1 Андэ Кесария сас мануш, саво бучёлас Карнилий, баро опэр шэлэ манушэндэ, андар кагорти*Кагорти — адава дэшто котор э легионеско э римски армияко, андэ савятэ сас шовшэл салдатя., саво пхиравэл нав Италийский. 2 О Карнилий, сар ли алаи лэско кхер, сас мануш, саво керэлас лачипэ тай трашалас катар Дэл. Ов бут дагытиелас ловэ тай екхараи мангелас э Дэвлэс. 3 Екхвар десе паш ко трин сагатя э Карнилиески сас дикхипэ. Ов шужэс дикхелас э Дэвлэски миляикес, саво ало лэстэ тай пхэнляс:

— Карнилий!

4 Ов дикхляс карин лэстэ трашаса тай пхэнляс:

— Со, сагбуса?

О миляики пхэнляс:

— О Дэл тюшунды тутар, вай то мангипэ тай ярдыми э чёрэнги ваздиндилэ Лэстэ. 5 Бичял манушэн андэ Яффа, тэ дэн икос он э Симонэс, савэски пхэнэн Пётар. 6 Ов тэрдило ки моря андэ кхер ко Симон, саво керэлас бути э моркхяса.

7 Кана о миляики, кай зборисаило лэса, гело, о Карнилий диняс икос дон пэ иргатен тай лаче салдатес, саво керэлас лэски иргатлыки. 8 Ов пхукавдяс лэнги алаи тай бичялдяс лэн андэ Яффа.

9 Десе авэр дес, кана о бичялдэ пашонас ки диз, паш ко дэшудуй сагатя о Пётар ваздиняспэс опэр кхер тэ мангел э Дэвлэс. 10 Ов сас бокхало тай мангелас тэ хал. Бискай тавэнас хапэ, э Пётарэски сас дикхипэ. 11 Ов дикхелас пхутэрдэ булутя тай сар бугло басмас, саво фулелас опэр пху, пханло штарэ четендар. 12 Андэ адалэ басмастэ сас бут штарэчянгенги гайваня тай одола, савэ балакадиен, тай чирикля. 13 Дэчи сэси пхэнляс лэски:

— Ущи, Пётар, чин тай ха.

14 — На, Сагбуса! — пхэнляс о Пётар. — Мэ дага на халём ништо гарами я нашужо.

15 Дэчи о сэси пхэнляс лэски дуйто рази:

— Ма пхэн гарами одолэски, со о Дэл шужардяс.

16 Аякха сас тривал, тай одова сагати о басмас сас ваздино опрэ.

17 О Пётар ништо на галёлас, со галярэл адава дикхипэ, кана о мануша, бичялдэ э Карнилиеса, пхучлэ катар кхер ки Симонэско, пашылэ тай тэрдилэ ки бар. 18 Он лилэ тэ пхучен, атхэ тэрдило о Симон, кай бучёл Пётар. 19 О Пётар дага тюшундиелас катар дикхипэ, кана о Духос пхэнляс лэски:

— Тут родэн трин мануша. 20 Ущи тай фули тэлэ. Джя лэнца би сидимаско, вай адава Мэ бичялдём лэн.

21 О Пётар фулистино тэлэ тай пхэнляс адалэ манушэнги:

— Мэ одова, савэс тумэ родэн. Со дилаки тумэ алянус?

22 Он пхэнлэ:

— О баро опэр шэлэ салдатендэ о Карнилий, мануш чячё тай трашал катар Дэл, гиндо алаи э иудеенца, диндило катар шужо миляики збора тэ дэл икос тут андэ пэ кхерэстэ тай тэ шунэл, со ту лэски кан пхэнэс.

23 Дэчи о Пётар диняс икос лэн андэ кхер тай кердяс лэнги лачипэ.

Авэр дес о Пётар гело лэнца. Екхетханэ лэса гелэ аякха сарсавэ пхрала андар Яффа. 24 Авэр дес он алэ андэ Кесария. О Карнилий ишандиелас лэн, диняс икос пэ тухумен тай пашэ амалэн. 25 Кана о Пётар ало, о Карнилий дикхляс лэс, пэло лэски чянгендэ тай бангило лэски. 26 Ай о Пётар ваздиняс лэс, пхэнляс:

— Ущи, вай ли мэ мануш.

