72
1 ⵏ ⵙⵓⵍⵉⵎⴰⵏ.
ⴰ ⴰⵔⴻⴱⴱⵉ, ⴻⵡⵛ ⵉ ⵓⵊⴻⴵⵉⴷ
ⵎⴰⵃⴻⵏⴷ ⴰⴷ ⵉⵃⴽⴻⵎ ⵄⵍⴰⵃⵙⴰⴱ ⵍⵃⴻⵇⵇ ⵏⵏⴻⵛ,
ⵓ ⴻⵡⵛ ⵜⴰⵙⴻⴳⴷⴰ ⵏⵏⴻⵛ ⵉ ⵎⵎⵉⵙ ⵏ ⵓⵊⴻⴵⵉⴷ.
2 ⵅⴻⵏⵏⵉ ⵏⴻⵜⵜⴰ ⴰⴷ ⵉⵃⴰⴽⴻⵎ
ⵍⴳⴻⵏⵙ ⵏⵏⴻⵛ ⵙ ⵜⵙⴻⴳⴷⴰ,
ⵍⵎⵓⵙⴰⴽⵉⵏ ⵏⵏⴻⵛ ⵙ ⵍⵃⴻⵇⵇ.
3 ⵉⴷⵓⵔⴰⵔ ⴰⴷ ⵉⵡⵢⴻⵏ ⵍⴻⵀⵏⴰ ⵉ ⵍⴳⴻⵏⵙ,
ⵓⵍⴰ ⴷ ⵜⵉⵡⵔⵉⵔⵉⵏ ⵜⴰⵙⴻⴳⴷⴰ.
4 ⵏⴻⵜⵜⴰ ⴰⴷ ⵢⴰⵖ ⵜⴻⵙⵖⴰⵔⵜ
ⵏ ⵍⵎⵓⵙⴰⴽⵉⵏ ⵏ ⵍⴳⴻⵏⵙ,
ⴰⴷ ⵉⵙⵙⴻⵏⵊⴻⵎ ⵜⴰⵔⵡⴰ ⵏ ⵉⵎⴻⵣⵍⴰⴹ,
ⵓⵛⴰ ⴰⴷ ⵉⵍⴱⴻⵣ ⵡⴻⵏⵏⵉ ⵜⴻⵏ ⵉⵃⴻⵚⵚⴰⵔⴻⵏ.
5 ⵏⵉⵜⵏⵉ ⴰⴷ ⵣⵣⴰⵢⴻⴽ ⴳⴳⵯⴻⴷⴻⵏ
ⵎⵉⵏ ⵖⴰ ⵜⴻⴽⴽ ⵜⴼⵓⵛⵜ ⵜⴻⴵⴰ,
ⵓ ⵜⴰⵣⵉⵔⵉ ⴰⴷ ⵜⴻⵙⵙⵛⴻⵏ ⵓⴷⴻⵎ ⵏⵏⴻⵙ,
ⵣⵉ ⵊⵊⵉⵍ ⴰⵍ ⵊⵊⵉⵍ. ◘72:5 ⵉⵥⵀⴷ. 89:37, 38
6 ⵏⴻⵜⵜⴰ ⴰⴷ ⴷⴷ-ⵉⵀⵡⴰ ⵅ ⵉⵢⵢⴰⵔ
ⴰⵡⴰⵔⵏⵉ ⵉ ⵡⴻⵃⵜⴰⵛ,
ⴰⵎ ⵜⵉⵏⴻⵛⵏⴰⵛⵉⵏ ⵉ ⵉⵙⵙⴰⵔⴹⴰⴱⴻⵏ ⵜⴰⵎⵎⵓⵔⵜ. ◘72:6 2 ⵚⵎ. 23:4
7 ⴷⴻⴳ ⵡⵓⵙⵙⴰⵏ ⵏⵏⴻⵙ
ⴰⴷ ⵉⵏⵏⵓⵡⴰⵔ ⵓⵎⵙⴻⴳⴳⴻⴷ,
ⴰⴷ ⴷⵉⵏ ⵢⵉⵍⵉ ⵍⴻⵀⵏⴰ ⵉⴼⴻⵢⵢⴹⴻⵏ
ⴰⵍ ⵖⴰ ⵜⴰⴼⴻⴷ ⵜⴰⵣⵉⵔⵉ ⵡⴰⵔ ⵜⴻⴵⵉ ⵄⴰⴷ.
