1 Акор Ісус розвакєрдя ленґє єкг вакєрібе пал ода, со кампел міндик те модліненпес і те на мукєн тейле о васта:

2 — Андро єкг фоврос есас судзас, саво Девлестар на даралас а ле манушендар на ладжялас. 3 Андро ода фоврос есас вдова, саві пгірелас кє лесте і вакєрелас: «Заач важ манде мійре врагостар». 4 Ов буталік на камелас, а паліш пгендя коркоро андре песте: «Хоч ме ле Девлестар на дарав, а ле манушендар на ладжяв, 5 та важ ода, кай кади вдова на дел манґє смійром, заачава важ лате, гой те преачел те пгірен кє манде, те мучінен ман».

6 І пгендя о Рай:

— Тумен шунен, со вакєрел када біпатівало судзас? 7 А о Дейл? На заачела важ одала, кас Ов кіндя аврі, саве вічінен кє Лесте дівесе те ратяга? Чі Ов буталік ужарела? 8 Пгенав туменґє, со Ов сіґ заачела важ ленде. Та кана авела о Ча Манушенґєро, чі аракгєла патябе пре пгув?

9 Одаленґє, ко есас бійзошно андро пескєро чачібен і дикгєнас тейле саворен манушен, Ісус розвакєрдя айсо вакєрібе:

10 — Дуй мануша авле андре храмос те модліненпес — єкг есас фарісєй, а дуйто ода, саво іскідел налогі. 11 Фарісєй тердьолас і модліндяпес важ песте авка: «Девла, палікєрав Тукє, кай ме на сом айсо, сар авер мануша: човраша, напатівале, одала, саве кєрен лубіпен, або сар када мануш, саво іскідел налогі. 12 Дувар про курко лікєрав о постос, а саворестар, со зародав, дав дештато». 13 А ода, саво іскіделас налогі, тердьолас пре сийра і даралас те вазден пескєре якга про нєбос, мареласпес андро колін і вакєрелас: «Девла, посаїн ман, бійношнес». 14 Пгенав туменґє, со чак када мануш ґейля кгєйре оправдіме, а на першо. Сако, ко ваздел пескє опре, дикгєна лес тейле, а ко дикгєлпес тейле, ода ейла ваздно опре.

15 Ко Ісус анде цікне чавен, гой Ов те тговел Пескєре васта пре ленде. Та кана дикгле сікаде када, на каменас лен те домукєн. 16 Акор Ісус вічіндя лен і пгендя:

— Мукєн ле чавен, мі авен кє Манде. На запріщінен ленґє те авен, бо Краліпе Девлескєро гіно ленґєро. 17 Чачібе вакєрав туменґє: ко на прелела Краліпе Девлескєро, сар о чаворо, на заджяла андре лесте.

18 Єкг ле пгуредер манушендар пгучля Лестар:

— Лачо танітов, со манґє те кєрен, гой те худав вечно джівіпе?

19 Ісус лескє пгендя:

— Соске ту вічінес Ман лачо? Ніко нане лачо, ча єкг о Дейл. 20 Ту джянес е заповіді: на кєр лубіпен, на мурдар, на човр, на свідчін начачібе, кам пескєре дадес те пескєра да.

21 Ов Лескє пгендя:

— Саворо акада ме долікєрав мійре терне бершендар.

22 Сар шундя када, Ісус пгендя лескє:

— Єкг тукє хібінел — саворо, со тут гін, бікєн і розде ле чоренґє, і ейла тут барваліпе про нєбос. Акор ав пал Манде.

23 Сар ов шундя саворо када, забаїндяпес, бо есас іґєн барвало. 24 Ісус дикгля, со ов забаїндяпес, і пгендя:

— Сар пгарес барваленґє те заджян андро Краліпе ле Девлескєро! 25 Ловкєдер верблюдоскє те преджян пріґ сувакєро кганоро, сар барвалескє те заджян андо Краліпе Девлескєро.

26 Одала, ко ода шунелас, пгучле:

— Акор ко шай ратинелпес?

27 Ісус ленґє отпгендя:

— Ода, со наший манушенґє, ода шай ле Девлескє.

28 Акор Петро пгендя:

— Дикг, саворо, со кє аменде есас, амен муклям і ґейлям пал Туте.

29 Ісус пгендя ленґє:

— Чачібе пгенав туменґє: сако, ко мукля пескєро кгєр, вай ромня, вай ле пгрален, вай ле даден, вай ле чавен важо Краліпе ле Девлескєро, 30 худела бутередер андре аді овра, а андро авер векос — вечно джівіпе.

31 Акор Ов вічіндя пескєре дешудуєн сікаден і пгендя ленґє:

— Канакє амен джяс андро Єрусалім, і обачелапес одя саворо, со гін пісіме пріґ пророка пало Ча ле Манушенґєро. 32 Ов ейла отдино манушенґє, саве на джянен ле Девлес. Оне асана Лес аврі, джюнґлярена Лес і чунґаркєрена пре Лесте, 33 а пало марібе ле чупняга мурдарена Лес, та про тріто дівес Ов джівдісальола.

34 Сікаде ніч одалестар на ахаліле, бо када лав есас запганло лендар, і оне на джяненас, пал состе джялас вакєрібе.

35 Кана Ісус авелас пашедер ко Єріхон, єкг коро мануш бешелас пажо дром і манґєлас о лове. 36 Сар шундя, со паж лесте преджял нийпос, пгучля лендар:

— Со пес обачіля?

37 Лескє пгенде:

— Ісус андал Назарет преджял.

38 Акор о коро завріскіндя:

— Ісус, о Ча ле Давідоскєро, посаїн ман!

39 А одала, саве джянас анґлал, кєздинде те вакєрен лескє, гой ов те ціхісальол, та о коро минґ федер вріскінелас:

— Ча Давідоскєро, посаїн ман!

40 Ісус терділя і пгендя:

— Анен лес кє Манде.

Кана ов подавля кє Лесте, Ісус пгучля лестар:

41 — Со ту камес, гой Ме тукє те кєрав?

А о коро Лескє пгендя:

— Раєя! Камав те дикгєн!

42 Ісус лескє пгендя:

— Пгутер о якга! Тийро патябе сасардя тут аврі!

43 Коро єкгваресте ачіля те дикгєн і ґейля пало Ісус, ле ашаріпнага ле Девлес. А саворо нийпос, саво дикгля када, ашарелас ле Девлес.