⵜ ⴼⴻⵢⵢⴹⴻⵏ, ⵎⴰⵖⴰⵔ ⵜⴰⵄⴻⴼⴼⴰⵏⵜ ⵏⵙⴻⵏ ⴷ ⵜⴰⵎⴻⵇⵇⵔⴰⵏⵜ.” ◘4:13 ⴰⵙⴰ. 14:15

14 “ⵉⴱⴰⵔⵔⵓⵜⴻⵏ, ⵉⴱⴰⵔⵔⵓⵜⴻⵏ ⴷⵉ ⵜⴻⵖⵣⵓⵔⵜ ⵏ ⵜⴻⵍⵡⵉⵃⵜ ⵉⵜⵜⴻⵃⵔⵓⴵⵓⴹⴻⵏ ⵏ ⵓⵙⴰⵔⵡⴻⵜ, ⵎⴰⵖⴰⵔ ⴰⵙⵙ ⵏ ⵙⵉⴷⵉ ⵢⵓⴷⴻⵙ, ⴷⵉ ⵜⴻⵖⵣⵓⵔⵜ ⵏ ⵜⴻⵍⵡⵉⵃⵜ ⵉⵜⵜⴻⵃⵔⵓⴵⵓⴹⴻⵏ ⵉ ⵓⵙⴰⵔⵡⴻⵜ. 15 ⵜⴰⴼⵓⵛⵜ ⴷ ⵜⵣⵉⵔⵉ ⴱⴱⴰⵔⵛⵏⴻⵏⵜ, ⵉⵜⵔⴰⵏ ⴰⵔⵔⵉⵏ ⵜⴰⴼⴰⵡⵜ ⵏⵙⴻⵏ. ◘4:15 ⵢⵓⵡ. 2:10; 3:4. 16 ⵙⵉⴷⵉ ⴰⴷ ⵉⵣⴻⵀⵀⴰⵔ ⵣⵉ ⵚⵉⵀⵢⵓⵏ ⵓ ⴰⴷ ⵢⴰⵔⵔ ⵜⵎⵉⵊⵊⴰ ⵏⵏⴻⵙ ⴰⴷ ⵉⵜⵜⵡⴰⵙⴻⵍ ⵣⵉ ⵓⵔⵛⴰⵍⵉⵎ ⴰⵍⴰⵎⵉ ⵉⵊⴻⵏⵡⴰⵏ ⴷ ⵜⴻⵎⵎⵓⵔⵜ ⴰⴷ ⴰⵔⵊⵉⵊⴻⵏ, ⵎⴰⵛⴰ ⵙⵉⴷⵉ ⴷ ⴰⴷⵓⵔⵔⵉ ⵉ ⵍⴳⴻⵏⵙ ⵏⵏⴻⵙ ⴷ ⵍⴱⵓⵔⵊ ⵉ ⴰⵢⵜ ⵏ ⵉⵙⵔⴰⵉⵍ.”

17 “ⴰⴷ ⵜⴻⵙⵙⵏⴻⵎ, ⴰⵇⴰ ⵏⴻⵛⵛ ⴷ ⵙⵉⴷⵉ, ⴰⵔⴻⴱⴱⵉ ⵏⵡⴻⵎ, ⵡⴻⵏⵏⵉ ⵉⵣⴻⴷⴷⵖⴻⵏ ⵅ ⵚⵉⵀⵢⵓⵏ, ⴰⴷⵔⴰⵔ ⵉⵏⵓ ⵉⵇⴻⴷⴷⵙⴻⵏ ⵓ ⵜⴰⵏⴷⵉⵏⵜ ⵏ ⵓⵔⵛⴰⵍⵉⵎ ⴰⴷ ⵜⵉⵍⵉ ⵜⵇⴻⴷⴷⴻⵙ. ⵄⴻⵎⵎⴰⵔⵚ ⴰⴷ ⵜⵜ ⵛⵓⵇⴻⵏ ⵄⴰⴷ ⵉⴱⴰⵔⵔⴰⵏⵉⵢⵢⴻⵏ.” ◘4:17 ⴰⵙⴰ. 21:27