8 ⵏⴻⵜⵜⴰ ⴰⴷ ⵉⵃⴽⴻⵎ ⵣⵉ ⵍⴻⴱⵃⴰⵔ ⴰⵍ ⵍⴻⴱⵃⴰⵔ,
ⵣⴻⴳ ⵉⵖⵣⴰⵔ ⵏ ⵍⴼⵓⵔⴰⵟ
ⴰⵍ ⵜⵉⵏⴻⴳⴳⵓⵔⴰ ⵏ ⵜⴻⵎⵎⵓⵔⵜ.
9 ⵉⵎⴻⵣⴷⴰⵖ ⵏ ⵍⴻⵅⵍⴰ
ⴰⴷ ⵇⵇⵓⵏⵊⴻⵍⴻⵏ ⵣⵣⴰⵜⴻⵙ,
ⵎⴰⵛⴰ ⵍⵄⴻⴷⵢⴰⵏ ⵏⵏⴻⵙ ⴰⴷ ⵍⴻⵙⵃⴻⵏ ⵓⵛⴰⵍ.
10 ⵉⵊⴻⴵⵉⴷⴻⵏ ⵏ ⵜⴰⵔⵛⵉⵛ
ⴰⴷ ⴷⴷ-ⵉⵡⵢⴻⵏ ⵉⵛⵜ ⵏ ⵜⴻⵡⵀⵉⴱⵜ,
ⵉⵊⴻⴵⵉⴷⴻⵏ ⵏ ⵛⴰⴱⴰ ⴷ ⵙⴻⴱⴰ
ⴰⴷ ⴷⴷ-ⵇⴰⵔⵔⴱⴻⵏ ⵜⴰⵔⵣⴻⴼⵉⵏ.
11 ⵎⴰⵔⵔⴰ ⵉⵊⴻⴵⵉⴷⴻⵏ ⴰⴷ ⴰⵙ ⴰⴹⴰⵔⴻⵏ,
ⵎⴰⵔⵔⴰ ⵍⴻⴳⵏⵓⵙ ⴰⴷ ⴰⵙ ⵄⴻⴱⴷⴻⵏ.
12 ⵎⴰⵖⴰⵔ ⵏⴻⵜⵜⴰ ⴰⴷ ⵉⴼⴻⴽⴽ ⴰⵎⴻⵣⵍⵓⴹ,
ⵡⴻⵏⵏⵉ ⵖⴰⵔⴻⵙ ⵉⵜⵜⵍⴰⵖⴰⵏ,
ⵓⵍⴰ ⴷ ⵍⵎⴻⵙⴽⵉⵏ
ⴷ ⵡⴻⵏⵏⵉ ⵡⴰⵔ ⵖⴰⵔⴻⵙ ⴰⵎⵄⴰⵡⴻⵏ. ◘72:12 ⴰⵢⵓⴱ 29:12
13 ⵏⴻⵜⵜⴰ ⴰⴷ ⵉⵄⵜⴻⵇ ⴰⵎⴰⵔⵅⵓ ⴷ ⵓⵎⴻⵣⵍⵓⴹ,
ⵏⴻⵜⵜⴰ ⴰⴷ ⵉⵙⵙⴻⵏⵊⴻⵎ ⵍⴻⵄⵎⴰⵔ ⵏ ⵉⵎⴻⵣⵍⴰⴹ. ◼72:13 ⵍⴻⵄⵎⴰⵔ-ⵉⵅⵙ ⴰⴷ ⵢⵉⵏⵉ ‘ⵜⵓⴷⴰⵔⵜ’.
14 ⵏⴻⵜⵜⴰ ⴰⴷ ⵉⴼⴻⴽⴽ ⵍⴻⵄⵎⴰⵔ ⵏⵙⴻⵏ
ⵣⵉ ⴷⴷⴻⴵ ⴷ ⵍⵄⵓⵏⴼ,
ⵉⴷⴰⵎⵎⴻⵏ ⵏⵙⴻⵏ ⴰⴷ ⵙⴻⴽⴽⵡⴰⵏ ⴰⵟⵟⴰⵙ
ⴷⵉ ⵜⵉⵟⵟⴰⵡⵉⵏ ⵏⵏⴻⵙ.
15 ⵏⴻⵜⵜⴰ ⴰⴷ ⵉⴷⴷⴰⵔ!
ⵓ ⴰⴷ ⴰⵙ ⵉⵎⵎⴻⵡⵛ ⵡⵓⵔⴻⵖ ⵣⵉ ⵛⴰⴱⴰ.
