1 ⵜⴰⵇⴻⴷⴷⵓⵃⵜ ⵉ ⴰⵢⵜ ⵏ ⵢⵓⵙⵓⴼ ⵜⴻⴽⴽⴰⵔ ⴰⵙ-ⴷⴷ ⵣⵉ ⵍ’ⵓⵔⴷⵓⵏ ⵖⴰⵔ ⴰⵔⵉⵃⴰ, ⵓⵛⴰ ⴰⵢⵎⵉⵔ ⵉⵜⵜⴻⴽⴽ ⵅ ⵜⵎⴰ ⵏ ⵛⵛⴰⵔⵇ ⵏ ⵡⴰⵎⴰⵏ ⵏ ⴰⵔⵉⵃⴰ, ⵅ ⵍⴻⵅⵍⴰ ⵏⵏⵉ ⴷⴷ-ⵉⵜⵜⴳⴻⵄⵄⴰⴷⴻⵏ ⵣⵉ ⴰⵔⵉⵃⴰ ⵅ ⵉⴷⵓⵔⴰⵔ ⵏ ⴱⴰⵢⵜ-ⵉⵍ. 2 ⵓ ⵣⵉ ⴱⴰⵢⵜ-ⵉⵍ ⵉⵜⵜⴻⴼⴼⴻⵖ ⵖⴰⵔ ⵍⵓⵣ, ⵉⵜⵜⴻⴽⴽ ⵅ ⵜⴻⵎⵎⵓⵔⵜ ⵏ ⴰⵢⵜ ⵏ ⴰⵔⴽⵉⵜ ⵖⴰⵔ ⵄⴰⵟⴰⵔⵓⵜ 3 ⵓⵛⴰ ⵉⵀⴻⴽⴽⵡⴰ-ⴷⴷ ⵖⴰⵔ ⵍⵖⴰⵔⴱ ⵖⴰⵔ ⵜⴻⵎⵎⵓⵔⵜ ⵏ ⵉⴼⴰⵍⴰⵟⵉⵢⵢⴻⵏ ⴰⵍ ⵜⴰⵎⵎⵓⵔⵜ ⵏ ⴱⴰⵢⵜ-ⵃⵓⵔⵓⵏ ⵏ ⵡⴰⴷⴷⴰⵢ ⵓ ⴰⵍ ⵊⴰⵣⴰⵔ ⵓ ⵟⵟⵔⵓⴼⴰ ⵏⵏⴻⵙ ⵜⵜⴰⴽⴽⵡⴰⴹⴻⵏ ⴰⵍ ⵍⴻⴱⵃⴰⵔ.

4 ⵅⴻⵏⵏⵉ ⵟⵟⴼⴻⵏ ⵓⵍⴰ ⴷ ⴰⵢⵜ ⵏ ⵢⵓⵙⵓⴼ, ⵎⴰⵏⴰⵙⵙⴰ ⴷ ⵉⴼⵔⴰⵢⵉⵎ, ⵍⵡⴰⵔⵜ ⵏⵙⴻⵏ. 5 ⴰⵢⵎⵉⵔ ⵏ ⴰⵢⵜ ⵏ ⵉⴼⵔⴰⵢⵉⵎ, ⵄⵍⴰⵃⵙⴰⴱ ⵍⴰⴵⴰⵜ ⵏⵙⴻⵏ, ⴷ ⵡⴰ. ⴰⵢⵎⵉⵔ ⵏ ⵜⴻⵙⵖⴰⵔⵜ ⵏⵙⴻⵏ ⵉⴱⴻⴷⴷⴰ ⵖⴰⵔ ⵛⵛⴰⵔⵇ ⵏ ⵄⴰⵟⴰⵔⵓⵜ-ⴰⴷⴰⵔ ⵓⵛⴰ ⵉⴳⴳⵓⵔ ⴰⵍ ⴱⴰⵢⵜ-ⵃⵓⵔⵓⵏ ⵏ ⵏⵏⴻⵊ, 6 ⵓⵛⴰ ⵉⴳⴳⵓⵔ ⵖⴰⵔ ⵍⵖⴰⵔⴱ ⵖⴰⵔ ⵓⵖⴻⵣⴷⵉⵙ ⵏ ⵛⵛⴰⵎⴰⵍ ⵏ ⵎⵉⴽⵎⴰⵜⴰ ⵓⵛⴰ ⵉⵜⵜⴻⴼⵔⵉⵖ ⵡⴻⵢⵎⵉⵔ ⵖⴰⵔ ⵛⵛⴰⵔⵇ ⵖⴰⵔ ⵜⴰ’ⴰⵏⴰⵜ-ⵛⵉⵍⵓ ⵓ ⵅⴻⵏⵏⵉ ⵉⵜⵜⴻⴽⴽ ⵅⴰⵙ ⵅ ⵓⵖⴻⵣⴷⵉⵙ ⵏⵏⴻⵙ ⵏ ⵛⵛⴰⵔⵇ ⵖⴰⵔ ⵢⴰⵏⵓⵃⴰ, 7 ⵓ ⵣⵉ ⵢⴰⵏⵓⵃⴰ ⵉⵀⴻⴽⴽⵡⴰ ⵖⴰⵔ ⵄⴰⵟⴰⵔⵓⵜ ⴷ ⵏⴰⵄⴰⵔⴰⵜⴰ ⵓⵛⴰ ⵄⵍⴰⵢⴻⵏ ⵉⵏⴻⵃⵃⴻⴷ ⴰⵔⵉⵃⴰ ⵓ ⵅⴻⵏⵏⵉ ⵉⵜⵜⴻⴼⴼⴻⵖ ⵖⴰⵔ ⵍ’ⵓⵔⴷⵓⵏ. 8 ⵣⵉ ⵜⴰⴼⴼⵓⵃ ⵉⵄⴻⴷⴷⵓ ⵡⴻⵢⵎⵉⵔ ⵖⴰⵔ ⵍⵖⴰⵔⴱ ⵖⴰⵔ ⵜⵉⵖⵣⴰⵔⵜ ⵏ ⵇⴰⵏⴰ ⵓⵛⴰ ⵟⵟⵔⵓⴼⴰ ⵏⵏⴻⵙ ⵜⵜⴰⴽⴽⵡⴰⴹⴻⵏ ⴰⵍ ⵍⴻⴱⵃⴰⵔ. ⵜⴰ ⴷ ⵜⴰⵙⵖⴰⵔⵜ ⵏ ⵜⴻⵇⴱⵉⵍⵜ ⵏ ⴰⵢⵜ ⵏ ⵉⴼⵔⴰⵢⵉⵎ, ⵄⵍⴰⵃⵙⴰⴱ ⵍⴰⴵⴰⵜ ⵏⵙⴻⵏ.

9 ⵜⵉⵏⴻⴷⴷⴰⵎ ⵉ ⵉⵜⵜⵡⴰⵃⵓⵣⴻⵏ ⵉ ⴰⵢⵜ ⵏ ⵉⴼⵔⴰⵢⵉⵎ ⴰⵇⴰ ⴰⵜⴻⵏⵜ ⴷⵉ ⵍⵡⴻⵙⵟ ⵏ ⵜⴻⵙⵖⴰⵔⵜ ⵏ ⵎⴰⵏⴰⵙⵙⴰ, ⵎⴰⵔⵔⴰ ⵜⵉⵏⴻⴷⴷⴰⵎ ⴰⴽ-ⴷ ⵍⴻⴷⵛⵓⵔ ⵏⵙⴻⵏⵜ. 10 ⵡⴰⵔ ⵓⵥⵥⵉⵍⴻⵏ ⵛⴰ ⵅ ⴰⵢⵜ ⵏ ⴽⴻⵏⵄⴰⵏ ⵏⵏⵉ ⵜⵓⵖⴰ ⵉⵣⴻⴷⴷⵖⴻⵏ ⴷⵉ ⵊⴰⵣⴰⵔ ⵣⵉ ⵜⴻⵙⵖⴰⵔⵜ ⵏⵙⴻⵏ. ⴰⵎⵎⵓ ⵣⴻⴷⴷⵖⴻⵏ ⵉⴽⴻⵏⵄⴰⵏⵉⵢⵢⴻⵏ ⵄⴰⴷ ⴷⵉ ⵍⵡⴻⵙⵟ ⵏ ⴰⵢⵜ ⵏ ⵉⴼⵔⴰⵢⵉⵎ ⴰⵍ ⴰⵙⵙ-ⴰ. ⵜᵉⵜⵜⵡⴰⴳⴳ ⵅⴰⵙⴻⵏ ⵎⴰⵛⴰ ⵍⵊⵉⵣⵢⴰ ⵏ ⵜⵙⴻⵅⵅⴰⵔⵜ.