18 “ⴷⴻⴳ ⵡⴰⵙⵙ ⵏⵏⵉ ⴰⴷ ⵉⵎⵙⴰⵔ ⴰⵇⴰ ⵉⴷⵓⵔⴰⵔ ⴰⴷ ⵓⴷⵎⴻⵏ ⵙ ⴱⵉⵏⵓ ⵥⴻⵎⵎⴻⵏ ⵜ ⵊⴷⵉⴷ ⵓ ⵜⵉⵡⵔⵉⵔⵉⵏ ⴰⴷ ⵙⵙⴻⴼⵢⴻⵏⵜ ⵙ ⵓⵖⵉ ⴷ ⵎⴰⵔⵔⴰ ⵜⵉⵖⴻⵣⵔⴰⵜⵉⵏ ⵏ ⵢⴰⵀⵓⴷⴰ ⴰⴷ ⴷⴰⵢⵙⴻⵏ ⵜⵜⴰⵣⵣⵍⴻⵏ ⵡⴰⵎⴰⵏ ⵓ ⵢⵉⵛⵜ ⵏ ⵜⴰⵍⴰ ⴰⴷ ⵜⴻⴷⴷⵓⵇⵇⴻⵣ ⴷⵉ ⵜⴰⴷⴷⴰⵔⵜ ⵏ ⵙⵉⴷⵉ, ⴰⴷ ⵜⴼⴻⵢⵢⴻⴹ ⵜⴻⵖⵣⵓⵔⵜ ⵏ ⵛⵉⵟⵟⵉⵎ. ◘4:18 ⵄⴰⵎ. 9:13 19 ⵎⵉⵚⵔⴰ ⴰⴷ ⵜⴻⴷⵡⴻⵍ ⴷ ⵉⵛⵜ ⵏ ⵜⴻⵎⵎⵓⵔⵜ ⵉⵜⵜⵡⴰⵔⴻⴷⴷⴵⴻⵏ ⵓ ⵉⴷⵓⵎ ⴷ ⵉⵛⵜ ⵏ ⵜⴻⵎⵎⵓⵔⵜ ⵉⵅⵍⴰⵏ ⵣⵉ ⵙⵙⵉⴱⴱⴻⵜ ⵏ ⵍⵄⵓⵏⴼ ⵉ ⴳⴳⵉⵏ ⴹⵉⴷⴷ ⵉ ⴰⵢⵜ ⵏ ⵢⴰⵀⵓⴷⴰ ⵏⵏⵉ ⵣⵉ ⵙⵙⵉⵣⵣⵍⴻⵏ ⵏⵉⵜⵏⵉ ⵉⴷⴰⵎⵎⴻⵏ ⵉⵎⴻⵣⴷⴰⴳⴻⵏ ⴷⵉ ⵜⴻⵎⵎⵓⵔⵜ ⵏⵙⴻⵏ. 20 ⵜⴰⵎⵎⵓⵔⵜ ⵏ ⵢⴰⵀⵓⴷⴰ ⵎⴰⵛⴰ ⴰⴷ ⵜⴻⵇⵇⵉⵎ ⵉ ⵍⴻⴱⴷⴰ ⵓ ⵓⵔⵛⴰⵍⵉⵎ ⵣⵉ ⵊⵊⵉⵍ ⴰⵍ ⵊⵊⵉⵍ. 21 ⵏⴻⵛⵛ ⴰⴷ ⵃⴻⵙⴱⴻⵖ ⵉⴷⴰⵎⵎⴻⵏ ⵏⵙⴻⵏ, ⵉⵏⵏⵉ ⵜⵢⵖⴰ ⵃⴻⵙⵙⴰⴱⴻⵖ ⵡⴰⵔ ⵉⵣⴷⵉⴳⴻⵏ, ⴷ ⵉⵎⴻⵣⴷⴰⴳⴻⵏ.

ⵓⵛⴰ ⵙⵉⴷⵉ ⴰⴷ ⵉⵣⴷⴻⵖ ⴷⵉ ⵚⵉⵀⵢⵓⵏ.”