ⵓ ⵏⵉⵜⵏⵉ ⴰⴷ ⵥⵥⴰⴵⴻⵏ ⵍⴻⴱⴷⴰ
ⴷⵉ ⵟⵟⵡⴻⵄ ⵏⵏⴻⵙ,
ⴰⵙⵙ ⵎⴰⵔⵔⴰ ⴰⴷ ⵜ ⴱⴰⵔⴽⴻⵏ.
16 ⴰⴷ ⵢⵉⵍⵉ ⵉⵊⵊ ⵏ ⵓⴼⴻⵢⵢⴻⴹ ⵏ ⵉⵎⴻⵏⴷⵉ
ⴷⵉ ⵜⴻⵎⵎⵓⵔⵜ
ⵅ ⵜⵇⵉⵛⵛⴰⵜ ⵏ ⵉⴷⵓⵔⴰⵔ,
ⵍⵖⵉⴵⴻⵜ ⵏⵏⴻⵙ ⴰⴷ ⵜⴻⵏⵀⴻⵣⵣ
ⴰⵎ ⵜⵛⴻⵊⵊⵓⵔⴰ ⵏ ⵍⵓⴱⵏⴰⵏ,
ⵓ ⵉⵏⵏⵉ ⵣⵉ ⵜⴻⵏⴷⵉⵏⵜ ⴰⴷ ⵏⵏⵓⵡⴰⵔⴻⵏ
ⴰⵎ ⴰⵖⴻⵎⵎⵓⵢ ⴰⵣⵉⵣⴰ ⴷⵉ ⵜⴻⵎⵎⵓⵔⵜ.
17 ⵉⵙⴻⵎ ⵏⵏⴻⵙ ⴰⴷ ⵉⵇⵇⵉⵎ ⵉ ⵍⴻⴱⴷⴰ,
ⵉⵍⵉ ⴰⴷ ⵉⵏⵏⵓⵡⴰⵔ ⵉⵙⴻⵎ ⵏⵏⴻⵙ
ⵣⵣⴰⵜ ⵉ ⵡⵓⴷⴻⵎ ⵏ ⵜⴼⵓⵛⵜ.
ⴰⴷ ⴷⴰⵢⴻⵙ ⵜⵜⵡⴰⴱⴰⵔⴽⴻⵏ ⵏⵉⵜⵏⵉ,
ⵎⴰⵔⵔⴰ ⵍⴻⴳⵏⵓⵙ ⴰⴷ ⵜ ⵙⵙⴻⵎⵖⴰⵔⴻⵏ.
18 ⴰⴷ ⵉⵜⵜⵡⴰⴱⴰⵔⴻⴽ ⵙⵉⴷⵉ ⴰⵔⴻⴱⴱⵉ,
ⴰⵔⴻⴱⴱⵉ ⵏ ⵉⵙⵔⴰⵉⵍ.
ⵏⴻⵜⵜⴰ ⵉⵜⵜⴻⴳⴳ ⵍⵎⵓⵄⵊⵉⵣⴰⵜ, ⵏⴻⵜⵜⴰ ⵡⴰⵀⴰ.
19 ⴰⴷ ⵉⵜⵜⵡⴰⴱⴰⵔⴻⴽ
ⵉⵙⴻⵎ ⵏ ⵓⵄⵓⴵⵉ ⵏⵏⴻⵙ ⵉ ⵍⴻⴱⴷⴰ.
ⴰⴷ ⵜᵉⵜⵜⵡⴰⵛⵛⵓⵔ ⵎⴰⵔⵔⴰ ⵜⴰⵎⵎⵓⵔⵜ
ⵙ ⵓⵄⵓⴵⵉ ⵏⵏⴻⵙ. ⴰⵎⵉⵏ, ⵡⴰⵀ, ⴰⵎⵉⵏ.
20 ⵜⵉⵥⵉⴵⴰⵜⵉⵏ ⵏ ⴷⴰⵡⵓⴷ, ⵎⵎⵉⵙ ⵏ ⵢⴰⵙⵙⴰ, ⴰⵇⴰ ⴽⴻⵎⵎⵍⴻⵏⵜ.
◘72:5 72:5 ⵉⵥⵀⴷ. 89:37, 38
◘72:6 72:6 2 ⵚⵎ. 23:4
◘72:12 72:12 ⴰⵢⵓⴱ 29:12
◼72:13 72:13 ⵍⴻⵄⵎⴰⵔ-ⵉⵅⵙ ⴰⴷ ⵢⵉⵏⵉ ‘ⵜⵓⴷⴰⵔⵜ’.