27 О Пётар зборизэлас э Карнилиеса тай ало андэ кхер, катэ кидинэпэс бут дюняс. 28 Ов пхэнляс лэнги:

— Тумэ сам джянэн, кай э иудеески на муклёл тэ зборизэл наиудеенца тай тэ авэс лэндэ андэ кхер. Ай о Дэл сикавдяс манги, кай мэ били екхе манушэски на камэл тэ пхэнав гарами я нашужо. 29 Оничин, кана пал мандэ алэ, мэ гелём би сидимаско. Мукен ман тэ пхучяв акана, соски тумэ бичялдянус пал мандэ?

30 О Карнилий пхэнляс:

— Штарто дес андэ адалэ вахытестэ, десе паш ко трин сагатя мэ мангавас э Дэвлэс андэ мэ кхерэстэ, сар бирдэн ангал мандэ уло мануш андэ шужэ парнэ савутя. 31 «Карнилий, — пхэнляс ов, — то мангипэ шунлило, тай о Дэл джянэл, кай ту керэс ярдыми э чёрэнги. 32 Бичял манушэн андэ Яффа пал Симон, савэски пхэнэн дага Пётар. Ов ки моря андэ кхер ко Симон, саво керэлас бути э моркхяса». 33 Мэ чяльти бичялдём пал тутэ, тай лачё, кай ту алян. Анкха алаи амэ атхэ, ангал Дэл, тай мангас тэ шунас одова, со о Сагбус диняс тут тэ пхэнэс.

34 О Пётар лиляс тэ пхэнэл:

— Акана мэ галяв, кай о Дэл чячес на дикхел карин муй ки манушэско, 35 тай андэ кажни дюнястэ Ов дэхэл одолэс, кон трашал Лэстар тай керэл чячипэ! 36 Ов бичялдяс э дюняски э Израилескерэски Лошано Габэри одолэстар, кай амэ овас лаче Лэса андар Исус Христос, Саво си о Сагбус алаи э манушэнго. 37 Тумэ джянэн одолэ дилэндар, савэ сас андэ алаи ки Иудея, ханик андэ Галилея, кана о Иоанн дэлас икос э манушэн тэ болэнпэс. 38 О Дэл макхляс э Шужэ Духоса тай э зораса э Исусес андар Назарет, тай Ов пхирэлас, керэлас лаче дилэс тай аиндэрдиелас алаен, кон сас андэ зор ки Шэйтанески, вай Лэса сас о Дэл. 39 Амэ дикхлям алаи одова, со о Исус керэлас андэ пху ки иудеенги тай андэ Иерусалими. Лэс мудардэ, илдылар опэр каштуно хачи, 40 ай о Дэл ко трито дес дживиндярдяс Лэс тай диняс Лэс тэ сикавэлпэс э манушэнги — 41 на алаи э дюняски, ами буруни никалдэ э Дэвлэса э дикхимаренги, самким амэнги. Амэ хасас тай пиясас Лэса пал отхэ, сар Ов дживиндило андар мулэ. 42 Ов пхэнляс амэнги тэ сиклярас э манушэн тай тэ пхукавас одолэстар, кай Ов си тхэдо э Дэвлэса, тэ овэс Цындомари э дживиндэнги тай э мулэнги. 43 Лэстар пхукавэн алаи о прарокя тай пхэнэн, кай кажын пакяло андэ Лэстэ диндёл мукипэ бэзенго булуб Лэски навэски.

44 О Пётар дага пхэнэлас адава, кана опэр алаендэ, кай шунэнас лэско Габэри, фулистино о Шужо Духос. 45 О пакялэ иудея, савэнги кердэ абризания, савэ алэ э Пётарэса, сас шаштимэна, кай о башладипэ э Шужэ Духоско сас чёрдо ли опэр наиудея. 46 Он шунлэ, сар одола пхэнэнас опэр наджянлэ чиба тай махтадиенас э Дэвлэс. Дэчи о Пётар пхэнляс:

47 — Кон на кан мукел, тэ овэн болдэ панеса адала мануша, савэ диндилэ о Духос о Шужо аякха, сар амэ?

48 Тай ов пхэнляс лэнги, тэ лэн болдипэ андэ нав ки Исусеско Христоско. Дэчи о сагбудэс манглэ э Пётарэс тэ ачёл лэнца генэ набут деса.