1 Андар алаи ки вэшэски гайваня, савэн кердяс о Дэл о Яхвэ, алаендар ярамази сас о сап. Ов пхучляс ки джювли:

— Чячи о Дэл пхэнляс: «Ма хан нисавэ тэрэкестар андэ сади»?

2 Э джювли пхэнляс э сапэски:

— Амэнги муклёл тэ хас имиша опрал тэрэкя андэ сади. 3 Ай о Дэл пхэнляс : «Ма хан имиша опрал тэрэки, саво машкарэ ко сади, тай ма астарэн лэн, я кан мэрэн».

4 — На, тумэ на кан мэрэн, — пхэнляс о сап э джювляки. 5 — О Дэл джянэл, кана тумэ кан хан лэн, тумарэ якха кан пхутэрдён тай тумэ кан овэн, сар о Дэл*Я «кан овэн, сар дэла». , саво джянэл о лачипэ тай о джюнгалипэ.

6 Дэчи э джювли дикхляс, кай о имишы э тэрэкеско сас лачё тэ хас тай шукар тэ дикхес, тай сас мангемаско, вай дэл годявэрипэ. Ой лиляс екх андар имиша тай халяс. Ой диняс имишы ли пэ ромэс, саво сас ласа, тай ов халас лэс. 7 Лэнги якха пхутэрдилэ, тай он галилэ, кай нанге. Дэчи он сивдэ пэски савутя опэр шалоя катар патря ки инжырески.

8 Бэлвэле пхудэлас балвалёри, сар шылоро. Он шунлэ, сар о Дэл о Яхвэ пхерэл андэ сади. О Адам тай лэски ромни гаравдэпэс катар Дэл Яхвэ машкарэ ко тэрэкя андэ сади. 9 О Дэл о Яхвэ пхэнляс э Адамески:

— Кай сан?

10 О Адам пхэнляс:

— Мэ шунлём Тут андэ сади, трашанилём, вай мэ нанго, тай гаравдёман.

11 О Дэл о Яхвэ пхучляс:

— Кон пхэнляс туки, кай ту нанго? Ту халян имиша катар тэрэки, савэстар Мэ динём тхэдипэ тэ на хас?

12 О Адам пхэнляс:

— Э джювли, савя Ту динян ман, тэ овэл ой манца, — адава ой диняс ман о имишы одолэ тэрэкестар, тай мэ халём лэс.

13 Дэчи о Дэл о Яхвэ пхэнляс э джювляки:

— Со ту кердян?

Э джювли пхэнляс:

— О сап хохавдяс ман, аки мэ тай халём.

14 Дэчи о Дэл о Яхвэ пхэнляс э сапэски:

— Андар одолэстэ, кай ту адава кердян, дино ту арман машкарэ алаи ки вэшэски тай кхерутнэ гайваня! Ту кан балакадиес опэр пэр, ту кан хас о прахос алаи о деса тэ бэшымаски.

15 Мэ кан керав душманлыки машкарэ тутэ тай ки джювли тай машкарэ тэ пуёстэ тай лаки пуёстэ: ов кан марэл то шэро, ай ту кан дандэлэс лэски патум.

16 Ай э джювляки Ов пхэнляс:

— Мэ кан керав то насвалипэ пуёстэ пхаро: о пуя кан аракхлён тутэ андэ хурлуки. Ту кан мангес тэ овэс опэр тэ ромэстэ, ай ов кан овэл сагбус опэр тутэ.

17 Э Адамески Ов пхэнляс:

— Аякха кай ту шунлян э ромня тай халян о имишы опрал тэрэки, савэстар Мэ пхэнлёмас туки: «Ма ха лэстар», арман дини андар тутэ э пху: андэ пхари бути ту кан хас латар андэ алаи ко деса тэ бэшымаски. 18 Ой кан барярэл туки хлядя тай налаче чяря, тай ту кан хас ливадяки гива. 19 О манро кан казандиес пхарэс, бискай на кан джяс андэ пху, андар савятэ санас линдо. Вай ту — прахос, тай андэ прахос ту кан джяс.

20 О Адам тхэдяс пэ ромня Ева†Авг. евр. нав «Хавва» (Ева) си катар збора «хай» (бэшыпэ). , вай ой ули э дай алаи, кай бэшэн.

21 О Дэл о Яхвэ кердяс савутя катар моркхи тай урявдяс андэ лэндэ Адамес тай лэски ромня. 22 Дэчи о Дэл о Яхвэ пхэнляс:

— О мануш галило о лачипэ тай джюнгалипэ тай уло акана, сар екх андар Амэндэ. На камэл, ов тэ сидэл по васт тай тэ чинэл имишы ли опрал тэрэки ки бэшымаско, тэ хал лэс тай лиляс тэ бэшэл сальтя.

23 Тай о Дэл о Яхвэ кувды лэс андар сади Эдэм, тэ керэл ов бути опэр пху, андар савятэ сас линдо.

24 Ов кувды э манушэс тай тхэдяс ко вастоки ангал сади Эдэм херувимен‡Авг. евр. «херувим» — барэ андар миляикя, савэ керэн иргатлыки э Дэвлэски Яхвэски. тай о камас, кай марэл алаи о рига ягаса, тэ дикхен пал ко дром ко тэрэки ки бэшымаско.